Yʉánɛs 12

Yésʉs lɨ́ elœmɔɔ múlǒ Bétanî

(Matthieu 26.6-13; Marc 14.3-9)

1Nzɔɔ, nyé osí lîʼ mélú mésaman, Yésʉs nzě tô Bétanî, kwár mé Lazare, mʉr nyé á pɛh ɨ́ soo nyá. 2Bê nzě tyêl dína lɨ́ esoho épyál mé Yésʉs. Mááta á be ó lɨ́ eka bʉ̂r mede. Lazare nyɨɛ á be ó, ɨ́ sɔ́má bʉ̂r o b'á be mindîndǐl, bé e boo Yésʉs lɨ́ ede bá. 3Maria nzě nʉǎ ntaʼ múló mé lɔbína, yé á be ɨ́ bwaʼ tâŋ yɨ́. Yé á be ó sɛ́á e mpǎŋ “nard.” Nye nzě lœ̌m Yésʉs yǎ ɨ́ mekʉ̌. Píe tɨ̂, nzě tin mé e mpuo nyé. Mbɛ̌r wɨ́wɛ̂h nzě lóno ɨ́ menumó mé lɔbína. 4Yé á be ó e nyʉ́ʉ́ mpʉ́n wé á be e díe ó, Yʉ́das Iskariôt nyá. Nye á be ó mʉr á be ó, nye óbɛ́mǎ Yésʉs nyá. 5Nye nzě lɛ́ɛ ó: «Bê bé abɛ́mǎ lɔbína yɨ̂ʼ minzaŋ mí mɔnɨ́ minter milɛ̂l, tô e mɔnɨ́ yaá, tó dweŋɔɔ míndyêbndyéb ɨ́ yé?»

6(Nye á bé alɛ́ɛ nó ɨ́ lɔ̌b nkóó nyé á jɨ̂ʼ baántéʼenteʼe o bʉ̂r nyɨ́. Nye á lwib nó ó, ebě, nye á be ó ndíblʉ̌. Nye ó b'á bɨbaʼle ekúró lɔ́ɔ́, le edidíbě sá bʉ̂r, bé á gbɨgbâ tɨ̂ʼ yɨ́.)

7Yésʉs, nye e né ó: «Bírɨ́ɨ́ gá nye ɨ́ puuu! Nyě sá syɛ́ɛlǎ nɨ̌ ó, dumo e móhó mé ngá dɨlɔɔ wɨ́. 8Bɨ̌n e baántéʼenteʼe o bʉ̂r ó dí edǐ jɔʼ yɨ́yɛ̂h. Sâ gwár, mɨná bɨɛ bé ábe gá jɔʼ yɨ́yɛ̂h.»

Bʉm éjʉ̂ Lazare

9OYúden ɨ́ buo buo ntɔ̂ʼ jóʼǒ ó, Yésʉs á be ó Bétanî. Bé á bé akǎ tô gʉ̂ʼ njɨ lɨ́ esú lé ébeě Yésʉs. Yé á be ntémé ó, lɨ́ esú lé étó beɔɔ̌ Lazare, mʉ̌r Yésʉs á pɛh ɨ́ soo nyá. 10Ojwɨ́ɨ o mpáh Nzyɛ̌m, bé á ka tíʼe ó, bé ɨ́ jala le ejʉ̂ ntémé ó Lazare, 11ebě, ɨ́ lɔ̌b wé ó óYúden ɨ́ buo buo, bé á líʼe bê, kǎ dyɛ̂ʼwo e Yésʉs yɨ́.

Yésʉs lɨ́ enî ɨ́ Yerʉ́zalɛm

(Matthieu 21.1-11; Marc 11.1-11; Luc 19.28-44)

12Ɨ́ mɛ́n tɨ̂, bʉr ɨ́ buo buo o b'á nze ɨ́ nzɔɔ bá, mpʉ bé á jóʼo ó, Yésʉs múo nzě pyâl ɨ́ Yerʉ́zalɛm yɨ́, 13bê nzě nʉa mébó mé élén, nzě tóŋɔɔ, tó bɔmɔɔ e né, le elɛ́ɔɔ ó: “Mɨná dwêʼ gá Nzyɛ̌m kûm. Mɨná gúmlaa gá waá dí enze e díé mé Dâ, mʉr dí njwɨ́ɨ kúl bʉ̂r o b'Ɨ́zraɛ̂l nyá.”

