Matthieu 18
18
Nzé dí buú bwǎʼ dǐ?
(Marc 9.33-37; Luc 9.46-48)
1Tyé e tyé yaá, ompʉ́n bé nzě tóŋɔɔ̌ gúmó Yésʉs á be yɨ́, lɨ́ etó díŋɔɔ nyé tíá. Bé ó: «Nzé buú bwaʼ ósʉ́sʉ́ ɨ́ Mpóʼo mé Dâ Nzyɛ̌m?» 2Yésʉs nzě jébe mâ ntwǒm, tyêl nyé ɨ́ mpǒm nyɔ́ɔ́. Nye ó:
3«Mě lɛ́ɛ́ bɨ́n lɨ́ otyeetye ó, bɨ́n bé adwira, báʼǎ dǐ mpʉ bwá ó ntwǒm nó, bɨ̌n bé ákóʼó nî níʼée ɨ́ Mpóʼo mé Dâ Nzyɛ̌m. 4Mʉr nyɨnyɛ̂h ójɔr nyʉ̂l nyé, dǐ mpʉ mwân nyâʼ nyá ó ngá buú bě sʉ́sʉ́ mʉ̂r ɨ́ Mpóʼo mé Dâ Nzyɛ̌m. 5Mʉr nyɨnyɛ̂h ngá nʉǎ mbi mâ ntwǒm wɨ̂ʼ mbɨ̂mbɨá ɨ́ díé lâm nyá, nyě nʉá ó me mʉr tɨ̂.
6«Ɨ́ nkǒ páʼ bwán ó dí edyɛ̂ʼwo e me bá, mʉr nyɨnyɛ̂h ngá gbâ ébɔ̌ʼ lé óbɨma ngwár tɨ̂ʼ ɨ́ léme nyá, yé bá bě mbɨ̂mbɨá ɨ́ páʼ wé ó, bé tyéelaa nye nkǒʼ nɨ́nɨ́ɨ́ ɨ́ twíí, ntɔ̂ʼ guho nyé lɨ́ etǒʼ e mâŋ, ó nye jɨ́blaa, dwe. 7Nkoó, nyé e bʉr ó sí yɨ̂ʼ dí egbâ mébɔ̌ʼ mé óbɨma bʉ́ʉ́ bʉ̂r ɨ́ miléme ó, bé sâʼ misyóm má bá! Yê tyeetye ó, mebɔ̌ʼ me dí ebɨma bʉ̂r ɨ́ miléme má, mé abe e nkul edi, abe. Sâ gwár, nkoó nye ó e mbi mʉ̂r dí egbâ bʉ́ʉ́ bʉ̂r mǎ wɨ́!
8«Yé bé mbó gô ngwár, nkʉ̂ kʉ̌ gô, wé ó dí etíne gó ó, go sâʼ misyóm nó, tíʼáá wê. Go e gúhó wé lɨ́ ejaa, ebě, yé mbɨa ɨ́ páʼ gô ó, go díʼee le bidyɛ̂m nkʉ̂ e tîʼlǎ kʉ̌ tyé twiʼ, ntɔ̂ʼ dwe, kǎ tó beě twiʼ mpâ, laa ó, go díʼee e mebó mébá le mekʉ̌ mebá mô, go gúhɔɔ ɨ́ siʼe dí edúǒ kɔ́m ti e kɔ́m yɨ́. 9Yé bé díh lô ó dí etíne gó ó, go sâʼ misyóm nó, pɛʼɛɛ lê. Go e myáh lé ká ká lɨ́ ejaa, ebě, yé mbɨa ɨ́ páʼ gô ó, go díʼee le dîh egwár, tó beě twiʼ mpâ, laa ó, go díʼee e míh mébá mô, kǎ tó guhɔɔ ɨ́ bɨ́ siʼe.
10-11«Gwá di gá le ocwóó ó, bɨ̌n ayɨ́ pyêh mwân ngwár lɨ́ bwán bâ, ebě, mě lɛ́ɛ́ bɨ́n ó: beéngeles bɔ́ɔ́ dí kʉ́ bá, bé lɨ́ ebee ɨ́ tooobó mpǒm me Sɔ́ŋ wǎm dí ɨ́ jʉ́o kʉ́ nyá ɨ́ jɔʼ yɨ́yɛ̂h.»
