Milʉ́mlʉ́ 8

1Saʉ̂l nzě kam éswie mé Étiene.

Ɨ́ móhó ngwár e ngwár waá, bê nzě nyɛl étíblě Mbɛ̌r-Nzyɛ̌m Yerʉ́zalɛm ɨ́ dwíííá. Obûʼla bɨ́bɛ̂h, pɛ̌ʼ njɨ bʉr o mílʉ́mlʉ́ mé Yésʉs, bê nzě gbɛha ɨ́ mekwár mé sí Yʉ́da ti e maá mé sí Samarî. 2Nó ó, bʉrʉ̂m o b'á dwáawo Nzyɛ̌m bá, bé á nze dɨl Étiene, ntɔ̂ʼ jɨ ɨ́ buo buo lɨ́ eswie lé.

3Saʉ̂l nyɨɛ nzě gbâ nkûl lɨ́ egbǎh Mbɛ̌r-Nzyɛ̌m. Nye á tʉtô nó ó, mímbɛ̌r e mímbɛ̌r myɛ̂h, lɨ́ etô le edulo bʉ́bá le bʉrʉ̂m o b'á bûʼla bá bɨ́bɛ̂h, gbâ bé ɨ́ mbʉʼ.

Philippe lɨ́ etúnǒ Mbɨambɨa Lɔ́ɔ ɨ́ sí Samarî

4Baá bé á gbɛha bá, bê nzě tô mésí e mésí mɛ̂h, lɨ́ etô le etúnǒ Mbɨambɨa Lɔ́ɔ. 5Philippe nyɨɛ nzě tô ɨ́ yʉ́ʉ́ nkana yé á be ɨ́ sí Samarî yɨ́, nzě táare élɛ́ɛ bʉ̂r lɔ́ɔ́ mé Krîst tɨ̂. 6Ɨ́ jɔʼ méntumo me bʉ̂r ménɨ̌, mé á jóʼo Philippe le ebee mésimá nyé á sɨsâ má yɨ́, bʉr baá kʉ́ nzě gwá jôʼlǒ lɔ́ɔ́ wé wɨ́wɛ̂h. 7Ebě, mimbɨ́a mísísǐm, myé á si bu duho ɨ́ menyʉ́l mé bʉ̂r o b'á bibíle bá, bɨ́haá lɨ́ ebʉ̂ bítím kʉ́kʉ́. Mimbʉ́mbʉ́ʼ mí bʉ̂r ɨ́ buo buo ti e bʉr o b'á tɨtɨ́a bá, bé ntémé, bé á si tiʼe. 8Yé á nze sâ ó, bʉr ó nkana yaá díʼee e bisʉhʉʉ ɨ́ buo buo.

9Yé á be ó e nyʉ́ʉ́ mʉ̂r, díé lé Simon. Nye á boo didi ó, tɨ̂ʼ ɨ́ nkana yaá. Ɨ́ mimbú mí píhe, ɨ́ jɔʼ nyé á bɨbe lɨ́ esɨ̂sa mésimá mé ónkaa mé yɨ́, bʉr ó Samarî, bé á bɨbe ó lɨ́ ekâm nyê. Nye á be ɨ́ jɔʼ yaá ó, lɨ́ ekʉ́ buú nkʉ́na, le elɛ́ɛ ó, nyɨɛ nye ó mpaŋ mʉ̂r. 10Bʉr bɨ́bɛ̂h, otɔ́má le ontwǒm, bé á bɨbe ó, lɨ́ egwá jôʼlo nyê. Bé á lɨlɛ́ɛ ó: «Mʉr nyâ, nye ó le nkǔl nɨ́nɨ́ɨ́ mé Nzyɛ̌m, nyaá bé jɨ́jébé “ánɨ̂nɨ̂n” nyɨ́.»

11Bé á bu jʉjôʼlo nye nó ó, ɨ́ nko nyé á sɨsâ mesimá mé ónkaa yɨ́. Nye á sâ bé mǎ ó, bé kámaa nye. 12Túná Philippe á túno bé lɔ́ɔ dumo e Mpóʼo mé Nzyɛ̌m le Yésʉs-Krîst wɨ́, bé ntɔ̂ʼ bûʼla, nzě duŋɔɔ, bʉbá le bʉrʉ̂m. 13Simon mʉr tɨ̂ʼ nzě bûʼla ntémé, nye ntɔ̂ʼ duŋɔɔ. Nye nzě didǐ gúmó yɨ́yɛ̂h Philippe á be yɨ́. Nó ó, nye á be ó lɨ́ ebuú kâm lɨ́ esiŋle mésimá ménɨ́nɨ́ɨ́ Philippe á sɨsâ má.

