Matthieu 22

Kɨkɛna nzɔ́ɔ ebâ

1Yésʉs á be lɨ́ ebáʼǎ sâ bé bikɨkɛna. Nye ó:

2«Mpóʼo mé Dâ Nzyɛ̌m nwɨɨlá ó e nyʉ́ʉ́ njwɨ́ɨ á tyêl nzɔɔ ebâ lɨ́ esú é mwân wé nyá. 3Nye nzě lómo ósyɛ̂l o mésá bé ó, bé tôʼ jébe bʉ̂r o nyé á boo báŋle ɨ́ nzɔɔ nyaá bá. Bɨ́ɛ ntɔ̂ʼ bene énze. 4Nye nzě báʼǎ lómo bʉ́ʉ́ ósyɛ̂l o mésá bé. Nye ó: “Lɛ́yɨ́ɨ́ gá bʉr o mé á báŋle bá ó: mɨ́ sîl ékomlo nzɔ́ɔ. Mɨ́ tíʼe bíntœœ le otír o dí ɨ́ nwaʼwo bá. Sá yɨ́yɛ̂h mû ó kʉmsá. Ntáʼ gá ɨ́ nzɔɔ.” 5Bʉr o nyé á báŋle bá, pyéhɔɔ mpáŋla nyé nyaá, atóŋɔɔ. Bé á sɨsâ ó: nyâ, tô ɨ́ yé pemé; nyʉ́ʉ́, tô ɨ́ wé mbɛ̌r mpɛ́ma. 6Baá bʉ́ʉ́, mɛ́rɔɔ ósyɛ̂l o mésâ ónɨ̌, sáŋɔɔ bé cére, jʉ́ŋɔɔ. 7Lémé mé njwɨ́ɨ, wé ntɔ̂ʼ lóno ɨ́ nkpaa, nye nzě lómo bísója byé lɨ́ etó jʉ̂ ójʉ̂l o bʉ̂r baá le edîʼ nkana yɔ́ɔ́. 8Píe tɨ̂, nye nzě lɛ́ɛ le osyɛ̂l o mésá bé ó: “Nzɔɔ ebâ nyɨɛ, nye mû ó kʉmsá. Nó bʉr o mé á báŋle bá, bé ajala le edi tɨ̂. 9Nó, tyɛ́bɨ́ɨ́ gá ɨ́ meman. Bɨ̌n a báŋlé mʉ̂r nyɨnyɛ̂h bɨ́n ngá bɔma e né nyá. Nye bwálaa ɨ́ nzɔɔ ebâ nyǎm.” 10Osyɛ̂l o mésá bé ntɔ̂ʼ tô ɨ́ menzɨ̌ mɨ́mɛ̂h, tô le egôhlɔɔ bʉ̂r o bé á bʉbɔma e bé bá, le bibɨ́bla bi bʉ̂r le otîtyěl o bʉ̂r. Mbɛ̌r nzɔ́ɔ ebâ nzě lóno lɨ́ ojwóo ɨ́ lúrúdú.

11«Jɔʼ njwɨ́ɨ á nî mbɛ̌r yɨ́, nye nzě dwɛ̂ʼ ójwóó bé á be ɨ́ téble bá. Nyě kǎ bee ó, nyʉ́ʉ́ mʉ̂r abe e mikán mí nzɔ́ɔ ebâ ɨ́ nyʉ̂l. 12Nye nzě dî e né ó: “Só wǎm, yê nyá? Gua ka nzé wâ, abwâr yɨ́ɛ kán nzɔ́ɔ ebâ ɨ́ yé ɛ́?” Mʉr waá kâr éyalǎ sɔ̂ʼ. Nye á jaa di ó, njɨ ɨ́ jwɨ́m. 13Njwɨ́ɨbʉr nzě lɛ́ɛ le osyɛ̂l o mésá bé ó: “Káʼáá gá nye mebô e mekʉ̌. Bɨ̌n a gúhó nyé lɨ́ edúrʉ́ʉ́ dí kʉ̌l lɨ́, nko bʉ̂r, bé ójóno le epûʼlo médye yɨ́.”»

14Yésʉs nzě kɛl tɨ̂ʼ ó: «Ebě, baá o dí ebáŋlɔɔ bá, bé ɨ́ buo. Sâ gwár, baá o dí mitwárá bá, bé abuo.»