Kɨkɛnǎ nteme, yé á be, yé mû sí dîm yɨ́
(Luc 15.3-6)
12«Bɨ̌n bé lɨ́ epahlě sá yɨ̂ʼ nyá? Yé bé mʉr, nyě e binteme nter, nteme gwár ntɔ̂ʼ dîm nó, nye ólíʼe bínteme mekám ebǔ le ebǔ lɨ́ ecwɨ̂ʼ kʉ́, ntɔ̂ʼ tó sáa yaá yé á dîm yɨ́. Yé abe nó? 13Mě lɛ́ɛ́ bɨ́n lɨ́ otyeetye ó, nyé óbe, nye mû sí bee yé nó, nye óbuú soho ɨ́ lɔ̌b nteme yaá, laǎ mpʉ nyé sóhaa ɨ́ lɔ̌b bínteme mekám ebǔ le ebǔ byé á be adîm bí yɨ́. 14Nó ntémé, gwɨ́má mé Sɔ́ŋ wɨ́n dí ɨ́ jʉ́o kʉ́ nyá, yé abe ó, nye dímlaa mwân ngwár ɨ́ bwán bé.»
Epɛʼ e bíbaa bí ébébe
15Yésʉs, nye e bé ó: «Mɨ́ɔɔ́ gǒ sí sâ syóm nó, tóʼ, tó sáa nyê. Go e lɛ́ʼlé nyé syóm waá, bɨ̌n e nɔ́ɔ́ obá. Nyé sí jóʼo gó nó, gʉ́ŋáá ó, gʉ́ pɛʼ mɨ́ɔɔ́ gǒ ɨ́ syóm. 16Nó nyé bé akǎ jóʼo gó nɛ́ɛ: go e nʉ́á mʉ̂r ngwár, nkʉ̂ obá, ebě, Lɔ̌b wɨ́wɛ̂h kʉ́ gwá gʉ́ŋɔɔ ó le oboʼlo obá, nkʉ̂ ntɔ̂ʼ olɛ̂l. 17Nyé sí bene lɨ́ ejóʼo bɨ́n le onɔ́ɔ́ nó, gó otô e né ɨ́ Mbɛ̌r-Nzyɛ̌m. Nyé sí báʼǎ bene lɨ́ ejóʼo bʉ̂r ó Mbɛ̌r-Nzyɛ̌m nó, nye sûʼlaa di ɨ́ míh mɨ́n mpʉ mʉ̂r bikûl, nkʉ̂ ó mpʉ nwɨ́a mɔnɨ́ tœ́a.
18«Mě lɛ́ɛ́ bɨ́n lɨ́ otyeetye ó, sá bɨ́n ngá kamle ɨ́ sí yɨ̂ʼ yɨ́, yé díʼee sâ gwár yé á pa kamlɔɔ kʉ́ yɨ́. Yaá bɨ́n ngá kam ɨ́ sí yɨ̂ʼ yɨ́, yé díʼee ntémé yaá Nzyɛ̌m á boo kam ɨ́ jʉ́o kʉ́ yɨ́.
19«Me lɨ́ ebáʼǎ lɛ́ɛ bɨ́n ó: bʉ̂r obá ɨ́ sɔ́má yɨ́n sí syɛŋa lɨ́ edî Sɔ́ŋ wǎm dí ɨ́ jʉ́o kʉ́ nyá sɔ̂ʼ nó, nye ósâ bé yǎ. 20Ebě, gúmó bʉ̂r obá, nkʉ̂ olɛ̂l, dí esyɛŋa ɨ́ díé lâm yɨ́, mɛm mʉr tɨ̂, me óbe ó tɨ̂, páʼ nyɔ́ɔ́.»
21Pétrus nzě sîhlě nkǒ Yésʉs á be yɨ́, nzě dî e né ó: «Dâ ɛ̌, nzɔʼ ntíá mé jálá le epɛʼ bíbaa mé á pa láa mɨ́ɔɔ́ wǎm bí, ɨ́ jɔʼ nyé dí ebáʼǎ sâ mbǐ syóm ngwár ɨ́ páʼ wâm yɨ́? Nzê tó pyâl nzɔ̂ʼ nzaangbá ɛ̌?»
Yésʉs, nye e né ó:
22«Mé alɛ́ɛ gó ó, tó pyâl nzɔ̂ʼ nzaangbá, njɨ tó pyâl mékám nzaangbá nzɔʼ nzaangbá.»
