Make 14

Naknakmen da o kawakwak da si Yeso

(Matay 26:1-5; Locya 22:1-2; Yowani 11:45-53)

1Kadwa araw pa kapamaring da so kanen a koman so ji nimimway a pang do Iyeci.#14:1 Iyeci - Citahen nyo do Panitanitan so jyatenngi a ciring do ney manowji na rana no vakong eya. Am o panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to am naknakmen da o ahahapan da si Yeso, do rakpan da sya do ikabo no tao a wakwaken. 2Maniring sira am, “Taosya o karakep ta sya do ipamaring so kanen, ta meyvonag sira o aro a tao.”

No kapaglo ni Madiya so mahangno a haneng do oo ni Yeso

(Matay 26:6-13; Yowani 12:1-8)

3Amyan si Yeso do Potani do vahay da da Simong a omlabyab so kolit no kakwa. Koman sira am mangai o asa ka mavakes so tagaw a kapnowan no masingat a mahangno a haneng. Karahan am aspin na o tagaw a kapaglo na sya do oo ni Yeso. 4Macita da no maciwalam ji Yeso a tao am maoya sira so aktokto. Maniring rana sira am, “To na gagidan ori am ikongo peypeypangayan no akman sang. 5Jingbeywani o yatey masingat a haneng ang.#14:5 O ciriciring da no Sila am: atlo a ranaw a ka dena. O nizpi da do kasaraw no meyvazay a tao am asa ka dena. Apyapya rana o kapamalit nya so nizpi a ipanidong so ikasi a tao am.” Am ori o nioyyan da no mavakes ang. 6Am maniring si Yeso am, “To nyo macipanadngi. Nyo kazyakan no yapiya vazay na jyaken. 7Yamasangib sira o makasi a tao a yamacikaop jinyo. Jyasalit jinyo o kasidong nyo sira. Am yaken am ko jyasangib, ta yalikey rana o ipacikaop ko jinyo. 8Am iya rana am na paminmindan rana ya no nakem na jyaken an, a yamapaglo do kataotao ko so yamahangno a haneng. Ta ori rana am yavat na ori do bobwan da jyaken. 9To ko na macitangayan jinyo am no ipeylimwang o Mapasaray a Ciriciring na ni Ama ta do to do karawan eya am abo ji makalavat so mina vazay na jyaken no mavakes eya.”

Naknakmen na ni Yota o kapanazang na ni Yeso

(Matay 26:14-16; Locya 22:3-6)

10O rarwa so ikakarwan a macinanao ji Yeso am amyan so asa ka tao a meyngaran so Yota a tao do Isecyadi. Iya rana am mangay ori do panipanirsirngen da no mapatanatanang so nakem da si Ama ta do to a manazang ni Yeso jira. 11Mamizing da o ciring ni Yota am masaray sira. Karahan am ninoon da o kapanta da nya so nizpi. Ori o nipacipinda na rana no sapan na so araraw a torwan na rana ni Yeso jira.

Tomalakanen sira so pamaringan da so kanen

(Matay 26:17-19; Locya 22:7-13)

12Omanam o kasaraw do ipamaring da so kanen a iyakan da so ji nimimway a pang am manwakwak sira so kagling. Maniring sira ji Yeso o macinanao jya am, “Do wanjin mo tovoyan jyamen a tomalakanen so pamaringan ta so kanen do Iyeci.” 13Karahan am mapahanhan si Yeso so rarwa ka macinanao jya. Maniring jira am, “Angay kamo do ili. Si makasinmo kamo so asa ka mahakay a omoli rana no ranom da am macihza kamo jya. 14No si somdep do asa ka vahay am somdep kamo do asdepan na. No si maniring kamo do mapeyvahay sya am, ‘Na ipanci no yamnanao jyamen am: Wanjin o vahay a kalovotan namen a yamamaring so kanen do Iyeci,’ kwan nyo an, 15a kangay na ninyo do cinavat no vahay na nipingsanan na. So to nyo rana ngyani do dang a mapeykakasa so kanen ta.”