14Yésʉs nzě kœb mâ kamntʉl, nzě di ɨ́ yé kʉ́ mpʉ Mékaná mé Nzyɛ̌m dí elɛ́ɛ yɨ́. Yê cɛmá ɨ́ Mekaná mé Nzyɛ̌m ó:

15“Sá ajóʼo bʉ́á, nkanǎ Síon.

Jwɛ́ʼɛ́ɛ́ gâ! Njwɨ́ɨ gǒ, nye lɨ́ enze.

Nye ó ndîndǐl ɨ́ mâ kamntʉl kʉ́.”

16(Ompʉ́n bé, bé á bé anyɛɛ́ jóʼǒ péh Mékaná mé Nzyɛ̌m yaá. Bé á ka nze gʉ́a yé ó, píe jɔ̌ʼ Yésʉs á nʉa kûm nyé yɨ́. Jɔʼ yaá ó bé á ka gʉ́a ó, nkúná ogwíha o mílɔ̌b, bé á cɨcɛma bisá bínɨ̌ bíbyɛ̂h ó, dumo e né. Bê nzě gʉ́a ntémé ó, bʉr ónɨ̌, bé á sâ nye bisyɛ́ɛla byaá ó, mpʉ byé á boo be micɛmá yɨ́.)

17Bʉr bɨ́bɛ̂h bé á bě gúmó Yésʉs á jébe Lazare ɨ́ soo, pɛʼ nyé lɨ́ odwe yɨ́ bá, bê nzě tô le eboʼlǒ sá yɨ́yɛ̂h bé á bee yɨ́. 18Nó yaá ó bʉ̂r, bé á tô nye lɨ́ esóʼ é nzɨ́ yɨ́, ebě, bé á si jóʼo lɔ́ɔ́ ésimá nyé á sâ lɨ́. 19OFarizyɛ̂n nzě nyɛl élwibla páʼ nyɔ́ɔ́. Bé ó: «Beyɨɨ gá, mɨná bé ákoʼo gá nye! Bʉr ó sí bɨ́bɛ̂h mû kǎ dû ó, njɨ nye omér.»

Bʉr o Grɛ̂s, bé lɨ́ esáǎ Yésʉs

20Yé á be ó e bʉ́ʉ́ bʉ̂r o Grɛ̂s, ɨ́ sɔ́má bʉ̂r o b'á tô Yerʉ́zalɛm bá. Bé á nze ó, lɨ́ ebwal nzɔ́ɔ oYúden, lɨ́ enzě dwě Nzyɛ̌m kûm. 21Bê nzě sîhlě bǎʼ e Philippe, mʉr Bétsɛ́da ɨ́ sí Galilê. Bé e né ó: «Bɨ̌h bé lɨ́ ekpɛl ébeě Yésʉs waá.»

22Philippe, nyɨ́ laa, tó lɛ́ɛ̌ André, bɨ́bɛ̂h obá nzě tó lɛ́ɔɔ̌ Yésʉs. 23Yésʉs, nye e bé ó: «Ɨ́ báánâ, jɔʼ Mwân mé Mʉr jálá le enʉa kûm nyé yɨ́, yé mû ó sí pyâl. 24Mě lɛ́ɛ́ bɨ́n lɨ́ otyeetye ó, bumó, yé ódidi gwár ó, jɔʼ yé dína apǎ swahɔɔ ɨ́ bibwǎh yɨ́. Bumó sí swahɔɔ ɨ́ bibwǎh, pâh nɛ́ɛ: yé ógúmo mpúmó menkû menkû. 25Mʉr nyɨnyɛ̂h dí ekpɛ̌l twiʼ yé nyá, ódímle yê. Mʉr dí ebeně twiʼ yé ɨ́ sí yɨ̂ʼ nyá, óbaʼle yê. Nye ódi ó, njʉ̌m dǐ e njʉ̌m dǐ. 26Mʉ̂r bé lɨ́ egwɨ̂m éséa e me nó, nye dúʼoo sɔ̂ʼ njɨ me. Nó, gúmó mé dí yɨ́, gúmo yaá ó syɛ̂l mesâ wǎm ntémé ngá di yɨ́. Waá nyɨnyɛ̂h ngá séa e me nyá, Sɔ́ŋ wǎm ódwe nyé kûm.»