Kɨkɛna syɛ̂l mesâ dí abe e njɨ́ʼá nkóó nyá
23«Nó, Mpóʼo mé Dâ Nzyɛ̌m nwɨɨla ó e nyʉ́ʉ́ njwɨ́ɨ á be lɨ́ egwɨ̂m éláa ósyɛ̂l o mésá bé sitɔ̂ʼ nyá. 24Mpʉ nyé á be, nye mû lɨ́ etáare éláa mémpʉ́lá maá yɨ́, nó ó bé á nze kwá nyé e nyʉ́ʉ́ syɛ̂l mesâ á be nye e mpʉ́lá, mebɨ́ʼ bímɔnɨ́ bí gʉ̂l otɔ́ɔ́sin kám nyá. 25Mpʉ nyé á be abe e sá nyé jánaa yɨ́, sɔ́ŋ wé ntɔ̂ʼ dwe twíí ó, bé bɛ́maa nye, le mʉmá wé, le bwán bé ti e bisá bíbyɛ̂h nyé á be e byé bí, ó nye jánaa mpʉ́lá nyé. 26Nó ó syɛ̂l mesâ nɨ̌ á bɨʼ mebóó sí ɨ́ mpǒm nyé, nzě táare éjɨʼla e né. Nye e né ó: “Júhwáá mê! Me ójána gó sá yɨ́yɛ̂h mé dí go e yǎ yɨ́!” 27Mpʉ nyé á jɨ̂ʼ nye nkoó yɨ́, nye ntɔ̂ʼ pɛʼ nyé mpʉ́lá nyaá nyɨnyɛ̂h. Nye nzě bîr ó, nye tôʼ.
28«Tœ́á syɛ̂l mesâ nɨ̌ á tô kʉ̌l wɨ́, nzě bɔma e mʉr njoo yé, á be nye e mpʉ́lá minzaŋ mí mɔnɨ́ nter nyá. Nó nyé á nze mɛ̂r nye, nzě syɛ̂ʼ nyé etám ɨ́ twíí. Nye e né ó: “Jɛ́náá mé bím gó dí me e yǎ yɨ́!” 29Nó só wé á nze bɨʼ mebóó sí, táare éjɨʼla e né. Nye e né ó: “Júhwáá mê. Me ójána gó sá mé dí go e yǎ yɨ́!” 30Sâ gwár, nyɨɛ á bé akpɛl éjɨ̂ʼ só wé nkoó. Nye nzě mɔa, gbâ nyé ɨ́ mbʉʼ, tó bónǒ jɔʼ nyé ngá jána nyé mpʉ́lá nyaá yɨ́. 31Tó kœb ó, bʉ́ʉ́ bʉ̂r ó njoo yé, jɔʼ bé á bee syɛ́ɛla yaá yɨ́, nyʉ̂l ntɔ̂ʼ tyɛʼ bê. Bê nzě tó bee sɔ́ŋ wɔ́ɔ́ le onɔ́ɔ́, lɛ́ɔɔ nyé sá yɨ́yɛ̂h laá yɨ́. 32Nó ó sɔ́ŋ á nze jébe syɛ̂l mesâ waá. Nye e né ó: “Bɨ́bla syɛ̂l mesâ nyâ! Me bé ó sí pɛʼ bíbaa bí ébébe bíbyɛ̂h mê láá gó bí, le ebîr mpʉ́lá nyǒ nyɨnyɛ̂h ɨ́ lɔ̌b mínjɨʼla gô jɨʼlá e me mí. 33Nzê yê bé ajala ntémé ó, go jɨ́ʼɨɨ mʉr njoo yô nkoó, ɨ́ mpʉ mɛ̂m pa jɨ́ʼ gó nkoó yɨ́ ɛ́?” 34Lémé wé, wé ntɔ̂ʼ lóno ɨ́ nkpaa, nye nzě gbâ nyé ɨ́ nkul bʉr o cére ó mbɛ̌r mímbʉʼ, tó bónǒ jɔʼ nyé ngá sîl éjána mpʉ́lá nyé nyɨnyɛ̂h yɨ́.»
35Yésʉs nzě kɛl tɨ̂ʼ ó: «Bɨ́n óbe, apɛʼ e milémé mín mímyɛ̂h, bibaa bí ébébe bɨ̂n pa niʼé bɨ́ɔɔ́ bɨ́n bí nó, Sɔ́ŋ wǎm dí ɨ́ jʉ́o kʉ́ nyá, nye ákam épɛʼ bíbaa nyé á niʼe mʉr nyɨnyɛ̂h ɨ́ sɔ́má yɨ́n bí.»
Currently Selected:
Matthieu 18: ozm
Highlight
Share
Copy
Want to have your highlights saved across all your devices? Sign up or sign in
