Yʉánɛs 8

[Mʉmá medyɛ̂n]

1[Yésʉs á si tô lɨ́ Ecwɨ́ʼ lé ólivier. 2Ɨ́ mɛ́n kúnó, nye nzě tô mpáh Nzyɛ̌m. Bʉr bɨ́bɛ̂h nzě tô nko nyé á be yɨ́. Nye nzě di sí, nyɛl édwe bé milɛ́ʼlá. 3Olɛ̂ʼla o métié le oFarizyɛ̂n nzě lɛ̂ʼle nyé nyʉ́ʉ́ mʉ́má bé alúno mɛ̂r lɨ́ esâ médyɛ̂n nyá. Bê nzě tyêl nyé tîtyěl témé bʉr memɛ̌n. 4Bé e Yésʉs ó: «Lɛ̂ʼla, bɨ̌h alúno mɛ̂r mʉ́má nyâʼ lɨ́ esâ médyɛ̂n! 5Moyɨ̂z á dwe bɨ̌h nkul etíʼe mbi mílɔ̌b mîʼ ó, bɨ̌h lúmaa mbi bʉ́bá wɨ̂ʼ mekóʼ. Gua, gǒ lɛ́ɛ́ nyá tɨ̂ʼ ɛ̌?»]

6[(Bé á dî nye tíá nyaá ó, lɨ́ elámɔɔ nyê, ó bé nkʉ̂ búʼo nyé lɔ̌b.)]

[Yésʉs nzě gwárwo sí, nzě táare écɛma e diné ɨ́ bibwǎh. 7Mpʉ bé á be lɨ́ etô dóló le edî métíá yɨ́, Yésʉs nzě sɨ́ʼa. Nye ó: «Mʉr dína apǎ sâ syóm nyá, nye nyɛ́ɛ lúmo mʉ́má nyâʼ ekóʼ esôʼ!»]

8[Nye ntɔ̂ʼ báʼǎ gwarwo sí, báʼǎ nyɛl écɛma ɨ́ bibwǎh. 9Jɔʼ bé á jóʼo ekǎn énɨ̌ yɨ́, bê nzě gɔ́na le esɔlwa ngúngwár, líʼɔɔ nyé tɨ̂ʼ nye omér, bé e mʉmá nɨ̌, nyɨɛ náǎ tîtyěl téme ebɛhɛɛ. Otɔ́má bʉ̂r o b'á nyɛɛ sɔlwa esôʼ, ontwǒm bɔma. 10Yésʉs nzě báʼǎ sɨ́ʼa. Nye e mʉmá ó: «Mʉmá, bé mû wó? Nzê mʉr, nyé akǎ dwe gó mebě ɛ̌?»]

[Mʉmá nzě yala ó: 11«Abe e mʉr, Dâ.»]

[Yésʉs, nye e né ó: «Mɛm ntémé, mé adwe gó mebě. Tóʼ. Sâ gwár, akǎ báʼǎ sâ syóm.»]

Yésʉs ó dí njʉl dí edwě twiʼ wɨ́

12Píe tɨ̂, Yésʉs nzě lɛ́ɛ bʉ̂r ó: «Me ó dí njʉl dí epan ɨ́ sí yɨ̂ʼ wɨ́. Mʉr ódû mé nyá, óbǐ njʉl dí edwě twiʼ wɨ́. Nye ákǎ ntíma lɨ́ edúrʉ́ʉ́.»

13OFarizyɛ̂n, bé e né ó: «Go lɨ́ eboʼlǒ lɔ̌b gô, go mʉr tɨ̂! Mboʼlá gô, wé abe le otyeetye!»

14Yésʉs, nye e bé ó: «Mě damá boʼlǒ lɔ̌b wâm mɛm mʉr tɨ̂, sá mé dí elɛ́ɛ yɨ́, yé kʉ́ be ó tyeetye, ebě, me lɨ́ egʉ́ǎ nko mé á duho, ndu e nko mé dí etô yɨ́. Sâ gwár, bɨ̌n bɨɛ, bé agʉ́ǎ nko mé á duho yɨ́, nkʉ̂ páʼ mé dí etô wɨ́. 15Bɨ̌n tíʼé mílɔ̌b ó, lɨ́ edû mpʉ bʉ̂r dí ekpɛl yɨ́. Mɛm, mé abe lɨ́ etíʼe mʉ̂r lɔ̌b. 16Sâ gwár, yé sí kǎ pyâl ó, me tíʼaa lɔ̌b nɛ́ɛ: tíʼá wâm, wé ó tîtyěl, ebě, mé abe mé omér ɨ́ tíʼá waá. Yé ó bɨ̌h e Sɔ́ŋ wǎm, mʉr á ntɨh me nyá. 17Yê cɛmá ɨ́ metié mɨ́n ó, ɨ́ jɔʼ bʉ̂r obá dí eboʼlǒ sâ gwár yɨ́, mboʼlá waá, wé ó tyeetye. 18Me lɨ́ eboʼlǒ lɔ̌b wâm, mɛm mʉr tɨ̂. Sɔ́ŋ wǎm, mʉr á ntɨh me nyá, nye lɨ́ eboʼlo ntémé lɔ̌b wâm waá.»