Mɔnɨ́ tœ́a mé Kɛ́ɛza

(Marc 12.13-17; Luc 20.20-26)

15OFarizyɛ̂n, bê nzě tó sáa pɨ̂ʼ ó, bé nkʉ̂ lâm nyé lâm dí ó, bé mɛ́rɨɨ nye ɨ́ lɔ̌b bíyalá byé. 16Bé ntɔ̂ʼ lómo bʉ́ʉ́ ómpʉ́n bɔ́ɔ́ nko nyé á be yɨ́, bé e bʉ́ʉ́ bʉ̂r o nkɔ́m mé Erôd. Nó ó bé á lɛ́ɛ e né ó: «Lɛ̂ʼla, bɨ̌h bɨ́ gʉ́a ó, gǒ lɛ́ɛ́ ó, otyeetye. Go ntémé, gǒ lɛ́ʼlé bɨ́h ó, nzɨ̌ mé Nzyɛ̌m lɨ́ otyeetye. Go ntémé, gó abe lɨ́ edwáawo bʉ̂r mempǒm. 17Lɛ́yɨ́ɨ́ bɨ́h jwɨʼ yô mpʉ yé dí yɨ́. Nzê metié gá mɨ́ná, mé kam ó, mɨná jánaa gá Kɛ́ɛza tœ́a ɛ̌? Nzê yê mpéné ó, mʉ̌r sá ajána nyé yǎ ɛ̌?»

18Náǎ yé ó, Yésʉs nyɨɛ lɨ́ egʉ́a míkóo myɔ́ɔ́. Nye ó: «Bɨ̌n bóbló mé ɨ́ yé, bɨ̌n baányâ-mikóo bâ? 19Lɛ́ʼláá gá me mɔnɨ́ bɨ́n dí ejánǎ tœ́a e tɨ̂ʼ yɨ́.» Bé ntɔ̂ʼ lɛ̂ʼle nyé nzǎŋ mɔnɨ́. 20Yésʉs ntɔ̂ʼ dî e bé ó: «Mpǒm mé nzé le díé mé nzé dí lúlá ɨ́ nzaŋ wɨ̂?» 21Bé e né ó: «Yé ó bisá mé Kɛ́ɛza.» Nye nzě lɛ́ɛ e bé ó: «Bwóóláá gá bé Kɛ́ɛza bisá mé Kɛ́ɛza; bɨ̌n e bwóóló Nzyɛ̌m byaá mé Nzyɛ̌m!» 22Mpʉ bé á jóʼo nye lɨ́ elɛ́ɛ nó yɨ́, bé ntɔ̂ʼ buú kâm nyê, líʼɔɔ nyê, tóŋɔɔ.

Lɛ́ʼlá ɨ́ lɔ̌b épah ɨ́ mesoo

(Marc 12.18-27; Luc 20.27-40)

23Ɨ́ dʉ́o egwár laá ntémé ó, óSadwisyɛ̂n, bʉr o dí elɛ́ɛ ó, odwe, bé ákóʼó pah ɨ́ mesoo bá, bé á tô kwá mé Yésʉs. Bê nzě tó dî e né ó:

24«Lɛ̂ʼla, Moyɨ̂z á si tyêl mɨná gá etié lɨ̂. Yê cɛmá ɨ́ Mekaná mé Nzyɛ̌m ó: “Mbɛ́á mʉ̂r óbe, sí dwe, alíʼe mwân nó, yé jala ó, mɨ́ɔɔ́ wé bâʼ mʉmá wé, bé e mʉmá waá nkʉ̂ byâ bwân lɨ́ esú é mɨ́ɔɔ́.” 25Tó kœb ó, yé á be bɨ̌h wâʼ ó e bʉ́ʉ́ bʉ̂r. Bé á byɛ̂l ɨ́ mo ngwár ó, nzaangbá, bʉrʉ̂m e bʉrʉ̂m. Medwéʼe nzě bâ mʉ́má. Di ɨ́ di di di, nye nzě dwe, alíʼe mwân sí. Mpʉ nyé á be abyâ yɨ́, nye ntɔ̂ʼ líʼe mʉ́má wé ɨ́ mebó mé mɨ́ɔɔ́ wé, waá á bɔma nye nyá. 26Syɛ́ɛla yaá pyâl ɨ́ waá mbá, le waá lɛ̂l, tó tôʼ, tó pyâl ɨ́ waá nzaangbá. 27Jɔʼ bɨ́bɛ̂h bé á be, bé mû sí dwe yɨ́, mʉmá waá ntémé nzě dwe. 28Nó dʉ́ó bʉ̂r ngá pah ɨ́ mesoo yɨ́, mʉmá waá ójóʼo e nzé lɨ́ bɨ́ɔɔ́ nzaangbá baá? Ebě, bɨ́bɛ̂h, bé á si bâ nye!»

