Matthieu 8
8
Yésʉs lɨ́ etǐʼ nzɨ̂nzǎm
(Marc 1.40-45; Luc 5.12-16)
1Yésʉs nzě sulo lɨ́ ecwɨ̂ʼ, bé e bʉr, entúúnó-é-nkáá. 2Nó ó, nyʉ́ʉ́ mʉ̂r á be e nzǎm nyá, á sîhlě bǎʼ e né, bɨʼ mébóó sí, lɨ́ edwe nyé kûm. Nye e Yésʉs ó: «Dâ ɛ̌, gó kpɛ̂l nó, go óbɛ̌m tiʼ mê. Nyʉ̂l díʼee me ɨ́ deŋé.» 3Yésʉs ntɔ̂ʼ syɛ̂m mbô, nzě kúna e né. Nye e né ó: «Mɨ́ kam. Nyʉ̂l díʼee go ɨ́ deŋé!» Tyé e tyé yaá, nzǎm síe nyé ɨ́ nyʉ̂l! 4Yésʉs nzě lɛ́ɛ e né ó: «Alɛ́ɛ mʉ̂r lɔ̌b wɨ̂. Sâ gwár, tóʼ kwá opara. Tó lɛ̂ʼle bé nyʉ̂l. Go e dwé míndwéá Moyɨ̂z á boo cɛma tɨ̂ʼ ɨ́ metié mé mí, ndwéá gô nkʉ̂ lɛ̂ʼle bʉ̂r ó, gʉ́ tiʼe.»
Yésʉs lɨ́ etiʼ syɛ̂l mesâ me njwɨ́ɨ bisója
(Luc 7.1-10; Yʉánɛs 4.43-54)
5Jɔ̌ʼ Yésʉs á be lɨ́ enî Kapernáʉm yɨ́, nyʉ́ʉ́ kapitɛ̂n bisója bí Rôm nzě sîhlě bǎʼ e né. Nye ntɔ̂ʼ jɨʼla e né ó: 6«Dâ ɛ̌, syɛ̂l mesâ dí me mpʉ mwân nyá, nye ó mbʉ́mbʉ́ʼ, njáʼ sí ɨ́ mbɛ̌r. Ekpaa, lɨ́ ntaa nyé ɨ́ nkul.» 7Yésʉs nzě lɛ́ɛ e né ó: «Me ótó tiʼ nyê.» 8Kapitɛ̂n, nye e Yésʉs ó: «Dâ ɛ̌, mbǐ bébebébe mʉr mé dí wɨ́, yé ajala ó, go níʼeě mbɛ̌r wâm. Cɨʼeě njɨ ekǎn egwár, syɛ̂l mesâ wǎm tíʼaa. 9Mɛm, mé e bʉr o dí ejwɨ́ɨ mé bá. Mɛm ntémé, mé e bisója ɨ́ jwɨ́ɨ́ yâm. Mě jaá lɛ́ɛ e yɨ̂ʼ ó, njɨ: “Tóʼ!” yê tô. Me e yʉ́ʉ́ ó: “Ntáʼ!” yɨ́haá nze. Me kǎ lɛ́ɛ e syɛ̂l mesâ wǎm ó: “Sáʼ sɨ̂ʼ yɨ̂!” nye sâ.» 10Ejóʼǒ Yésʉs á jóʼo mekǎn maá yɨ́, nye ntɔ̂ʼ kâm. Nye e bʉr o b'á dû nye bá ó: «Mě lɛ́ɛ́ bɨ́n lɨ́ otyeetye ó, abe e nyʉ́ʉ́ mʉ̂r ngwár, damá jóʼo ɨ́ kúl bʉ̂r o b'Ɨ́zraɛ̂l, dí e mbǐ búʼó wɨ̂. 11Mě lɛ́ɛ́ bɨ́n lɨ́ otyeetye ó, bʉr ɨ́ buo buo, bé óduhǒ nko dʉ́o dí ejɨma le nko dʉ́o dí ejâ yɨ́. Bé onî ɨ́ Mpóʼo mé Dâ Nzyɛ̌m, ntɔ̂ʼ nʉa bídiá byɔ́ɔ́ ɨ́ dína, bé le Abraham, Isaac le Yákɔb. 12Minyɛ̂r mí Mpóʼo nyaá míɛ, myé ónzéŋlɔɔ̌ kʉ̌l lɨ́ edúrʉ́ʉ́, súm bé ójóno le epûʼlo médye yɨ́.» 13Yésʉs ntɔ̂ʼ lɛ́ɛ e kapitɛ̂n waá ó: «Tóʼ kwár nyǒ. Yé syɛ́yɨɨ mpʉ̌ búʼó yô pa kpɛl yɨ́.» Tyé e tyé yaá, syɛ̂l mesâ wé ntɔ̂ʼ tiʼe!
