luka 21

sʉ'tʉ 'o tuvcongʉ ci mamespingi

(maluko 12:41-44)

1mo biue'ie'iyo 'o iesu, aiti 'omo yuyupasʉ ci cou ihe to'seni to tvopeisua to seiten 'o peisuhe. 2yaeza aiti 'o cihi cimo tuvcongʉ ho thi'cia ci mamespingi mo to'so tomo yuso ci okono peisu. 3isicu yainca to iesu: <te'o a'ʉmta eʉsvʉta muu, 'e isi to'seni ta thi'cia ho tuvcongʉ ci mamespingi mo na'nohe man'i ta ihe to'seni ta mocmo ci cou. 4maica 'e mocmo ihec'o to'seni 'o ang'osʉ to yupasʉhe; at'inghi 'e mamespingi micu anana'o thi'cia, isin'a to'seni 'e ntohsin'a titha onsonsou.>

eyoca hotena aapayo'ʉ 'o seiten

(matai 24:1-2; maluko 13:1-2)

5panto cou ihe yue'engha 'o seiten, engha mo mainenu na hia teyoyonghua to isi titha ci fatu ho boemi no oho teonghia ci macucuma ho aoyoyonghua. yainca to iesu: 6<imu aiti 'e acʉcʉhʉ eni? ho tac'u esmi na hiesi, ho mio, uk'ana ci tenala makon'a yupa tooskopʉ ci fatu, 'emo macoconi tena acʉha taon'oza.>

meakvo'ʉ ho pohtutumza

(matai 24:3-14; maluko 13:3-13)

7ihecu tuocosi: <sensei, homna nate esmi 'emo maica ci hi'hioa? hoci esmi 'emo maica pano te ake'a humzi?>

8yainca to iesu: <temula bumemealʉ, 'otes'a noa pasloʉngvi; maica te botngonʉ ci cou 'o tena esmi ho titho ta ongko'u ho mainca: <<'aeno a'o 'o kilisto!>> tena mainca: <<micu mic'ʉhi 'e hiesi!>> at'inghi 'otes'a to'ofeihni. 9ho tamu tac'ʉhi na fihngau no ehtothomʉ ho totalʉi nala yufeo'fu'u ci hi'hioa, 'ote nama smoyo. tena anana'o auyu esmi 'emo maica ci hi'hioa; at'inghi o'a isi yainca tec'u mon'i esmi na puesona ta lekisi.>

10isi ecnguha to iesu: <'emo cono suezopʉ tena ehtothomʉ tomo h'unano suezopʉ, 'emo conci hpʉhpʉngʉ tena suyumo tamo h'unano hpʉhpʉngʉ. 11te nongabo na kuici motoevi, seova, ho i'o kolela, tena yaa husmoyoa ci mavolosi te yuyafo ta engʉca. 12at'inghi auyusi no esmi 'emo maica ci hi'hioa, tehe tʉtpʉta muu ho pohtutumza; tahe toveineni to kaitoo ho tuucocosi na muu, a'vinano poekotva. nomio a'o, tehe e'usna to tuhcu to honte ho itola leaʉt'ʉcʉ. 13na eni 'acueno 'oc'ocic'o temu peelʉi 'akasi 'e fukuin. 14ko'koeno, temula bikokoyu, 'ote 'ahʉyʉ ma'eoyocʉ no ehcʉvheni 'e iachi; 15maica te'o fii no mahsosonʉ ci ngayo ho moutʉs'ʉ, poa o'te meelʉ etpʉtʉ ho yutasufku na hangʉmu. 16ac'ʉhʉ no maameoimu, nanat'ot'ohaesa, 'oahngʉ, nanghia tahe yaeza phieni muu; ta 'ayumonamu pano tahe timcoza. 17nomio a'o, tehe toehunga sʉ'nova muu. 18at'inghi ac'ʉhʉ nomo mehacni ci f'ʉsʉmu o'ate payo'a. 19temu bimahtʉicʉ buveici niantemu peelʉi tʉyʉca si iachi nsou.>

eyoca ho tena aapayo'ʉ 'o 'elusalemu

(matai 24:15-21; maluko 13:14-19)

