Matay 28

Mirwa mavyay si Yeso

(Make 16:1-10; Locya 24:1-12; Yowani 20:1-10)

1Madagdag do niciyo do nikavitos no ipeywalam no tao am meyheza sira Matelyan Madiya kano asa ka tao a meyngaran si Madiya mangay do heseb ni Yeso a mangay tomita sya. 2Makarahan am to meykanini a kapeygegcin no tinsi ni Ama ta do to a apo do teyngato a kalolog na no rako a vato a nipasengseng da do heseb na, kalisna na jya. 3O kataotao na am to maniray. O talili na am akma raney otab no awa so kalavalavang. 4Pandan da rana amzikzik a manyahey no mamzat do heseb na tao. So nikazyazikaz da do teyrahem a akmey nimawakwak a tao. 5Maniring o tinsi do mavavakes am, “Ji kamo anyahey. Ko katenngan inyo a yakomala si Yeso a nipadket da do jyojika. 6Yarana ji ngyan do jya, ta na nipangononongan o ciring na a yanimirwa rana yamavyay. Sijya kamo a kacita nyo so yada nipangayan sya, 7a kangay nyo na manci nya do macinanao jya, ta yarana nimirwa mavyay. So ipanmanma na mangay do Cyadidi a ka ninyo. Cyaha, ta to nyo na cita do dang. Peyyanen nyo do onowned nyo o ko nipanci jinyo a ciring ang.”

8Karahan am meybebezbezan sira komaro rana do heseb na ang. No mangay kasaray da am mangay kanyahey da a malalayo a mangay do macinanao jya. 9Meyratateng am to da cita si Yeso do rarahan. Maniring jira am, “Kokay kamo.” Am ori o nipeypanam da mangay a omyapet so ai na amraralay nya. 10Maniring jira si Yeso am, “Ji kamo anyahey. Angay kamo na kapanci nyo nya do karwan nyo a mangay do Cyadidi. Cyaha, ta macita da yaken do dang.”

Ciring da no mamzat a tao

11Amyan pa sira do rarahan o mavavakes am o tatasa jira do nimzat do heseb na itaysang am nimangay sira do ili a kapanci da no niyapoyapwan no vazay na ni Yeso do panipanirsirngen no mapatanatanang so nakem da si Ama ta do to. 12Teyka sira meysirisiring o panipanirsirngen no mapatanatanang so nakem da si Ama ta do to a kano kamanrarakehan da no tao do Yotay am ipanta da sira so aro a nizpi. 13Maniring sira am, “Si maniring kamo am, ‘O macinanao ji Yeso am sira nimai no kamahep a da katayo so kataotao ni Yeso do namen itkeh.’ 14Cyaha, ta si mamizing no panirsirngen am yagom namen inyo kaji na oyyan ninyo.” 15Meyratateng am ahapen da o nizpi no itaysang. So to da mangozai do ciring da. O akman rana sang a ciring am yatodavangovangon a yada peyyamyamizngan no tao do Yotay a yato ngai sicyaikwaya.

Mapacita si Yeso do macinanao jya

(Make 16:14-18; Locya 24:36-49; Yowani 20:19-23; Nimlivolivon 1:6-8)

16Makaranes sira o asa so ikakarwan a macinanao jya do Cyadidi am mangay sira do nipamnekan ni Yeso a angayan da tokon. 17Macita da si Yeso am meylilitod sira amraralay nya. Am tatasa pa jira o mapeykarwa pa so onowned. 18Omasngen jira si Yeso am maniring jira am, “Na rana nimimin ni Ama ta do to o oyowyat do teyngato a kado teyrahem a yanitoro jyaken. 19Am ori o yangay nyo do peycyamahamahatawan na a mapanop so tao a omanoyong jyaken, a kahap nyo so ngaran ni Ama ta do to a kano Anak na kano Seyzi a tomaktak jira, 20a kananao nyo sira a omahap so makakaday a yako ninanao jinyo. Am manakem nyo o kaji ko macisyayan jinyo a mangay do kaidan no karawan.”

Currently Selected:

Matay 28: snt

Highlight

Copy