yohane 6

poa yoseʉ to iesu 'omo posiyoemohʉ ci cou

(matai 14:13-21; maluko 6:30-44; luka 9:10-17)

1mohcu aʉlʉ piyo no hie, mo ohpihi to etʉpʉ ne ngalilaya 'o iesu (la yaeza yainca etʉpʉ ne tipilia). 2panto botngonʉ ci cou mo to'ofeihni to iesu, mo maica ho ohe aiti 'o po'e nosi aotothomʉ. 3mo uhto hcuyu 'o iesu, suteuyuneni to ic'o 'o tesisi. 4ne mio tec'u mon'i esmi 'o hiesi no meem'esa'o to couyutaya. 5mo mʉengʉcʉ 'o iesu, aiti 'emo botngonʉ ci cou mo uhto isi yoni, cu mi'usni 'o fuili ho yainca: <teto'so uhnenu ho mhino note ana, te ko'ko peelʉi acʉha poa yoseʉ 'emo maica ci cou?> 6ho isi e'e eni tesi hʉsvʉta 'o fuili; isieno o'te cohivi na tesi iachia peipeis'ausna.

7yut'ingi 'o fuili: <'upena hoci'so boemi note suse'icha ho mhino no pang. teeno ahtu mako amso otpʉskʉ 'emo macicihi!>

8'omon'a cihi ci tesi, zou ohaesa to saimong petelo ci 'antole, mo smacmu'u ho yainca: 9<ta tan'e panto cihi ci oko mo mahafo tomo eimo ci pang ho yuso ci yoskʉ, at'inghi mateeno'so ahta amsoa aangaeza tamo maica hia botngonʉ ci cou?>

10isi eucufni to iesu: <acʉha poa yusuhngu.> (to ic'o mo na'no man'i 'o kukuzo.) micu acʉhʉ yusuhngu, i'oc'o haahocngʉ, mo asonʉ posiyoemohʉ 'o hia botngonʉ. 11isi yaa to iesu 'o pang, cu to'aveoveoyʉ, ataveiya aangaeza tomo yusuhngu, isi yaeza yaicac'o 'o yoskʉ ho aangaeza; mo acʉhʉ pnanfo 'o hiahe bonʉ. 12ataveisi ne micu yoseʉ, isi eutotaveiya to iesu 'o tesi: <acʉha a'pʉ'pʉya 'o ong'ongacva, teav'as'a a'hi'hisa.> 13ihecu acʉha a'pʉ'pʉya 'o h'ah'atpʉskʉ to moso eimo ci pang, 'aeno 'o ihe ong'ongacvi, ne isi ateuyuna, aʉla teongcʉngci 'omo maskʉ ueso ci skayʉ.

14ihe toehunga aiti 'o isi hioa to iesu ci po'e, cu yainca: <o'as'a ahtuo'te eni nate cmʉ'ho ta hpʉhpʉngʉ ci eyongensa!> 15isi cohivi to iesu ho tehe 'ucia tʉtpʉta, 'ahʉya p'eyac'a ho poa honte, cu ivaho cihcihi totoefʉngʉ to hcuyu.

coeconʉ to skoskopna to chumu

(matai 14:22-33; maluko 6:45-52)

16a'usnu no yofna, mo uhto aaskiti to etʉpʉ 'o tesi to iesu. 17bohsifou to 'apangʉ, e'ohʉ emo'usnu to apihanasi ci kapenong. ne mio micu voecʉvcʉ 'e engʉca, o'amocu mo ahtu esmi to ihe yoni 'o iesu. 18akameosʉ, kuici poepe, isi yufeifei'za to smahu 'o etʉpʉ. 19mo poʉt'ʉcʉ to 'apangʉ 'o tesi, micu asonʉ 5, 6 kilo 'o ihe miya, teolʉi 'o iesu mo coeconʉ to chumu ho emo'usnu to ihe yoni ci 'apangʉ, cu na'na smoyoa. 20isi mi'usni to iesu ho yainca: <'a a'o, teav'a smoyoa!> 21ihecueno 'aveoveoneni ho esifova to 'apangʉ; micu osni sʉc'ʉhʉ to tehe usa 'o 'apangʉ.

toehunga i'ima tomo botngonʉ 'o iesu

22cu mivahi, 'omo nongaco to apihana ci mo botngonʉ ci cou ihe aiti moc'o conci okono 'apangʉ 'omo yonto ic'o; ihe cohivi ma'imo no'upu to 'apangʉ 'o iesu ho fiho to tesi, moc'o iachi emo'usnu maita'e 'o tesi. 23panto piyo ci mo i'mi ne tipilia ci moc'o 'o'okosi ci 'apangʉ mo tosvo to aaskiti, 'aitoeno cum'usi to ohsi yoni to'aveoveoyʉ ho aangae to pang to iesu. 24ihe aiti to botngonʉ mo acʉhʉ o'te yonto ic'o 'o iesu ho i'o tesisi, cu smo'apangʉ ho uhne kapenong ho i'ima.

zou 'oanʉ no nsou 'o iesu

25ihe elʉa to apihana to etʉpʉ 'o iesu, ihe tuocosi: <sensei, miko esmi tan'e homo mainenu?>

