Lʉʉka 14

ɄYesu ɨkʉnsosia ʉntamu pa kɨghono ɨkya Sabati

1Ɨkɨghono kɨmonga ɨkya Sabati, ʉYesu alyalʉtile kulia ɨkyakʉlia kʉ kaaja kwa mʉlongosi jʉmonga ʉghwa Vafalisayi. Ʉnsiki ye alɨ mula, aVafalisayi na vange vakava vikʉmwʉvɨla valole kɨno kyaivomba mʉ kɨghono ɨkya Sabati.

2Pavʉlongolo pa Yesu, pwealyale ʉmuunhu jʉmonga, jʉno alyale nɨ nhamu ɨja kʉfimba ʉmʼbɨlɨ. 3Pe ʉYesu akavaposia aVafalisayi na vavʉlanɨsi va ndaghɨlo akati, “Asi, indaghɨlo siitu sikʉtwɨtɨkɨsia kusosia avaanhu mʉ kɨghono ɨkya Sabati?” 4Aveene vakajika kɨmihe. ɄYesu akamwabasia ʉntamu jʉla, akansosia, akantavʉla alʉtaghe.

5Pe ʉYesu akavaposia akati, “Ghwe veeni pakate palyʉmue jʉno ʉmwanaake angaghwɨlɨle, nambe ɨngʼombe jaake jɨngaghwɨlɨle mʉ kɨtiimu ɨkɨghono ɨkya Sabati, naale isuvula mʉ kɨghono ɨkio?” 6Avaanhu vala, vakava vasila ɨlya kʉjova.

Ʉlʉjisio nʉ vʉkoola

7ɄYesu akava ilola avahesia vano valyaghongolilue pa lʉlio lʉla, vʉle vakasalʉlagha ifitengo ifya kʉvʉlongolo ifya voghopua. Pepano akavavʉʉla ɨkɨhwanɨkɨsio akati, 8“Pano ʉmuunhu akʉghongolile kʉ vʉtolani, ʉlekaghe pifikila pa fitengo ifya kʉvʉlongolo ifya voghopua. Nʉngavombaghe ʉluo, ʉlwakʉva pamo aghongolilue ʉmwoghopua ʉjʉnge kukila ʉve. 9Neke angiise jʉno avaghongolile ʉmue mweni, ɨkʉkʉvʉʉla iiti, ‘Mʉlekele ʉjʉ pano ghukalile.’ Apuo, kyaghuvona soni kyongo, pano ghuvʉʉka kulʉta kʉ fitengo ifya kʉnsana.

10“Looli, pano ʉghongolilue, ʉfikilaghe pa fitengo ifya kʉnsana, neke kyaikwisa jʉno akʉghongolile, akʉvʉlaghe kuuti, ‘Ghwe mmanyaani ghwango, ghwise ghukale pavʉlongolo apa.’ Apuo pe kyavuvoneka ʉvʉvaha vwako, pamaaso gha vaghongolua vooni. 11Ʉlwakʉva, ʉmuunhu ghweni jʉno ikughinia, ʉNgʉlʉve alamwisia. Neke ʉmuunhu jʉno ikujisia, ʉNgʉlʉve alamʉghinia.”

12Apuo, ʉYesu akamʼbʉʉla jʉno amʉghongolile akati, “Pano ʉkʉvalɨngʼhanɨkɨsia avaanhu ʉlʉlio ʉlwa pamwisi nambe pakɨvwilile, ʉlekaghe pikʉvakemeela avamanyaani vaako, nambe avanyalʉkolo vaako, nambe avaanhu ava kɨsina kyako, nambe avabadɨngʼhani vaako avamofu, kuuti voope valakʉghongoola mʉlwa kʉkʉhomba lʉno ʉkavavombiile. 13Looli, pano ghulɨngʼhania ʉlʉlio, ʉvakemelaghe avakotofu, avalema, na vabofu. 14Apuo pepano ghuuva nʉ lufuunyo, ʉlwakʉva avuo vasila kɨmonga ɨkya kʉkʉhomba. Neke ʉNgʉlʉve ghwe jʉno ilikʉkʉhomba, pano alaava isyʉsia avagholofu.”

Avaanhu vano vakemelilue kʉ vʉtolani

(Mataayi 22:1-10)

15Ye valɨ pa lʉlio, ʉmʉghongolua jʉmonga ye apʉliike amasio gha Yesu, akamʼbʉʉla akati, “Inomile, ʉmuunhu jʉno ililia ʉlʉlio mʉ Vʉtwa vwa Ngʉlʉve!” 16ɄYesu akamwamʉla mʉ kɨhwanɨkɨsio akati, “Kwealyale ʉmuunhu jʉmonga, jʉno alyalɨngʼhanisie ʉlʉlio ʉlʉvaha, akavakemeela avaanhu vinga. 17Ʉnsiki ʉghwa lʉlio ye ghʉfikile, akasuungʼha ʉmʼbombi ghwake kʉ vano alyavaghongolile, kuuti avavʉʉle ndɨɨkɨ, ‘Mwisaghe! Ifiinu fyoni filɨngʼhanɨsivue!’

