يَحَيَ 18

يٜىٰسُ نَنْغَامَ

1غَطَ يٜىٰسُ يٛتِّنِي ندٜعٜ دٛعَارٜ، اٛ دِلِّدِ اٜ تٛکُّٻٜمٛ ٻٜ کُولِ لُغّٜرٜ کِدِرٛنْ؞ ٻٜ نجَحِ وٛنْدٜ وِغٜىٰرٜ غٛودُندٜ نغٜسَ لٜطّٜ جَيْتُنْ، ٻٜ نَتِّ ندٜرْ لٜطّٜ طٜنْ؞ 2تٛو، يَحُودَ کٛکِّتِرَيْطٛ يٜىٰسُ اٜ اَنْدِ وِغٜىٰرٜ ندٜنْ، نغَمْ ندٜ طُطُّمْ يٜىٰسُ اٜ حَوْرَ اٜ تٛکُّٻٜمٛ تٛنْ؞ 3سٜيْ يَحُودَ يَحِ نغٜسَ کَنْ اٜ اَرْدِي کَوْتَلْ سٛوجِعٜنْ رٛومَ، اٜ وٛٻّٜ تَادِيٻٜ وُرٛ شٜنِينغٛ ٻٜ مَوْٻٜ اَرْدِيٻٜ دِينَ اٜ فَارِسَنْکٛعٜنْ لِلِ؞ اٜ ٻٜ نجٛغِي فِتِلَاجِ، اٜ جَمٜ حِيتٜ، اٜ کٛ طُمْ حٛنِرْتَ؞ 4يٜىٰسُ ندٜ اٜ اَنْدِ فُو کٛ حٜٻَتَمٛ، اٛ دَرِي يٜىٰسٛ مَٻّٜ اٛ پَمِٻٜ، اٛ وِعِ، ‏«‏طُمْ مٛيٜ طَٻِّتٛتٛنْ؟»‏

5ٻٜ مبِعِ، ‏«‏يٜىٰسُ نَجَرَنْکٜىٰجٛ؞»‏

اٛ وِعِٻٜ، ‏«‏طُمْ مِنْ؞»‏

يَحُودَ کٛکِّتِرَيْطٛمٛ بٛو اٜ دَرٛدِي اٜ مَٻّٜ؞ 6ندٜ يٜىٰسُ وِعِٻٜ، ‏«‏طُمْ مِنْ،»‏ ٻٜ شٛعّٛرِي غَطَ ٻٜ نجَنِ اٜ لٜيْدِ؞ 7سٜيْ يٜىٰسُ فُطِّتِ پَمِٻٜ وِعِ، ‏«‏مٛيٜ طَٻِّتٛتٛنْ؟»‏

ٻٜ مبِعِ، ‏«‏يٜىٰسُ نَجَرَنْکٜىٰجٛ؞»‏

8اٛ وِعِٻٜ، ‏«‏مِ يَادَکٜ مِ وِعِيعٛنْ طُمْ مِنْ؞ تٛ نِ مِنْ طَٻِّتٛتٛنْ، اَلٜىٰ يِمْٻٜ ٻٜعٜ ندِلَّ؞»‏ 9اٛ وِعُ نٛنْ نغَمْ کٛ اٛ وِعُنٛ حٜىٰوَ، ‏«‏مِ دُلَّايِ کٛو غٛعٛتٛ ندٜرْ ٻٜنْ طٛنْ ٻٜ کٛکُّطَايَمْ؞»‏

10سِيمَنْ بِيتُرُسْ اٜ وٛودِ کَافَحِ، سٜيْ سٛلْتِکِ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ ݧَامٛ؞ اِنْدٜ مَشُّطٛ اٛنْ مَلْکُسْ؞ 11سٜيْ يٜىٰسُ وِعِ بِيتُرُسْ، ‏«‏وَتُّ کَافَحِ مَاطَ ندٜرْ حٛلْغٛ مَاکِ؞ اَ ݧُمَ مِ يَرَتَا جَرْدُغٜلْ تٛرَّ کَ ݧَاکٛ اَمْ حٛکَّتَيَمْ؟»‏

