Milʉ́mlʉ́ 4
4
Pétrus, bé e Yʉánɛs ɨ́ mpǒm bʉ̌m nɨ́nɨ́ɨ́
1Pétrus, bé e Yʉánɛs dína lɨ́ elwib nó nɛ́ɛ: opara, le njwɨ́ɨ odwéela ó mpáh Nzyɛ̌m, le oSadwisyɛ̂n nzě pyálɔɔ ɨ́ sulûm. 2Bé á be ó, bé mû miléme ɨ́ díʼa díʼa, ebě, Pétrus, bé e Yʉánɛs, bé á be lɨ́ elɛ̂ʼle bʉ̂r le etúno ó, Nzyɛ̌m ópɛh ódwe ó, ɨ́ nzɨ̌ mé Yésʉs. 3Nó bé á nze mɛ̂r bê, gbáŋɔɔ bé ɨ́ mbʉʼ, bónɔɔ̌ mɛ́n, ebě, yé á be ó, yé mû medwíne mé pum. 4Sâ gwár, bʉr ɨ́ buo buo o b'á jóʼo milɔ̌b myaá bá, bé á be ó sí bûʼla. Tâŋ bʉrʉ̂m o b'á dwira miléme bá, nye á si pyâl kúnókúno e bʉr otɔ́ɔ́sin otɛ̂n.
5Ɨ́ mɛ́n tɨ̂, ojwɨ́ɨ, le otɔ́má bʉ̂r, le olɛ̂ʼla o métié nzě swâl Yerʉ́zalɛm. 6Yé á be ntémé ó, le Ánas, á be njwɨ́ɨ opara nyá. Tɨ̂ʼ ntémé, yé á be ó, le Kayɨáfa, le Yʉánɛs, le Alexandre ti e bʉ́ʉ́ bʉ́rʉ̂m bé á byɛ̂l ɨ́ mpóʼo mé Ánas bá. 7Nó bé á nze tyêl Pétrus ndu e Yʉánɛs ɨ́ mpǒm nyɔ́ɔ́, díŋɔɔ e bé ó: «Bɨ̌n bé á pʉgʉ tiʼ nye nó, e nkul me nzé ɛ́? Yé bé bɨ̌n bé á si twóolo díé é nyʉ́ʉ́ mʉ̂r nó, yé á be laá mé nzé?»
8Nó, Pétrus, lwɨ́ŋlá e Sísǐm mé Nzyɛ̌m, á lɛ́ɛ e bé ó: «Minjwɨ́ɨbʉr le otɔ́má bʉ̂r! 9Bɨ́n ódî bɨ́h múh ó: “Yé bɨ́n á sâ syɛ́ɛla mpâm kwá nzwoó nyâʼ?” nó, le ntémé ɨ́ lɔ̌b nzɨ́ bɨ́h á tiʼ nye e tɨ̂ʼ nyɨ́ nó, 10bɨ̌n óbɛ̂h le bʉr o b'Ɨ́zraɛ̂l bɨ́bɛ̂h, gʉ́ŋáá gá bé ó, mʉr bɨ́n mû lɨ́ ebee lɨ́ etyɛ̂b tîtyěl nyâ, nye mû mbɨ̂mbɨá ó ɨ́ lɔ̌b nkûl díé mé Yésʉs-Krîst, mʉr Nazarɛ̂t. Yésʉs waá ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá. Tó kœb ó, Nzyɛ̌m á si pɛh nye lɨ́ odwe. 11Yésʉs waá ó dí mʉr Mékaná mé Nzyɛ̌m dí elwib ɨ́ lɔ̌b wé nyá. Yê cɛmá ɨ́ Mekaná mé Nzyɛ̌m ó:
“Ekóʼ bɨ́n, oswim, bé á pyêh lɨ́,
lé ó mû ekóʼ e dí esúʼo médwii me sɔ́ŋ lɨ́.”
12Bʉr o dí ebǐ twiʼ bá, bé jaá bi yé ó kwá nyé. Ebě, yé abe e lʉ́ʉ́ díe eswîh Nzyɛ̌m á lɛ̂ʼle mɨná gá ó, lé e nkul ebáʼǎ dwe bʉ̂r twiʼ lɨ́.»
