مَاتِيُ 15

ندٛنُ مَامَعٜنْ

1سٜيْ وٛٻّٜ فَارِسَنْکٛعٜنْ اٜ مٛودِٻّٜ اَتَّوْرَ نغَرِ تٛ يٜىٰسُ دَغَ اُرُشَلِيمَ، ٻٜ مبِعِ، 2‏«‏نغَمْ طُمٜ تٛکُّٻٜمَ تٛکَّتَا ندٛنُ مَامَعٜنْ مٜىٰطٜنْ؟ نغَمْ ٻٜ لٛوتَتَا جُوطٜ مَٻّٜ کٛ ٻٜ ڤُطَّ ݧَامُکِ ݧَمْندُ؞»‏

3سٜيْ يٜىٰسُ نٛوتِي، وِعِٻٜ، ‏«‏اٛنٛنْ مَا، نغَمْ طُمٜ اٛنْ تٛکَّتَا کٛ اَللَّه وِعِ نغَمْ ندٛنُ مٛوطٛنْ؟ 4نغَمْ اَللَّه وِعِي، ‏‹‏حٛکُّ ݧَاکٛ مَاطَ اٜ مَدُوجٛ مَاطَ مَنْغُ،›‏ ندٜنْ، ‏‹‏کٛو مٛيٜ حُطِ ݧَاکٛ مُوطُمْ کٛو مَدُوجٛ مُوطُمْ دٛولٜ وَرٜىٰ؞›‏ 5اَمَّا اٛنٛنْ اٛنْ مبِعَ تٛ نٜطّٛ وِعِي ݧَاکٛ مُوطُمْ کٛو مَدُوجٛ مُوطُمْ، ‏‹‏فُو کٛ کٛکَّيْنٛمَامِ، مِ حٛکِّيطُمْ اَللَّه،›‏ تٛو، نَاع دٛولٜ نٜطّٛ اٛنْ مَوْنِنَ ݧَاکٛ مَاکٛ وٛنْ طٛنْ؞ 6نٛنْ نغَرْتِرْطٛنْ وٛلْدٜ اَللَّه مٜىٰرٜ نغَمْ ندٛنُ مٛوطٛنْ؞ 7اٛنٛنْ مُنَافُکِعٜنْ!‏ اِشَايَ وِعِي غٛونغَ ندٜ اٛ وَطِ اَنَّبَاکُ دٛوْ مٛوطٛنْ وِيکِ،

8اَللَّه وِعِي، ‏‹‏ٻٜنْ طٛنْ يِمْٻٜ اٜ حٛنْدُکٛ تَنْ ٻٜ مَوْنِنْتَيَمْ،

اَمَّا ٻٜرْطٜ مَٻّٜ اٜ نغٛطِّتِييَمْ؞

9اٜ مٜىٰرٜ ٻٜ مَوْنِنْتَيَمْ؞

اٜ ٻٜ اٜکِّتِنَ دٛوکَ يِمْٻٜ بٛ تٛ اَمْ طُمْ پِوٛيِ؞›‏ »‏

فِي غَطَيْطُمْ نٜطّٛ وَرْتَ مٛ لَاٻَا يٜىٰسٛ اَللَّه

10سٜيْ يٜىٰسُ نٛدِّ يِمْٻٜ حَوْرُتُٻٜ، وِعِٻٜ، ‏«‏کٜتِّندٜىٰ، ڤَامٛنْ؞ 11نَاع کٛ نَتَّتَ نٜطّٛ اٜ حٛنْدُکٛ وَرْتِرْتَ ٻٜرْندٜ مَاکٛ ندٜ لَاٻَا يٜىٰسٛ اَللَّه، اَمَّا کٛ وُرْتٛيْتٛو دَغَ ندٜرْ حٛنْدُکٛ مَاکٛ وَرْتِرْتَمٛ مٛ لَاٻَا يٜىٰسٛ اَللَّه؞»‏

12سٜيْ تٛکُّٻٜمٛ نغَرِ تٛ مَاکٛ، مبِعِمٛ، ‏«‏اَ اَنْدِ فَارِسَنْکٛعٜنْ نَنِي مٛنّٜرٜ ندٜ ٻٜ نَنِ کَنْ طٛنْ حَالَ کَ مبِيطَا؟»‏