يٜىٰسُ يَارَامَ يٜىٰسٛ حَنَانَ

12سٜيْ سٛوجِعٜنْ رٛومَ اٜ اَرْدِيطٛٻٜ اٜ تَادِيٻٜ وُرٛ شٜنِينغٛ نَنْغِ يٜىٰسُ، ٻٜ کَٻِّمٛ؞ 13اَرَنْدٜ ٻٜ نجَارِمٛ تٛ حَنَانَ اٜسِرَاوٛ کَيَافَ؞ کَيَافَ اٛنْ وٛنِ مَوْطٛ مَوْٻٜ اَرْدِيٻٜ دِينَ اٜ طُنْ طٛنْ ندُنْغُ؞ 14کَنْکٛ وٛنِ کٛکُّطٛ اَرْدِيٻٜ يَحُودَنْکٛعٜنْ شَاوٛرِ وِيکِ، طُمْ ٻُرِي نٜطّٛ غٛعٛتٛ مَايَ نغَمْ کٛو مٛيٜ؞

بِيتُرُسْ وِعِ اَنْدَا يٜىٰسُ

15سِيمَنْ بِيتُرُسْ اٜ غٛطّٛ تٛکُّطٛ يٜىٰسُ ٻٜ تٛکِّ يٜىٰسُ؞ ندٜ اٛنْ طٛنْ تٛکُّطٛ يٜىٰسُ غٛعٛتٛ اٛنْ مَوْطٛ مَوْٻٜ اَرْدِيٻٜ دِينَ اٜ اَنْدِمٛ، سٜيْ اٛ يَادِ اٜ يٜىٰسُ تٛ نجَيْرِ وُرٛ مَوْطٛ مَوْٻٜ اَرْدِيٻٜ دِينَ اٛنْ؞ 16اَمَّا بِيتُرُسْ دَرِي يَاسِ تٛ دَمُّغَلْ وُرٛ نغٛنْ؞ سٜيْ اٛنْ طٛنْ تٛکُّطٛ يٜىٰسُ مٛ مَوْطٛ مَوْٻٜ اَرْدِيٻٜ دِينَ اَنْدِ، اٛ وُرْتِي يَاسِ، اٛ مٜتَنِ دٜبّٛ ڤَامَنٛووٛ دَمُّغَلْ نغَلْ، اٛ نَتِّنِ بِيتُرُسْ؞ 17سٜيْ دٜبّٛ ڤَامَنٛووٛ دَمُّغَلْ اٛنْ وِعِ بِيتُرُسْ، ‏«‏اَنْ، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟»‏

بِيتُرُسْ وِعِ، ‏«‏کٛو سٜطَّ، نَاع مِ تٛکُّطٛمٛ؞»‏

18اٜ شَرٜلْ نغٜلْ اٜ وٛودِ ڤٜىٰوٛلْ، نغَمْ نٛنْ مَشُّٻٜ اٜ تَادِيٻٜ وُرٛ شٜنِينغٛ کُٻِّ حِيتٜ، اٜ ٻٜ ڤِلِينغٜ، اٜ ٻٜ اِرْفٛو؞ سٜيْ بِيتُرُسْ کَنُمْ مَا ٻَدِّي دَرِي ندٜرْ مَٻّٜ اٜ اِرْفٛو؞

مَوْطٛ مَوْٻٜ اَرْدِيٻٜ دِينَ پَمِي يٜىٰسُ

19سٜيْ مَوْطٛ مَوْٻٜ اَرْدِيٻٜ دِينَ پَمِ يٜىٰسُ دٛوْ تٛکُّٻٜمٛ اٜ دٛوْ اٜکِّتِنٛلْ مَاکٛ؞ 20يٜىٰسُ وِعِمٛ، ‏«‏کٛو ندٜيٜ اٜ مِ مٜتَنَ کٛو مٛيٜ اٜ نجَيْرِ؞ کٛو ندٜيٜ اٜ مِ اٜکِّتِنَ اٜکِّتِنٛلْ اَمْ ندٜرْ شُوطِ دٛعَارٜ اٜ ندٜرْ وُرٛ شٜنِينغٛ تٛ فُو يَحُودَنْکٛعٜنْ کَوْرَتَ؞ مِ مٜىٰطَايِ وِيکِ غٛطُّمْ اٜ سُوطٜ؞ 21نغَمْ طُمٜ پَمَتَايَمْ پَمْطٜ طٜعٜ؟ پَمُ يِمْٻٜ نَنْٻٜ اٜکِّتِنٛلْ اَمْ؞ غٛونغَ اٜ ٻٜ اَنْدِ کٛ مبِيمِ؞»‏