13Bʉr ó bʉm ntɔ̂ʼ kâm lɨ́ ebeě mpʉ̌ Pétrus, bé e Yʉánɛs, bé á lwib ɨ́ kpɛŋlɛm, abáawǒ sɔ̂ʼ yɨ́. Bé á be lɨ́ ekâm ntémé mpʉ bé á lwilwib lɨ́ otîtyěl, bɨ́ɛ yɨ́ɛ abe bʉ̂r o b'á sâ sʉkʉ́lʉ bá yɨ́. Bê nzě kǎ dweʼe ó, bé á kʉ be ó, bʉr ó sɔ́má mé Yésʉs. 14Bé á be lɨ́ ebee ntémé mʉr á pa tiʼɔɔ nyá náǎ tîtyěl, bǎʼ e bê. Bé ntɔ̂ʼ di ɨ́ jolaaa, abe e sá bé yálaa. 15Bé ntɔ̂ʼ pyêl bé kʉ̌l ɨ́ bʉ̌m nɨ́nɨ́ɨ́. Bé ntɔ̂ʼ sáa pɨ̂ʼ. 16Bé á lɛ́ɛla páʼ nyɔ́ɔ́ ó: «Mɨná sâʼ gá bʉr bâʼ nyá? Ebě, bʉr ó Yerʉ́zalɛm bɨ́bɛ̂h, bɨ́ gʉ́a ɨ́ pébébé ó, bɨ́ lɛ̂ʼle nkûl nyɔ́ɔ́ le ánɨ̂nɨ̂n esimá lɨ̂. Mɨná bé abe e nkul ekǎ sóŋlo gá lê. 17Yé damá bé nó, lɨ́ esú ó, lɔ́ɔ́ syɛ́ɛla yɨ̂, wé ayɨ́ myaŋla ɨ́ páʼ bʉ̂r bɨ́bɛ̂h, mɨná bɛ́ŋɨɨ gá bé ó, bé sá akǎ báʼǎ lwib e mʉr swîh ɨ́ díé mé Yésʉs.»
18Bê nzě báʼǎ jébe bê, nzě lɛ́ɔɔ e bé ó, bé gwáʼaa elwib le edwe bʉ̂r gúú lɛ́ʼlá swîh ɨ́ díé mé Yésʉs. 19Pétrus, bé e Yʉánɛs bɨ́ɛ nzě yala e bé ó: «Bɨ̌n bʉr o tɨ̂, tíʼáá gá lɔ̌b wɨ̂: nkʉ̂ yé ɨ́ mbɨa ɨ́ míh mé Nzyɛ̌m ó, bɨ̌h jáa jóʼo bɨ́n, asâ nyɨ́ɛ mejóʼo. 20Yé abe e sá dí e nkul ebá sâ ó, bɨ̌h káraa elɛ́ɛ̌ sá bɨ́h á bee le ejóʼo yɨ́.»
21Bʉr ó bʉm ntɔ̂ʼ báʼǎ bɛ̂ŋ bê. Bé ntɔ̂ʼ bírɔɔ bê. Bé á bé abee nzɨ́ edwe bé bintɨ́ʼá, ebě, bʉr bɨ́bɛ̂h, bé á be ó lɨ́ egúmlǒ Nzyɛ̌m ɨ́ lɔ̌b syɛ́ɛla bé á pa sâ yɨ́. 22Ebě, mʉr á tiʼe e nzɨ̌ esimá laá nyá, á be ó e mimbû mekám ménâ le mpubuʼó.
Minjɨʼla mí óbûʼla
23Jɔ̌ʼ Pétrus, bé e Yʉánɛs, bé á bírɔɔ yɨ́, bê nzě tô nkǒ bɨ́ɔɔ́ bɔ́ɔ́, bé á be yɨ́. Bé ntɔ̂ʼ lɛ́ɛ bé sá yɨ́yɛ̂h ójwɨ́ɨ ó mpáh Nzyɛ̌m, le otɔ́má bʉ̂r, bé á sâ bé yɨ́. 24Jɔʼ bé á jóʼo lɔ́ɔ waá yɨ́, obûʼla ntɔ̂ʼ táare éjɨʼla e Nzyɛ̌m. Bé ó: «Dâ ɛ̌, go ó b'á kuho kʉ́ e sí, ndu e l'ekomlo mâŋ ti e bisá bíbyɛ̂h bi dí tɨ̂ʼ bí. 25Go á lwib e nzɨ̌ Sísǐm gô, lwib ntémé e nzɨ̌ me sɔ́ŋ mpám wɨ́h David, syɛ̂l mesâ gǒ ó:
“Bikûl, byé kpaa mébúʼ ɨ́ yé?
Bikûl, byé kúhló mépɨʼ
me dí abe e nyɔm má ɨ́ yé?
26Ojwɨ́ɨ́ ó sí, bé á si tyɛ̂b ɨ́ tyé dɔ̂m.
Minjwɨ́ɨbʉr, myé á sáa pɨʼ ó,
bé lwímlaa e Dâ Nzyɛ̌m,
bé e Mʉr nyé á lœm múló mé jwɨ́ɨ nyá.”
