luka 1

ehoi

1einva ci ti'afuilo:

micu 'enepio ci cou 'omoso tmopsʉ to tposʉ, psoyom'a 'emo esmi ta taicoto ci hi'hioa. 2'o hiahe psoyom'o mo i'tohungu to ohela ahoza to ahoisi ho aʉla huceoevi ci hi'hioa, a'vinano etoyangza to moso la psoyaski ta e'e tan'e. 3acʉcʉhʉ na eni o'ucula i'momhoma bumemeala eseiseita, ko'ko os'o yainca te'o etotoyangza ho mi'usnu suu ho eʉsvʉta, 4na atuhcusi te poa cohivneni suu 'e ohsula yoyayaeza ci ceonʉ ho mio emio.

eyoca hote yayo 'o letoonono yohane

5ne ohsin'a aʉt'ʉca to honte helote 'o yutaya, panto cihi ci saisi, zou zakalia 'o ongkosi, mo tma'usnu to saisi ci 'apia; zou 'ilisape 'o ongko to vcongʉsi, maezo mʉntʉ'ca to suezopʉ to 'along. 6holasi aiti to hamo, mo aepohʉ mousngʉcʉ ci cou, ayʉyʉcʉ ho noyʉci 'o h'oesvʉta ho h'ofiha to hamo. 7uk'a ci okohe; maica mo maitola o'te mev'ohʉ no oko 'o 'ilisape, aavaho cu aepohʉ mameoi 'emo yoso.

8moso conci hie, seolʉa no yaahioa to seiten 'o zakalia, yonto tuhcu to hamo ho hioa 'ola hi'hioa to saisi. 9maito lahe at'oca ci h'ofiha, to ataveisi no yu'siseiti, te meelʉ uhto seiten ho phomeo to hiu. 10nemo seolʉa no phomeo to hiu, mo yonto yafana 'omo botngonʉ ci cou ho 'inoli. 11akameosʉ, panto tensi to nooe'oca mo yac'ʉ to vhona to 'oyona sʉ'tʉ ho aopa'to; 12isi teolʉi to zakalia, mo yamci ho ngoheʉngeʉ. 13at'inghi isi mi'usni to tensi ho yainca: <zakalia, 'ote ngoheʉngeʉ! isicu tac'ʉhi to hamo 'o 'inolisu; 'o vcongʉsu ci 'ilisape. tesi pecnineni suu, tako tos'ongki ho poa yohane. 14teko 'aveoveoyʉ ho kokaekaebʉ; botngonʉ ci cou te maezo nomio hote yayo ho 'aveoveoyʉ. 15ho lasi aiti to hamo, mo cihi cite taunona'vʉ ci cou. o'ala mimo to afu'u emi, ne moson'a ngho'ʉ#<ne moson'a ngho'ʉ> hocieno yainca <ne micu yayo>. isicu nongcʉngci to seilei. 16tesi eahafa 'omo botngonʉ ci cou'isolaelu ho meeyovei to nooe'oca - to hamohe. 17te papoevʉ to nooe'oca, 'ʉteʉ ho yaa tonʉa, mais'a 'o eyongensa 'iliya. tesi i'momhoma poa nanghia 'o amo ho 'o'oko, poa ma'vovei 'ola yu'hango, mito ceonʉ no toutʉs'ʉ ho coumoʉlʉlʉ; tesi to'usni 'e yatatiskova ho yungeou to nooe'oca.>

18mi'usnu to tensi 'o zakalia ho yainca: <te'o humi no cuma hoci'u peelʉi cohivi 'emo maica ci hi'hioa? mi'ocu mameoi; maezocu yʉepʉngi 'o vcongʉ'u.>

19yainca to tensi: <la'u yac'ʉ to tuhcu to hamo ci kapele; isi popeoskuna a'o ho evahi suu, eʉsvʉta suu 'e kaebʉ ci e'e. 20at'inghi, maica osko o'te taa'uiva 'e e'e'u, ho tac'u mic'ʉhi 'e hie ho esmi 'e isi engha, teko tmusngʉsngʉ, ac'ʉhʉ no hiesi ho tac'u esmi 'e os'o teomneni.>

21ne mio, ihe toehunga totea 'o zakalia, o'a ihe cohivi mo mainci na'no noana'o ma'na'o to seiten. 22ne micu yuyafo, o'amo meelʉ aomotʉ'ʉ tamo botngonʉ, ihecu cohivi homo baito no mavolosi homo yonto seiten. ho o'amo meelʉ aomotʉ'ʉ, c'o moezʉ boemi to emucu ho mi'usnu to botngonʉ ho meuoloʉngʉ.

