matai 19

e'usna no mochi no vcongʉ ci mo'ma'cohio

(maluko 10:1-12)

1pateʉpnga to iesu 'emo maica ci e'e, mongoi ne ngalilaya, yuovei to apihana ne yolutan ci hupa to yutaya. 2botngonʉ ci cou mo to'ofeihni to iesu, micu yonto ic'o ho aotothoma 'o tma'congohe.

3piyo ci coufalisai mo esmi ho baito to iesu, akoeva no akuzkuzoa 'o iesu, tuocosi: <'o hoolicuto isi teomneni 'e hahocngʉ hoci boemi no mav'ov'o ci 'o'emamzʉ ho ciha na vcongʉ, mio emzo?>

4yut'inga to iesu: <o'amocu ohmulaeno ahta engha 'e seiso eni? <<no ahoisi, 'o nooe'oca ohsi teyai 'e hahocngʉ yaeza teyai 'e mamespingi.>> yainca to hamo: 5<<i'mi tan'e, 'e cou te mongoi to maameoi, tmuepohʉ 'o vcongʉ, micu cono feango 'emo yoso.>> 6homoeno maica, o'ana mo i'vaho yoso 'e navconga, mamicu coni ci feango. ko'koeno, na isi yupa paepo'usna to hamo, o'ate eevaza ta cou.>

7ihe tuocosi to coufalisai 'o iesu: <mainci isieno fii tamo maica ci h'oesvʉta to moose a'to, yainca hocisi fii no tposʉ no yupeevai tec'u peelʉi ciha 'e mamespingi?>

8yut'inga to iesu: <ho isi teomneni to moose muu ho teongasi na vcongʉ, 'amoeno maica homo angu kʉhtosʉ na 'tohʉngʉmu; at'inghi no nia ahoisi ho ohon'a teyai 'e hpʉhpʉngʉ o'amosos'a maica. 9te'o eʉsvʉta muu, 'e vcongʉ hoci o'te nomio no 'oha aʉtʉkcʉ, 'upena na siya hoci teongasi na vcongʉ ho i'vaho mevcongʉ no mocmo ci mamespingi, micu yaa kuisi no mseezo.>

10yainca to tesi: <homoeno maica na natʉ'ca no navconga, apuyu ʉmnʉhe hoci o'ate 'ahʉyʉ mevcongʉ.>

11yut'inga to iesu: <'emo maica ci mo'ma'cohio o'ates'a acʉhʉ meelʉ tiou 'e cou, 'ai'o moc'o mayo to afnaso ci mengumi to hamo nate meelʉ tiou. 12maica mo man'i na 'o'emamzʉ no o'te mevcongʉ 'e cou: pantola ahoi ho mon'a yayo ho o'ate 'aseolʉ hoci mevcongʉ; pantola nomio ta cou ho o'te mevcongʉ; pantolan'a nomio no hpʉhpʉngʉ ne pepe ho o'te mevcongʉ. hoci peelʉi tiova 'e mo'ma'cohio eni 'ateeno tiova!>

tooyokeo to oko

(maluko 10:13-16; luka 18:15-17)

13pantomo mahafo to oko ho baito to iesu, te m'eya hoe'oci to emucusi ho 'inolineni; ihe at'ingha koica to tesi 'emo maica ci cou. 14at'inghi isi yainca to iesu: <poa uhtan'e si 'o'oko, teav'a potani, maica 'omo yonto hpʉhpʉngʉ ne pepe ci mao'o'oko 'amoeno aʉlʉ mais'a 'emo maica ci cou.>

15isicu hoe'oci to emucu to iesu, ataveisi micu mongoi to ic'o.

yuyupasʉ ci foinana

(maluko 10:17-31; luka 18:18-30)

16moso i'nʉskʉ, pantomo uso ci cou ho baito to iesu, yainca: <sensei, cumanante'o hioa cimo ʉmnʉ niante'o meelʉ mayo no 'auesiesi nsou?> 17yut'inga to iesu: <mainci osko tuocosi a'o namo natʉ'ca no <<mou'ʉmnʉ>> ci hi'hioa? moc'o cihi 'o mou'ʉmnʉ. hociko mici mayo no 'auesiesi nsou, 'antekoeno noʉt'ʉci 'o h'oesvʉta.>

18isicu tuocosi: <namo mainenu ci h'oesvʉta?>

yainca to iesu: <'ote opcoi no cou; 'ote mseezo; 'ote meo'eoi; 'ote emeknuyu; 19la meot'ʉt'ʉcʉ to maameoi; la himngonghi ta ehuehungu, mais'a hola ngohia 'e iachi.>

20isi yut'inga to foinana: <'emo maica ci h'oesvʉta os'ocu acʉha noʉt'ʉci, cuma na ten'a hioa ci mocmo?>

21yainca to iesu: <hociteko peihcʉ'ho no a'sʉftonʉ, acʉha phieni 'o ezoezoyʉsu, faeni tomo thi'cia ci cou na peisu, tekocueno yaa yupasʉ ci te soangva ne pepe; atavei tekocu to'ofeihni a'o.>

22ne isi talʉi to foinana 'e e'e eni, tosmʉsmʉzʉ hocu mongoi, maica homo kuici yuyupasʉ.

23isicu mi'usni to iesu 'o tesi ho yainca: <te'o a'ʉmta eʉsvʉta muu, hoci meelʉ 'o'oko to hpʉhpʉngʉ ne pepe 'emo yuyupasʉ ci cou. a'ʉmtʉs'a songoveoa! 24te'o i'vaha eʉsvʉta muu, 'emo yuyupasʉ ci cou hoci mici tma'oko to hpʉhpʉngʉ to hamo, mo ngoveohe to lakuta hoci yʉh'ʉtʉ to koyu to feezo!>

25ihe talʉi to tesi 'e e'e eni, mo a'sʉftonʉ yamci, cu tuocosi: <hoci maica, siya na ten'a meelʉ noa to'usni?>

26isi teochʉmi to iesu 'o tesi, yainca: <o'ate peelʉi ta cou, at'inghi 'o hamo, tesi aa'pucva peelʉi.>

27tuhcusi tan'e, mo aomotʉ'ʉ 'o petelo ho yainca: <teko aiti, imzacu teongasi 'e acʉcʉhʉmza ho to'ofeihni suu, cuma na tamzala elʉa?>

28isi mi'usni to iesu 'o tesi ho yainca: <te'o eʉsvʉta muu, yono tena faeva ci hpʉhpʉngʉ, hotena yusuhngu no psoevohngʉ ci suoca'ha 'o okocou, 'e mimu to'ofeihni a'o ci cou te yusuhngu to maskʉ ueso ci suoca'ha, yʉsvʉta 'o maskʉ ueso ci suezopʉ ta 'isolaelu. 29'upena na siya, nomio a'o ho teongasi na emoo, nanat'ot'ohaesa, maameoi, 'o'oko, ho ezoezoyʉ, te acʉha evei note tose'conza ci hnoo. a'vinano mayo no 'auesiesi nsou. 30at'inghi, mo botngonʉ 'o moso muyo, tenala uafeihi, 'o moso uafeihi. tenala muyo.>

Currently Selected:

matai 19: bsnfe

Highlight

Copy