maluko 5

poa yov'o to iesu 'o isi cʉnghi to h'aokuv'o ci cou

(matai 8:28-34; luka 8:26-39)

1mo uhto ta'esi to etʉpʉ ne ngalilaya, zoucu hupa to coukolasin. 2ne mon'a ohpueho to 'apangʉ 'o iesu isi lʉa 'o cihi cimo i'mi to heuf'a ho yuyafo ci cou; 'e cou eni isi cʉnghi to h'aokuv'o, 3la asonghoi yonto heuheuf'a, uk'a ci la meelʉ atʉkcʉ, o'a la h'unasa seov'oha to ekʉka. 4lahe siho ta'poe'i to ekʉka 'o t'angosi ho seo'eisi 'o emucusi, lasi ez'oz'a 'o ekʉka to t'angosi, ho taintʉha 'o isi seo'eisneni to emucusi. uk'a cimo tasohe ho peelʉi atpʉta. 5la huhucmasi yonta heuheuf'a ho ito mayoyo'hunge ho tmunoi moozoyʉ, lean'a mayo to fatu ho invonvo pohcinghi.

6isi i'mocvihneni ho teolʉi 'o iesu, 'atimeumeusu smo'usnu ho pop'up'ungu to tuhcu to iesu, 7tmunoi moozoyʉ: <oko to sopepea hamo ci iesu, mainci uhtan'e ho 'afeo'fu'a a'o? te'o epici to hamo ho m'ene suu, teav'a pohtutumza a'o!> ( 8homo maica 'e e'esi mo i'mi ho ohsicu yainca to iesu: <h'aokuv'o, i'mi ta feangosi ho yuyafo!>)

9isi tuocosi to iesu: <cuma na ongkosu?>

isi yut'inga: <'a <<sobotngonʉ>> 'o ongko'u. maica ho mimza botngonʉ!> 10mo mi'usnu to iesu ho mici ehʉhʉyʉ m'eya o'te peobanga ho mongoi to hpʉhpʉngʉ to ic'o.

11to tngʉceofʉ to cum'usi mo 'oc'ocic'o yaa botngonʉ ci feʉ'ʉ mo eabobonʉ; 12mo mi'usnu to iesu 'o h'aokuv'o, mainca: <moeza popeo'usna ta botngonʉ ci feʉ'ʉ a'mi, poa tmʉ'cʉnghʉ ta 'ayumona ta feʉ'ʉ.> 13isi teomneni to iesu; cu i'mi to feango to cou 'o h'aokuv'o ho yuyafo, yʉmeʉmʉ to botngonʉ ci feʉ'ʉ; 'o feʉ'ʉ (mo asonʉ posipopsohʉ) micu cono meievoi to tʉ'nʉ ho su'to etʉpʉ, acʉhʉ engeosʉ hocu mcoi.

14'o le'aʉt'ʉcʉ feʉ'ʉ cu acʉhʉ toekameosʉ; uhta hosa ho ito mayoyou to aukukuyungu ho eʉsvʉsvʉta na eni. micu acʉhʉ yuyafo ho 'ucia aiti cumas'a namo esmi ci hi'hioa. 15mo acʉhʉ uhto isi yoni to iesu, aiti 'o ohsila cʉnghi no h'aokuv'o ci cou mo yusuhngu, micu aepʉngʉ sʉ'eʉsʉ, ma'tʉtʉs'ʉ 'o koyusi, ihecu na'na smoyoa. 16i'o moso aʉlʉ baito ta ohsi cʉnghi no h'aokuv'o ho i'o nia a'a'ausna to feʉ'ʉ ihecu acʉha eʉsvʉta tamo botngonʉ. 17ihe mi'usni 'o iesu poa mongoi ta hupahe.

18nemo bohsifou to 'apangʉ 'o iesu, mo uso 'o ohsi la cʉnghi to h'aokuv'o ci cou ho yainca 'o iesu: <teko'so poa to'ofeihni a'o.>

19o'a isi teomneni to iesu. at'ingha yainca: <teko maine'e ho eʉsvʉta to 'oahngʉsu, isi yainenu to nooe'oca na hiasi boemi no himcocoveoi ho aʉt'ʉca suu, ho ina isi hi'hioa ta feangosu.>

20cu e'ohʉ 'o ic'o, ahoi yonto mia'usnu to tikapoli ho psoyaska 'o iesu ho i'o ohsi hioaneni ta feangosi; uk'a cimo o'te tmayamci tomo tmalʉ ci cou.

oko no mamespingi to ielu ho i'o tma'sʉpcʉ ci mamespingi

(matai 9:18-26; luka 8:40-56)

