Make 1

No kapangnanao na no nimanaktak a meyngaran si Yowani

(Matay 3:1-12; Locya 3:1-18; Yowani 1:19-28)

1O Mapasaray a Ciriciring na ni Yeso Kizisto a Anak na ni Ama ta do to am oya o niyapoyapwan na. 2O panoyonoywan na so ciring ni Ama ta do to a tao a meyngaran so Isayya am maniring do nivatvatkan na vakong am,

“Cita pala o yako tovoin a meylimwang no ciring ko an. Iya rana ori am mamanong nimo a meywadwad so rarahan mo.#1:2 Malaci 3:1.

3Amyan so tao a omlololos do kabwan no nihakawan no tao a manci no, ‘Inyo rana am wadwadan nyo o rarahan no Panirsirngen ta, ikatazineng na rana no pangonongan na.’ ”#1:3 Isayya 40:3.

4So niyan na ni Yowani do kabwan no nihakawan no tao a manaktak so tao a kapangnanao na. Maniring am, “Karwan nyo o peyraratenan nyo a kataktak ko jinyo. Ta ori o vonasan na sya ni Ama ta do to so raraten nyo.” 5Aro tao a nimapo do peycyeylilyan na do Yotay a kado Yelosaleng a mangay do tangain na ni Yowani. Sira rana am ipanci da o raraten da. Am ori o nitaktakan na jira ni Yowani do ayo a meyngaran so Yotan.

6Meyyayob si Yowani so niparing da a bobow no baka a kapeyyabtek na so kolit no baka a kakan na so zozon a kano maganinem a amyan do vahay no tapipi. 7Maniring am, “O manownowjyan pa ka nyaken am mowyowyat pa ka nyaken. Si meylologod ko a omovay so bedbed no tokap na am abo pacicingayan ko jya. 8Ranom o ko itaktak jinyo. Am iya rana am taktakan na inyo no Seyzi.”

9Makarahan am mai si Yeso a apo do Nasale a ili a macinapnap do Cyadidi kataktak na ji Yeso ni Yowani do ayo a meyngaran so Yotan. 10Meypapowpow si Yeso a apo do ranom am macita na o hanit a kacyangan. Makarahan am mangay maneyked jya o akmey hato rana Seyzi. 11Makarahan am maciralay o ciring na ni Ama ta do to apo do teyngato. Maniring am, “Imo rana am Anak ko imo a ko tey kaglaw. So sarayan ko nimo.”

12So ji na nimeyyahahai ni Yeso a nitovoy no Seyzi do kabwan no nihakawan no tao. 13So niyan na dang so kasikapat (40) so araraw a littan ni Satan. So nipacizavoz na do omalalam do dang. Am keyyan no aro a tinsi a somidong sya.

Rarahen na ni Yeso o papat a ka mangahangahahap a tao

(Matay 4:12-22; Locya 4:14-15; 5:1-11)

14Aneban da si Yowani am mangay si Yeso do Cyadidi a meylimwang no Mapasaray a Ciriciring na ni Ama ta do to. 15Maniring am, “Yarana makeykai o yana katalamozong ninyo ni Ama ta do to. Am ori o karwan nyo na do peyraratenan nyo a omanoyong do Mapasaray a Ciriciring na ni Ama ta do to.”

16Mangonong si Yeso do pasalan no rako a meybebneng a ranom a ngaranan da Cyadidi am macita na o rarwa ka tao a mangahangahahap a meyngaran so Simong a kano kakteh na meyngaran so Antele a amzoyo no tawaz da. 17Maniring si Yeso jira am, “Macilolo kamo jyaken, ta nanawen ko inyo. So icyakma nyoy mangahahap a mapanop so tao.” 18Mamizing da am to da rana ngaroi o tawaz da macilolo ji Yeso.

19Alikey pa o nyalaman na am macita na ni Yeso o anak na ni Sipitay a meyngaran so Yake a kano kakteh na si Yowani a rarwa a tomonod so nyayoma da tawaz do tatala da. 20Macita na sira ni Yeso am tawagan na sira. Makarahan am to da ngaroi o ama da kano lamlamsoy da do tatala da kapacilolo da ji Yeso.

Kovotan no kalamsoyan ni Satan a tao

(Locya 4:31-37)

21Makaranes sira do ili do Cyapaynong am amyan si Yeso do peyneynozyan a mangnanao so tao do ipeywalam no tao. 22Isavasavak da no makamizing so ciring na ni Yeso o ipangnanao na. Ta tey rako oyowyat na no ipangnanao na, do kapacitarek no ipangnanao na kano aro a mangnanao no iwawalam ni Ama ta do to a tao.

