Matay 14

No kawakwak no nimanaktak a si Yowani

(Make 6:14-29; Locya 9:7-9)

1No kanang am o panirsirngen no Cyadidi a meyngaran so Helote am mamizing na o vazay ni Yeso. 2Maniring do lamlamsoy na am, “Ala nimanaktak a si Yowani o tao ori a yanimirwa a mavyay. Am ori o na ikatey mowyat a yamapeyvazay so yamapeyzokab a vazay.” 3-4O cinawakwak na ni Yowani am o panirsirngen a meyngaran so Helote am to ney mehsa o mavakes no kakteh na a meyngaran so Veydipo. O ngaran no mavakes am si Helotiya. Masangib si Yowani a mazyak nya, do kato ney nakawan so kataned na do vahay no kakteh na. Am ori o nipanovoy na ni Helote so tao no kanang a omrakep si Yowani a kangay da nya do pamemtengan. 5Ori o naknakman na sya ni Helote si Yowani a wakwaken. Am ikanyahey na o aro a tao. Ta ipanci da si Yowani a panoyonoywan na so ciring ni Ama ta do to.

6Araraw no cinatazak na tao ni Helote am maganam o anak na mavakes ni Helotiya do tangain no nipanoyon na tao. Ikakza ni Helote o ganam na. 7Maniring rana si Helote do maganam a mavakes am, “No amyan so amin mo jyaken am cyaha, ta itoro ko jimo.” 8Ikongo do nyahes na no ina na o anak na, am ori o nipancyan na no, “Oo no nimanaktak a si Yowani a pangain do kakanan a itoro mo jyaken.” 9Makarahan am ji rana teneng a manakenakem o panirsirngen ang, do kanimapanmanma na so ciring na do tangain no nipanoyon na a tao. Am ori o to na rana myapyai so amin na jya itoro jya. 10Makarahan am mapahanhan rana so tao a mangay do pamemtengan a motow do oo na ni Yowani, 11kapangay na rana sya do kakanan a itoro do anak ni Helotiya. Ahapen no mavakes ori am itoro na ji ina na. 12O macinanao ji Yowani am mangay da pingsanan o kataotao ni Yowani, kangay da rana mapakakasa sya. Meyratateng am mangay rana sira a manci nya ji Yeso.

Nibsoy na o kakaliman a ranaw (5000) a tao

(Make 6:30-44; Locya 9:10-17; Yowani 6:1-15)

13Mamizing na ni Yeso o kanimawakwak na ni Yowani am omavang do vazangay a kano macinanao jya a komaro do dang a kaveyvow na mangay do kabwan no tao. Katenngan da no aro a tao am omalam sira a apo do peycyeylilyan na a omonot jya. 14Makaranes si Yeso do pamsan na am macita na o aro a tao. So nikarilawan na nira. Am ori o niwakwakan na do ingingnen da no meyngen a tao. 15Maseyrem rana am mai sira o macinanao ji Yeso. Maniring sira am, “Yatey mahep rana. Yabo pa do jya o tao a yameyvahay. So to ta na novoi sira kangay da manazang so kanen da do ili.” 16Maniring si Yeso am, “Cyaha, ji nyo novoya sira. Pantan kamo sira so kanen da.” 17Maniring sira o macinanao jya am, “Yalima ka myanpaw a kano yadwa ka among o yamyan jyamen do jya.” 18Maniring si Yeso am, “Inney kamo.” 19Makarahan am ipanci na sira o tao a amlisna do katamtamkan a kahap na so alima ka myanpaw a kano adwa ka among a katangara na so hanit a somaray nya ji Ama ta do to a kakcikcil na so myanpaw a itoro do macinanao jya a kavonong da rana sya do aro a tao. 20So ikamimin da rana nikoman a mabsoy. Peysinsinmowen da rana o atda da am nipno da o adwa so ikarwa ka yala. 21O vilang no tao a nikoman am kakaliman a ranaw (5000) sira. Am ji pa nipavilang sira o mavakes a kano kanakan.

Omalam si Yeso do ranom

(Make 6:45-52; Yowani 6:16-21)

22Komavos ori am ipanci na rana ni Yeso o macinanao jya somakay do vazangay a mangay do katovangan na no rako a meybebneng a ranom. 23Teyka na taitaiden o aro a tao am maveyvow a mangay do tokon a meynozi. Mahep rana am amyan pa do dang. 24Am marai rana o vazangay do pamsan na. Ikongo do sangozen da, am ori o ikaligaligan no vazangay do kasangoz da sya. 25Toda jyadagdag rana am amyan si Yeso do rako a meybebneng a ranom a mangonong a meypangay do macinanao jya. 26Macita da no macinanao jya a omalam do ranom am ikanyahey da. Maniring sira am, “Anito!” kwan da a manyahey a amlololos. 27Maniring si Yeso jira am, “Ji kamo anyahey, ta yaken.”

28Maniring si Pite am, “Mo Panirsirngen, no si Yeso ka am pancyan yaken a kalam ko do ranom a mangay jimo.” 29Maniring si Yeso am, “Sijya.” Makarahan am gomcin si Pite do vazangay a kalam na do ranom a meypangay ji Yeso. 30Am macita na o omaopaong am to rana nyahey. Toda jingned am amlololos a manci ni Yeso do kahap na sya. 31Makarahan am jya nimeyyahahay si Yeso a mangay komatkat sya. Maniring am, “Yatey likey pa o onowned mo, ta mo ji meyhanhan nyaken. Ikongo o mo peykarwan so onowned mo a yaji meyhanhan nyaken.” 32Zomagpit rana sira do vazangay am irekhang na rana o pagpag. 33O macikavang ji Yeso a macinanao jya am iraralay da rana si Yeso. Maniring sira am, “Namen anoyngan imo a Anak ni Ama ta do to.”

Niwakwakan na o meyngen a tao do Kenisale

(Make 6:53-56)

34Makaranes sira do katovangan no rako a meybebneng a ranom am mangid sira do Kenisale. 35Masingkad da si Yeso no aro a tao do dang am manovoy sira so tao a mangay a mapeykatokatoyo so meykeyngeyngen a tao do manwanongnong a ili a kangay da nira do tangain ni Yeso. 36Ta no si ori pa o ipakapinan da do ayob ni Yeso. Ta o minan do ayob ni Yeso a tao am todapya rana sira.

Currently Selected:

Matay 14: snt

Highlight

Copy