Yohani 10

Ɨkɨhwanɨkɨsio ɨkya nʼdɨɨmi ʉnnofu

1ɄYesu akafijovagha akatisagha, “Kyangʼhaani nɨkʉvavʉʉla, ʉmuunhu jʉno ikwingila mʉ lʉvagha lwa ngʼholo kɨsila kʉkilila pa mʉlyango, neke ikilila pavʉnge, ʉjuo mhɨɨji kange mhɨjimʼbudi. 2Looli jʉno ikilila pa mʉlyango, ʉjuo ghwe nʼdɨɨmi ghwa ngʼholo. 3Ʉmʉloleleli ghwa lʉvagha ɨkʉnʼdindulila ʉmʉlyango, nasi ngʼholo sipʉlɨka ɨlɨsio ɨlya nʼdɨɨmi ʉjuo. Ghwope ɨkʉsikemeela ingʼholo saake nɨjɨngɨ nɨ lɨtavua lyake na kʉkʉsihʉmia kʉnji. 4Kyande asihʉmisie ingʼholo saake sooni, ʉmwene ilongola, iseene sikʉmʼbɨngɨlɨla, ʉlwakʉva silɨkagwile ɨlɨsio lyake. 5Ingʼholo nasingamʼbɨngɨlɨle nambe padebe ʉmuunhu ʉmhesia, ʉlwene sikʉnkɨmbɨla, ʉlwakʉva nasilɨmanyile ɨlɨsio lyake.” 6ɄYesu alyavavʉlile aVafalisayi ɨkɨhwanɨkɨsio ɨkɨ, neke aveene navalyasitangʼhinie sino ɨkʉvavʉʉla.

7Pe ʉYesu akavavʉʉla kange akati, “Kyangʼhaani nɨkʉvavʉʉla, ʉne neene mʉlyango ghwa lʉvagha pano sikwingilila ingʼholo. 8Avaanhu vooni vano valyatalile kʉlyʉne vano vivɨkagha vadɨɨmi va ngʼholo, valyale vahɨɨji kange vahɨjivabudi, nasi ngʼholo nasilyale sikʉvapʉlɨkɨsia. 9Ʉne neene mʉlyango, ʉmuunhu jʉno ikwingila kukilila ʉne, ipokua. Kukilila ʉne ikwingilagha na kuhʉma na kuuva nɨ kyakʉlia. 10Ʉmhɨɨji ikwisa nʉ vʉfumbue ʉvwa kʉhɨɨja, kubuda na kunangania. Ʉne nisile kuuti avaanhu vaave nʉ vwʉmi, ʉvwʉmi ʉvʉkwɨlanɨfu.

11“Ʉne nɨlɨ nʼdɨɨmi nnofu. Ʉnʼdɨɨmi ʉnnofu, ikutavʉla kufua vwɨmɨla ingʼholo saake. 12Ʉmuunhu jʉno idɨɨma ingʼholo vwɨmɨla ʉlʉhombo, ʉjuo nanʼdɨɨmi ghwa ngʼholo, kange ingʼholo nasaake, angavone ɨngʼhekeeva jikwisa, ikɨmbɨla na kʉkʉsileka ingʼholo seene. Pe ɨngʼhekeeva jikwalʉkɨla ingʼholo na kupalasania. 13Ʉmuunhu ʉjuo ikɨmbɨla, ʉlwakʉva ʉvʉfumbue vwake lwe lʉhombo, ingʼholo nakɨɨnu kwa mwene. 14Ʉne nɨlɨ nʼdɨɨmi nnofu. Ingʼholo sango nɨsikagwile, soope singʼhagwile, 15ndavʉle ʉNhaata vʉle angʼhagwile ʉne, na jʉʉne vʉle nɨnkagwile ʉmwene. Ʉne nikutavʉla kufua vwɨmɨla ingʼholo. 16Nɨlɨ ni ngʼholo isingi sino nasili mʉ lʉvagha ʉlʉ, soope isio nilondua kʉkʉsileeta, soope sikʉmhʉlɨkagha. Apuo kiiva kɨpʉgha kɨmo, nʉ nʼdɨɨmi jʉmo.

17“ɄNhaata anganile, ʉlwakʉva nitavwile kufua, neke nɨɨve mwʉmi kange. 18Nakwale ʉmuunhu jʉno ndepoonu ivʉsia ʉvwʉmi vwango. Ʉne nitavwile jʉʉne kufua. Ʉne nɨlɨ nʉ vʉtavʉlɨlua ʉvwa kʉvʉsia ʉvwʉmi vwango, kange nɨlɨ nʉ vʉtavʉlɨlua ʉvwa kʉvʉgomosia. Ʉluo lwe lʉno ʉNhaata ghwango andaghiile nɨvombe.”

19Amasio aghuo ghakapelela aVayahudi kulekengʼhana. 20Vinga mʉ veene vakati, “Ʉjʉ alɨ nɨ lɨpepo, kange apelwike. Lwakɨki kʉkʉmpʉlɨkɨsia?” 21Neke avange vakava vikaana viiti, “Amasio aghuo naghihʉma mwa muunhu ʉnya lɨpepo. Asi, ɨlɨpepo ndepoonu lɨkʉmpelela ʉmʼbofu amaaso kulola?”

