Yohani 20

Kusyʉka kwa Yesu

(Mataayi 28:1-8; Malɨka 16:1-8; Lʉʉka 24:1-12)

1Ye kuhenga, ɨkɨghono ɨkya kwasia mʉ mʉlʉngʉ, ʉMaliya ʉmhʉma mʉ lɨkaaja ɨlya Magidala akalʉta kʉ mbiipa. Ye afikile, akavona ɨlɨvue lɨno vadindila pa mʉlyango ghwa mbiipa, lɨvʉsivue. 2Pe akavʉʉka lʉvɨlo kulʉta kwa Simoni ʉPeteli na kwa mʼbʉlanɨsɨvua ʉjʉnge jʉno ʉYesu alyamʉghanile fiijo, akavavʉʉla akati, “Vamʼbʉsisie ʉMʉtwa mʉ mbiipa, natʉkagwile kʉno vamʼbɨkile!” 3Pe ʉPeteli palɨkɨmo nʉ mʼbʉlanɨsɨvua ʉjʉnge jʉla, vakavʉʉka, vilʉta kʉ mbiipa. 4Vooni ve vavɨɨlɨ vakavʉʉka lʉvɨlo, neke ʉmʼbʉlanɨsɨvua ʉjʉnge jʉla, akakɨmbɨla fiijo kukila ʉPeteli, akatala kufika kʉ mbiipa. 5Akinama, akahʉngɨɨla mʉ mbiipa, akaghavona gha menda amapala ghano vansyɨlɨla, neke naalingiile mʉnkate.

6ɄSimoni ʉPeteli ye afikile pala, akingila mʉ mbiipa akaghavona amenda ghala, 7nɨ kɨtambala kɨno valyampinyile ʉYesu kʉ mutu. Ɨkɨtambala ɨkio nakɨlyale palɨkɨmo na menda aghange, looli ɨkyene kɨlyale palʉbale kɨniengilue. 8Pe ʉmʼbʉlanɨsɨvua ʉjʉnge jʉla, jʉno alyatalile pifika pala, ghwope akingila mʉ mbiipa, akalola, akɨtɨka kuuti ʉYesu asyʉkile. 9Ʉlwakʉva ye lʉkyale kuvombeka ʉlʉ, navalyaghatangʼhinie aMalembe aMɨmɨke ghano ghiiti ʉYesu isyʉka kuhʉma kʉ vafue. 10Pe avavʉlanɨsɨvua vala, vakagomoka kʉno vakikalagha.

ɄYesu ikuhʉfia kwa Maliya ʉmhʉma kʉ lɨkaaja ɨlya Magidala

(Mataayi 28:9-10; Malɨka 16:9-11)

11Neke ʉnsiki ʉghuo ʉMaliya ʉghwa kʉ Magidala alyɨmile piipi nɨ mbiipa, ilɨla. Ye ajiighe ifilɨla akinama, akahʉngɨɨla mʉ mbiipa. 12Ye ihʉngɨɨla, akavaagha avanyamhola vavɨlɨ vafwalile amenda amapala, vikalile pano ghʉlyale ʉmʼbɨlɨ ghwa Yesu. Jʉmo alikalile ʉlʉbale ʉlwa kʉ mutu, ʉjʉnge ʉlwa kʉ maghʉlʉ. 13Avanyamhola vala vakamposia vakati, “Ghwe mama, ghulɨlɨla kɨki?” Akavamʉla akati, “Nilɨla ʉlwakʉva vamʼbʉsisie ʉMʉtwa ghwango, kange nanɨkagwile kʉno vamʼbɨkile.”

14ɄMaliya ye ajovile amasio aghuo, akasyetʉka kʉnsana, akamwagha ʉmuunhu ɨmile, neke naalyakagwile kuuti ghwe Yesu. 15ɄYesu akamposia akati, “Mama, ghulɨlɨla kɨki? Ghʉkʉmʉlonda veeni?” ɄMaliya akasaghagha kuuti ʉmuunhu ʉjuo ghwe mʼbombi mʉ mʉghʉnda ʉghuo. Akamʼbʉʉla akati, “Ntwa, nave veeve ʉmʼbʉsisie ʉMʉtwa, ʉmbʉʉle kʉno ʉmʼbɨkile, nɨntoole.” 16ɄYesu akati, “Maliya!” ɄMaliya akasyetʉka, akajova mʉ njovele ɨja Kɨebulania akati, “Laboni,” kwekʉti, “Mʼbʉlanɨsi.” 17ɄYesu akamʼbʉʉla akati, “Nʉngangʼholaghe, ʉlwakʉva nɨkyale kulʉta kʉkyanya kwa Nhaata. Looli lʉtagha kʉ vavʉlanɨsɨvua vango,#20:17 Vavʉlanɨsɨvua vango: Mʉ Kɨyunaani lɨlembilue, avanyalʉkolo vango. ʉvavʉʉle kuuti, nilʉta kʉkyanya kwa Nhaata ghwango, jʉno ghwe Nhaata ghwinu, kange Ngʉlʉve ghwango, jʉno ghwe Ngʉlʉve ghwinu.” 18ɄMaliya ʉmhʉma mʉ lɨkaaja ɨlya Magidala akalʉta kʉ vavʉlanɨsɨvua va Yesu, akavavʉʉla akati, “Ʉne nɨmwaghile ʉMʉtwa!” Pe akavavʉʉla sooni sino ʉYesu amʉlaghiile.