19Bé e né ó: «Á sɔ́ŋ gǒ, nye nkoó?»

Yésʉs, nye e bé ó: «Bɨ̌n bé agʉ́a, damá jóʼo mê, damá jóʼo Sɔ́ŋ wǎm. Yé bé bɨ̌n bé lɨ́ egʉ́a mé nó, lɛ́ɛ́, bɨ̌n ntémé bɨ́ gʉ́a Sɔ́ŋ wǎm.»

20(Yésʉs á lwib bilwǐb bínɨ̌ ó, nyɨɛ lɨ́ edwe bʉ̂r milɛ́ʼlá ɨ́ mpáh Nzyɛ̌m, gúmó mpɔra míndwéá yé á be yɨ́. Abe e mʉr á mɛ̂r nye, ebě, jɔʼ yé, yé á bé apǎ pyâl.)

21Yésʉs nzě báʼǎ lɛ́ɛ e bé ó: «Mɛm múo nzě tô. Bɨ̌n bé ósáa mê, ɨ́ sáa sáa, abee. Bɨ̌n ntɔ̂ʼ búra e misyóm mín. Bɨ̌n bé abe e nkul etô nko mé ngá tô yɨ́.»

22OYúden nzě táare édíila ó: «Nzê nye ójwɨ́a nyʉ̂l ɛ̌? Ebě, nye lɛ́ɛ́ ó: “Bɨ̌n bé abe e nkul etô nko mé ngá tô yɨ́.”»

23Yésʉs, nye e bé ó: «Bɨ̌n bé ó bʉr ó sí. Mɛm, me ó mʉr kʉ́. Bɨ̌n gúmó ó e sí yɨ̂. Mɛm, mé agúmo e yê. 24Sá tɨ̂ʼ ó mê lɛ́ɛ́ e bɨ̌n ó: “Bɨ̌n bé óbúra e misyóm mín” yɨ́. Bɨ́n bé abûʼla ó, mɛm ó dí Me-ó-tɨ̂ʼ nó, bɨ̌n bé ókʉ́ búra e misyóm mín.»

25Bé e né ó: «Gua, go nzé?»

Yésʉs, nye e bé ó: «Nzê mé alɛ́ɛ bɨ́n yǎ, duho ɨ́ menyɛ̌l ɛ̌? 26Me ɨ́ buo bísá bí élɛ́ɛ ɨ́ lɔ̌b wɨ́n. Milɔ̌b mín mé jálá le etíʼe mí, myé ɨ́ buo. Mʉr á ntɨh me nyá, lɛ́ɛ́ ó otyeetye. Mɛ̌m jaá lɨlɛ́ɛ ó, njɨ sá mé á jɨ̂ʼ kwá nyé yɨ́.»

27Bé á bé agʉ́a ó, nye á lwib e bé ó, dumo e Nzyɛ̌m Sɔ́ŋ. 28Yésʉs nzě lɛ́ɛ e bé ó: «Jɔʼ bɨ́n ngá bɨ̂n Mwân mé Mʉr kʉ́ yɨ́, ɨ́ jɔʼ yaá ó bɨ́n ngá gʉ́a ó, mɛm ó dí Me-ó-tɨ̂. Bɨ̌n bé ogʉ́a ó, mé abe lɨ́ esâ yʉ́ʉ́ sɔ̂ʼ ɨ́ mɛm mʉr tɨ̂. Mě jaá lwilwib ó, njɨ sá Sɔ́ŋ wǎm á lɛ̂ʼle me yɨ́. 29Mʉr á ntɨh me nyá, bɨ̌h e né ó dí. Nye á bé alíʼe mé me omér, ebě, mě sá jɔʼ yɨ́yɛ̂h ó, syɛ́ɛla nyé dí ebee mbɨ̂mbɨá yɨ́.» 30Jɔ̌ʼ Yésʉs á lɛ́ɛ nó yɨ́, bʉr ɨ́ buo buo ntɔ̂ʼ dyɛ̂ʼwo e nye.

