KUHALAWA 39
39
Vivalo va Mkulu wa Nhambiko
(Kuh. 28:1-14)
1Watenda#39:1 Watenda nhegulo yake iyo Bezaleli, Oholiabu, na magalu wose Mulungu iyawagwelele udaho na ujuzi kulawa 36:1. vivalo vilukigwe na nyuzi za buluu, zambalau, na ndung'hu sama ya kusang'hanikila mdihema da kuiting'hanila. Vivija watenda vivalo ving'alile sama ya Haloni, kamba MNDEWA viyamulagize Musa. 2Bezaleli katenda kizibao na nyuzi za zahabu, nyuzi za buluu, zambalau, na ndung'hu, na kitani inogile isokotigwe. 3Waisana izahabu na nyundo na kuwa vibamha vibanhibanhi abaho waitenda kuwa nyuzi na kuzibandikiza na nyuzi za buluu, zambalau, na ndung'hu, na kitani inogile isokotigwe. 4Wakitendela ikizibao mikandala mibili ya mmaega na kuifunga mzing'ambu mbili za ikizibao ng'ambu ya kuulongozi na ng'ambu ya kuchugu. 5Lukambala luhambigwe lutendigwe na vinhu vivija vitendile ikizibao, nyuzi za zahabu, nyuzi za buluu, zambalau, na ndung'hu, na kitani inogile isokotigwe, lolondigwa lushonelwe mkizibao kamba MNDEWA viyamulagize Musa. 6Wandika matwaga ga wana wa Islaeli longo dimwe na wabili uchana ya igamabwe mabili gakemigwe shohamu kamba vija msongola dibwe da hela bwando viyosongola utango. Abaho kagagela mzifelemu zilukigwe na nyuzi za zahabu. 7Kagabandikiza mmikandala ya mmaega ya ikizibao, kuwa mabwe ga ng'humbukila ha Mulungu sama ya wana wa Islaeli, kamba MNDEWA viyamulagize Musa.
Kifuko cha Mmhambaga
(Kuh. 28:15-30)
8Katenda kifuko cha mmhambaga cha kuvala Mkulu wa Wakulu Wose wa Nhambiko na ufundi mkulu. Kakitenda na vinhu vivija vitendile ikizibao, nyuzi za zahabu, nyuzi za buluu, zambalau, na ndung'hu, na kitani inogile isokotigwe. 9Kakikunza mwanza umwe, na katenda utali wake na ugazi wake uilinge, utali wake ukala sentimeta 22 na ugazi wake ukala sentimeta 22. 10Abaho uchana yake keka minhongo mine ya mabwe ga hela bwando. Mumnhongo wa ichanduso, keka mabwe ga akiki, yakuti manjano, na bahalamani. 11Mumnhongo wa ikabili, keka mabwe ga zumalidi, yakuti samawi, na alimasi. 12Mumnhongo wa ikadatu, keka mabwe ga yasinto, akiki ndung'hu, na ametisto. 13Mumnhongo wa ikane, keka mabwe ga zabalajadi, shohamu, na yasipi. Mabwe gano gose gageligwa mzifelemu za nyuzi za zahabu. 14Kukala na mabwe longo dimwe na mabili kamba vigali matwaga ga wana wa Islaeli. Mabwe gano gakala kamba utango wao, kila dibwe dimwe disongoligwa mtala umwe wa wana wa Islaeli. 15Wakitendela ikifuko cha mmhambaga mikufu ya zahabu ing'alile, isokotigwe kamba nzabi. 16Watenda felemu mbili zilukigwe na nyuzi za zahabu na vitindi vibili va zahabu, na kuvigwasika ivitindi vibili mzimhembe mbili za uchana za ikifuko cha mmhambaga. 17Waigwasika imikufu mibili ya zahabu m'vitindi vibili vili mzimhembe za uchana ya ikifuko cha mmhambaga, 18sota mbili ziyagwe za imikufu ya zahabu zikalile zifudikwe mzifelemu mbili za nyuzi za zahabu, zifudikwa mmikandala ya mmaega ya ikizibao ng'ambu ya kuulongozi. 19Abaho watenda vitindi vibili va zahabu, na kuvigwasika mzimhembe mbili za hasi ya ikifuko cha mmhambaga, mulugigo lwake lwa mgati behi na ikizibao. 20Watenda vitindi vibili viyagwe va zahabu, wavigwasika hasi ya imikandala mibili ya mmaega kuulongozi wa ikizibao, behi na ulugigo uchana ya ulukambala luhambigwe lwa ikizibao. 21Wavifudika ivitindi va ikifuko cha mmhambaga kuna ivitindi va ikizibao na nzabi za buluu, giladi ikifuko cha mmhambaga kikale uchana ya ulukambala luhambigwe lwa ikizibao, na kija ikifuko cha mmhambaga hakilondigwa kilegele kulawa mkizibao, kamba MNDEWA viyamulagize Musa.