16Mangay sira do ili o rarwa ka macinanao jya am todey mangononong o ciring na jira ni Yeso. Am ori o niyan da rana do dang a mapeykakasa so yaven da.

Pazimanen ni Yeso o keyyan no manazang nya

(Matay 26:20-25; Locya 22:21-23; Yowani 13:21-26)

17Maseyrem rana am malovot rana sira Yeso a kano rarwa so ikakarwan a macinanao jya. 18Maniring si Yeso do ikalimot da koman am, “To ko na macitangayan jinyo am yamyan jinyo so yasa ka tao a yamacihanghang jyaten a yamanazang nyaken.” 19Mamizing da ori am marahet sira so onowned o macinanao jya. Am ori o nikateyteyras da manangangay nya ji Yeso. Maniring sira am, “Yaken an?” 20Maniring si Yeso am, “O yasa ka tao jinyo do yararwa so ikakarwan o macizanod jyaken a tomahem so kanen na am iya ori. 21O ciring rana do Seysyo am wakwaken da o Nipamnekan na ni Ama ta do to a tao. Am o manazang nya tao am to makasi. Apyapya rana kaji na nimatazakan a tao do karawan.”

Ney manowji rana pamaringan da so kanen ni Yeso a kano macinanao jya

(Matay 26:26-29; Locya 22:14-20; 1 Kedinto 11:23-25)

22Koman sira am ahapen na ni Yeso o pang a isaray na ji Ama ta do to a kakcikcil na sya a itoro do macinanao jya. Maniring am, “Kanen nyo ya, ta kataotao ko ya.” 23Karahan am ahapen na rana o kopo a yanan no potaw cyo a kasaray na nya ji Ama ta do to a katoro na rana nya do macinanao jya a keyyop da rana sya. 24Maniring si Yeso am, “Oya rana am rala ko a nimvoyog a omaing do aro a tao. O rala ko rana ya am yongkad nyo do avayo a pangozayan nyo a ciring na ni Ama ta do to a mapatastas so omanoyong jya tao. 25To ko na macitangayan jinyo am ji ko rana ngyop so potaw cyo mangay no marateng o araraw na no kapacikaop ko jinyo a omyop do teyngato, no si papwen na ni Ama ta do to o katalamozong na no vayo a karawan.” 26Teyka da o asa ka anwanood a sarayan da ni Ama ta do to a peyyanwanooden am mangay rana sira do tokon a meyngaran so Kanlan.

Pazimanen na ni Yeso ji Pite o kalalas na jya

(Matay 26:31-35; Locya 22:31-34; Yowani 13:36-38)

27Maniring si Yeso jira am, “Mangay o kapacisyay nyo jyaken. Ta maniring do Seysyo am, ‘Wakwaken ko o mapamangan so kagling a tao a kapeyvwak da no kagling.’#14:27 Sacyadiya 13:7. 28Am si mirwa ko a mavyay am manmanma ko a ka ninyo a mangay do Cyadidi.” 29Maniring si Pite am, “Tana peymakarwan da imo no tao am jyabo kakaro ko jimo a.” 30Maniring si Yeso ji Pite am, “To ko na macitangayan jimo am si ipidwa o manok a tomazokokok do ji na pa araw eya am mangay keypitlo mo a omalalas jyaken.” 31Karahan am mavezkat si Pite a meyzezyak. Maniring am, “Ji ko macizanod jimo a mawakwak a. Jyabo kato ko ngalalasan jimo a.” So nikakman da sang so ciring no kadwan jira macinanao jya.