20<hotamu aiti 'e 'elusalemu tehe kuyungvi to heetai to hangʉ, tamucu cohivi tenac'u mon'ia aapayo'a. 21ho mio, namo yone yutaya, te p'usnu to hcuyu; namo yonta hosa te yuyafo; na lenohi'u, 'otena yʉmeʉmʉ ta hosa. 22maica na eni <<zou hiesi no patvovei>>, te acʉha poa esmi 'o e'e to seiso. 23to hiesi ho mio, i'omo ngangho'ʉ ci mamespingi ho inamo paun'u ci ino tena 'atutumzo! 'emo kuici meakvo'ʉ te esmi tan'e, te tma'pueho ta feango ta yatatiskova tan'e na sʉ'no to hamo. 24te mcoi no yu'tipopoyave, hocieno holeo ho hafa uhta mauhpʉhpʉngʉ. tehe psafeo'fu'i to couyafana 'e 'elusalemu, ac'ʉhʉ ho tahecu noc'ʉhi 'o isi esvʉta ci hie.>

cmʉ'ho 'o okocou

(matai 24:29-31; maluko 13:24-27)

25<ho mio, 'o hie, feohʉ, congeoha tena acʉhʉ aopa'to no mavolosi. 'e mauhpʉhpʉngʉ ta ceoa te acʉhʉ nomio no mʉmʉ no smahu ta etʉpʉ ho ma'papayo'ʉ. 26'e yatatiskova te acʉhʉ mooteo tote cmʉ'ho ta hpʉhpʉngʉ ci hi'hioa, ac'ʉhʉ no tuma'payo'ʉ no hia ngoheʉngeʉ, maica te acʉhʉ tmaot'ou 'e afu'u ceoceona ta mouhpʉhpʉngʉ. 27ho mio, te espa'to 'o okocou, a'sʉftonʉ yaa tonʉ ho psoevohngʉ poʉt'ʉcʉ to cmʉcmʉ ho ohpueho. 28hotena esmi 'emo maica, temu tobʉsngʉcʉ, maica tec'u esmi 'e hiesi no to'usni muu!>

pahsʉsʉfta to moezunge

(matai 24:32-35; maluko 13:28-31)

29isi ivaha mi'usni to iesu ho mo'engho tomo coni ci epo'usa: <temu aiti 'o moezunge ho i'o mocmo ci ma'e'evi. 30cono hola fungaho, tamucu cohivi tec'u esmi na homu'eina. 31totiski, ho temu aiti 'e acʉcʉhʉ ci a'a'ausna te cohivi tec'u mon'i esmi na hpʉhpʉngʉ to hamo.

32<temu atatalʉa: 'e yatatiskova ta maitan'e auyusi no o'amocu te acʉhʉ mongoi ta hpʉhpʉngʉ, acʉcʉhʉ 'emo maica ci hi'hioa tenac'u esmi. 33te aapayo'ʉ 'e engʉca ho ceoa, i'e e'e'u 'auesiesi o'ate aapayo'ʉ.>

bu'a'aʉtʉs'ʉ

34<temu la iachi aʉtʉs'ʉ! teav'a poa ma'payo'ʉ no eabobonʉ ho ino ma'tipvongʉ no h'oyunsova na piepiyamu, ci tes'a aemo'au cmʉ'ho muu 'o hie ic'o. maica 'o hie ic'o 35te totiski no tokeʉpʉ. te cmʉ'ho ta feango ta afu'u yatatiskova ta acʉcʉhʉ ci hpʉhpʉngʉ. 36temula aʉtʉs'ʉ, o'te tosvo 'inoli, poa yaa tonʉa no buveici tate esmi ci afu'u hi'hioa, ko'ko meelʉ yac'ʉ to tuhcu to okocou.>

37homo hie la yonto seiten 'o iesu ho mo'ma'cohio to cou, yuyafo to hosa homo yofna, yonto hcuyu'olivu ho miski; 38'o botngonʉ ci cou la aʉsʉfeʉngnʉ uhto seiten, te akoyu no tmalʉ to iesu hote eʉsvʉsvʉtʉ.

Currently Selected:

luka 21: bsnfe

Highlight

Copy