AVayahudi vikʉnkaana ʉYesu

22Ʉnsiki ʉghwa kɨkulukulu ɨkya Vayahudi kukʉmbʉka kuvalasivua ɨnyumba ɨnyɨmɨke ɨja kufunyila kʉ Yelusalemu, ghʉkafika. Ʉnsiki ʉghuo ghʉlyale ghwa mhepo. 23ɄYesu alyale pa nyumba ɨnyɨmɨke ɨjio, ighendaghenda mʉ balaasa jɨno jɨkatambʉlwagha Lʉgono lwa Solomoni. 24Pe aVayahudi vamonga vakankongʼhanɨla, vakamʼbʉʉla vakati, “Ghʉkʉtʉvɨɨka mʉ nganighani ʉmpaka lɨɨghi? Nave veeve Kɨlɨsite, tʉvʉʉle pa vʉvalafu!”

25ɄYesu akavamʉla akati, “Ʉne nɨvavʉlile kuuti neene veeni, neke ʉmue namukwɨtɨka. Sino nivomba mʉ ngʉfu sa Nhaata, sikwoleka kuuti neene veeni. 26Neke ʉmue namukwɨtɨka, ʉlwakʉva namʉlɨ ngʼholo sango. 27Ingʼholo sango sipʉlɨka ɨlɨsio lyango, na jʉʉne nɨsikagwile, soope sikʉmbɨngɨlɨla. 28Nɨkʉsipeela ʉvwʉmi ʉvwa kʉvʉsila kʉsila, nasilasova lʉsiku. Kange, nakwale ʉmuunhu ʉghwa kʉsivʉsia mʉ mavoko ghango. 29ɄNhaata ghwango jʉno amheliile ingʼholo isio, mʼbaha kukila vooni, kange nakwale ʉmuunhu jʉno ndepoonu ɨkʉsivʉsia mʉ mavoko ghaake. 30Ʉne nʉ Nhaata tʉlɨ jʉmo.”

31AVayahudi ye vapʉliike isio, vakahola kange amavue kuuti vantove, vamʼbude. 32Neke ʉYesu akavavʉʉla akati, “Nɨvombile imbombo nyinga inofu pamaaso ghiinu. Imbombo isio nɨvombile mʉ ngʉfu sa Nhaata. Lɨno, mʉ sino nɨvombile, lʉlɨku lʉno lʉkʉvapelela kulonda kʉkʉnhova na mavue?” 33AVayahudi vakamwamʉla vakati, “Natulonda kʉkʉkʉtova na mavue vwɨmɨla imbombo inofu sino ʉvombile, ʉlwene tʉkʉkʉtova ʉlwakʉva ʉkʉmʉligha kyongo ʉNgʉlʉve. Ghukuvɨɨka ʉlɨ Ngʉlʉve napano ʉlɨ muunhu ndavʉle avaanhu avange!”

34ɄYesu akavamʉla akati, “Nalɨlembilue mʉ fitabu fiinu ifya ndaghɨlo kuuti, ʉNgʉlʉve alyatiile, ‘Ʉmue mʉlɨ mangʉlʉve’?#Sabuli 82:6 35ɄNgʉlʉve alyavatambwile ‘mangʉlʉve’ avaanhu vano valyapʉliike ɨlɨsio lyake, ʉsue tʉkagwile kuuti, aMalembe aMɨmɨke ifighono fyoni ghijova isa kyangʼhaani. 36Lɨno, lwandaani ʉmue mwiti nɨkʉmʉligha kyongo ʉNgʉlʉve, pano niiti, ‘Ʉne nɨlɨ Mwana ghwa Ngʉlʉve’? ɄNhaata ghwe jʉno anyɨmiike ʉne na kʉkʉsuungʼha mʉ ɨɨsi. 37Nave nanivomba imbombo isa Nhaata, namʉnganyɨtɨkaghe. 38Neke nave nivomba, nambe namʉkʉnyɨtɨka, mwɨtɨkaghe vwɨmɨla imbombo isio neke mʉkagʉle na kʉkʉlʉtangʼhania kuuti ʉNhaata alɨ mʉlyʉne, na jʉʉne nɨlɨ mwa Nhaata.” 39Pe aVayahudi vakava vilonda pikʉnkola kange, neke ʉYesu akavatyegha.

40ɄYesu akalʉta kange ɨmwambo ɨja kɨkogha ɨkya Yolidani, pano ʉYohani alyale ikwofugha avaanhu, akava ʉkuo ifighono fidebe. 41Ye alɨ ʉkuo, avaanhu vinga vakalʉta kwa mwene viiti, “ɄYohani naalyavombile nambe ɨkɨvalɨlo kɨmo, neke imhola sooni sino alyajovile vwɨmɨla ʉmuunhu ʉjʉ, sa kyangʼhaani.” 42Ʉkuo avaanhu vinga vakamwɨtɨka ʉYesu.

Currently Selected:

Yohani 10: wbi

Highlight

Copy