Inozi ni Yeso do Kesimani

(Matay 26:36-46; Locya 22:39-46)

32Makaranes sira do meyngaran so Kesimani a peymowamowan da am maniring si Yeso do macinanao jya am, “To kamo ngyan jya, ta mangay ko pa meynozi.” 33Karahan am rarahen na si Pite a kani Yake a kani Yowani. So nyapo na rana dang no keyngen na rana so onowned. 34Maniring jira am, “Ko mazabab so onowned a toda jyawakwak. To kamo ngyan do jya. Am meytataziman kamo an.” 35Meyratateng am karwan na sira ni Yeso so kabneng no keytan so karairai a kapeyrorokma na a mapasyasi ji Ama ta do to. Maniring am, “No si apyahen mo am pakarwen mo o yatey rako a alalaw ko an.” 36Maniring pa am, “Mo Ama, yabo mo jya peyvazay. So pakarwan mo so alalaw eya an. Am ji mo na mangozai o nakenakem ko. Ta ahahapan mo na sya.”

37Meysinaoli a mangay jira am macita na o tatlo a ka macinanao jya makapya mitkeh. Maniring rana ji Pite am, “Mo Simong, ka mitkeh? Manngwa, ji nyo nahap o asa ka vatvatek a ji nyo ngitkehi?” 38Maniring pa jira am, “Meytataziman kamo a meynozi. Ta kalittan kamo an. Tana nyo apyahen do onowned nyo am nyo jyapakongo o nyo kapeynozi.”

39Akman sang a komaro jira mangay a meynozi. Am akman sang o ciring na ji Ama ta do to. 40Karahan am meysinaoli a mangay do macinanao jya. Am akman sang, ta mitkeh sira, ta tey makaha rana sira. Am ori o ji da makatenngi ji Yeso a pacisirsirngan. 41Ipitlo si Yeso a mangay jira am maniring jira am, “Yakamo pa mitkeh? Cyana, manga ovay. Ta yarana makeykai o Nipamnekan na ni Ama ta do to a tao a ipanazang da do meyraraten a tao. 42Kayokay kamo na, kangay tamo rana. Cita kamo o yamanazang nyaken a tao a yarana mai.”

Rakpen da si Yeso

(Matay 26:47-56; Locya 22:47-53; Yowani 18:1-14)

43Ji pa vitos o ciring ni Yeso am mai rana si Yota a pacihzan da no meyhavit so takzes a kano sisipzot a tao. Sira ori am nitovoy da no panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan. 44O manazang ni Yeso a tao am nipanci na rana jira o ahahapan na sya. Maniring si Yota jira am, “O rapongen ko a tao am iya ori. So rakpan nyo sya a kangay nyo na nya.” 45Kapakaranes na ni Yota am mangay na rapongen si Yeso a manci no, “Mo Mangnanao.” 46Karahan am rakpen da na si Yeso. 47O meytatanek do katangked da tao am amyan so asa ka tao a to baba so takzes na kangay na mapacipas so talinga no kalamsoyan no panirsirngen da no mapatanatanang so nakem da si Ama ta do to a kakas na no asa ka talinga na. 48Maniring si Yeso jira am, “Kamo mapalolo so takzes nyo a kano sisipzot nyo a yakomala jyaken? Nyo ipanci yaken a manakaw a tao? 49Ko mangday so araw a yamangnanao so tao do rako a panaralayan. Kamo masangib a yamacikaop jyaken am nyo ji rakpi jyaken. Am kangay na mangononong no ciring do Seysyo.”

50No kano nang am nimamimin sira o macinanao jya nikomaro jya a meyvwak.

51Amyan so asa ka mowva tao a mapayob sya do kataotao na so zaping a nimacilolo ji Yeso. Naknakmen da o karakep da sya. 52Am to na rana wasikan o ayob na zaping kapalalayo na rana mangay somazok.

