Ntandiliko 19

Mambo lahakalenge la vanu va ku Sodoma

1Bahi avala malaika vavili nkuhwika ku Sodoma chinalyulo. Na Lutu áikele pannango wa imanga ya ku Sodoma. Lutu pavawene, nkuimila uhwena unavachingamila, nkuhunama kwa eshima mpaka pahi, 2nkuhaula kuchidoni,“Mmanang'olo vangu, kalibu kukaya kwangu, nangu ni ntumishi wenu. Muchimukalave medi mmadodo na kulala kukaya kwangu chilo cha nelo, koka ulyamba namambumbu muhwenehe na mwanda wenu.” Henga vanang'o nkuchidoni, “Nanga, hwetu tùmbelala chihi ukuno kuchiwanja, kuching'ati imanga.” 3Lutu nkuvapembeja namene, kuntululilo vanang'o nkukubali, nkuhwena unainjila nng'ande mwake. Lutu nkuvaandalila chakulya chohe namene pamo na mikate ikátaijwe hamila, vanang'o nkulyanga.

4Henga chilo kabla vakànambilala, valume vammalele va muimanga ya ku Sodoma, vijana na vasele vammalele, nkuidinguka ing'ande yanga Lutu. 5Nkunchema Lutu nkummuja kuchidoni, “Valume avala vaidîle kwakuwe vàvele kwachi? Vahumye pawelu, hwetu tùlembela tuvalale.”

6Lutu nkuhuma pawelu, akuno wachima nnango wa ing'ande yake, 7nkuvahaulila kuchidoni, “Chonde mmalangavangu, nannyuwanga munatende chinu anecho chihakalenge. 8Lola, nangu apano ngùvele na vana vangu vavili vachimahe, vakámmaite nnume. Nangu nìnnyuwanga nimwing'ange vali anevo uchinga muvatendele muchi chimulembela. Henga valume avano nìnnyuwanga munavatendele chinu chohecho, kwa kuva vàidile paing'ande yangu na ngùlembelewa nivachunge.”

9Henga anevo vanu nkuchidoni, “Uka wako! Wako paunaidile apano wavele mmidi, na hambi ùlitenda kuva nkúhukumu! Bahi tùmbekutenda vibaya kupunda chitumbevatenda anevo vayeni vako.” Bahi vanu anevo nkuntukuha Lutu, nkuhengelekelanga muyo uchinga vatutumule nnango wa ing'ande yake. 10Henga avala vayeni nkuchimula nnango, nkunyalodya makono lavo, nkummutangila Lutu nng'ande, nkuchima nnango. 11Anepo nkuvaputaja meho valume vammalele vanavele pannango, vijana na vasele, bahi nkusindwa kuuhwikila nnango.

Lutu àuka ku Sodoma

12Avala vanu vavili nkunnyaulila Lutu kuchidoni, “Dachi, ùvele na munu yunji apano, ikàva vana vako au vaposi va vana vako au alangavako vanji vaikâla muimanga aino? Vause apano upehi, 13kwa kuva, tùmbeyondonganga mwalehu imanga aino. Chitangelo chimmwikilidîle Yahwe kwamba venedi va apano ni chikulungwa namene, nanang'e ànitutuma tuide tukayondongange.”

14Bahi Lutu nkuvahwenela vaposi va vana vake nkuvahaulila kuchidoni, “Ukananga pachinu apano, kwa kuva, Yahwe àmbeiondonganga imanga aino!” Henga vanang'o nkumwona chihi kuva àtenda mang'wanyu.

15Bahi uhiku pauchele, malaika nkunkulumisa Lutu uvachidoni, “Takatuka ntwale n'jalo na vana vako vavili uyopa munaondongwa paimbeondongwa imanga aino.” 16Lutu nkuva walidoha-doha, bahi avala malaika vavili nkunkamula nkono Lutu na n'jawe na vana vake vavili, nkuvahumya panda imanga, kwa kuva Yahwe ámmikidile chididi. 17Pavavausije muimanga aneyo, malaika yumo nkuvahaulila kuchidoni, “Tukutanga mupohe umi wenu! Munalole nnyuma na wala munaimile pachinu pohepo nnuhunde aluno! Tukutilangila aneko kuchilambo cha machinga uyopa munaondongwa.”