14Bʉr o mílʉ́mlʉ́ bé á be ɨ́ Yerʉ́zalɛm bá, bé ntɔ̂ʼ jóʼǒ lɔ́ɔ ó, bʉr ó Samarî, bé á si bûʼla lɔ́ɔ́ mé Nzyɛ̌m. Bê nzě lómlo bé Pétrus, bé e Yʉánɛs. 15Pyálá bé á pyâl ɨ́ sí Samarî yɨ́, bê nzě jɨʼla e Nzyɛ̌m lɨ́ esú lé óbûʼla baá, ó bé bíʼee ntémé Sísǐm mé Nzyɛ̌m. 16Ebě, wé á bé apǎ sulo ɨ́ mʉr ngwár ɨ́ sɔ́má yɔ́ɔ́. Bé á jaa duŋɔɔ ó, njɨ ɨ́ díé mé Tî Yésʉs. 17Nó ó, Pétrus, bé e Yʉánɛs, bé á kɛl bé mebô, bé ntɔ̂ʼ kǎ bǐ Sísǐm mé Nzyɛ̌m ɨ́ jɔʼ yaá.

18Jɔ̌ʼ Simon nyɨɛ á bee mpʉ bʉ̂r, bé á bi Sísǐm mé Nzyɛ̌m ɨ́ kɛlá bʉ̂r o mílʉ́mlʉ́, bé á kɛl bé mebô wɨ́ yɨ́, nye nzě syɛ̂m mbô, ó nyě dwé ó Pétrus, bé e Yʉánɛs mɔnɨ́. 19Nye e bé ó: «Dwéʼ gá me ntémé nkul ó, mʉr nyɨnyɛ̂h mé ókɛl mébô nyá, bíʼee Sísǐm mé Nzyɛ̌m.» 20Pétrus nyɨɛ nzě kǎ lɛ́ɛ e né ó: «Bɨ̌n e mɔnɨ́ yô bɨ́bɛ̂h dímɨɨ ɨ́ jɔʼ gwár, ebě, go sí bánǎ jwɨʼ ó, ndwéá mé Nzyɛ̌m, wé sá ó bwámɔɔ e mɔnɨ́. 21Gó akúnwo e bá nkɔ̂b ɨ́ lɔ̌b wɨ̂, nkʉ̂ gúú pâʼ tɨ̂, ebě, lémé gô, wé abě tîtyěl ɨ́ míh mé Nzyɛ̌m. 22Nó túmáá koo e bibébebébe bíjwɨʼ gó dí e byé ɨ́ léme bí. Go e dwírá léme, le ejɨʼla e Tî Yésʉs ó, nye pɛ́ʼɛɛ go baa ébébe nyê niʼé gó ɨ́ lɔ̌b jwɨʼ gô bé e yé ɨ́ léme yɨ́, nyé ókpɛl nó. 23Ebě, mě beé ó, go ó lwɨ́ŋlá le ebébe. Go ntémé, go ó mbilá ɨ́ menkara mé ébébe.»

24Simon ntɔ̂ʼ lɛ́ɛ e bé ó: «Jɨʼlaa gá e Dâ Nzyɛ̌m lɨ́ esú lâm ó, sá yɨ́yɛ̂h bɨ̂n lɛ́ɛ́ yɨ́, yé sá apyâl mê.»

25Jɔʼ bé á sil elɛ́ɛ, le eboʼlǒ lɔ́ɔ́ dí edumo e Tî Yésʉs wɨ́ yɨ́, bʉr o mílʉ́mlʉ́ obá baá, bé ntɔ̂ʼ báʼǎ tô Yerʉ́zalɛm. Nzɨ́ e nzɨ̌, bé á be lɨ́ ebuú tô le etúnǒ Mbɨambɨa Lɔ́ɔ ɨ́ mekwár mé sí Samarî.

Philippe, bé e cwɨhá mʉ̂r Etiopî

26Nó ó éngeles mé Dâ á lɛ́ɛ e Philippe ó: «Mɔaa sí. Tóʼ nkǒ páʼ díbé tie, ɨ́ nkpǎʼ dí esulǒ Yerʉ́zalɛm, tô Gáza wɨ́. Nkpǎʼ waá, wé cɨɨ ó ɨ́ lʉá.»