Onzyɛh o bʉ̂r ndu e bitúʼǎ

31Yésʉs nzě lɛ́ɛ le oYúden bé á dyɛ̂ʼwo e né bá ó: «Bɨ́n óbaʼle mékǎn mâm nó, bɨ̌n bé ódi ómpʉ́n bâm lɨ́ otyeetye. 32Jɔʼ bɨ́n ngá gʉ́a ótyeetye yɨ́, otyeetye waá, wé ódil bɨ́n ɨ́ tyé ónzyɛh o bʉ̂r.»

33Bé e né ó: «Bɨ̌h bé ó onta mé Abraham. Bɨ̌h bé apǎ di bítúʼǎ bi bʉ̂r. Gǒ e nkul elɛ́ɛ e bɨ̌h ó, bɨ̌h, bé ódi ónzyɛh o bʉ̂r e wáǎ mbi nzɨ́?»

34Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, mʉr nyɨnyɛ̂h dí esâ syóm nyá, nye ó túʼǎ mísyóm. 35Tó kœb ó, túʼǎ, yé ádí ɨ́ mbɛ̌r njʉ̌m dǐ e njʉ̌m dǐ. Mwân ó dí ɨ́ mbɛ̌r jɔʼ yɨ́yɛ̂h. 36Mwân sí táǎ góo, le edwih bɨ́n ɨ́ mpila ótúʼǎ nó, ɨ́ jɔʼ yaá ó bɨ́n ókʉ́ be ónzyɛh o bʉ̂r yɨ́. 37Me lɨ́ ekʉ́ gʉ́a ó, bɨ̌n bé ó onta mé Abraham. Sâ gwár, bɨ̌n bé lɨ́ ekpɛl éjʉ̂ mê, ebě, bɨ̌n bé akpɛl ékǎm lɛ́ʼlá wâm. 38Me lɨ́ elɛ́ɛ ó, sá mé á bee kwá Sɔ́ŋ wǎm yɨ́. Bɨ̌n bɨɛ̌ sá ó, sá wɨ́n sɔ́ŋ á lɛ́ɛ bɨ̌n yɨ́.»

Sátan ó dí sɔ́ŋ wɨ́n

39Bé e né ó: «Sɔ́ŋ wɨ́h, nye ó Abraham.»

Yésʉs, nye e bé ó: «Bɨ́n bé tyeetye onta mé Abraham nó, lɛ́ɛ́, bɨ̌n bé lɨ́ esâ bísyɛ́ɛla nyé á sɨ̂sa bí. 40Sâ gwár, ɨ́ báánâ, damá jóʼo ó mpʉ mé mû sí kala bɨ́n otyeetyě Nzyɛ̌m á lɛ́ɛ me wɨ́ yɨ́, bɨ̌n bé lɨ́ egwɨ̂m éjʉ̂ mê. Abraham á bé asâ yʉ́ʉ́ syɛ́ɛla nó. 41Bɨ̌n bé lɨ́ esâ náǎ ó, bisyɛ́ɛla bi sɔ́ŋ wɨ́n.»

Bé e né ó: «Bɨ̌h bé abe bwân o b'á byɛ̂l ɨ́ mbɛ̌r bá. Bɨ̌h bé e Sɔ́ŋ ngwár, njɨ Nzyɛ̌m nye omér.»

42Yésʉs, nye e bé ó: «Yé bé Nzyɛ̌m, nyě tyeetye ó Sɔ́ŋ wɨ́n nó, lɛ́ɛ́, bɨ̌n bé lɨ́ ekpɛl mê, ebě, me á duho ó kwá mé Nzyɛ̌m. Me ntémé, me wâʼ ó ɨ́ nkul nyé. Me á bé anze ɨ́ gwɨ́má yâm, mɛm mʉr tɨ̂. Nye ó b'á lómo me. 43Bɨ̌n bé lɨ́ ekâr égwá jóʼǒ lwǐb yâm ɨ́ yé? Ebě, bɨ̌n bé abe e nkul ejóʼǒ lɔ́ɔ́ wâm. 44Sɔ́ŋ wɨ́n, nye ó sɔ́ŋ meleme. Sá tɨ̂ʼ ó bɨ́n dí ekpɨkpɛ̌l njɨ esâ gwɨ́má mé sɔ́ŋ wɨ́n yɨ́. Nye á boo be ó njʉ̂l bʉr, duho ɨ́ menyɛ̌l. Nyé abe e nkul elɛ́ɛ ótyeetye lʉ́ʉ́ dʉ́o, ebě, otyeetye, wé abe e né. Jɔʼ nyé dí elɛ́ɛ bíbɛr yɨ́, nyě lɛ́ɛ́ ó, sá yé, ánta nye, ebě, nye ó mʉr bibɛr. Nye ntémé, nye ó sɔ́ŋ bibɛr. 45Sâ gwár, mɛ̌m lɛ́ɛ́ bɨ́n ó otyeetye. Nó yaá ó bɨ́n dí abûʼla mé yɨ́. 46Wáa mʉ̂r ɨ́ sɔ́má yɨ́n dí e nkul elɛ̂ʼle mé ó, me á be ɨ́ sâ syóm? Jɔʼ mé dí elɛ́ɛ ótyeetye yɨ́, bɨ̌n bé abûʼla wé ɨ́ yé ɛ́? 47Mʉr dí mʉr mé Nzyɛ̌m nyá, jóʼó ó, mekǎn mé Nzyɛ̌m. Sâ gwár, bɨ̌n bé abe bʉ̂r o mé Nzyɛ̌m. Nó yaá ó bɨ́n dí ajóʼo mé yɨ́.»