Mwân mé Mʉr, nye óbɨ́rɔɔ kʉ́

27«Ɨ́ báánâ, lémé wâm, wé mû ó lɨ́ ekʉ́ jóʼǒ túú. Nó ó, me ólɛ́ɛ yé? Nzê me lɛ́yɨɨ Sɔ́ŋ wǎm ó, nye pɛ́ʼɛɛ me ɨ́ sá múo nzě pyâl mé ɨ́ báánâʼ yɨ̂ʼ ɛ̌? Heʼé, ebě, me á nze ó ɨ́ lɔ̌b sâ yaá, ó me bɔ́maa e mitúú mí tɨ̂. 28Dâ ɛ̌, dwéʼ díé lô kûm ɨ́ buo buo.» Twíí nzě duho ɨ́ jʉ́o kʉ́ ó: «Me á si nyɛɛ dwe lé kûm. Nó ó, me óbáʼǎ dwe lé nyǎ.»

29Entumo e bʉ̂r, lé á be tɨ̂ʼ lɨ́, lé á bě sí jóʼo twíí á duho ɨ́ jʉ́o kʉ́ nyɨ́. Lé ntɔ̂ʼ lɛ́ɛ ó: «Yé ó mindum mi mpíé.»

Bâʼ, bé ó: «Éngeles, nyɨ́ lwib e né.»

30Yésʉs, nye e bé ó: «Twíí nɨ̌, nye bé ajwɨ̂ʼ lɨ́ esú lâm. Nye jwɨ́ʼ ó, lɨ́ esú lɨ́n. 31Báánâʼ mû ó jɔ̌ʼ lɔ̌b sí yɨ̂ʼ múo nzě tîʼ yɨ́. Ɨ́ báánâ, njwɨ́ɨ sí yɨ̂, múo nzě soŋɔɔ. 32Nó ɨ́ jɔʼ mé óduhǒ sí yɨ̂, bɨ́nɔɔ kʉ́ yɨ́, me ódulo bʉ̂r bɨ́bɛ̂h nko mé óbe yɨ́.»

33(Ekǎn énɨ̌, lé á be ó lɨ́ elɛ̂ʼlě mbi éswie nyé ódwe wɨ́.)

34Entumo e bʉ̂r, lé e né ó: «Bɨ̌h bé á be ɨ́ jóʼo ɨ́ mekaná métié gá wɨ́ná ó, Mʉ̌r Nzyɛ̌m á lœm múló mé jwɨ́ɨ nyá, ódǐ njʉ̌m dǐ e njʉ̌m dǐ. Gǒ kǎ lɛ́ɛ ó, Mwân mé Mʉr, nye ɨ́ jala le ebɨ́nɔɔ kʉ́ ɨ́ yé ɛ́? Nzé pʉ́gʉ́ be “Mwân mé Mʉr” ɨ́ sɨ̂?»

35Yésʉs, nye e bé ó: «Njʉl, wé dína lɨ́ epǎn myɛ́n kwá nyɨ́n njɨ mâ jɔʼ. Bʉŋlaa gá ɨ́ jɔ̌ʼ njʉl dína lɨ́ epǎn myɛ́n yɨ́, ebě, edúrʉ́ʉ́, lé ámû jaá go bɨ́n, ebě, mʉr dí etô le entíma lɨ́ edúrʉ́ʉ́ nyá, nyé agʉ́ǎ nko nyé dí etô yɨ́. 36Dyɛ́ʼwáá gá e njʉl waá ɨ́ jɔʼ wé dína lɨ́ epǎn myɛ́n yɨ́. Nó yaá ó bɨ́n ngá sûʼla bʉ̂r ó myɛ́n yɨ́.»

OYúden, bé adyɛ̂ʼwo e Yésʉs

Jɔ̌ʼ Yésʉs á be ɨ́ lwib nó yɨ́, nye nzě laa, tó swab bê. 37Damá be ó Yésʉs á si bu sâ mesimá ɨ́ míh mɔ́ɔ́, oYúden, bé á bé adyɛ̂ʼwo e né. 38Sá tɨ̂ʼ ó lɔ́ɔ́ mé ngwíha milɔ̌b Ésayie, wé á dira yɨ́. Mbi wɨ̂ʼ ó wé á dira:

“Dâ ɛ̌, nzé á bûʼla lɔ́ɔ́ wɨ́h?