27Philippe ntɔ̂ʼ mɔa, tô. Nye dína téme-nzɨ̌ nɛ́ɛ: nyʉ́ʉ́ mʉ̂r ntɔ̂ʼ kœb nyê. Yé á be ó cwɨhá mʉ̂r Etiopî á be bâŋ másǎ nɨ́nɨ́ɨ́ wɨ́. Wé á sɨséa ó, kwá mé njwɨ́ɨ mʉmá á be ɨ́ sí Etiopî, díé lé Kandâs nyá. Cwɨhá mʉ̂r waá, wé á duho ó, Yerʉ́zalɛm, nko nyé á pa to dwe Nzyɛ̌m kûm yɨ́. 28Nó wé á nze búla, ndîndǐl ɨ́ kálîʼ yé kʉ́, le etô le eláa mékaná ngwíha milɔ̌b mé Nzyɛ̌m Ésayie á cɛma má. 29Sísǐm mé Nzyɛ̌m ntɔ̂ʼ lɛ́ɛ e Philippe ó: «Síhláa. Tó dǐ bǎʼ e kálîʼ.»

30Philippe nzě tô kám, tó tyɛ̂b bǎʼ e kálîʼ, ntɔ̂ʼ jóʼo mʉ̂r Etiopî waá lɨ́ eláa mékaná ngwíha milɔ̌b mé Nzyɛ̌m Ésayie á cɛma má. Nye ntɔ̂ʼ dî e né ó: «Nzê go lɨ́ ejóʼǒ sá gó dí eláǎ nɨ̌ ɛ́?»

31Nye e Philippe ó: «Mʉ̂r bé atɨ́e mé yǎ nó, á wáǎ mbi mé dí e nkul ejóʼo wɨ́ ɛ́?»

Nó nyé á lɛ́ɛ e Philippe ó, nye kálwaa ɨ́ kálîʼ, bɨ́bɛ̂h díʼee ɨ́ diá yé yaá. 32Náǎ yé ó, pêh Mékaná mé Nzyɛ̌m nyé á lɨláa yɨ́, yé á lɛ́ɛ ó:

“Nye á di ó mpʉ̌ nteme

mû lɨ́ etó tíʼɔɔ twíí yɨ́.

Nye á be ó mpʉ mâ nteme dídí ɨ́ puuu

ɨ́ jɔʼ bé dí ecɨa nyé myě yɨ́ nyá.

Nye á bé abɛ́ɛ̌ num.

33Bé á si sámle nye.

Bé á bé atíʼe nyé lɔ̌b wé lɨ́ otîtyěl.

Nzé ngá lɛ́ɛ ó,

nye á si líʼe bwân sí?

Ebě, bé á si pɛʼ nye ɨ́ sí yɨ̂.”

34Cwɨhá mʉ̂r waá ntɔ̂ʼ dî e Philippe ó: «Lɛ́yɨ́ɨ́ mê, me lɨ́ ejɨʼla e go: ngwíha milɔ̌b, nye á cɛma mpʉ́nʉ̌, dumo e wáa mʉ̂r? Nzê ɨ́ lɔ̌b wé nye mʉr tɨ̂ʼ ɛ̌? Nzê ɨ́ lɔ̌b mʉ̂r swîh ɛ̌?»

35Philippe ntɔ̂ʼ táare ɨ́ péh Mékaná mé Nzyɛ̌m gwár e gwár yaá, nzě lɛ́ɛ nyé Mbɨambɨa Lɔ́ɔ dí edumo e Yésʉs wɨ́. 36-37Ɨ́ mpʉ bé á tʉ̂to nzɨ́ e nzɨ̌ yɨ́, bê nzě pyâl ɨ́ yʉ́ʉ́ gúmo, yé á be e medíbé yɨ́. Cwɨhá mʉ̂r waá ntɔ̂ʼ lɛ́ɛ e né ó: «Paá bee: medíbé ó mâ! Yé dí e nkul ekǎ kamle mé lɨ́ eduŋɔɔ?»

38Nye ntɔ̂ʼ dwe twíí ó, bé tyélɨɨ kálîʼ. Philippe, bé e né bɨ́bɛ̂h, bê nzě sulo ɨ́ medíbé. Philippe ntɔ̂ʼ du nyê. 39Pɔʼá bé á pʉʼa ɨ́ medíbé yɨ́, Sísǐm mé Tî Yésʉs ntɔ̂ʼ pɛ̌ʼ Philippe tɨ̂, syɛ̂l mesâ ntɔ̂ʼ lîʼ náǎ, akǎ bee nyê. Nye ntɔ̂ʼ laa, tô e tyen yé dóló le ekʉ́ soho. 40Philippe á ka to pâm ó Ázɔt. Nye á be ó lɨ́ elaa bínkana e bínkana byɛ̂h lɨ́ etô le etúnǒ Mbɨambɨa Lɔ́ɔ ɨ́ mekwár mɨ́mɛ̂h, tó pyâl ɨ́ jɔʼ nyé á pyâl ɨ́ Kesáre yɨ́.

Currently Selected:

Milʉ́mlʉ́ 8: ozm

Highlight

Copy