Mbombo sa Vasungʼhua 9

Kuvangʉka kwa Savʉli

(Mbombo sa Vasungʼhua 22:6-16; 26:12-18)

1Ʉnsiki ʉghuo, ʉSavʉli alyale ifikʉvoghofia avavɨngɨlɨli va Mʉtwa kuuti ɨkʉvabuda. Ɨkɨghono kɨmonga, akalʉta kwa ntekesi ʉmʼbaha, 2akasʉʉma ikalata isa kʉtwala kʉ valongosi va masinagogi mʉ lɨkaaja ɨlya Damesiki. Ikalata isio sikava sikʉmpeela ʉvʉtavʉlɨlua kuuti, angavaaghe avaanhu vano vivɨngɨlɨla ɨSɨla ɨja Mʉtwa ʉYesu,#9:2 ƗSɨla ɨja Mʉtwa ʉYesu, lɨlyale lɨtavua lya vano vakamʼbɨngɨlɨla ʉYesu Kɨlɨsite ni mbʉlanɨsio saake. Lijova vwɨmɨla ɨsɨla ɨja vʉpoki nambe ɨsɨla ɨja vwʉmi ʉvwa kʉvʉsila kʉsila. vaave vakɨnhaata nambe avakɨjʉʉva, avakʉngaghe na kʉkʉvatwala kʉ Yelusalemu.

3Pepano akavʉʉka ilʉta kʉ Damesiki. Ye alɨ piipi kufika, nakalɨngi ʉlʉmuli kuhʉma kʉkyanya lʉkammulika ʉmwene imbale sooni. 4Akaghua paasi, akapʉlɨka ɨlɨsio lɨkʉmʼbʉʉla liiti, “Savʉli, Savʉli, kɨki ʉkʉmhumusia?” 5Ghwope ʉSavʉli akaposia akati, “Ntwa, veeve veeni?” Ɨlɨsio lɨla lɨkamwamʉla lɨkati, “Ʉne neene Yesu ne jʉno ʉkʉmhumusia. 6Lɨno ɨma, ghwingile mʉ lɨkaaja ɨlio. Ʉmuo mwale ʉmuunhu jʉno kyaɨkʉkʉvʉʉla sino ʉnoghiile kuvomba.” 7Avaanhu vano vakava vikyʉla palɨkɨmo nʉ Savʉli vakɨɨma vasila ɨlya kʉjova, ʉlwakʉva vakapʉliike ɨlɨsio lɨla, neke navakamwagha ʉmuunhu jʉno ajovile. 8Pe ʉSavʉli akɨɨma, akadindula amaaso ghaake, napano amaaso ghaake ghakadindwike naakava ilola. Pepano avajaake vakankola ʉlʉvoko na kʉkʉmʉlongosia kuhanga kufika mʉ lɨkaaja ɨlya Damesiki. 9Ifighono fitatu akava nailola, nailia, nambe kunyua kɨmonga.

10Lɨno, kʉ Damesiki kʉla kwealyale ʉmʼbɨngɨlɨli ghwa Mʉtwa ʉYesu jʉno akatambʉlwagha Anania. ɄMʉtwa akamwisila mʉ nyivonelo akankemeela akati, “Anania!” ɄAnania akɨtɨka akati, “Mʉtwa, nɨlɨ apa.” 11ɄMʉtwa akamʼbʉʉla akati, “Ɨma, ʉlʉte mʉ nyumba ɨja Yuuda, jɨno jɨlɨ mʉ mpuulo ghʉno ghutambʉlua Mʉgholofu. Ʉngafike mula, ʉposie ʉmuunhu jʉno ihʉma mʉ lɨkaaja ɨlya Taliso, itambʉlua Savʉli. Ʉnsiki ʉghʉ alɨ pikufuunya, 12neke mʉ nyivonelo amʼbwene ʉmuunhu jʉno itambʉlua ghwe Anania, ikwingila na kuvɨɨka amavoko ghaake pa mwene kuuti alolaghe kange.” 13Pe ʉAnania akamʉla akati, “Ghwe Mʉtwa, nɨpʉliike kʉ vaanhu vinga vʉle ʉmuunhu ʉjuo avavombiile ʉvʉhosi vwinga avɨmɨke vaako kʉ Yelusalemu. 14Kange, isile apa nʉ vʉtavʉlɨlua kuhʉma kʉ vavaha va vatekesi kuuti, avakʉnge avaanhu vooni vano vikʉkwɨtɨka ʉve.” 15Neke ʉMʉtwa akamʼbʉʉla akati, “Ʉve lʉtagha! Ʉlwakʉva ʉmuunhu ʉjuo nɨnsalwile kuuva mʼbombi ghwango, kuuti apʉlɨsyaghe ɨlɨtavua lyango, kʉ Vaisilaeli, na kʉ vaanhu vano naVaisilaeli na kʉ vatwa vaave. 16Ʉne kyanɨkʉnsoona vʉle anoghiile kupumuka kyongo vwɨmɨla kupʉlɨsia imhola sango.”