Yésʉs á si boo byɛ̂l le Abraham

48OYúden, bé e né ó: «Nzê bɨ̌h bé abe lɨ́ egwá lɛ́ɛ ó, go ó mʉr Samarî, ndu e ntémé ó, gǒ le eleme ɛ̌?»

49Yésʉs, nye e bé ó: «Mé abe le eleme. Me ó njɨ lɨ́ edwidwe Sɔ́ŋ wǎm kûm. Bɨ̌n bɨɛ lɨ́ esâ mé bisá bí ésɔ́m! 50Mé abe lɨ́ esáa kûm nyǎm mɛm mʉr tɨ̂. Yé e mʉr dí esâ ó, me nʉ́aa kûm nyá. Nye ó ngá tíʼě lɔ̌b dí páʼ gá nyɨ́ná wɨ́. 51Mě lɛ́ɛ́ bɨ́n lɨ́ otyeetye ó, mʉr óbaʼlě lwǐb yâm nyá, nye ákǎ dwe.»

52OYúden, bé e né ó: «Ɨ́ báánâ, bɨ̌h bɨ́ gʉ́a ó, go bánǎ kʉ́ be le eleme! Abraham á si dwe. Ogwíha o mílɔ̌b mé Nzyɛ̌m sí dwe ntémé. Tó kœb ó, guǎ lɛ́ɛ́ ó, “mʉr óbaʼlě lwǐb yâm nyá, nye ákǎ dwe”? 53Sɔ́ŋ wɨ́h Abraham á si dwe. Nzê gǒ bûʼlá ó, go ó dí elaa nyé ɛ̌? Ogwíha o mílɔ̌b ntémé sí dwe. Gǒ bee ó, go nzé?»

54Yésʉs, nye e bé ó: «Mé sí gúmlo mɛ̂m mʉr tɨ̂ʼ nɛ́ɛ: kûm nyǎm nyaá, nyé abe e nyɔm. Mʉr dí edwe mé kûm nyá, nye ó Sɔ́ŋ wǎm. Nye ó waá bɨ́n dí elɛ́ɛ ó, nye ó Nzyɛ̌m wɨ́n nyá. 55Bɨ̌n bɨɛ, bɨ̌n bé agʉ́a nyê. Mɛm ó dí egʉ́a nyê. Mé sí lɛ́ɛ ó, mé agʉ́a nyé nó, lɛ́ɛ́, me ó mʉr bibɛr mpʉ bɨ́n. Sâ gwár, me lɨ́ ekʉ́ gʉ́a nyê. Me ntémé, me lɨ́ ebaʼlě lwǐb yé. 56Sɔ́ŋ wɨ́n Abraham á be ɨ́ soho ɨ́ jɔʼ nyé á jwɨjwɨʼ ó, nye óbeě móhó épyál lâm. Nye á si bee wê. Nye kʉ́ nzě soho.»

57OYúden, bé e né ó: «Gó apǎ pyâl mímbû mekám métɛ̂n. Nó ó, gǒ lɛ́ɛ́ ó, go á si bee Abraham ɨ́?»

58Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, Abraham dína apǎ byɛ̂l, mɛm á boo be ó Me-ó-tɨ̂.»

59Bê nzě nkɛ́ɛ mékóʼ ó, bé lúmó ó nye. Yésʉs ntɔ̂ʼ swab, ntɔ̂ʼ duho ɨ́ mpáh Nzyɛ̌m.

Currently Selected:

Yʉánɛs 8: ozm

Highlight

Copy