13يٜىٰسُ نٛوتِي، وِعِ، ‏«‏فُو اَوْرٜ ندٜ طُمْ اَاوِ، تٛ نَاع ݧَاکٛ اَمْ مٛ دٛوْ اَاوِندٜ، طُمْ طٛوفَيْندٜ؞ 14اَلٜىٰٻٜ!‏ ٻٜ وُمْٻٜ اَرْدِيٻٜ وُمْٻٜ؞ تٛ بُمْطٛ اَرْدَکٜ بُمْطٛ، ٻٜ فُو طِطٛ ٻٜ نجَنَيْ ندٜرْ نغَيْکَ؞»‏

15سٜيْ بِيتُرُسْ وِعِمٛ، ‏«‏وِعُمِنْ مَعَنَ طُعُمْ مِسَالُ؞»‏

16يٜىٰسُ وِعِٻٜ، ‏«‏حَا جٛونِ اٛنٛنْ مَا اٛنْ ڤَامَايِ؟ 17اٛنْ اَنْدَا فُو کٛ نَتِّ ندٜرْ حٛنْدُکٛ نٜطّٛ ندٜرْ رٜىٰدُ مَاکٛ طُمْ نَتِّ، ندٜنْ طُمْ وُرْتٛتٛ؟ 18اَمَّا کٛ وُرْتٛيِي ندٜرْ حٛنْدُکٛ، دَغَ ندٜرْ ٻٜرْندٜ طُمْ پِوٛيِ؞ کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه؞ 19نغَمْ دَغَ ندٜرْ ٻٜرْندٜ نٜطّٛ ݧُمٛ کَلُّنغٛ وُرْتٛيْتٛو، اٜ وَرْحٛورٜ، اٜ نجٜىٰنُ، اٜ نجٜىٰنُ حَکُّندٜ يِمْٻٜ ٻٜ نغَلَا تٜىٰغَلْ، اٜ نغُيْکَ، اٜ شٜيْدَ فٜوْرٜ، اٜ وٛنُّکِ اِنْدٜ نٜطّٛ؞ 20طُعُمْ کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه، اَمَّا ݧَامُکِ ݧَمْندُ اٜ جُوطٜ طٜ لٛوتَاکَ نَاع کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه؞»‏

حٛولَارٜ دٜبّٛ کَنْعَانِيَنْکٜىٰجٛ

21يٜىٰسُ اَلِ طٛنْ يَحِ حَادٜ غَرِيجٜ تَايَ اٜ سِدٛنْ؞ 22سٜيْ رَا غٛطّٛ کَنْعَانِيَنْکٜىٰجٛ دٜبّٛ نٜطّٛ لٜيْدِ ندِنْ وَرِ نٛدِّ سٜمْبٜىٰ، وِعِ، ‏«‏مٛودِبّٛ، ٻِي دَوْدَ، يُرْمِنَنَمْ!‏ وٛنْغٛلْ غِنّٛلْ اٜ تٛرَّ ٻِطّٛ اَمْ سُرْبَاجٛ؞»‏

23اَمَّا يٜىٰسُ وِعَايِمٛ غٛطُّمْ؞ سٜيْ تٛکُّٻٜمٛ نغَرِ تٛرِيمٛ، مبِعِ، ‏«‏رِيوُمٛ، نغَمْ اٜ مٛ تٛکِّعٜنْ اٜ مٛ وَنَّعٜنْ اٜ وُلُّکِ!‏»‏

24سٜيْ اٛ وِعِ دٜبّٛ اٛنْ، ‏«‏مِ لِلٛيَاکَ تٛ وٛٻّٜ، سٜيْ تٛ بَالِ مَجُّطِ طِ لٜݧٛلْ اِسْرَاعِيلَ تَنْ؞»‏

25اَمَّا اٛ وَرِ اٛ دِشِّي يٜىٰسٛ يٜىٰسُ، اٛ وِعِ، ‏«‏مٛودِبّٛ، وَلَّمْ!‏»‏

26يٜىٰسُ نٛوتِي، وِعِ، ‏«‏طُمْ حَانَايِ طُمْ حٛشَّ ݧَمْندُ ٻِکّٛيْ طُمْ حُبَنٛوندُ کُتِحٛيْ؞»‏

27اٛ وِعِ، ‏«‏اٜىٰ، طُمْ نٛنْ، مٛودِبّٛ، اَمَّا کٛو کُتِحٛيْ اٜ ݧَامَ حٛرَانٛ جَنُطُمْ دَغَ تٜىٰبُرْ جٜيْطٛکٛيْ؞»‏