29Yésʉs nzě yala e bé ó: «Bɨ̌n bê sí bɔ́ʼa le otyeetye, ebě, bɨ̌n bé agʉ́a Mékaná mé Nzyɛ̌m, agʉ́a ntémé nkul nyé. 30Ɨ́ jɔʼ bʉ̂r, bé ópah ɨ́ mesoo yɨ́, bé ákǎ bɛ́a. Bé ódidi ó mpʉ bééngeles dí eboó di ɨ́ jʉ́o kʉ́ yɨ́. 31Bɨ́n dí mé tíá ɨ́ nkǒ páʼ ódwe, le mpʉ bé ópah yɨ́ nó, bɨ̌n e gʉ́á ó, ntʉ ódwe dí edwě Nzyɛ̌m kûm. Yé ó njɨ bʉr o dí etiʼe bá. Nzê bɨ̌n á bé aláa ékǎn Nzyɛ̌m á cɨ tɨ̂ʼ lɨ́? 32Yê cɛmá tɨ̂ʼ ó: “Me ó Nzyɛ̌m, waá Abraham, Isaac, ndu e Yákɔb dí edwe kûm nyɔ́ɔ́ nyá.” Nzyɛ̌m, nyé abe waá odwe. Nye ó Nzyɛ̌m mikublakúbla mi bʉ̂r.» 33Entumo e bʉ̂r lé á be tɨ̂ʼ lɨ́, lê nzě buú kâm mílɛ́ʼlá Yésʉs á dwidwe bé mí.

Etié dí entaa métié mɨ́mɛ̂h lɨ́

(Marc 12.28-34; Luc 10.25-28)

34Jɔʼ óFarizyɛ̂n, bé á jóʼo ó, Yésʉs á si pɨr oSadwisyɛ̂n minum yɨ́, bé ntɔ̂ʼ sáa pɨ̂ʼ ɨ́ lɔ̌b wé. 35Mʉr ngwár ɨ́ sɔ́má yɔ́ɔ́ á be tîʼ milɔ̌b nyá, nzě bóblǒ Yésʉs. Nye e né ó:

36«Lɛ̂ʼla, ɨ́ metié gá mɨ́ná, láa étié dí elaa mʉ́ʉ́ ɨ́ medile?» 37Yésʉs nzě yala e né ó: «Etié e dí elaa mʉ́ʉ́ ɨ́ medile lɨ́, lé ó: “Kpɛlɨɨ̌ Dâ, dí Nzyɛ̌m gǒ nyá, le lémé gô wɨ́wɛ̂h, le sísǐm gô wɨ́wɛ̂h le pɨʼ nyǒ nyɨnyɛ̂h!” 38Lɨ́haá, lé ó dí esôʼ. Lé ntémé, lé ó etié e dí elaa mʉ́ʉ́ ɨ́ medile lɨ́. 39Nó laá émbá, bé e laá lé ésôʼ dile ó, jwɨʼ gwár. Lɨ́haá, lé ó: “Kpɛlɨɨ mɨ́ɔɔ́ gǒ mʉr mpʉ gó kpɛ́l gó mʉr tɨ̂ʼ yɨ́!” 40Metié mebá ménɨ̌, mé ó mpɔmá bisá Moyɨ̂z, bé le ogwíha o mílɔ̌b bé á cɛma bí.»

Mʉ̌r Nzyɛ̌m á lœm múló mé jwɨ́ɨ nyá, bé e David

41Mpʉ óFarizyɛ̂n, bé á be, bé dína sɔ́má gwár yɨ́, Yésʉs ntɔ̂ʼ dî bé tíá nyɨ̂ʼ ó:

42«Bɨ̌n pʉgʉ́ jwɨʼ nyá, dumo e Mʉ̌r Nzyɛ̌m á lœm múló mé jwɨ́ɨ nyá? Nye mwân mé nzé?» Bé ntɔ̂ʼ yala e né ó: «Nye ó Mwân mé David.» 43Yésʉs nzě lɛ́ɛ e bé ó: «David, nye mʉr tɨ̂, e nzɨ̌ Sísǐm mé Nzyɛ̌m, á jébe Mʉ̌r Nzyɛ̌m á lœm múló mé jwɨ́ɨ nyá ó, “Tî wǎm” ɨ́ yé? David á lɛ́ɛ ó: #22.43: Nye á cɛma nó ó, ɨ́ Sâm 110.1. 44Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee sí mebo mô yɨ́.”

45«Olɛ̂ʼla o métié jébé Mʉ̂r Nzyɛ̌m á lœm múló mé jwɨ́ɨ nyá ó: “Mwân mé David.” David nyɨɛ á jébe nye ó: “Tî wǎm”. Á bɨ̌n bɨɛ̌ kǎ lɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ó “Mwân mé David” e nyáa nzɨ́?»

46Mʉr á bé akǎ be e nkul eyala tíá nyé. Táare ɨ́ jɔʼ yaá, abe e mʉr á ka baʼa dî nye tíá ɨ́ gúú lɔ̌b, ebě, bé á bé akoʼo nyê.

Currently Selected:

Matthieu 22: ozm

Highlight

Copy