Onzé b'á bee

ɨ́ jɔ̌ʼ Dâ á be ó,

nyě lɛ́ʼlé ó bé nkul nyé yɨ́?”

39Bé á bé abe e nkul ebúʼla. Yé lɨ́ ebɔma e sá Ésayie á lɛ́ɛ yɨ́. Nye á lɛ́ɛ ó:

40“Nzyɛ̌m á be ó sí liŋ bé baántím.

Nye á si dibe bé mepɨʼ mɔ́ɔ́,

ó míh mɔ́ɔ́, mé ayɨ́ bee;

bé ntémé díʼee abe e mepɨʼ,

lɨ́ ebene ó, bé ámû jaá dwira míléme,

tóŋɔɔ kwá nyé ó, nye tíʼɨɨ bê.”

41Ésayie á lɛ́ɛ nó ó, ebě, nye á si bee kûm mé Yésʉs. Nó nyé á lwilwib ɨ́ lɔ̌b wé yɨ́.

42Damá jóʼo nó, myúú mílʉ́ mí óYúden ɨ́ buo buo, myé á be ó lɨ́ edyɛ̂ʼwo e Yésʉs. Sâ gwár, bé á bé alɛ́ɛ bʉ̂r nó. Bé á be lɨ́ ekpɛ́ɛ óFarizyɛ̂n, ebě, bé ámû soŋɔɔ ɨ́ mpáh minjɨʼla nyɔ́ɔ́. 43Ebě, bé á be ó lɨ́ ekpɛl kûm, nyaá dí eduho kwá bʉr nyɨ́, bene nyaá dí eduho kwá mé Nzyɛ̌m nyɨ́.

Lwǐb mé Yésʉs, yé ó dí etíʼe mílɔ̌b

44Yésʉs nzě túno. Nye ó: «Mʉr dí edyɛ̂ʼwo e me nyá, nyé adyêʼ koo njɨ e me. Nyě dyɛ́ʼwó ntémé ó e mʉr á ntɨh me nyá. 45Mʉr dí ebee mé nyá, bee ntémé ó, mʉr á ntɨh me nyá. 46Mɛm á nze ɨ́ sí yɨ̂ʼ ó, me pánaa myɛ́n, ó mʉr nyɨnyɛ̂h dí edyêʼ koo e me nyá, nkʉ̂ duho lɨ́ edúrʉ́ʉ́, tô pyâl ɨ́ myɛ́n. 47Mʉ̂r sí jóʼǒ lɛ́ʼlá wâm, abâʼle wé nɛ́ɛ: nye mû ó e lɔ̌b. Sâ gwár, ntʉ mé ótíʼe nyé wǎ, ebě, me á nze ó, me ntáa nzě tiʼ bʉ̂r, abe lɨ́ enzě tíʼe mílɔ̌b. 48Mʉr nyɨnyɛ̂h dí eso mê, akǎm lɛ́ʼlá wâm nyá, nyě e mʉr ngá tíʼě lɔ̌b wé nyá. Milɛ́ʼlá mé mû sí dwe bɨ́n mî, myé ó ngá tíʼě lɔ̌b wé ɨ́ móhó ésúʼlá é sí yɨ̂. 49Ebě, me á bé alwib yʉ́ʉ́ sɔ̂ʼ e mɛm mʉr tɨ̂. Sɔ́ŋ wǎm, mʉr á ntɨh me nyá ó b'á lɛ́ɛ me sá mé jálá le elɛ́ɛ bɨ́n yɨ́. 50Ebě, me lɨ́ egʉ́a ó, metié nyé dí etyêl má, mé ó dí edwě twǐʼ njʉ̌m dǐ. Nó ó, sá mé dí elɛ́ɛ yɨ́, mě lɛ́ɛ́ yé ó, lɨ́ edû mpʉ Sɔ́ŋ wǎm á lɛ́ɛ me yǎ yɨ́.»

Currently Selected:

Yʉánɛs 12: ozm

Highlight

Copy