23ne micu noc'ʉhʉ 'o hiesi homo yaahioa to seiten, cu maine'e 'o zakalia. 24o'amo noana'o, 'o vcongʉsi ci 'ilisape cu a'ʉmtʉ ngangho'ʉ, eimo no feohʉ ho o'amo emoyafo to phingi. 25isi yainca: <petohʉyacu aʉlʉlʉa to nooe'oca a'o, aapayo'a 'e la'u h'oinveni tamo botngonʉ ci cou.>

eyoca hote yayo 'o iesu

26ne micu nomʉ no feohʉ 'o ngho'ʉ to 'ilisape, isi popeoskuna to hamo 'o tensi kapele ho uhtola yainca nazalo ci hosa ne ngalilaya, 27te evahi no e'e 'omo cihi ci oko no mamespingi, zou maliya 'o ongkosi; 'e oko no mamespingi eni. mohcula yupa esvʉtʉ no navconga 'o cono suezopʉ to tavite ci isi yainca yosefu 'o ongkosi. 28mo uhto tuhcu to mamespingi 'o tensi. yainca: <soanono'sio! miko ʉm'ʉmnʉ ci mamespingi, isi no'upi to nooe'oca suu!>

29i'mi to e'e to tensi, mo na'no yamci 'o maliya, ta'vavoveiya na e'ausna ta tuasoanono to tensi. 30isi mi'usni to tensi ho yainca: <maliya, 'ote ngoheʉngeʉ, maica isi fii no mengumi to hamo suu. 31teko ngangho'ʉ ho peyafa 'omo cihi ci oko, teko tos'ongki ho poa iesu. 32tena taicini ci cou, tenala yainca oko to sopepea ci hamo. 'o nooe'oca - hamo tesi p'eyac'a ho poa suuski to suoca'ha honte to nia maameoisi ci tavite. 33te 'auesiesi honte to cono emoo to yakovu, na tonʉ to hpʉhpʉngʉsi uk'a ci tesi noca'cʉ'hi!>

34mo mi'usnu to tensi 'o maliya ho yainca: <o'amocu mi'o mevcongʉ, te mainenu hoci yuyafo 'emo maica ci hi'hioa?>

35yut'inga to tensi: <te ohpueho ta feangosu 'o seilei; tesi aʉt'ʉca to tonʉ to sopepea ci hamo na suu. ko'koeno, i'otena yayo ci oko te noa yainca oko to hamo. 36aiti 'o 'oahngʉsu ci 'ilisape, cu e'vono mameoi, lahe yainca o'anate meelʉ yaaokoa, at'inghi micu nomʉ no feohʉ 'o ngho'ʉsi maitan'e. 37maica 'o hamo uk'a cimo coni ci o'a tesi peihcʉ'hi ci hi'hioa.>

38yaica to maliya: <zou soskuskunu to nooe'oca a'o; tesi'so aepʉnga ta feango'u co e'esu.> micu mongoi to maliya 'o tensi.

baito to maliya 'o 'ilisape

39o'amo noana'o, cu e'ohʉ 'o maliya, 'aumeumeusu emo'usnu to mia'usnu to hcuyu, cu sʉc'ʉhʉ to mo conci hosa to yutaya. 40mo yʉmeʉmʉ to emoo to zakalia, mi'usnu to 'ilisape ho tuayokeo. 41ne isicu talʉi to 'ilisape homo tuayokeo 'o maliya, micu aha'o aot'ou 'o ngho'ʉsi. isi nongcʉngci to seilei 'o 'ilisape. 42tmunoi moozoyʉ: <ta taico ta maamespingi miko atva'esi ʉm'ʉmnʉ; 'e osko ngho'ʉ ci oko mo maezo ʉm'ʉmnʉ! 43homo uhtan'e ho baito a'o 'e ino ta nooe'oca, ma te'oeno'so pasvo'ha? 44ne os'ocu talʉi ne miko tuayokeo, co ngho'ʉ'u micu bi'po'potʉ ho kokaekaebʉ. 45namo asansano tmaa'uzo hote esmi na e'e to nooe'oca ci mamespingi mo a'ʉmtʉ ʉm'ʉmnʉ!>

tohmomoengʉ to nooe'oca 'o maliya

46yainca to maliya:

mo einu to nooe'oca co 'tohʉngʉ'u;

47co piepiya'u la nomio to hamo - to leto'usnu ci nooe'oca'u ho kaebʉ;

48maica ho lasi ta'cingha 'e soskuskunu nosi mamespingi.

ahoi maitan'e. tehe toehunga yainca ta yatatiskova mi'o ʉm'ʉmnʉ,

49maica 'o sotonʉa ci hamo isi aepʉnga ta feango'u 'emo someoisa ci hi'hioa.

na ongkosi mo socofkoya;

50la mi'usnu tamo einu to ongkosi ci cou ho pafi no himcocoveoi,

acngucnguhu uk'a noc'ʉhi.

51lasi hoʉsʉzneni 'o yaa tonʉa ci emucusi.

popeoemo'a 'o lahe ta'koeva ci 'tohʉngʉ tola bobitano.

