MWANDUSO 44

Kikasi cha Usufu

1Usufu kamulagiza mtumigwa mkulu wa ng'anda yake, yomulongela, “Memeza magunia ga wanhu wano vakuja bwando kamba vowodaha kupapa na ika hela ya kila munhu hamulomo wa gunia jake. 2Ika kikasi changu cha feza mdigunia da ija ikizuwanda wao hamoja na hela zake ziyezile nazo kugula vakuja.” Na heyo katenda kamba Usufu viyamulagize. 3Imitondo ng'hani wandugu zake Usufu walekigwa wachole na zao hamoja na mhunda zao. 4Viwakalile hawanavika kutali na idiwambo, Usufu kamulongela mtumigwa wake, “Genda ukawakweleleze waja iwanhu na uhawavika walongele, ‘Habali mulihile gehile kwa ganogile? 5Habali mwibile kikasi cha feza cha mndewa wangu? Kino sio kikasi chayang'wilaga mndewa wangu na kutendela uhokozi? Mtenda mbuli ihile ng'hani.’ ”

6Ija imtumigwa viyawavikile, kawalongela vivija viyamulongele Usufu. 7Wamulongela, “Habali mndewa wangu yolonga mbuli kamba ino? Mbuli ino na iwe kutali na tweye watumigwa zako, sambitutende mbuli kamba ino! 8Hata hela zituvikile mmilomo ya magunia getu kuja Kanaani tukubwezela, avo habali twibe madini ga feza ama zahabu kulawa mng'anda ya mndewa wako? 9Kamba imwe wa watumigwa zako yahavikwa nacho nayadanganhike, na tweye wose na tuwe nyakadala wa mndewa wangu.”

10Na heyo kawalongela, “Vinoga, na iwe kamba vuulongile. Ila ija yondayavikigwe nacho kowa nyakadala wangu, na mweye mose msigale mochola na zenu.” 11Avo kila munhu mmwanza wao hima kahumulusa gunia jake hasi na kudifungula. 12Abaho ija imtumigwa wa Usufu kasonga kusakula, kasonga gunia da imkulu wao na kumambukizila da imdodo. Na kija ikakasi kivikigwa mdigunia da Benjamini. 13Waja iwakulu zake wasigale viwonile vija, wadega vivalo vao mkona bwembwe, abaho wakweleza magunia gao mmhunda zao na kubweleganya mdiwambo.

14Usufu kakala yang'hali mng'anda kipigiti Yuda na wandugu zake viwakalile wobweleganya, waibwanha hasi haulongozi wake, 15Usufu kawalongela, “Habali mtendile vino? Ham'vitangile kamba munhu kamba nie nodaha kuvumbula vinhu mkulolesa?”

16Yuda kalonga, “Tulonge choni kumwako, mndewa, todahaze kuwatenda wanhu watutogole kamba tweye sio wavwizi? Mulungu kavigubula vilozo vetu. Tweye tose twa nyakadala zako, sio ija tu yavikigwe na ikikasi.”

17Usufu kalonga, “Si vivo! Mbuli ino na iwe kutali na nie, sambinitende mbuli kamba ino. Ija tu yavikigwe na ikikasi iyo yondayawe nyakadala wangu. Mweye msigale gendeni ukae ha tataenu mditindiwalo.”

Yuda Koiyalala Giladi Benjamini Yalekesigwe

18Yuda kamcholela Usufu na kulonga, “Chonde, mndewa wangu, nileke nie mtumigwa wako nikulongele mbuli imwe gweye mndewa wangu, sambiunyonele lusango kwavija gweye kwa kamba Falao mwenyego. 19Mndewa, gweye kukala utuuzile ulonga, ‘Mweye muna tata ama ndugu iyagwe?’ 20Na tweye tukwidika, tulonga, ‘Tweye tuna tata m'vyele ng'hani na mdodo wetu mzuwanda yavumbuke muuvyele wake. Mkulu wake kadanganhika, na heyo iyo mwana yeiyeka yasigale mmwanza wa wana wa mamaake, na tataake kamnogela ng'hani.’ 21Abaho kutulongela tumgale hano kumwako umone na meso gako, 22na tweye tukulongela, ‘Havidahika mwana ija kusegela ha tataake, kamba yahasegela, tataake kodanganhika.’ 23Na gweye kulonga, ‘Kamba hamwizile na mdodo wenu hano, hamuchona kabili kihanga changu.’

24“Vitubwelile ha mtumigwa wako, ayo yali tataangu, tumulongela gaja gaulongele, mndewa wangu. 25Na tataetu viyatulongele, ‘Gendeni kabili mkatugulile mandia,’ 26tumulongela, ‘Hatuchola, ila kamba mdodo wetu imzuwanda yahachola hamoja na tweye basi tochola, kwavija hatuchona kihanga cha ija imunhu mbaka mdodo wetu imzuwanda yachole hamoja na tweye.’ 27Abaho mtumigwa wako ayo yali tataangu katulongela, ‘M'vitanga kamba mwehe wangu kandelela nie wana wabili wa kimbigalo. 28Imwe kapotela, na nie nilonga, “Kadegigwa vidangavidanga na mng'onyo.” Na sinamona songela kipigiti kija. 29Na kamba muhamsola na ino, gaham'vika gehile na uvyele uno unilinao, mong'homa na giogio.’

30“Avo kamba tuhabwela ukae ha mtumigwa wako ayo yali tataangu bila mwana ino kuwa hamoja na tweye, na avija ugima wake vuuifungile hamoja na ugima wa mwana ino, 31yahona kamba imwana hali hamoja na tweye, kodanganhika, avo tweye watumigwa zako tomkoma na giogio tataetu m'vyele. 32Kwavija nie mtumigwa wako iyo nisolile zamana ha tataangu nilonga, ‘kamba sim'bwezile kumwako, nie iyo yondaniipape mbuli ino muugima wangu wose.’ 33Avo nileke nie mtumigwa wako nisigale hano kamba nyakadala wako nisole hanhu ha mwana ino, giladi umuleke ino imwana yabwele ukae na wakulu zake. 34Kwavija nodahaze kubwela ukae ha tataangu kamba ino imwana hali hamoja na nie? Nodumba kona mgayo wondaumpate tataangu.”

Currently Selected:

MWANDUSO 44: Kizalamo

Highlight

Copy