MWANDUSO 23

Sala Kodanganhika na Kuzikigwa

1Sala kakala milao mia na malongo mabili na saba. 2Sala kadanganhikila hanhu hokemigwa Kiliasi-Aliba, sambi hokemigwa Hebloni, muisi ya Kanaani, na Ablaham kachola kumulilila.

3Ablaham kenuka kulawa hamgwazo wa mwehe wake yadanganhike na kuchola kuwalongela waja Iwahiti, 4“Nie na muhenza nikala hano mmwanza wenu. Niguzileni hanhu ha kumzikila mwehe wangu.”

5Wahiti wamulongela Ablaham, 6“Tutegeleze mndewa, kumwetu tweye gweye kwa munhu mkulu ng'hani. Mzike mtwanzi wako hana gamapanga gogose gondausagule kulawa mgamapanga getu, haduhu munhu yoyose mmwanza wetu yondayakugomese gweye sambiumzike mwehe wako mdipanga jake.”

7Abaho Ablaham kenuka na kainamila haulongozi wa waja Iwahiti. 8Kawalongela, “Kamba mtogola nie nimzike mwehe wangu hano avo nitegelezeni na muyalalileni Efloni mwanage Zohali sama yangu nie, 9yaniguzile mhango ili ako Makipela mumgwazo wa umgunda wake. Mulongeleni yaniguzile dimwe kwa dimwe hano haulongozi wenu iwe hanhu hangu ha kuzikila.”

10Efloni mwenyego kakala yakalile haja hamting'hano hamoja na Wahiti wayagwe, hana idizivi da kwingilila mdiwambo, kamwidika Ablaham haulongozi wa Wahiti wose. 11Kalonga, “Si vivo, mndewa, nitegeleze, nokugwelela uja umgunda, na nokugwelela ija imhango ili mumgunda uja, nokugwelela haulongozi wa wanhu zangu, kazike mwehe wako.”

12Ablaham kainamila kabili haulongozi wa Wahiti, 13kamulongela Efloni haulongozi wa Wahiti wose, yolonga, “Nitegeleze, nokuliha hela ya umgunda wose, nokuyalalila uibokele giladi nikamzike mwehe wangu.”

14Efloni kamwidika Ablaham, yolonga, 15“Nitegeleze, mndewa, mgunda uja woguzigwa vidanga mia nne va feza. Kino kinhu kidodo ng'hani kumwangu nie na gweye! Mzike mwehe wako.” 16Ablaham kazitogola mbuli za Efloni, avo kampimila Efloni vidanga va feza viyalondile, haulongozi wa Wahiti, vidanga mia nne va feza zipimigwe kulingana na vipimilo va soko da kipigiti kija.

17Avo mgunda wa Efloni uli Makipela ukalile ng'ambu ya ulawilo wa zua wa Mamle, na ija imhango ikalile mumgunda, na mibiki yose ikalile muja, kaguziligwa Ablaham. 18Viwa vake dimwe kwa dimwe haulongozi wa Wahiti wose wezile haja hadizivi da idiwambo.

19Abaho Ablaham kamzika Sala mwehe wake muimhango ikalile mumgunda wa Makipela behi na Mamle, ukalile Hebloni muisi ya Kanaani. 20Avo Wahiti wamguzila Ablaham uja umgunda na imhango ikalile mumgunda, hawe hanhu hake ha kuzikila.

Currently Selected:

MWANDUSO 23: Kizalamo

Highlight

Copy