Luka 1
1
Ko waɗi dewtere ndee winndaa
1Yaa Tawfilus tedduɗo, himɓe ɗuɓɓe puɗɗi winndude habaru dow ko Iisa waɗi hakkune meeɗen. 2Habaru mo ɓe mbinndi oo duu, ƴuwaana he kunndule aranɓe seedoriiɓe gite mum'en ko Iisa waɗi. Kamɓe duu laatii halfinaaɓe golle anndinde himɓe haala Alla. 3Miin duu, mi tewtirii hakkillo am kujje ɗeen fuu ngam mi winnda ɗe dey-dey no ɗe ngaɗiraa. 4Mi winndanii ma habaru oo ngam tabbintina goongaaku ekkintinol ngol keɓuɗaa.
Bannginol dimeeki Yahaaya gaɗoowo batisma
5Nder laamu *Hirudus, laamiiɗo leydi Yahudiya, no woodunoo *cakkanoowo Alla gom bi'eteeɗo Jakariya, jeyaaɗo nder hawriine *cakkanooɓe Alla wi'eteene Abiya.#1.5 Jakariya e hawriine mum no jippotooɓe e Haaruuna cakkanoowo Alla mawɗo gom. Dee-Jakariya no wi'ee Elisabet, o ƴuwi he lenyol Haaruuna. 6Jakariya e deekum fuu no dartiiɓe yeeso Alla, feloore fuu walaa he maɓɓe. Ɓe tokkuɓe tilsinooje Joomiraawo e farillaaji mum duu. 7Ɓe keɓaay ɓeyŋu, ngam Elisabet no dimaro, ɓe fuu ɗiɗo duu, ɓe naywi.
8-9Nder tawaangal *cakkanooɓe Alla, *cakkanoowo Alla gom suɓetee, naata nder *Juulirde mawne ngam waɗude sadakaaji gaɗanteeɗi Alla. Nyannde gom, kuɗel Jakariya suɓaa ngam o naata nder *Juulirde mawne, o wula uurdi nder mayre. 10Wakkati uurdi ndiin wuletee, jama'aare ndeen fuu darii yaasin no du'oo. 11Sey maleykaajo Joomiraawo gom wanngani mo, no darii nyaamo urorde ndeen. 12Wakkati Jakariya hi'unoo maleykaajo oon, hakkillo makko ummii, kulol nanngi mo. 13Amma maleykaajo oon wi'i mo :
—Jakariya, taa hulu, ngam du'aa'u maaɗa jaabaama. Elisabet, jom suudu maa, no rimante ɓiɗɗo gorko, inndiraa mo Yahaaya. 14Suka dimaaɗo oo no waddante welwelo manngo. Himɓe ɗuɓɓe nanan belɗum dimeeki makko. 15O laatoto neɗɗo mawɗo yeeso Joomiraawo. O yarataa cabiijam e ko soptinta hoore fuu. O heewan *Ruuhu Ceniiɗo illa nder reedu inniiko. 16O wartiran ɓiɓɓe *Isra'el ɗuɓɓe to Alla Joomiraawo mo ɓe ndewata. 17O artan *Almasiihu warde. Nder ir baawɗe Ruuhu Alla ɗe annabi Eliya heɓunoo o wartirta ɓerɗe baabiraaɓe har ɓiɓɓe mum'en, hakkillooji murtuɓe har himɓe dartiiɓe. O siryoo lenyi duu ngam garki Joomiraawo.
18Jakariya ƴami maleykaajo oon, wi'i mo :
—Noy anndiranmi ko mbiiɗaa ɗum no goonga ? Ngam miin, mi naywi, deekam duu, duuɓi mum ɗuuɗi.
19Maleykaajo oon jaabii mo, wi'i :
—Miin woni Jibirilla takkiiɗo Alla, lilaaɗo he maaɗa ngam haalane habaru lobbo oo. 20Joonin a beebeete, a waawtaa yecci sey nyannde ko mbi'umaami ɗum tabbiti, ngam a goonɗinaay. Amma ɗum tabbitowan nde wakkati majjum waɗi.
21Himɓe no yaasin no ndoomi Jakariya. Ɗum haayɗini ɓe ko o ɓooyi nder *Juulirde mawne ndeen. 22Wakkati o wurtinoo, o heppi fuu haaldude he maɓɓe. Nden ɓe paami ko o hi'i ko haayɗini gom nder mayre. O beebii, o darii omo tinndina ɓe he juuɗe. 23Wakkati golle makko kantunoo, o hooti wuro makko.