22ندٜ يٜىٰسُ وِعِ نٛنْ، غٛعٛتٛ ندٜرْ تَادِيٻٜ دَرِيطٛ حَادٜ مَاکٛ حٜلِّمٛ تٛ وٛلٛ، وِعِ، ‏«‏نٛنْ مٜتِرَنْتَا مَوْطٛ مَوْٻٜ اَرْدِيٻٜ دِينَ؟»‏

23يٜىٰسُ وِعِمٛ، ‏«‏تٛ نِ مِ وِعِي غٛطُّمْ طُمْ حَانَا، وِعُکَ کٛو مٛيٜ طٛعٛ؞ اَمَّا تٛ کٛ مبِيمِ طُمْ غٛونغَ، نغَمْ طُمٜ کٜلُّطَايَمْ تٛ وٛلٛ؟»‏

24سٜيْ حَنَانَ وَطِ طُمْ سٛعِّ يٜىٰسُ تٛ کَيَافَ مَوْطٛ مَوْٻٜ اَرْدِيٻٜ دِينَ، اٜ مٛ حَٻِّي؞

بِيتُرُسْ فُطِّتِي وِعِ اَنْدَا يٜىٰسُ

25بِيتُرُسْ اٜ دَرِي طٛنْ اٜ اِرْفٛو، سٜيْ وٛٻّٜ مبِعِمٛ، ‏«‏اَنْ مَا، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟»‏

اَمَّا بِيتُرُسْ يٜدِّ وِعِ، ‏«‏نَاع مِ تٛکُّطٛمٛ؞»‏

26غٛعٛتٛ ندٜرْ مَشُّٻٜ مَوْطٛ مَوْٻٜ اَرْدِيٻٜ دِينَ بَنْدِرَاوٛ نٜطّٛ مٛ بِيتُرُسْ اِتَّنِ نٛوْرُ اٛ وِعِ بِيتُرُسْ، ‏«‏نَاع مِ يِيدِيمَ اٜ مَاکٛ تٛنْ ندٜرْ نغٜسَ لٜطّٜ جَيْتُنْ؟»‏

27بِيتُرُسْ فُطِّتِ وِعِ، ‏«‏نَاع طُمْ مِنْ؞»‏ اٜ مٛ وِعَکَ نجَکَرْدِ حَنِ؞

يٜىٰسُ يٜىٰسٛ بِلَاتُسْ

28سٜيْ يَحُودَنْکٛعٜنْ کٛشِّ يٜىٰسُ دَغَ وُرٛ کَيَافَ ٻٜ نجَارِمٛ لَامٛرْدٜ غٛمْنَاجٛ رٛومَنْکٜىٰجٛ؞ اٜ شَرٜلْ نغٜلْ طُمْ اِلَا سُبَکَ؞ اَرْدِيٻٜ يَحُودَنْکٛعٜنْ نَتَّايِ لَامٛرْدٜ ندٜنْ، نغَمْ تٛع ٻٜ نغَرْتَ ٻٜ لَاٻَا، ٻٜ کَطٜىٰ ݧَامُکِ ݧَمْندُ حُمْتٛ سَکِّنْکِ؞ 29نغَمْ نٛنْ، بِلَاتُسْ وُرْتِي يَحِ تٛ مَٻّٜ پَمِٻٜ، وِعِ، ‏«‏طُمٜ نغُلّٛرْتٛوطٛنْ نٜطّٛ اٛعٛ؟»‏

30ٻٜ مبِعِمٛ، ‏«‏دَا نَاع اٛ غَطٛووٛ کٛ حَلِّ، دَا مِنْ نغَدَّايِمٛ تٛ مَاطَ؞»‏

31بِلَاتُسْ وِعِٻٜ، ‏«‏اٛنٛنْ اٜ کٛعٜ مٛوطٛنْ کٛشّٜىٰمٛ نغَطَنٛنْمٛ کِيتَ نٛ دٛوکَ مٛوطٛنْ وِعِ؞»‏