17Pepano ʉAnania akalʉta, akingila mʉ nyumba jɨla, akavɨɨka amavoko ghaake pa Savʉli akati, “Nyalʉkolo ghwango Savʉli, ʉMʉtwa ʉYesu asungʼhile kʉlyʉve kuuti ʉlolaghe kange, na kʉkʉkʉsʉmɨla kuuti ghwʉpɨle ʉMhepo ʉMwɨmɨke. ɄYesu ʉjuo ghwe jʉno ihʉfia kʉlyʉve mʉ sɨla ye ghukwisa mʉ lɨkaaja ɨlɨ.” 18Nakalɨngi ifiinu fino hwene fibandu fikaghua kuhʉma mʉ maaso gha Savʉli, akatengʉla kulola kange. Akɨɨma, akofughua. 19Pepano akalia ɨkyakʉlia, ingʉfu saake sikanʼgomokela.

ɄSavʉli ipʉlɨsia kʉ Damesiki

ɄSavʉli akikala ifighono fidebe palɨkɨmo na vavɨngɨlɨli va Mʉtwa vano valyale mʉ Damesiki. 20Nakalɨngi akatengʉla kupʉlɨsia imhola isa Yesu mʉ masinagogi, iiti, ʉYesu ghwe Mwana ghwa Ngʉlʉve.#9:20 Mwana ghwa Ngʉlʉve: Ɨmba kʉ Vʉghanʉle vwa Masio aMahesia. 21Avaanhu vooni vano vakava vikʉmpʉlɨkɨsia, vakava videgha viiti, “Ʉmuunhu ʉjʉ naghwe jʉno avapumusyagha avaanhu vano vikʉmwɨtɨka ʉMʉtwa kʉ Yelusalemu? Kange, naakisile apa nʉ vʉfumbue ʉvwa kʉvakʉnga avaanhu avuo na kʉkʉvatwala kʉ vavaha va vatekesi?” 22Looli ʉSavʉli akafipʉlɨsyagha kɨsila vwoghofi. Vwɨmɨla aMalembe aMɨmɨke akavahʉfyagha aVayahudi ava mʉ Damesiki kuuti, ʉYesu ghwe Kɨlɨsite, neke aveene vakakunwagha isa kʉjova.

23Ye fikilile ifighono finga, aVayahudi avuo vakapʉlɨngʼhana kuuti vamʼbude ʉSavʉli. 24Vakava vikʉmwʉvɨla pakɨlo na pamwisi pa malyango agha kwingilila mʉ lɨkaaja ɨlio, kuuti pano kyaihʉma vamʼbude. Neke ʉSavʉli akapʉlɨka ɨmhola ɨjio. 25Pakɨlo, avavɨngɨlɨli vaake vakantoola, vakamʼbɨɨka mʉ kiivo kɨno kɨlyapinyilue ni ngoji. Pe vakamhʉmia kukilila pa lɨdiliisa lɨno lɨlyale mʉ lʉvʉmba lʉno lʉlyajengilue kusyʉta ɨlɨkaaja lɨla, vakamwisia paasi.

ɄSavʉli igomoka kʉ Yelusalemu

26Pambele ʉSavʉli akalʉta kʉ Yelusalemu. Ʉkuo akava ilonda kuuva palɨkɨmo na vavɨngɨlɨli avange ava Mʉtwa, neke vooni vakava vikʉmwoghopa, ʉlwakʉva navalyɨtiike kuuti, ghwope lweli mʼbɨngɨlɨli ghwa Mʉtwa. 27Pe ʉBalinaba akantoola ʉSavʉli, akantwala kʉ vasungʼhua va Yesu. Akavoleka vʉle ʉSavʉli akamʼbwene ʉMʉtwa ʉYesu mʉ sɨla, na vʉle ʉMʉtwa akajovile naghwo. Kange, akavoleka vʉle ʉSavʉli akapʉlisie imhola isa Yesu kɨsila vwoghofi, mʉ Damesiki. 28Pe ʉSavʉli akava ighenda palɨkɨmo na vasungʼhua mʉ lɨkaaja ɨlya Yelusalemu, ipʉlɨsia imhola isa Mʉtwa ʉYesu kɨsila vwoghofi. 29Akava ijova na kukanɨngʼhana na Vayahudi vano vakajovagha ɨnjovele ɨja Kɨyunaani, neke aveene vakalondagha ɨsɨla ɨja kʉmʼbudila. 30Avɨtɨki ye vakagwile isio, vakantoola ʉSavʉli, vakantwala kʉ lɨkaaja ɨlya Kaisalia, apuo pe vakamʉleka alʉtaghe kʉ lɨkaaja ɨlya Taliso.