Vivalo Viyagwe va Wakulu wa Nhambiko
(Kuh. 28:31-43)
22Bezaleli katenda kanzu ilukigwe na nyuzi za langi ya buluu ya kuvalila mgati ya ikizibao, 23na watenda zonzo hagatigati sama ya kwingizila ditwi. Weka lugigo lulukigwe kuzunguluka idizonzo, giladi ikanzu sambiidegeke. 24Mulugigo lwa hasi ya idikanzu watenda makomamanga ga langi ya buluu, zambalau, na ndung'hu, na kitani inogile isokotigwe. 25Watenda mbugi za zahabu ing'alile, na kuzika hagatigati ya igamakomamanga kuzunguluka ulugigo lwa hasi lwa idikanzu. 26Zimbugi na igamakomamanga vizunguluka ulugigo lwa hasi ya ikanzu yondaivaligwe na mkulu wa nhambiko kipigiti cha kumsang'hanikila MNDEWA, kamba MNDEWA viyamulagize Musa.
27Watenda mashati galukigwe na nyuzi za kitani inogile sama ya Haloni na wanage, 28kilemba cha kitani inogile, kofia ya kitani inogile, kaputula za kitani inogile isokotigwe, 29na lukumbulu lwa nyuzi za buluu, zambalau, na ndung'hu, na kitani inogile isokotigwe, luhambigwe na muhambaji, kamba MNDEWA viyamulagize Musa. 30Watenda kidiwala kibanhibanhi king'alile cha zahabu ing'alile, uchana yake wakisongola nyandiko kamba viwasongolaga utango na kuchandika mbuli zino, “YANG'ALILE HA MNDEWA.” 31Wakifudika ikidiwala kibanhibanhi na nzabi ya langi ya buluu kuulongozi wa ikilemba, kamba MNDEWA viyamulagize Musa.
Kimambukizo cha Sang'hano
(Kuh. 35:10-19)
32Avo sang'hano zose za idihema da kuiting'hanila zikala zimalile. Waislaeli watenda kila kinhu kamba MNDEWA viyamulagize Musa. 33Abaho wamgalila Musa idihema da kuiting'hanila hamoja na via vake vose, ving'hwangwazi vake, felemu zake, boliti zake, nguzo zake, vikalilo vake, 34ngubiko ya ng'hwembe za songolomi wa ng'hondolo zisindikigwe na langi ndung'hu, ngubiko ya ng'hwembe zinogile, guo da kukikiwizila Hanhu Hang'alile Ng'hani kulawa Hanhu Hang'alile, 35Sanduku da Lagano hamoja na fimbo zake za kudipapila, ngubiko yake, 36meza hamoja na via vake vose, imikate ilavigwe nhosa ha Mulungu, 37kiguzo cha zahabu ing'alile cha kwikila viwenge hamoja na viwenge vake, via vake vose, na mavuta ga iviwenge, 38kilingo cha zahabu cha kufushila ubane, mavuta ga kubakala, ubane unung'hila goya, na guo da kutungika hanhu ha kwingilila mdihema, 39kilingo cha shaba cha kulukuzila nhosa hamoja na lwavu lwake lwa shaba, fimbo zake, via vake vose, teleko da shaba hamoja na kikalilo chake, 40miguo sama ya viwambaza va idikonhi da idihema da kuiting'hanila hamoja na nguzo zake na vikalilo vake, guo sama ya kutungika hanhu ha kwingilila mdikonhi, nzabi zake, vigingi va idikonhi da idihema, via vose va sang'hano za mdihema da kuiting'hanila, 41na vivalo vilukigwe goya sama ya kusang'hanikila mdihema da kuiting'hanila, vivalo ving'alile sama ya Haloni, mkulu wa nhambiko, na vivalo sama ya wanage, vondawavale kipigiti wahasang'hana sang'hano ya ukulu wa nhambiko. 42Waislaeli watenda sang'hano zose kamba MNDEWA viyamulagize Musa. 43Musa viyaikagule ija isang'hano na kona kamba watenda kamba vija MNDEWA viyalagize, kawamoteza.
Currently Selected:
KUHALAWA 39: Kizalamo
Highlight
Share
Copy
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
