Yowani 11

No kawakwak ni Lasalo

1Amyan so asa ka tao a meyngaran so Lasalo a tey makdeng so ingingnen a meyvahay do Potani. Do dang rana am peyilyan da Madiya kano kaka na a meyngaran so Marta. 2Si Madiya rana am iya o nimapaglo so mahangno a haneng do ai ni Yeso a kalinas na jya no avok na so ai ni Yeso. O meyngen a si Lasalo am kakteh na no nang. 3O rarwa kakteh na am mapasonson sira so tao a mangay ji Yeso. Maniring sira am, “Mo Panirsirngen, yameyngen o ney malipetpet na jimo a kagagan mo.” 4Maniring si Yeso do pakamizngan na sya am, “Jyabo kato na rana wakwakan ni Lasalo no ingingnen na ori a. O ikakman na sang am azwain si Ama ta do to a kapacyazway na no Anak na.”

5Ikaglaw ni Yeso si Marta kano kakteh na a si Madiya. Akman sang si Lasalo a ikaglaw na. 6Mamizing na si Lasalo a meyngen am todavezed pa dang si Yeso a miseysan so kadwa araw. 7Karahan am maniring do macinanao jya am, “Meyoli tamo pa do Yotay a pongso.” 8Maniring o macinanao jya am, “Mo Mangnanao, no kano nang asyo am apwa agsahan da imo no veysen no tao do Yotay. Ikongo mo kakzan no mo kapeysinaoli pa do dang.”

9Maniring si Yeso am, “Yadwa o ikarwa no vatvatek no na ikazngang. No malam o tao do maraw am jyabo kacikad na, do kapakacita na so zezak a amzezak so karawan a. 10Am no mangonong do mahep am jyabo kaji na nikadan, do kaji na makacittan so mazngang a.”

11Iptad na o ciring na ni Yeso am maniring pa am, “Yamitkeh si Lasalo a kagagan ta. Mangay ko pa yokain.” 12Maniring o macinanao jya am, “Mo Panirsirngen, no si manoyong a mitkeh am ji meyvangon pa ori a.” 13O peypeypangayan no ciring ni Yeso am yarana nimawakwak si Lasalo. Am ji da tenngi no tao o ciring na. Ta ipanci da yato ngitkeh. 14Karahan am ji na rana naywa o ciring na ni Yeso jira. Maniring am, “Yarana nimawakwak si Lasalo. 15Apyapya o kaji ko ngyanan do dang. Ta si macita nyo na o vazay ko am ji nyo nganoyngi rana yaken a. So yangay tamo pala.” 16O meyngaran so Tomase a ngaranan da si Nimeytovong a nimatazak a tao am maniring do karwan da macinanao ji Yeso am, “Macihza tamo jya, kapacikawakwak ta jya.”

Si Yeso o mapeyvangon so tao a yapwan no ikavyay no tao

17Makaranes si Yeso do Potani am katenngan na rana si Lasalo a kapat araw a nibobo da. 18Masngen o Potani do Yelosaleng. 19Aro o tao do Yotay a nimapo do Yelosaleng a mangay mapadnadna so pahad da Marta kani Madiya, do kanimawakwak no kakteh da. 20Mamizing ni Marta si Yeso a nimai am makowbot a mangay amrapong sya. Si Madiya am to ngyan do sahad no vahay da. 21Maniring si Marta ji Yeso am, “Mo Panirsirngen, no ka mina to ngyan do jya am jyabo na mina kawakwak a. 22Am ko katenngan o kamizing na jimo ni Ama ta do to do pasyasyan mo jya sicyaikwaya.” 23Maniring jya si Yeso am, “O kakteh mo ori am mirwa pa ori a mavyay.” 24Maniring si Marta am, “Ko katenngan o keypirwa na mavyay no marateng o araraw no keypirwa da meyvangon no nimawakwak rana tao do ikavos rana no karawan.” 25Maniring si Yeso am, “Yaken o mapeyvangon so nimawakwak a tao. Yaken o yapwan no inawan no tao. Tana nimawakwak rana sira o omanoyong jyaken am mirwa pa sira mavyay. 26O mavyay pa omanoyong jyaken am amyan rana jira so to meyyonong a ikavyay no pahad da. So ji da rana wakwaki no pahad da. Anoyngan mo ori an?” 27Maniring si Marta am, “Mo Panirsirngen, ko anoyngan. Ko anoyngan imo a Misayya a mai do karawan a Anak na ni Ama ta do to.”

Amlavi si Yeso

28Teyka na o ciring na ni Marta am mangay rana do vahay da a kahes na si Madiya. Maniring am, “Yana nimai o Mangnanao. Yana ipanci imo.” 29Mamizing na o ciring na am meybezbez a mangay ji Yeso. 30No kano nang am ji pa nimangay si Yeso do ili da, ta todavezed pa do niyanan da da Marta. 31O aro a tao do Yotay a nimangay mapadnadna so pahad da Madiya meyketeh am macita da si Madiya meybezbez a makowbot. Karahan am onotan da. Ta ipanci da mangay amlavi do heseb no kakteh na.