18“Neke vooni vano valyaghongolilue vakati navilʉta. Ʉghwa kwanda akati, ‘Nɨghʉlile ʉmʉghʉnda, nilondua nɨlʉte kulola. Lɨno ʉmhyanɨle, nanikwisa.’ 19Ʉghwa vʉvɨlɨ akati, ‘Nɨghʉlile ingʼombe kɨjigho isa kʉlɨmɨla, nilʉta kʉkʉsighesia. Ʉmhyanɨle nanikwisa.’ 20Ghwope ʉghwa vʉtatu akati, ‘Nanga natoola ʉnʼdala, lɨno nanɨngiise.’

21“Ʉmʼbombi jʉla akagomoka, akampangɨla sooni ʉntwa ghwake. Pe ʉntwa jʉla akakalala, akamʼbʉʉla ʉmʼbombi ghwake akati, ‘Lʉtagha ngʼhaningʼhaani mʉ nsevo na mʉ sɨla isingi mʉ lɨkaaja ɨlɨ, ʉvaleete apa avakotofu, avalema na vabofu.’

22“Pambele, ʉmʼbombi jʉla akagomoka, akamʼbʉʉla akati, ‘Ntwa, sino ʉveele ʉndaghiile nɨvombile. Neke lɨno, ʉvweleefu vʉjiighe.’

23“Ʉntwa akamʼbʉʉla ʉmʼbombi jʉla akati, ‘Lɨno, ʉlʉte kʉnji kʉ lɨkaaja, mʉ masevo na mʉ sɨla sino silʉta mʉ fikaaja ifidebe, na mʉ maghʉnda, ʉkavapelepesie avaanhu viise vingile mʉ nyumba jango, kuhanga vameme. 24Looli, nɨkʉvavʉʉla ʉmue kuuti, mʉ avuo vano nɨkavaghongolile ʉlʉtasi, nambe jʉmo naalalia ʉlʉlio lʉno nɨlɨngʼhanisie ʉne!’ ”

Kukutavʉla kʉkʉmʼbɨngɨlɨla ʉYesu

(Mataayi 10:37-38)

25ɄYesu akava ighenda palɨkɨmo nɨ lɨpʉgha ɨlɨvaha ɨlya vaanhu. Akasyetʉka, akavavʉʉla akati, 26“Ʉmuunhu jʉno ilonda kʉkʉmbɨngɨlɨla ʉne, ilondua kʉkʉngana ʉne kukila kʉkʉmʉghana ʉviise, ʉngʼina, ʉnʼdala ghwake, avaana vaake, na vanine na valʉmbʉ. Kange, ilondua kʉkʉngana ʉne kukila kʉkʉvʉghana ʉvwʉmi vwake. 27Ʉmuunhu ghweni itavʉlaghe kʉkʉmbɨngɨlɨla ʉne na kupumusivua, nambe kʉʉve kwe kʉfua. Nave naivomba ʉluo, naangave mʼbɨngɨlɨli ghwango.

28“Nɨlʉvʉlanie vʉnofu, nave jʉmonga mʉlyʉmue ilonda kujenga, kyaivomba kɨki taasi? Taasi, itala kusaagha ifiinu fyoni fino filondua kujengela. Pepano ikughela nave alɨ ni ndalama isa kʉkwɨla kumala kujenga. 29Kɨsila kʉvomba ʉluo, ndepoonu ijenga lʉ lwalo, neke ikunua kumalɨsia kujenga. Apuo avakilasɨla vooni vikʉmʼbedagha, 30vitisagha, ‘Ʉmuunhu ʉjʉ akatengwile kujenga, neke akunilue kumalɨsia!’

31“Nɨjove ɨkɨhwanɨkɨsio ɨkɨngɨ, tʉʉti avatwa vavɨlɨ vilonda pilua. Ʉghwa kwanda alɨ na valua lɨlʉgʉ imbilima kɨjigho veene, ʉjʉnge imbilima fijigho fivɨlɨ. Ʉghwa kwanda naangalʉte kulua, kɨsila kukala paasi na kusaagha kuuti, ndepoonu ilua na kʉkʉmʉlema, jʉno alɨ na valua lɨlʉgʉ imbilima fijigho fivɨlɨ? 32Angavone kuuti ikunua, isuungʼha ngʼhaningʼhaani avanjagɨla vaake, valʉte kwa ntwa ʉjʉnge jʉla pano ajiighe kʉtali, kuuti valeke kulua vavisaghe nʉ lʉtengaano.

33“Fye lʉlɨvuo na kʉlyʉmue, nakwale nambe jʉmo mʉlyʉmue jʉno anoghiile kuuva mʼbɨngɨlɨli ghwango, nave naafilekile fyoni fino alɨ nafyo.

Kuuva ndavʉle ʉmwinyo ʉnnono

(Mataayi 5:13; Malɨka 9:50)

34“Ʉmwinyo kɨɨnu kɨnono kulʉnga. Neke nave ghʉsʉpʉke lwoni, ndepoonu ghuvɨɨka kɨki kugomosia ʉlʉnoneesi? 35Ʉmwinyo ndavʉle ʉghuo, nsila mbombo kʉ lɨhanga, nambe kuuva fundila, looli ku kutaghua. Ʉnya kʉpʉlɨka, apʉlɨkaghe!”

Currently Selected:

Lʉʉka 14: wbi

Highlight

Copy