MWANDUSO 20

Ablaham na Abimeleki

1Ablaham kasegela kulawa Mamle kachola muisi ya Negebu na kukala hagatigati ya isi za Kadeshi na Shuli. Abaho kasegela kachola kukala mdiwambo da Gelali mkipigiti kidodo, 2hanhu haja Ablaham kuyamulongile Sala mtwanzi wake, “Ino iyo lumbu jangu.” Abaho Abimeleki mndewa wa Gelali kamsola Sala na kumtenda kuwa mtwanzi wake. 3Ila ikilo imwe Mulungu kamulawilila Abimeleki muinzozi, kamulongela, “Kodanganhika sama ya imtwanzi yuumsolile, kwavija kumsola mtwanzi wa munhu.”

4Abimeleki hamkwenhukile ija imtwanzi, avo kalonga, “Mndewa, kolonda kuwabananga wanhu walibule uzenzeleganye? 5Ablaham mwenyego kalonga kamba heyo kakala lumbu jake, na imtwanzi kalonga vivija. Nitenda vino na nia inogile, na sitendile mbuli ihile.”

6Abaho Mulungu kamulongela muinzozi, “Ona, nivitanga kamba kutenda vino na nia inogile, avo nikwimiliza giladi sambiunitende vilozo. Kino kicho kilamso kamba sikulekile umkwase. 7M'bweze mtwanzi wa munhu, kwavija mbigalo wake muhokozi, na heyo kokutambikila na gweye kowa mgima. Ila kamba hum'bwezile, uvitange kamba gweye na wanhu zako wose modanganhika.” 8Imitondo ng'hani ya zua diyagwe, Abimeleki kawakema wakulu zake wose na kuwalongela gaja galawilile, na hewo wadumba ng'hani. 9Abaho Abimeleki kamkema Ablaham, kamulongela, “Kututendela choni? Mbuli yaki ihile inikutendile mbaka kugala nhaguso ng'hulu kumwangu nie na muundewa wangu? Kunitendela vinhu havilondigwe kutendeka. 10Habali utendile gano?”

11Ablaham kamwidika, kamulongela, “Nitenda vino kwavija nigelegeza kamba wanhu wa isi ino wabule kidumbo cha Mulungu, avo wodaha kung'homa sama ya mtwanzi wangu. 12Kweli heyo lumbu jangu, kwavija tweye twa wana wa tata imwe, ila kila munhu kana mamaake. Na nie nimsola heyo yawe mtwanzi wangu. 13Mulungu viyanikemile kulawa mng'anda ya tataangu, nimulongela mtwanzi wangu, ‘Kamba uhaninogela nie, kila hanhu hatuchola, mulongele kila munhu kamba nie iyo lumbu jako.’ ”

14Abaho Abimeleki kasola ng'hondolo na ng'ombe, na nyakadala wakitwanzi na wakimbigalo kamgwelela Ablaham, na kum'bwezela Sala mtwanzi wake. 15Abimeleki kamulongela Ablaham, “Isi ino yose yangu nie, kala hanhu hohose haulonda.” 16Abaho kamulongela Sala, “Nimgwelela lumbu jako vidanga alufu imwe va feza haulongozi wa wanhu wose wali hamoja na gweye, giladi kugubika mbuli zihile zinikutendele, na kila munhu kovitanga kamba hutendile mbuli ihile.”

17Abaho Ablaham katambika ha Mulungu. Mulungu kamuhonya Abimeleki na mtwanzi wake na nyakadala zake wa kitwanzi giladi wadahe kupata wana kabili. 18Kwavija MNDEWA kakala yazifungile inda za wanhu wose wali mng'anda ya Abimeleki sama ya Sala, mtwanzi wa Ablaham.

Currently Selected:

MWANDUSO 20: Kizalamo

Highlight

Copy