Yésʉs lɨ́ etiʼ mímbêl ɨ́ buo buo
(Marc 1.29-34; Luc 4.38-41)
14Píe tɨ̂, Yésʉs nzě tô mbɛ̌r mé Pétrus, tó kœb ó, tǐ mʉmá mé Pétrus á be ó njáʼ sí lɨ́ ejóʼo ékpaa, nyʉ̂l lɨ́ edúo ɨ́ bɨl bɨl. 15Nye nzě kúna e né ɨ́ mbô, medúo me nyʉ̂l ntɔ̂ʼ síe. Mʉmá waá ntɔ̂ʼ gbɔlwa sí, táare éséa e né.
16Ɨ́ bíí kʉ̌ʼ yaá, bʉr ntɔ̂ʼ nze e bʉr ɨ́ buo buo, baá méleme, mé á nzɨnzamra bá. Yésʉs nzě so méleme maá ndu e l'etiʼ ntémé mimbél mímyɛ̂h e lwǐb num. 17Nye á sâ nó ó, sá ngwíha milɔ̌b Ésayie á boo lɛ́ɛ yɨ́, yé díraa. Nye á cɛma ó:
“Nye á si tiʼ bʉr o bídyɛ̂m gá bíná,
pɛʼ mɨ́ná gá mitúú mékpaa ɨ́ menyʉ̂l.”
Mʉr jálá le edû Yésʉs nyá
(Luc 9.57-62)
18Mbeá Yésʉs á bee entumo e bʉ̂r lɨ́ ebɔma nyé ɨ́ nká yɨ́, nye nzě lɛ́ɛ ó, bé ntáŋaa mâŋ, tô ɨ́ lʉ́ʉ́ ébʉ̂m. 19Nó ó, nyʉ́ʉ́ lɛ̂ʼla metié á nze sîhlě gúmó nyé á be yɨ́. Nye e né ó: «Lɛ̂ʼla, me ódû gó gúmó yɨ́yɛ̂h gó ótô yɨ́.» 20Yésʉs nzě yala e né ó: «Ompɔ̌ʼ, bé ó e mekul. Binʉ̌n e mɔʼ. Sâ gwár, Mwân mé Mʉr, nyé abe e gúmó nyé kɛ́lɨɨ lʉ̂.» 21Nó nyʉ́ʉ́ mʉ̂r á be ntémé mpʉ́n wé nyá, á nze lɛ́ɛ e né ó: «Dâ ɛ̌, paá bîr ó, mɛm páa nyɛɛ́ tó dɨl sɔ́ŋ wǎm.» 22Yésʉs nzě yala e né ó: «Dúʼóó mê. Bírɨ́ɨ́ ódwe, bé dɨ́lɨɨ mimúú myɔ́ɔ́.»