28سٜيْ يٜىٰسُ نٛوتِي، وِعِمٛ، ‏«‏حٛولَارٜ مَاطَ اٜ طُوطِ!‏ طُمْ وَطَنْتٜ نٛ نغِطَّا؞»‏ طٛنْ اٜ طٛنْ ٻِطّٛ مَاکٛ يَمْطِتِ؞

يٜىٰسُ يَمْطِتِنِي يِمْٻٜ طُطْٻٜ

29يٜىٰسُ اُمِّي، اَلِ طٛنْ، تٛکِّ حَادٜ مبٜىٰلَ غَلِيلِ، اٛ پٜنْتِ دٛوْ حٛشّٜىٰرٜ اٛ جٛوطِي؞ 30يِمْٻٜ طُطْٻٜ نغَرِ تٛ مَاکٛ، ٻٜ نغَدّٛيِ ٻٜ کٛيْطٜ جَرَاطٜ، اٜ وُمْٻٜ، اٜ لَپٛوٻٜ، اٜ ٻٜ مبَاوَتَا مٜتُکِ، اٜ وٛٻّٜ طُطْٻٜ غٛودُٻٜ ݧَوُوجِ؞ ٻٜ ندٜسِٻٜ يٜىٰسٛ مَاکٛ، سٜيْ اٛ يَمْطِتِنِٻٜ؞ 31يِمْٻٜ کَيْطِنِ ندٜ نغِعِ يِمْٻٜ ٻٜ مٜتَتَا اٜ مٜتَ، لَپٛوٻٜ اٜ نجَحَ، ٻٜ کٛيْطٜ جَرَاطٜ اٜ نجَاٻَ، وُمْٻٜ اٜ نغِعَ؞ سٜيْ ٻٜ مَنْتِ اَللَّه اِسْرَاعِيلَ؞

يٜىٰسُ ݧَمْنِي يِمْٻٜ ‏4,000

32سٜيْ يٜىٰسُ نٛدِّ تٛکُّٻٜمٛ، وِعِٻٜ، ‏«‏اٜ مِ نَنَ جُرُمْطُمْ يِمْٻٜ ٻٜعٜ نغَمْ حَنْدٜ بَلْطٜ مَٻّٜ تَتِ اٜ ٻٜ نغٛنْدِ اٜ اَمْ، اَمَّا ٻٜ نغَلَا کٛ ٻٜ ݧَامَتَ؞ مِ يِطَا ٻٜ ندِلِّدَ اٜ وٜىٰلٛ، نغَمْ طُمْ سَطَا ٻٜ ڤٜکّٛرَ دٛوْ طَتَلْ؞»‏

33سٜيْ تٛکُّٻٜمٛ مبِعِمٛ، ‏«‏تٛيٜ مِنْ کٜٻٛيْتَ بُرٛودِ ندٜرْ لَدّٜ ندٜعٜ کٜپَيْطُمْ يِمْٻٜ طُطْٻٜ ٻٜعٜ؟»‏

34يٜىٰسُ پَمِٻٜ وِعِ، ‏«‏بُرٛودِ نٛيٜ نغٛودُطٛنْ؟»‏

ٻٜ مبِعِ، ‏«‏بُرٛودِ جٛوٜىٰطِطِ اٜ لِپِّ سٜطَّ؞»‏

35سٜيْ اٛ وِعِ يِمْٻٜ حَوْرُتُٻٜ ٻٜنْ فُو ٻٜ نجٛوطٛو اٜ لٜيْدِ؞ 36اٛ حٛشِّ بُرٛودِ جٛوٜىٰطِطِ طُمْ اٜ لِپِّ طِنْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، کَمْٻٜ بٛو ٻٜ نغٜىٰدَنِ يِمْٻٜ ٻٜنْ؞ 37يِمْٻٜ ٻٜنْ فُو ݧَامِ کَارِ؞ غَطَ مَاجُمْ تٛکُّٻٜمٛ مٛٻْتِ کٛ حٛرِي، طُمْ حٜىٰوِ کٛنْدٛوجٜ جٛوٜىٰطِطِ؞ 38ݧَمْٻٜ ٻٜنْ وٛرْٻٜ تَنْ نغَطِ ‏4,000، رٜوْٻٜ اٜ سُکَاٻٜ لِمَاکَ؞

39غَطَ يٜىٰسُ جَٻِّتَکٜ حَوْرُتُٻٜ ٻٜنْ، سٜيْ اٛ نَتِّ کٛمِوَلْ، اٛ دِلِّ لٜيْدِ مَغَدَنْ؞

Currently Selected:

مَاتِيُ 15: fuv

Highlight

Copy