24Balɗe seɗɗa gaɗa mum, deekiiko Elisabet saawi, suuɗii lebbi joy, no wi'a :
25—Ndaaree ko Joomiraawo waɗani kam. Nder wakkati mo hiɗi, o hi'i yurmeene am, o ittanii kam mone yeeso himɓe.
Bannginol dimeeki Iisa
26Nder lewru Elisabet jeegaɓuru, Alla lili maleyka Jibirilla Nasaratu nder leydi Galili. 27O lili mo he surbaajo nannganaaɗo Yusufu, ƴuwɗo he lenyol Daawda. Surbaajo oo no wi'ee Mariyaama, o anndaa gorko abada. 28Jibirilla wari to makko, wi'i mo :
—Jam woni, aan keɓuɗo moƴƴere ƴuwne to Alla. Joomiraawo no wondi he maaɗa.
29Haala Jibirilla ummini hakkillo Mariyaama sanne faa omo ƴama omo ƴamtinoo hoore makko maana sannoore ndee. 30Jibirilla wi'i mo :
—Taa hulu, Mariyaama, ngam a heɓii moƴƴere ƴuwne to Alla. 31Ndaa, a saawan, ndimaa ɓiɗɗo gorko, inndiraa mo Iisa. 32O laatoto mawɗo, o noddirtee *Ɓii-Alla Toowɗo. Alla Joomiraawo hokkan mo laamu maamiiko Daawda. 33O laamoto dow lenyol Yakuuba#1.33 Lenyol Yakuuba kam woni himɓe Isra'el. faa abada abadin, laamu makko duu walaa keerol.
34Mariyaama ƴami maleyka Jibirilla, wi'i :
—Noy ɗum laatortoo, miin mo anndaa gorko sam ?
35Jibirilla jaabii mo, wi'i :
—*Ruuhu Ceniiɗo no jippoto dow maaɗa,
baawɗe Alla Toowɗo no huurete.
Ngam majjum, ɓiɗɗo ceniiɗo mo ndimataa oon no noddirtee *Ɓii-Alla. 36Ndaa Elisabet, sakiike maa duu saawi. Baa ko o naywi, o riman ɓiɗɗo gorko. Kanko mo himɓe mbi'annoo no dimaro, jooni omo nder lewru makko jeegaɓuru, 37ngam walaa fuu ko hepporta Alla.
38Mariyaama jaabii mo, wi'i :
—Ndaa, mi korɗo Joomiraawo. Ɗum waɗa he am hano no mbi'irɗaa.
Nden maleykaajo oon dilli.
Mariyaama humpitowake Elisabet
39Nder balɗe Jibirilla haaldunoo he Mariyaama, nyannde gom Mariyaama ummii dow ko yaawi yehi nder wuro leydi Yahudiya gom tawaango nder baamle. 40Wakkati o yottinoo, o naati nder hoggo Jakariya, o sanni Elisabet. 41Wakkati Elisabet nanunoo sannoore Mariyaama ndeen, ɓiyiiko dimmbi nder reedu makko. Elisabet hebbinaa *Ruuhu Ceniiɗo, 42o huuɓi daane mawne, o wi'i :
—A barkinaaɗo ɓurɗo rewɓe fuu, ɓiɗɗo gonɗo nder reedu maa duu no barkinaaɗo ! 43Noy potumi, faa inna Joomiraawo am wara to am ? 44Ndaa, wakkati sannoore maa toɓɓinoo nder nowru am, ɓiɗɗo gonɗo nder reedu am dimmborake welwelo. 45A belɗo hoore, aan goonɗinɗo kumnol ko Joomiraawo wi'unoo ma !
Jimol Mariyaama
46Mariyaama wi'i :
—Yonki am no teddina Joomiraawo,
47ɓerne am duu heewi welwelo Alla Kisinoowo kam,
48ngam o jaɓi daarude kam,
miin korɗo makko leesuɗo.
Illa jooni, jamanuuji fuu no noddiran kam belɗo hoore.
49Ngam Jom baawɗe waɗanii kam kujje mawɗe !
Innde makko no seniine.
50Yurmeene makko no faa abada dow hulooɓe mo fuu
nder jamanuuji fuu.
51O waɗi kujje mawɗe he junngo makko semmbiɗingo,
o sankitii ɓe ɓerɗe mum'en keewiri mawnitaare.
