Mataos 17

Yesʉs lé esiila nyʉl

(Markus 9.2-10; Lʉkas 9.28-36)

1Molu tobo, mé osi laa nɛʼɛ, Yesʉs ze nʉa Pyɛr bé e Jacques ndwe e ncyom we Yʉanes. Nye ze to e be é bwaʼbwaʼ ecwɨʼ. Bé a be gʉʼ ó bé ome. 2Nye ze siila nyʉl é mih mɔɔ. Nye a be ó, nye mu dɨ nyin guu mbi fih. Mpom we a be ó, nye mu dɨ pan mpʉ dobo; mɨkan myé mu é pumo-pumo, mpʉ mɨmbah mɨ dobo. 3Ngbaa le eka be nɛʼɛ, bʉʉ bʉrʉm oba ze nyin kunokuno e nye, bé e boo nɔɔ lé elɛɛla. Yé a be ó Moyiz bé e Élie. 4Pyɛr ze lɛɛ e Yesʉs ó: «Da, yé é laŋle mbɨa ó, bɨna diʼe ga wâ. ǃGo si mɛʼle nɛʼɛ, me ósa bɨn mompaʼ wâ, bɨsaʼ bɨlɛl: le yo, le yaa mo Moyiz ndwe e yaa mo Élie.»

5Mpʉ nye a be, nye dina lé elwib ɨ, dwine é nge-ngɨ-nge ze buuro be. Ompʉn, bé ka joʼo ó, nuu twii lé eduho é mɨnkur tʉŋlʉ, lé elɛɛ ó: «Nwaʼ, nye ó mwan kpɛl wam. Me ekʉ mɨɨla e nye. Joʼa ga nye.»

6Njoʼa ompʉn be, bé a joʼo lwib yaa ɛ, bé ntɔʼ bɨʼ mompom mɔɔ si é mih mo Yesʉs, ebe, bé a be ó si bul joʼo bʉa. 7Pie tɨ, Yesʉs ntɔʼ dihle nko bé a be e, ze pɨʼ be. Nye ó: «Mʉŋa ga si! Ajoʼo ga bʉa!» 8Cye e cye yaa, ompʉn ka bɨn mih nɛʼɛ, bé a kʉ ka bee ó njɨ Yesʉs nye ome.

9É jɔʼ bé a be, bé mu teme efulo ecwɨʼ ɨ, Yesʉs ze cyel be mpene ó: «Alɛɛ ga mʉr sa jehe bɨn bee e, to pyal é jɔʼ mɛm, Mwan mo Mʉr óbe si pàh é foo e!» 10No ó ompʉn be, bé a ze dî e nye ó: «Yé be no nɛʼɛ, ebe yé oyeʼle o motie bɛɛ lé elɛɛ ó, yé ókʉ be Élie é nere-nere ó, nye taara pyal ɨ?» 11Nye ntɔʼ bɨha e be ó: «Yé ó no! Yé ekʉ jala ó, Élie pyala, lé eze komlo bɨsa bibyɛh. 12No ó, me elɛɛ bɨn ó nɛɛ: Élie, nyi bɛa pyal! Sa gwar, bé a baadweʼe nye. Bé a si lɛʼle nye mbi cere wiwɛh bé a kpɛl lɛʼle nye e. Mpʉ yaa nteme ó Mwan mo Mʉr ósia e tuu é mobo mɔɔ ɛ.» 13Ompʉn be ntɔʼ joʼo ó, nye a lwib e be no ó, tiibe e Yʉanes Ndubʉr.

Yesʉs lé etiʼ mwan a sia e l'eleme e

(Markus 9.14-29; Lʉkas 9.37-43)

14É jɔʼ Yesʉs bé e l'ompʉn be, bé a be, bé mu lé ekunbo e gumo ntuntuma bʉr yé a bono e, nuu mʉr ntɔʼ ze, kur moboo si é mih mo Yesʉs. 15Nye e nye ó: «Da, jwɨʼɨ mwan wam nkoo, ebe, nye ó syoblʉ, lé esile bʉʼ. Nye esa-sa ó, duma é muro, nkʉ nteme é modibe. 16Me a si to e nye boo ompʉn bo. Sa gwar, bé a baakoʼo lé etiʼ nye.» 17Yesʉs ntɔʼ lɛɛ e be ó: «Bɨn ozyɛhozyɛh o bʉr o ndɨ akpɛl buʼla ɛ! Me kaʼ diibe é sama yin, to pyal é yáa jɔʼ? Me ódihbe bɨn, to fiʼ yáa gumo? Ntaʼ ga me e mwan nɨ wâ.» 18Bé ze ze e mwan. Yesʉs ntɔʼ bâm e l'eleme, lé ntɔʼ duho. Taare é jɔʼ gwar yaa, soho waa ntɔʼ tiʼe.