23No kanang am amyan so kovotan no kalamsoyan ni Satan a tao a mai do peyneynozyan. 24Maniring a amlololos am, “Imo a Yeso a tao do Nasale am ikongo mo kakzeben jyamen. Mo yamen balinasen? Ko imo katenngan. Imo am na nitovoy imo no Tao do to a tey yapya so nakenakem a tao.” 25Am ori o nioyyan na nya ni Yeso. Maniring am, “Ji ka meyzezyak. Pakowbot rana do kataotao na.” 26Makarahan am mina to na pazikzika o tao ang no komovot jya a kalololos na kapakowbot na rana do tao ang. 27Isavasavak da no aro a tao. Am ori o nipeysingsingkad da manci no, “Asyo o akman sya vazay. Abo pa o akman sya nimamizing ta a nanao. Asyo oyowyat na ori yato makavozwaw so kalamsoyan ni Satan ang. Na to ngamiznga pa no kalamsoyan ni Satan o ciring na ang.” 28Ori o nipeyrengarengayan da rana do ngaran ni Yeso do Cyadidi.

Niwakwakan na sira o meykeyngeyngen a tao

(Matay 8:14-17; Locya 4:38-41)

29Karwan na o peyneynozyan ni Yeso am mangay do vahay da Simong a kani Antele. Macita ni Yake a kani Yowani am macihza sira mangay. 30Ikongo do paingwaten na o icyarwa na mavakes ni Simong, am ori o to na ngirai. Makaranes si Yeso am ipanci da ji Yeso o ingingnen no mavakes ang. 31Ori o nyangay na tomita sya ni Yeso. Makarahan am pinanan na o lima na keyvangon na sya. Am ji na rana nipaingwat. Am ori o nipeyvangon na rana tomaotao sira.

32Somipsip rana o araw do makoyab am yai da no aro a tao o meykeyngeyngen a tao a kano kovotan no kalamsoyan ni Satan a tao do tangain ni Yeso. 33So nikalovot no tao do ili a nimai. Ori o nipanicit da no aro a tao do pangengneban. 34Makarahan am iwakwakan na rana sira o meykeyngeyngen a tao ni Yeso a kapya da rana. O komovot do tao a kalamsoyan ni Satan am nivozwaw na sira ni Yeso. Ji na mya sira o kalamsoyan ni Satan a meyzezyak, ta katenngan da o yapwan no oyowyat ni Yeso.

No kapeylimwang na ni Yeso no Mapasaray a Ciriciring do Cyadidi

(Locya 4:42-44)

35Ji pazngang do ikadwa na araw am mayokay si Yeso a kangay na do kabwan no tao a meynozi. 36O meyngaran so Simong a kano kararay na am kalahen da si Yeso. 37Makala da am maniring sira am, “Abo yaji ngala jimo.” 38Maniring si Yeso am, “Mangay tamo do teyhesa ka ili, ta ipeylimwang ko do dang o Mapasaray a Ciriciring na ni Ama ta do to, ta ori o ko nyai do karawan.” 39Makarahan am nikakaday ni Yeso o peyneynozyan do Cyadidi a peylimwangan no ciring na ni Ama ta do to a kavozwaw na so komovot do tao a kalamsoyan ni Satan.

Niwakwakan ni Yeso o omlabyab so kolit a tao

(Matay 8:1-4; Locya 5:12-16)

40Amyan so asa ka tao a omlabyab so kataotao a mangay do tangain ni Yeso a meylilitod a mapasyasi jya. Maniring am, “No si apyahen mo am jyabo kaji na apyan no kataotao ko a.” 41Ikarilaw na ni Yeso. Am ori o niparapongan na so lima na jya. Maniring am, “Ko apyahen. So na rana ikapya no kataotao mo.” 42Ji nimeyyahahay o kataotao na mapya. 43So nitovoyan na rana sya ni Yeso. O nipakoyokoy na pa jya am, 44“Ji mo meylimwangan do tao an. Angay rana pacittan do mapatanatanang so nakem ta si Ama ta do to a kavalivaliw na so kataotao mo a kapangozay mo na do iwawalam ni Moyse a mapatanang so nakem mo si Ama ta do to. So anoyngan da jimo no tao a nimapya rana so kataotao.” 45Am makowbot o tao ori am to na rana meylimwangan do aro a tao. Am ori o ji na rana nimangai do ili ni Yeso. So niseysan na do siri no ili da. Ta jyates sira o aro a tao do peycyeylilyan na mangay komala sya.

Currently Selected:

Make 1: snt

Highlight

Copy