Yésʉs lɨ́ enkáŋla e nkúo
(Marc 4.35-41; Luc 8.22-25)
23Yésʉs ntɔ̂ʼ kalwo ɨ́ byɛ̂l, ompʉ́n bé, bê nzě dû nyê. 24Abea nɛ́ɛ: nkúo nzě kwoolo ɨ́ mâŋ ɨ́ buo buo. Obóʼó ó mâŋ, wê nzě bére, byɛ̂l akǎ nyɨ̂n. Náǎ yé ó, Yésʉs ɨ́ jô. 25Ompʉ́n nzě sîhlě súm nyé á be yɨ́, ntɔ̂ʼ jɨmɔɔ nyé ɨ́ jô. Bé e né ó: «Dâ ɛ̌, tiʼɨɨ mɨ́ná gâ! Mɨná múo nzě dwe gá ó yɨ̂!» 26Jɔʼ yaá ó nyé á nze lɛ́ɛ e bé ó: «Bɨ̌n jóʼó bʉ́á mpʉ́nʉ̌ ɨ́ yé? Á twâʼwǒ búʼó yɨ́n ɛ̂!» Nye nzě mɔa sí, nkáŋla e nkúo le mâŋ. Sá yɨ́yɛ̂h nzě di ɨ́ puuu. 27Bʉr baá, bê nzě jóʼo ékɛ̂n ɨ́ buo buo. Bé ó: «Mʉr nyâ, nye wáǎ mbi, dí, nkúo e mâŋ, byé lɨ́ ebánǎ sâ nyé mejóʼo nyâʼ ɛ̌?»
Yésʉs lɨ́ eso méleme ɨ́ bʉrʉ̂m obá
(Marc 5.1-20; Luc 8.26-39)
28Jɔ̌ʼ Yésʉs á sulo lɨ́ ebʉ́m é kɔ́m nkɛ́ɛ́ ɨ́ sí Gadarɛ̂n yɨ́, bʉr obá nzě duhǒ pemé mésoo, tó bɔma e Yésʉs. Bé á be ó e meleme, mé á nzɨnzamra bé má. Mé á be ɨ́ buú nyan. Bʉr, bé á bé akǎ dûhwo écɨɨ̌ súm bé á be yɨ́. 29Bé ntɔ̂ʼ táare ébʉ̂ bítím. Bé e Yésʉs ó: «Gǒ sáá yé e bɨ̌h, Mwân mé Nzyɛ̌m? Gǒ nzě dwe bɨ́h bintɨ́ʼá ó, jɔʼ apǎ pyâl ɨ́?» 30Bá ncɛ́rá e sûm yaá, daa lé ónkʉ̌ ɨ́ buo buo, lé á be ó lɨ́ ede. 31Nó méleme maá, mé á jɨʼla e Yésʉs ó: «Yé bé gǒ sǒ ó bɨ̌h nó, tyenɨɨ bɨ́h yɨ́ɛ ɨ́ daa lé ónkʉ̌ lɨ̂.» 32Nó nyé á lɛ́ɛ e mé ó: «Tóʼ gâ!» Mé ntɔ̂ʼ duho ɨ́ menyʉ́l mé bʉ̂r obá baá, tó níŋɔɔ ɨ́ menyʉ́l mé ónkʉ̌. Mesaʼ metwɨrâ, daa lé ónkʉ̌ nzě buma e mikám, ntɔ̂ʼ tulwa ɨ́ mbéʼé écwɨ̂ʼ kʉ́, ntɔ̂ʼ lʉ́ŋa ɨ́ mâŋ, jɨ́bla, dwe.
33Opála bé ónkʉ̌ nzě kpɛ́ɛ, tóŋɔɔ̌ nkana, tó lɛ́ɛ̌ sá yɨ́yɛ̂h bé á bee yɨ́, le lɔ́ɔ ɨ́ lɔ̌b bʉ̂r o méleme mé á nzɨnzamra bá. 34Nó ó bʉ̂r ó nkana bɨ́bɛ̂h bé á nze dua, tó bɔma e Yésʉs yɨ́. Jɔʼ bé á bee nye yɨ́, bê nzě jɨʼla e né ó, nye pʉ́ʼaa ɨ́ sí yɔ́ɔ́, tô lɨ́ ejaa.
Currently Selected:
Matthieu 8: ozm
Highlight
Share
Copy
Want to have your highlights saved across all your devices? Sign up or sign in