ٻٜ مبِعِمٛ، ‏«‏اٛنٛنْ رٛومَنْکٛعٜنْ اٛنْ اَلَتَامِنْ مِنْ تَپَنَ غٛطّٛ کِيتَ مَيْدٜ؞»‏ 32طُعُمْ وَطُ نغَمْ طُمْ حٜبِّنَ کٛ يٜىٰسُ وِعُنٛ دٛوْ اِرِ مَيْدٜ ندٜ مَايَتَ؞

33سٜيْ بِلَاتُسْ سٛعِّي ندٜرْ لَامٛرْدٜ، اٛ نٛدِّ يٜىٰسُ، اٛ پَمِمٛ اٛ وِعِ، ‏«‏اَنْ وٛنِ لَامِيطٛ يَحُودَنْکٛعٜنْ؟»‏

34يٜىٰسُ نٛوتِي، وِعِ، ‏«‏نغٛعٛلْ پَمٛلْ تٛ مَاطَ نغٛلْ پِوِ، کٛو وٛٻّٜ کٛکُّمَا حَبَرُ اَمْ؟»‏

35بِلَاتُسْ وِعِ، ‏«‏اَ ݧُمَ مِ يَحُودَنْکٜىٰجٛ؟ طُمْ لٜݧٛلْ مَاطَ اٜ مَوْٻٜ اَرْدِيٻٜ دِينَ نغَدُّمَا تٛ اَمْ؞ طُمٜ نغَطُطَا؟»‏

36يٜىٰسُ وِعِ، ‏«‏لَامُ اَمْ نَاع دَغَ ندُعُ دُونِيَارُ طُمْ پِوٛيِ؞ دَا لَامُ اَمْ دَغَ مَيْرُ طُمْ پِوٛيِ، دَا تٛکُّٻٜيَمْ کٛنَيْ نغَمْ ٻٜ کَطَ طُمْ نَنْغَيَمْ طُمْ وَطَيَمْ ندٜرْ جُوطٜ اَرْدِيٻٜ يَحُودَنْکٛعٜنْ؞ اَمَّا لَامُ اَمْ نَاع دَغَ ندُعُ دُونِيَارُ طُمْ پِوٛيِ؞»‏

37سٜيْ بِلَاتُسْ پَمِمٛ وِعِ، ‏«‏تٛو، اَنْ، اَ لَامِيطٛ وٛنْ طٛنْ؟»‏

يٜىٰسُ نٛوتِي، وِعِ، ‏«‏اَ وِعِي مِ لَامِيطٛ؞ نغَمْ طُعُمْ طُمْ دَݧِيَمْ، ندٜنْ نغَمْ مَاجُمْ نغَرْمِ ندٜرْ دُونِيَارُ نغَمْ مِ مٜتَ دٛوْ کٛ وٛنِ غٛونغَ؞ کٛو مٛيٜ غِطّٛ غٛونغَ تٛکَّيْ کٛ مبِيمِ؞»‏

38بِلَاتُسْ پَمِمٛ وِعِ، ‏«‏طُمٜ وٛنِ غٛونغَ؟»‏

يٜىٰسُ تَپَنَامَ کِيتَ مَيْدٜ

غَطَ بِلَاتُسْ وِعِي نٛنْ فُطِّتِ وُرْتِي يَاسِ تٛ يَحُودَنْکٛعٜنْ وِعِٻٜ، ‏«‏مِ تَوْرَايِمٛ غٛطُّمْ کَلُّطُمْ؞ 39اَمَّا طُمْ ندٛنُ مٛوطٛنْ مِ يٛوفَنَعٛنْ شُرَاطٛ غٛعٛتٛ شَرٜلْ حُمْتٛ سَکِّنْکِ؞ اٛنْ نغِطِ مِ يٛوفَنَعٛنْ لَامِيطٛ يَحُودَنْکٛعٜنْ؟»‏

40ٻٜ نٛوتِي ٻٜ مبِعِ اٜ سٜمْبٜ، ‏«‏نَاع اٛعٛ نجٛوفَنْتَامِنْ، يٛوفَنْمِنْ بَرَبَّسْ!‏»‏ بَرَبَّسْ اٛنْ بٛو اٛ غٛعٛتٛ ندٜرْ کَٻْدٛوٻٜ اٜ لَامُ؞

Currently Selected:

يَحَيَ 18: fuv

Highlight

Copy