ɄYesu ikuhʉfia kʉ vavʉlanɨsɨvua vaake

(Mataayi 28:16-20; Malɨka 16:14-18; Lʉʉka 24:36-49)

19Pakɨvwilile ɨkɨghono ɨkya kwasia mʉ mʉlʉngʉ, avavʉlanɨsɨvua va Yesu valyakongʼhanile mʉ nyumba vidindiile, ʉlwakʉva valyale vikwoghopa avalongosi va Vayahudi. ɄYesu akiisa, akɨɨma pakate pa veene, akavavʉʉla akati, “Mʉvisaghe nʉ lʉtengaano!” 20Ye ajovile ʉluo, akavavonia amavoko ni mbafu saake. Avavʉlanɨsɨvua vaake ye vakagwile kuuti ghwe Mʉtwa ʉYesu, vakahovoka fiijo. 21ɄYesu akavavʉʉla kange akati, “Ʉlʉtengaano lʉvisaghe numue. Ndavʉle ʉNhaata vʉle alyasungʼhile ʉne, na jʉʉne nɨkʉvasuungʼha ʉmue.” 22Ye ajovile amasio aghuo, akavapulila ʉmwʉja ghwake akati, “Ʉpɨla ʉMhepo ʉMwɨmɨke. 23Avaanhu vooni vano mʉkʉvasaghɨla inyɨvi saave, ʉNgʉlʉve ɨkʉvasaghɨla; vano namʉkʉvasaghɨla inyɨvi saave, ʉNgʉlʉve naɨkʉvasaghɨla.”

ɄYesu ikuhʉfia kwa Tomasi

24Neke ʉTomasi jʉno akatambʉlwagha Mʉngʼhʉngʉ, ʉmo mʉ vavʉlanɨsɨvua kɨjigho na vavɨlɨ, napwealyale ʉYesu ye ikuhʉfia kʉ vavʉlanɨsɨvua avange. 25Avavʉlanɨsɨvua avange vala, vakamʼbʉʉla ʉTomasi vakati, “Ʉsue tʉmwaghile ʉMʉtwa.” Neke ʉmwene akavamʉla akati, “Ʉne nanɨngɨtɨke isio, nave nanɨfyaghile na kukwabasia nɨ kyove kyango ifivamba ifya masumale mʉ mavoko ghaake, na kukwabasia nʉ lʉvoko lwango ɨkɨvamba mʉ mbafu saake.”

26Ifighono lekelalʉbale ye fikilile, avavʉlanɨsɨvua va Yesu valyakongʼhanile kange mʉ nyumba jɨla, najʉ Tomasi mwealyale. Amalyango ghalyale madinde, ʉYesu akiisa kange, akɨɨma pakate pa veene akati, “Ʉlʉtengaano lʉvisaghe numue.” 27Pe akamʼbʉʉla ʉTomasi akati, “Tomasi, ghwise ghwabasie amavoko ghango nɨ kyove kyako, kange ghwabasie imbafu sango nʉ lʉvoko lwako. Ʉlekaghe piiva nsiiti kukwɨtɨka, looli ghwɨtɨkaghe.” 28ɄTomasi akamʉla akati, “Ʉve ʉlɨ Mʉtwa ghwango! Kange, ʉlɨ Ngʉlʉve ghwango!” 29ɄYesu akamʼbʉʉla akati, “Ghwɨtiike ʉlwakʉva ʉnyaghile! Vafunyilue vano vikwɨtɨka, kɨsila kʉnyaagha.”

Ʉvʉfumbue ʉvwa kʉlemba ɨkɨtabu ɨkɨ

30ɄYesu alyavombile ifidegho ifingi finga fino fihʉfia ifivalɨlo pamaaso gha vavʉlanɨsɨvua vaake fino nafilembilue mʉ kɨtabu ɨkɨ. 31Ifidegho ifi fino filembilue, filembilue neke mwɨtɨke kuuti, ʉYesu ghwe Kɨlɨsite, Mwana ghwa Ngʉlʉve, neke vwɨmɨla kʉkʉmwɨtɨka ʉmwene, mwʉpɨle ʉvwʉmi mʉ lɨtavua lyake.

Currently Selected:

Yohani 20: wbi

Highlight

Copy