27Mpʉ yaá ntémé ó yé á ka sûʼla yɨ́, ebě, yê tyeetye ó, Erôd bé e Pɔ́ŋtus Pilátos, bé á si syɛŋa ɨ́ nkana yɨ̂, bé e bʉr o bíkûl ti e baá ó bé Ɨ́zraɛ̂l. Bɨ́bɛ̂h, bé á si di bʉm, sáŋɔɔ pɨ̂ʼ ó, bé lwímlá ó e syɛ̂l mesâ gǒ, Yésʉs, mʉr dí ti, waá gó á lœm múló mé jwɨ́ɨ nyá. 28Nkúná syɛ́ɛla bé á sâ yɨ́, yé ó b'á lóŋlo ekǎn gó á boo lɛ́ɛ ɨ́ nkul nyǒ le gwɨ́má yô lɨ́. 29Nó ó, Dâ ɛ̌, ɨ́ báánâ, jóʼáá mpʉ bé mû kǎ bɛ̂ŋ bɨ́h yɨ́. Dibɨɨ ósyɛ̂l o mésá bô nzɨ̌ ó, bé lɛ́yɨɨ lɔ́ɔ́ gô ɨ́ kpɛŋlɛm, abáawǒ sɔ̂ʼ. 30Syɛ́mɨ́ɨ́ mbó gô, go e lɛ́ʼlé nkûl nyǒ. Go e tíʼ mímbêl ɨ́ díé é syɛ̂l mesâ gǒ Yésʉs, mʉr dí ti nyá. Sɨ́sáʼ ntémé mesimá ti e bisá bí ékâm ɨ́ díé lé.»
31Le bé á sil ejɨʼla e Nzyɛ̌m, le ntɔ̂ʼ gúmó bé á syɛŋa yɨ́, yé á kubla. Sísǐm mé Nzyɛ̌m nzě lóno bɨ́bɛ̂h ɨ́ miléme, bé ntɔ̂ʼ táare élɛ́ɛ̌ lɔ́ɔ́ mé Nzyɛ̌m ɨ́ kpɛŋlɛm, abáawo bá yʉ́ʉ́ sɔ̂ʼ.
Mebi mé óbûʼla
32Ɨ́ sɔ́má óbûʼla bɨ́bɛ̂h, bé á be ó lémé ngwár ti e sísǐm ngwár. Abe e mʉr ngwár ɨ́ sɔ́má yɔ́ɔ́ á be e nkul elɛ́ɛ ó, byé bísâ, byé á jaa gúmo ó, njɨ e nye mʉr tɨ̂. Páʼ nyɔ́ɔ́, sá yɨ́yɛ̂h, yé á bɨbe ó sadága. 33Bʉr o mílʉ́mlʉ́ mé Yésʉs, bé á bʉboʼlo pahá sóo mé Tî Yésʉs ó e nkul nyɨnyɛ̂h. Nó ntémé ó Nzyɛ̌m á sʉ bé metyɛʼ me mpóm ɨ́ ntʉʉʉ́ yɨ́. 34Sɔ̂ʼ, yé á bé abe mʉ̂r ngwár ɨ́ sɔ́ɔlʉ, ebě, bʉr o b'á bɨbe e bipemé ndu e mimbɛ̌r bá, bé á sɨsâ ó, bɛ́mɔɔ byê, nzeŋɔɔ e mɔnɨ́ yé á duho tɨ̂ʼ yɨ́, 35nzě tímlɔɔ bʉ̂r o mílʉ́mlʉ́ mé Yésʉs yǎ. Nó bé á nʉnʉa mɔnɨ́ yaá, bê nzě kab mʉ̂r nyɨnyɛ̂h dû, mpʉ̌ gwɨ́má mʉ̂r á be yɨ́.
36Yé á be ó e nyʉ́ʉ́ mpʉ́n á be e díe ó, Yóseb nyá, mʉr onzweh mé Levî, waá á byɛ̂l ɨ́ tíhé Swiprʉ̂s nyá. Bʉr o mílʉ́mlʉ́, bé á ka jwɨr nye lʉ́ʉ́ díe ó, Banabâs. (Nó yé páʼlɔ́ɔ́ ó: “Póblobʉr”.) 37Nye á si bɛ́ma pemé yé á gúmo e né yɨ́, ntɔ̂ʼ nze e mɔnɨ́ tɨ̂, nzě tímle bʉ̂r o mílʉ́mlʉ́ yǎ.
Currently Selected:
Milʉ́mlʉ́ 4: ozm
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in