21mo ivaho yonto 'apangʉ 'o iesu ho ohpihi to ta'esi; to aaskiti to etʉpʉ mo botngonʉ ci cou 'omo yu'eteuyunu to tuhcu to iesu. 22to ic'o mo cihi cila leaʉt'ʉcʉ to kaitoo zou ielu 'o ongkosi, mo maezo esmi. ne isicu aiti 'o iesu cu osni m'ocnguyu to tuhcu to t'angosi, 23m'eya coveoza to iesu: <'o okono'u mamespingi mo tma'congo hocu na'no sokoeva, tekon'aso usa ho hoe'oci ho aotothoma, to'usni 'o nsousi!>

24mo fiho 'o iesu. 'enepio ci cou 'omo to'ofeihni ho skotva'oya 'o iesu.

25to ic'o panto cihi ci mamespingi micu aʉlʉ tomaska ueso homo tma'congo no tma'sʉpcʉ, 26mosola poa baito to 'enepio ci leaotothomʉ, esmi tomo man'i ci 'atutumzo, tiepʉnga na nia afu'usi ezoezoyʉ; at'inghi o'aisi ahta husuhca 'o tma'congosi, nama mo huhucmasi ausuhcu kuzo. 27ohsicula tac'ʉhi na ohsila hi'hioa to iesu, ko'koeno aha'o notvohʉ tamo botngonʉ ci cou, ho ohfaf'uhu to iesu, meuaso to yʉsʉsi, 28yainca no koyusi: <hoci'u maka peuasa si yʉsʉsi, 'ata'u ahtuo'te yov'o.>

29'o tma'sʉpcʉsi micu osni tosvo, ta'hongi ho micu yov'o 'e tma'congo ta feangosi. 30isi osnia cohivi to iesu homo yaa yuyafo ta feangosi ci tonʉ, cu miezuhu tamo botngonʉ, yainca: <siya como meuaso ta yʉsʉ'u?>

31ihe yut'inga to tesisi: <aiti, maica 'e hia botngonʉ ta cou ho skotva'oya suu, mainci tuocosi siya namo meuaso suu?>

32micu miukukuyungu 'o iesu, 'ucia cohivi siya namo meuaso. 33'o mamespingi isi iachia cohivi 'emo esmi ta feangosi ci hi'hioa, cu ma'eopeophi ho pop'up'ungu to yaa t'ango to iesu, esansana 'o a'ʉmtʉsi a'a'ausna. 34isi mi'usni to iesu ho yainca: <oko, isi to'usni ta singkoosu. soanono'sio hocu maine'e, na tma'congosu micu aapayo'ʉ.>

35ne isin'a seolʉa no engha to iesu 'e e'esi, panto mo i'mi to emoo to le'aʉt'ʉcʉ kaitoo, eʉsvʉta to ielu: <micu kuzo 'o okonosu mamespingi, ten'aeno 'ahʉya a'ep'epva si sensei?>

36o'a isi cumasa to iesu#<o'a isi cumasa to iesu> hocieno yainca <isi talʉi to iesu>. 'o e'ehe, mi'usnu to le'aʉt'ʉcʉ kaitoo ho yainca: <'ote ngoheʉngeʉ, at'inghac'o taa'uzva!> 37isicu hafa 'o petelo, yakovu, ho i'o ohaesa to yakovu ci yohane ho nʉtheni, isi potani hoci to'ofeihni na mocmo. 38esmi to emoo to le'aʉt'ʉcʉ kaitoo, aiti to iesu ho micuc'o acʉhʉ ep'ʉcʉ ho tmunoi mongsi. 39mo yʉmeʉmʉ 'o iesu ho yainca: <mainci mimu 'ahʉyʉ moozoyʉ tmunoi mongsi. mioeno ahtu mcoi si oko, 'amoc'o oengʉtʉ.>

40ihe toehunga cocvi 'o iesu, isicu peteoyafa to iesu, i'oc'o maameoi to oko ho i'o mo tuyu ci tesisi 'o isi poa fiho yʉmeʉmʉ to hopo to oko. 41isi tiemuca to iesu 'o oko no mamespingi, mi'usni ho yainca: <talita, kumi!> 'o e'a'ausnasi zou: <oko no mamespingi, te'o cucufni suu, yʉc'ʉ!>

42'o oko no mamespingi micu osni yʉc'ʉ ho coeconʉ (ne mio micu tomaska ueso 'o oko no mamespingi.) 'e hi'hioa eni a'ʉmta acʉha poa kuici yamci 'o botngonʉ! 43isi bumemeala eutotaveiya to iesu teav'a mi'usneni no mocmo ho epeaska, isin'a cucufni ho ake'a fii no tesi ana 'e oko.

Currently Selected:

maluko 5: bsnfe

Highlight

Copy