18Lutu nkunnyaulila kuchidoni, “Chonde nang'olo wangu ngùyuwa inààve uchocho! 19Wako ngwòna ùnikatapaliwa na nangu, na ùngutendeledile lambone namene kwa kuupoha umi wangu. Henga aneko kuchilambo cha machinga nni kulehu namene. Na kwondongwa anekwo kumbeng'oja chihi kabla nikànambihwika aneko, nanangu nguchinguhwe. 20Lola, akula kùvele imanga inyoko, nangu nahulula chihi kutukutila aneko kwa kuva ìvele pepi. Bahi nguluhusu ngutukutile aneko. Aila nni imanga chihi inyoko, na aneko nguchingupohe umi wangu.”

21Nang'e nkunnyang'ula kuchidoni, “Haya, ǹnikubali chiuyuwite. Nangu nikambeyondonganga imanga aneyo. 22Bahi tukutila aneko upehi, nangu nikambetenda chinu chohecho mpaka paumbehwika aneko.” Na aneyo njo ing'anya inatendile imanga aneyo ichemwe Soali, mana lake “pachinu pajoko.”

Kwondongwa kwa imanga ya Sodoma na Gomola

23Lutu pahwikile kuimanga ya Soali liduva lívele lihumìlè tayali. 24Bahi Yahwe nkutonya moto wa baluti kuhaloka kumahunde muimanga ya ku Sodoma na ku Gomola, 25nkudyondonganga dimanga anedyo na luhunde lwammalele na vanu vammalele na mimeya yammalele nchilambo anecho. 26Henga n'jawe Lutu ánavele nnyuma mwanga Lutu, nkulauka kulola nnyuma, nkujuka sanamu ya munyu.

27Bahi nniduva ulyolyo, Iblahimu átakatwike ulyamba na mambumbu, nkupiyanya kuhwena pachinu apala pánaimidìlè walonjela nawi Yahwe. 28Iblahimu pahwikile pachinu anepo, nkulola kuluhunde mpata wa ku Sodoma na ku Gomola na eneo lyammalele lya luhunde, nkukangana palyonite lyohi ulitutuma mueneo lyammalele lya luhunde, muchi lyohi lihalôka nnitanuli likulungwa. 29Henga Nnungu áninkumbukila Iblahimu kwa kummusa Lutu n'dimanga dya nnuhunde, dyachiikala uchinga anaondongwe pamo na anedyo dimanga muuhiku aula Nnungu padyondongenge dimanga anedyo.

Kutandilika kwa Vamoabu na Vaamoni

30Lutu nkuyopa kuikala muimanga ya ku Soali, bahi nang'e pamo na vana vake vavili nkuhama muimanga aneyo, nkuhwena unaikala nnipanga, aneko kuchilambo cha machinga. 31Lutu na vana vake pavanavele aneko, mwali wake nkulungwa nkunnyaulila nnung'une kuchidoni, “Atata wetu vino ànikongopala, na wala nanga nnume nchilambo achino wa kulala na hwetu uchinga tupate vavana muchi chiivele kwa vanu vammalele va pachilambo. 32Bahi tunkelewehe atata wetu wala uchinga tupate kulala nawe. Kwa kutenda uchocho, tuchituhwenehe lukolo lwetu kupitila atata wetu.” 33Chilo cha liduva anelyo, nkunkeleweha atata wao wala, na ayula mwali wake ntandi nkuhwena unalala nawe. Henga atatake nanga panakameke uhiku wainjidile mwanawe unalala nawe, wala uhiku waukile.

34Liduva lipapête, ayula mwali nkulungwa nkunnyaulila nnung'une kuchidoni, “Chilo cha nelo nangu ńnilala na atata. Uchocho na nelo tunkelewehe, koka na wako uhwene ukalale nawe uchinga tuhwenehe lukolo lwetu kupitila atata wetu. 35Bahi chilo chipapête nkunkeleweha wala atata wao, na ayula mwali n'joko nkuhwena unalala nawe. Henga atatake nanga panakameke uhiku wainjidile mwanawe unalala nawe, wala uhiku waukile. 36Bahi avala vali vanga Lutu vammalele nkuva na vitumbo vya atata wao. 37Ayula mwali ntandi nkummaleka mwana wachilume, nkunchema Moabu.#19:37 Lidi lya lina Moabu, lìpilikanika muchi lilove lya Chieblaniya livêle na mana ya “atata.” Aneyo njo anakulwao Vamoabu mpaka nelo. 38Na ayula mwali n'joko nanang'e nkummaleka mwana wachilume, nkunchema Benami.#19:38 Benami mana lake mwana wa vanu vangu. Aneyo njo anakulwao Vaamoni mpaka nelo.

Currently Selected:

Ntandiliko 19: Chimakonde

Highlight

Copy