19Pie tɨ, ompʉn be, ze dihle nko Yesʉs a be e, bé mu bé ome. Bé ó: «Ebe yé bɨh baakoʼo lé edwih le e?» 20Nye ze bɨha e be ó: «Yé ó, ebe, buʼo yin ndɨ é twaʼbe. Me elɛɛ bɨn cyecye ó nɛɛ: ǃbɨn si be e ma peh buʼo titia, dam be bim boho nʉo nɛʼɛ, bɨn bé óbɛm kʉ lɛɛ e l'ecwɨʼ lɨʼ ó: “Nkɛŋɨ go mʉr tɨʼ wâ, to cyɛb ká,” yé nteme bana syɛɛ no. Abe e sa yé ógba bɨn mokɔbla tɨ. [21No ó, wiʼ mbi eleme, wé edwihɔ ó, bé osi pa ti mode ndwe le esa mɨnjwɨʼla.]»

Yesʉs lé ebal ompʉn be é lɔb efie le é jɔʼ mba

(Markus 9.30-32; Lʉkas 9.43-45)

22É jɔʼ bé a be, bé dina lé ekœʼ é lal Galɨle e, Yesʉs, nye e be ó: «Mwan mo Mʉr mu ó kunokuno le ekɛhɔ é mobo mo bʉr. 23Bé ójʉ nye. Nye òbula pàh é l'elu elɛl.»

Ompʉn be, bé ntɔʼ liʼ é gœʼra-gœʼra e mocyɛʼ mo nyʉl ebe ekan laa.

Yesʉs lé ejɛna tœa é l'efu e Mpah Zyɛm

24É jɔʼ Yesʉs bé e l'ompʉn be, bé a pyal nkana Kapernaʉm ɨ, onwɨa o tœa Mpah Zyɛm, bé a si ze nko Pyɛr a be e. Bé e nye ó: «Zê yeʼle win nyɛɛ, nye ákwoʼ jɛna tœa lé efu e Mpah Zyɛm ɛ?» 25Pyɛr, nye e be ó: «Ndɨ, nye ekʉ jɛna nye!» É jɔʼ Pyɛr a ni mbɛr ɨ, Yesʉs ze nʉa lwib. Nye e nye ó: «Simɔn, go ebee lɔb wiʼ nyá ɛ? Mɨnjwɨɨbʉr mɨ si nwa, myé epa kʉ dî tœa boo ozé? Zê boo mɨmbyɛla mɨ bwan be ɛ? Zê boo bʉr ofih ɛ?» 26Nye ze bɨha e nye ó: «Bé edî ó boo bʉr ofih.» Yesʉs ze lɛɛ e nye ó: «No, yé elɛʼle ó, mɨmbyɛla mɨ bwan be, bé mu ó bʉr o ndɨ é dia otî ɨ. 27No ó, bɨna bé agwɨm ga ekol be ebɔʼ bé óbɨm é mɨleme e. No ó, toʼ, to guho esyɛb é modibe maŋ. Fu efoʼ go ójʉ ɨ, go à bɛɛ nye nʉm. Go ókœb saŋ mɔn#17.27 Saŋ mɔn waa, wé a be ó é bwaʼbwaʼ. Wé a jala ó e bim tœa bʉr oba bé a jala le ejɛna ɛ. Wé a jala nteme ó, e mɔn syɛɛ mɨmoho mɨmba lobila ndɨ e nkul ebi ɨ. tɨ. Go à nʉa we, go òto jɛna bɨna e go bɨbɛh tœa lé efu e Mpah Zyɛm.»

Currently Selected:

Mataos 17: ozmBad

Highlight

Copy