31Ifighono fila, avaanhu mʉ fipʉgha ifya vɨtɨki vakava nʉ lʉtengaano imbale sooni isa mʉ kɨghavo ɨkya Yudea, ɨkya Galilaya nɨ kya Samalia. ɄMhepo ʉMwɨmɨke akava ɨkʉvapeela ingʉfu na kʉkʉvakangasia, pe vakava vifikʉmwɨmɨka ʉMʉtwa ʉYesu. Kange, avaanhu vakava vikwongelela mʉ fipʉgha ifya vɨtɨki.

ɄPeteli ɨkʉnsosia ʉAinea

32ɄPeteli alyale ighendela ifikaaja finga. Ɨkɨghono kɨmonga, akalʉta kʉkʉvaghendela avɨmɨke vano vikukala mʉ lɨkaaja ɨlya Lida. 33Ʉkuo akamwagha ʉmuunhu jʉmonga jʉno akatambʉlwagha Ainea. Ʉmuunhu ʉjuo alyale nɨ nhamu ɨja lɨteela, alyaghonile pa kɨteefu kɨsila kʉghenda amaaka lekelakwoni. 34Pe ʉPeteli akamʼbʉʉla akati, “Ainea, ʉYesu Kɨlɨsite akʉsosisie! Lɨno ɨma, ʉnienge ɨkɨteefu kyako.” Ʉnsiki ghʉghuo ʉAinea akɨɨma. 35Pambele avaanhu vano vakikalagha mʉ Lida na mʉ lʉvɨndɨ ʉlwa Saloni vakamwagha ʉAinea ighenda. Ye vasivwene isio, vakamwɨtɨka ʉMʉtwa ʉYesu.

ɄPeteli ɨkʉnsyʉsia ʉDolikasi

36Mʉ lɨkaaja ɨlɨngɨ lɨno lɨkatambʉlwagha Yopa, mwealyale ʉmʉkɨjʉʉva jʉno alyale mʼbɨngɨlɨli ghwa Yesu. Ʉmʉkɨjʉʉva ʉjʉ ɨlɨtavua lyake alyale ghwe Tabita, mʉ njovele ɨja Kɨyunaani vakantambʉlagha Dolikasi, kwekʉti swengu. Ʉmuunhu ʉjʉ alyale ɨkʉvatanga avakotofu na kuvomba imbombo isingi inofu.

37Mʉ fighono fila ʉDolikasi akatamua, pambele akafua. Pe avaanhu vakamwofugha, vakamʉghonia mʉ kyʉmba ɨkya kʉkyanya kʉ gholoofa. 38Ʉnsiki ʉghuo avavɨngɨlɨli va Yesu vakapʉlɨka kuuti ʉPeteli alɨ mʉ Lida, ʉlwakʉva ɨlɨkaaja ɨlɨ lɨlyale piipi nɨ lɨkaaja lyave ɨlya Yopa. Pe vakasuungʼha avaanhu vavɨlɨ kwa mwene vampelepesie vaati, “Sivuo ghwise kʉlyʉsue ngʼhaningʼhaani!”

39Pe ʉPeteli akavʉʉka ilʉta palɨkɨmo na veene. Ye afikile kʉ Yopa, vakantwala kʉ gholoofa mʉ kyʉmba kɨla. Ʉkuo avakɨjʉʉva vinga avafwɨle vakansyʉngʉtɨla ʉPeteli kʉmo vilɨla na kʉkʉmʼbonia isopeka na menda aghange ghano alyahonile ʉDolikasi ye mwʉmi. 40ɄPeteli akavavʉʉla vooni kuuti vahʉme kʉnji, akafughama, akifuunya. Pepano akaghʉsyetʉkɨla ʉmfimba ghʉla akati, “Tabita, sisimuka!” ɄTabita akadindula amaaso ghaake. Ye amwaghile ʉPeteli, akasisimuka, akikala. 41ɄPeteli akankola ʉlʉvoko, akamwɨmia. Pe akavakemeela avakɨjʉʉva vala avafwɨle na vɨtɨki avange, akavahʉfia ʉTabita kuuti mwʉmi. 42Ɨmhola ɨjio jɨkakwɨla mʉ lɨkaaja lyoni ɨlya Yopa, avaanhu vinga vakamwɨtɨka ʉMʉtwa ʉYesu. 43Pe ʉPeteli akikala pa Yopa ifighono finga, kwa muunhu jʉmonga jʉno akatambʉlwagha Simoni. Ʉmuunhu ʉjuo akatendagha ifiinu ifya ngʼhwembe.#9:43 Akatendagha ifiinu ifya ngʼhwembe: Kʉ Vayahudi ʉmuunhu jʉno akatendagha ifiinu ifya ngʼhwembe akavonekagha kuuti mʉlamafu, ʉlwakʉva akakolelagha ingʼhwembe isa fikanu fino fifwile fyene (Valeevi 11:39-40).

Currently Selected:

Mbombo sa Vasungʼhua 9: wbi

Highlight

Copy