52O jippinii laamiiɓe dow laamu mum'en,
leesuɓe duu, o ɓanti ɗum'en.
53O harni rafaaɓe kujje lobbe,
riikuɓe duu, o soƴƴi ɗum'en juuɗe ɓole.
54-55O walli lenyol *Isra'el, lenyol tawaangol nder golle makko.
O yeggitaay alkawal ngal o waɗannoo maamiraaɓe himɓe Isra'el,
Ibrahim e jippotooɓe he mum faa abada.
56Mariyaama jooɗodii he Elisabet ko waɗata lebbi tati, nden gaɗa mum o hooti.
Dimeeki Yahaaya gaɗoowo batisma
57Wakkati lebbi Elisabet kuuɓunoo, o rimi ɓiɗɗo gorko. 58Wondiraaɓe makko e koreeji makko fuu nani moƴƴere mawne ndee nde Joomiraawo waɗani mo. Nden ɓe kawri ɓe mbelbeltidi he makko.
59Wakkati cukalel ngel waɗunoo balɗe jeɗɗi, himɓe ngari juulnol maggel. Ɓe ngiɗiino wattande ngel Jakariya, 60amma inniigel jaabii ɓe, wi'i :
—Aa'a, ngel wattee Yahaaya.
61Nden ɓe njaabii Elisabet, ɓe mbi'i :
—Nder lenyol maa fuu, walaa inndiraaɗo ir innde ndee.
62Ɓe ƴami baabiigel nder beebeere, noy o hiɗi ngel wattanee. 63O wi'i kam hokkee alluwal. O hokkaa ngal nden o winndi dow maggal o wi'i :
—Ngel wattanee Yahaaya.
Ɗum haayɗini himɓe fuu. 64Wakkati Jakariya wi'unoo ngel wattanee Yahaaya, wakkati mum da, hunnduko makko fiirtii, ɗemngal makko yoofaa, o fuɗɗi omo haala, omo teddina Alla. 65Kulal nanngi tawaaɓe seraaji makko fuu. Habaru oon sankitii nder wurooji tawaaɗi nder baamle Yahudiya fuu. 66Nanuɗo habaru oo fuu jogii mo nder ɓerne mum, tinni no ƴama hoore mum no wi'a : « Ɗume cukalel ngel laatoytoo nde ngel mawni ? » Ngam nde goonga junngo Joomiraawo no wondi he maggel.
Annabaaku Jakariya
67Jakariya, baaba cukalel ngel heewnaa *Ruuhu Ceniiɗo, nden waɗi annabaaku, wi'i :
68—Teddungal laatanoo Joomiraawo, Alla *Isra'el,
ngam o walli himɓe makko, o soptini ɓe.
69O lildani en Kisinoowo jom semmbe,
jippotooɗo he golloowo makko Daawda.
70Ɗum duu woni ko o haalunoo illa arannde
har kunndule annabiiɓe makko seniiɓe.
71O wi'i o hisinan en honnooɓe en,
o soptinan en he juuɗe wayɓe men fuu.
72O holli maamiraaɓe men yurmeene
o jogake amaana makko ceniiɗo,
73amaana mo o hunaninoo maamii'en *Ibrahim.
74-75O soptinan en he juuɗe wayɓe men.
Yeeso makko, ndeewen mo nder senaare e dartinaaku keddi balɗe men,
kulal fuu tawataake nder ɓerɗe meeɗen.
76Aan duu, ɓinngel am,
a noddirtee annabiijo Alla Toowɗo,
ngam a ardoto Joomiraawo
moƴƴinana mo laawol makko.
77Anndinaa himɓe makko laawol kisinam
ngam hakkeeji maɓɓe no njaafetee.
78Alla meeɗen no keewɗo yurmeene mawne,
ngam yurmeene makko,
o lildowan en jeyngol makko manngol diga dow,
79ngam ngol yaynana tawaaɓe nder nimre
e wonɓe nder ɗowdi maayde,
ngol ɗowa en dow laawol jam.
80Yahaaya no mawna, hakkillo mum no ɓeydoo. O hoɗowi nder ladde yeeruure naako wakkati mo o wanngintee yeeso himɓe *Isra'el oon yottii.
Currently Selected:
Luka 1: FUH
Highlight
Share
Copy

Want to have your highlights saved across all your devices? Sign up or sign in
© 2018, Wycliffe Bible Translators Inc.; © SIM Niger, 2018