52'omo sotasoa ci honte isi popeoha to suoca'hasi;

isi ec'ʉvi 'ola noaceaco ci cou.

53'ola sieo ci cou lasi poa yoseʉ to mafe ci 'oanʉ,

poa psasayae maine'e 'omo yuyupasʉ ci cou.

54-55isi noyʉci 'o ohsila afu'a teomneni to nia maameoito ci e'esi,

e'oca 'o soskuskunusi ci 'isolaelu.

isi ta'cingha 'o 'avulahamu, mi'usni ho pafeni na himcocoveoisi,

a'vinano ac'ʉha to mʉntʉ'casi, ac'ʉhʉ no 'auesiesi!

56mo asonʉ tuyu no feohʉ homo no'upu to 'ilisape 'o maliya, ataveisi cu maine'e.

yayo 'o letoonono yohane

57micu mic'ʉhi 'o hiesi no yayo 'o ngho'ʉ to 'ilisape, cu yayo 'o mo cihi ci oko no hahocngʉ. 58ihe tac'ʉhi to ehuehungusi ho ito 'oahngʉsi ho isi fii tamo maica meoino mengumi to hamo, mo maezo acʉhʉ toehungu 'aveoveoyʉ.

59miptuhi ne mohcu yayo 'o oko, ihecu hioa 'o mees'ehonga, a'vinano 'ucia e'ofeihna to ongko to amosi ho poa zakalia. 60at'inghi isi yainca to inosi: <o'ates'a maica! te poa yohane.>

61ihe mi'usni to 'oahngʉsi ho yainca: <ta suezopʉsu uk'a cimo ahtu maica ci ongko.> 62ihecu peuoloʉngva 'o amosi, tuocosi cuma na tesi poa ongkoneni ta oko.

63micu m'ene to h'atpʉskʉ no taopica 'o zakalia, isi tposi ho yainca: <'o tesi ongko zou yohane.> ihe toehunga na'na yamceni. 64tuhcusi ne mio, cu ivaho meelʉ aomotʉ'ʉ 'o zakalia, cu maavo 'o ngayosi ho tohmomoengʉ to hamo. 65mo acʉhʉ na'no yamci 'o ehuehungu. 'e eni micu psoengaboa to mia'usnu to mauhcuhcuyu to yutaya; 66i'o mo tmac'ʉhʉ mo acʉhʉ mainca no koyuhe: <tena nana mainenu ci cou 'e okoeni?> maica isi husansana ho isi no'upi no tonʉ to hamo.

eyongen to zakalia

67'o amo to yohane zakalia isi nongcʉngci no seilei, cu psoecʉ'ha 'o e'e to hamo, yainca:

68teto'so tohmomoengʉ to nooe'oca - hamo ta 'isolaelu!

isi mʉʉt'ʉci 'e mao'o'okosi, psoevoyunga 'e 'o'okosi.

69isi i'mi ta emoo to soskuskunusi ci tavite,

nomio a'to ho p'eyac'a 'emo cihi ci yaa tonʉ ci leto'usnu.

70ne noana'o, ohsicula ieni to eyongensa to hamo ho yainca:

71tesi to'usni a'to ho poa momeesih'i to hangʉ,

poa momengvo'ʉ no tonʉ tola afu'u mihango a'to ci cou.

72te mi'usnu to nia maameoito ho hioa na meoino himcocoveoi,

a'vinano talʉa na cofkoya ci ohsila esvʉta.

73-75isi teomneni to nia maameoito ci 'avulahamu.

esvʉta ho to'usni a'to ho poa momengvo'ʉ no hangʉto.

ta conoto yunsou.

o'te poa ngoheʉngeʉ hote yonto tuhcusi.

boemi no socofkoya ho mousngʉcʉ ho fifiho to hamo.

76oko'u,

teko noa yainca zou eyongensa to sopepea ci hamo.

teko papoevʉ to nooe'oca. ayocneni no tesi miya ci ceonʉ;

77la eʉsvʉta to 'o'okosi:

maica ho isicu peteongasa na kuisihe,

te meelʉ noa to'usni.

78'o hamoto mo ma'cocacni ho himcocoveoi;

isi poa psoecʉ'heni to tiskova no mengumisi a'to,

79isin'a i'mi ta pepe ho psoetiskovi

'emo afu'u yaansou ta isi pe'ongki no mcoi ci cou,

engocha a'to ho poa smaimio no moususeomʉ ci ceonʉ.

80micu ausuhcu yusasmoyʉskʉ 'o oko, yuayayokeo 'e feango ho 'tohʉngʉsi. la yone maepuepuhu, ac'ʉhʉ ne mohcu la apa'to aut'ot'ou ta taico ta 'isolaelu.

Currently Selected:

luka 1: bsnfe

Highlight

Copy