Pacicin da si Yeso do peykeykaygyan da

(Matay 26:57-68; Locya 22:66-71; Yowani 18:13-14,19-24)

53Yangay da si Yeso do vahay na no panirsirngen da no mapatanatanang so nakem da si Ama ta do to. O amyan rana do dang am panipanirsirngen da no mapatanatanang so nakem da si Ama ta do to a kano kamanrarakehan a kano mangnanao no iwawalam ni Ama ta do to. 54To na macyazizazawi si Yeso ni Pite a mangay do tezantehed no vahay no panirsirngen da no mapatanatanang so nakem da si Ama ta do to. Meyratateng am to rana macizavoz do mamzat a tao a omlisna macipanangdang jira. 55O panipanirsirngen no mapatanatanang so nakem da si Ama ta do to a kano aro a meykaygi a tao am meykala sira so tao a mangamaog so iraherahet da si Yeso a ciring a iwakwak da sya. Am ji sira makakala. 56Tana aro sira o tao a mangitao nya so malas a ciring a iraherahet da sya am ji meyyangangay o ipanci da. 57Karahan am tatasa ka tao jira o to rana meytatanek a mangamaog so malas a ciring a iraherahet da si Yeso. Maniring sira am, 58“Namen nimamizing ori a yanimanci no yana kakavakava so yanyamaog no lima no tao a rako a panaralayan. Si katlo araw am mapatnek so asa ka panaralayan a jya nyamaog no lima no tao.” 59Am tana akman rana sang a ciring a iraherahet da si Yeso am ji sira meyyangangay so ciriciring.

60Karahan am meytatanek o panirsirngen da no mapatanatanang so nakem da si Ama ta do to. Maniring ji Yeso am, “Manngwa, yamyan so ciring mo do da iraherahet jimo ang?” 61Abo o asa ka ciring a nipanci na ni Yeso. Maniring pa ji Yeso o panirsirngen da no mapatanatanang so nakem da si Ama ta do to am, “Manngwa, manoyong ka ya Misayya a Anak ni Ama ta do to?” 62Maniring si Yeso am, “Noon. Manoyong. Mamimin kamo a makacita so Nipamnekan na ni Ama ta do to a tao a omlisna do wanan na ni Ama ta do to a meygegcin do cinalab a mai do teyrahem.” 63Mamizing na no panirsirngen da no mapatanatanang so nakem da si Ama ta do to am to na rana misipisinga o talili na. Maniring am, “Tana abo rana tao a manci no karatan na am cyaha. 64Ta nyo na nimamizing o ciring na na iraherahet si Ama ta do to. Pancyan kamo pala, kongwen takamo ya.” Mamimin sira manci no kawakwak sya. 65O tatasa jira am cicippan da si Yeso a kabengbeng da so mata na a bakbakan. Maniring sira ji Yeso am, “Pancyan pala. Sino yanimbakbak jimo ang.” O tatasa ka mamzat a tao am siplangen da si Yeso.

Alalasan ni Pite si Yeso

(Matay 26:69-75; Locya 22:56-62; Yowani 18:15-18,25-27)

66Amyan pa si Pite do pantaw no vahay no panirsirngen da no mapatanatanang so nakem da si Ama ta do to am amyan so lamlamsoy da a mavakes a mai. 67Macita na si Pite a manangdang am to na ningkaji. Maniring ji Pite am, “Imo asyo o kararay na no tao do Nasale a si Yeso?” 68Maniring si Pite am, “Ko jyasingkaji o yamo ipanci a tao ang.” Teyka na o ciring na am meyparai jira. 69Makarahan am macita na pa si Pite no mavakes ang. Maniring do meytatanek do katangked da tao am, “Iya rana ito am yamacinanao jya ori.” 70Mamizing ni Pite am alalasan na. Makarahan am o meytatanek do siri da tao am maniring sira ji Pite am, “Ji mo naywa o mo kapacikaop jira. Ta imo rana am tao ka do Cyadidi.” 71Maniring si Pite am, “Tana to ko mangavay am ko jyatenngi o tao a nyo ipanci ang. No yamalas o ciring ko am cyaha, ta yamyan si Ama ta do to a mapasingesinget jyaken.” 72Teyka na ori a ciring am ipirwa na so katazokokok no manok. Karahan am manakem na rana ni Pite o mina ciring ni Yeso do keypitlo na omalalas jya no keypidwa na tomazokokok o manok. Ji na pariparing o onowned na am to rana zezezeng a omlavi.

Currently Selected:

Make 14: snt

Highlight

Copy