32Makaranes ji Yeso si Madiya am meylilitod do tangain na. Maniring am, “Mo Panirsirngen, no ka mina to ngyan do jya am jyabo na kanimawakwak no kakteh namen a.” 33Macita na si Madiya kano aro a tao do Yotay amlavi am meyngen onowned na do pakacittan na sira. 34Maniring jira am, “Do wanjin nyo nibobwan nya.” Maniring sira am, “Mo Panirsirngen, sijya pala, kacita mo sya.” 35Karahan am mina to meykaoo a amlavi si Yeso. 36Maniring sira o tao do Yotay am, “Asyo na tey karilaw si Lasalo eya.” 37Maniring o tatasa jira am, “Niwakwakan na o mata na no mavota tao am ikongo na ji ngiwakwaki ji Lasalo no keyngen na kaji na rana limanan.”

Nipeyvangon na si Lasalo

38Makaranes si Yeso do heseb na am meyngen o onowned na amnakenakem sya. O heseb rana ori am asa ka azcip ori. O ngoso no nang am nipasengsengan da so rako a veysen. 39Maniring si Yeso am, “Peylis kamo o veysen.” Maniring o kakteh na meyngaran si Marta am, “Mo Panirsirngen, yajya kapat araw rana yanibobo a jyabo na kajyangotan no kataotao na.” 40Maniring si Yeso jya am, “Nipanci ko na jimo asyo o, ‘No si anoyngan mo am macita mo o mapeyzokab a oyowyat ni Ama ta do to,’ kwan ko imo asyoo.” 41Karahan am peylisen da o rako a veysen. Maniring si Yeso a tomangara so hanit am, “Mo Ama, ko isaray jimo an. Ta yamo na nyamizing o ciring ko. 42Ko katenngan mo kapangday a yaomamizing so ciring ko. O ko peycirngan so sang am ko ipamizing so aro a tao a yamyan do katangked ko ito. Ta no si ori pa o anoyngan da jyaken a yamo nipahanhan do teyrahem.” 43Mateyka na o ciring na am amlolos a manci no, “Pakowbot rana mo Lasalo.” 44Karahan am makowbot rana si Lasalo. O ai na kano lima na am mabedbed pa no milakayob. O moing na am nipongosan da no milakayob. Maniring si Yeso jira am, “Ovai kamo rana kalam na rana.”

Naknakmen da kawakwak da si Yeso

(Matay 26:1-5; Make 14:1-2; Locya 22:1-2)

45Macita da o vazay ni Yeso no aro a tao do Yotay a nimangay tomazogaw ni Madiya am anoyngan da rana. 46Am amyan so karwan da mangay manci no vazay ni Yeso do tao a macyagom do Vadisay. 47Am ori o nipeykaygi da no tao a macyagom do Vadisay a kano panipanirsirngen da no mapatanatanang so nakem da si Ama ta do to. Maniring sira do kaygi da am, “Yatey yaro o mapeyzokab a vazay na mina vazay. Meypanngonngo tamo. 48No si to ta amyapya o tao ori a kato da miminan no tao a omanod jya am jyabo kaji da angayan no Loma mangay komavakava so rako a panaralayan ta kabalinas da rana jyaten a.”

49Amyan jira ang so asa ka tao a meyngaran so Keyava. Iya rana ori am panirsirngen da no mapatanatanang so nakem da si Ama ta do to no kano nang. Maniring ori am, “Yabo nyo katenngan. 50Manngwa, nyo jyatenngi o kapyapya na pa no keyyan no asa ka tao a mawakwak nyaten aro a tao do Yotay? No si jyakman sang am jyabo kaji ta miminan a mabalinas a.” 51Am o ciring eya am beken a meyngongyod a ciring na. Ta iya rana am panirsirngen da no mapatanatanang so nakem da si Ama ta do to no kano nang. Am ori o nicyakma ney manoyonoyo so ciring ni Ama ta do to a manci ni Yeso a mangay mawakwak no tao do Yotay. 52Beken a tao do Yotay o ikawakwak na, ta mangay na peylovolovoten o mavonong do peycyavanovanwan na omraralay ni Ama ta do to a tao akmey yasa rana.

53Nimakalapo no kano nang o kanakenakem da no panipanirsirngen no tao do Yotay o kawakwak da si Yeso. 54Am ori o ji na rana mangilili ni Yeso do Yotay. So nimangay ni Yeso a kano macinanao jya do asa ka ili a meyngaran so Ivalyan a masngen do kabwan no nihakawan no tao a miseysan dang.

55Omanam o Iyeci am aro tao a mangay do Yelosaleng a mangay mahap so iwawalam da omoyas do kataotao da. 56No kanang am to da ngala si Yeso. Maniring sira do kalwalovotan da rako a panaralayan am, “Ala yaji ngai si Yeso a yamacipamaring so kanen ang.” 57Nipanci da na no tao a macyagom do Vadisay a kano panipanirsirngen no mapatanatanang so nakem da si Ama ta do to do aro a tao o kapanci da no yanan ni Yeso, ta mangay da rakpen.

Currently Selected:

Yowani 11: snt

Highlight

Copy