26yut'inga to iesu: <te'o esansana, ho imu i'ima a'o, o'a mo i'mi ho mimu baito to po'e, mamo i'mi homo bonʉ to pang ho ooyoseʉ. 27'ote nomio tate kuzo ci 'oanʉ ho peisngoseo, la nomio to 'oanʉ no 'auesiesi nsou ho asno'zonʉ. 'e 'oanʉ eni 'aeno 'o tesi pafeni muu ta okocou, maica i'o amohamo isicu topci to huomza 'e feango ta okocou.>

28ihecu tuocosi: <cuma na ntemza hioa niante tamza no mio yaahioa no lasi hioa to hamo?>

29yut'inga to iesu: <taa'uzva 'omo cmʉ'ho ci isi popeoskuna ci ic'o, 'aeno eni na tesi poa hioaneni muu to hamo.>

30ihe ivaha yainca: <hocieno maica, cuma na teko hioa ci po'e, temia ko'ko peelʉi aiti hocu taa'uzva suu? na teko hioa zou atuhcu cuma? 31'o nia maameoimza. mosola yonta maepuepuhu ho bonʉ no maana, aʉlʉ mais'a 'o isi tposi to seiso: <<isi i'mizneni ne pepe ho fii to tehe 'oanʉ.>> >

32yainca to iesu: <te'o bumemeala eʉsvʉta muu, 'o moose ma'i isi fii nomo i'mi ta pepe ci 'oanʉ na muu#<'o moose ma'i isi fii nomo i'mi ta pepe ci 'oanʉ na muu> hocieno yainca <'e isi faeni muu to moose. o'a mos'a i'mi ne pepe ci 'oanʉ>.; 'omo i'mi ne pepe ci a'ʉmtʉ 'oanʉ mai'o amo'u 'omo mofi muu. 33maica i'o isi faeni to hamo ci 'oanʉ. 'ai'o teeno i'mi ne pepe ho ohpueho, ho fii no nsou 'e hpʉhpʉngʉ ci ic'o.>

34ihe yainca: <sensei, teko'so asngʉcva faeni a'mi 'emo maica ci 'oanʉ!>

35isi mi'usni to iesu ho yainca: <'aeno 'oanʉ no nsou a'o; nate uso a'o, 'auesiesi o'ate sieo; nate tmaa'uzo a'o, 'auesiesi o'ate mecu. 36at'inghi. o'ucula mi'usni muu ho yainca, imucu aiti a'o, o'a imuc'o taa'uzva. 37na isi afu'a pafeni a'o to amo ci cou te acʉhʉ uso a'o. nate uso a'o, o'ate'o ahta hopsʉpseni; 38maica ho mi'o i'mi ne pepe ho ohpueho, o'amo i'mi no iachi'u 'tohʉngʉ ho yaahioa, ma te'o hioa 'o 'tohʉngʉ to mo popeosmuhnu a'o ci ic'o. 39i'o 'tohʉngʉ tomo popeosmuhnu a'o ci ic'o zou: 'o isi afu'a faeni a'o ci cou, o'ate cihi nate tipeoha, a'vinano te poa smoevovei no puesonasi ta hie. 40maica ina 'tohʉngʉ to amo tesi acʉha poa mayo no 'auesiesi nsou nate afu'u baito ta oko ho tmaa'uzo; no puesona ta hie, te'o poa smoevoveia.>

41'o masoso'ehti to couyutaya mo maica ho isi'so yainca to iesu mi'o i'mi ne pepe ho ohpueho ci 'oanʉ, cu yu'tuc'oc'ou: 42<o'as'aeno oko to yosefu ci iesu na taini? ito honga 'o maameoi taini. mainci ita aac'o yainca mita i'mi ne pepe ho ohpueho!>

43yainca to iesu: <o'atemu nama yupa euc'oc'ou. 44hoci o'a i'omo popeosmuhnu a'o ci amo namo koa e'pʉ'pʉyʉ ta cou, uk'a cite meelʉ uso a'o; nate uso a'o, no puesona ta hie ta'ula poa smoevovei. 45ohsicula engha to tposʉ to eyongensa: <<'e cou te acʉhʉ noa po'pa'cohivi to hamo.>> namo afu'u tmalʉ to amo ho tiou no lasi hia mo'ma'cohio, te acʉhʉ uso a'o. 46na eni o'a isis'a yainca pano mohcula baito to amo, 'ai'omosoc'o i'mi to hamo cimo cihi na mohcu baito to amo. 47te'o bumemeala eʉsvʉta muu, inamo tmaa'uzo ci cou micu yaa 'auesiesi nsou. 48'aeno 'oanʉ ta nsou a'o. 49'o nia maameoimu mosola yonta maepuepuhu ho bonʉ to maana, mosoc'o mcoi; 50at'inghi 'omo i'mi ne pepe ho ohpueho ci 'oanʉ hoci ana ta cou o'anate mcoi. 51'aeno a'o 'omo i'mi ne pepe ho ohpueho ho mofi no 'oanʉ no nsou; inamo bonʉ ta 'oanʉ tan'e ci cou te 'auesiesi o'te mcoi. 'e te'o pafeni ta cou ci 'oanʉ 'ai'eno feango'u, te akoeva no poa mayo no nsou 'e yatatiskova ho faeni.>

52'e e'e eni mo ec'ʉ to meoino yupa 'eehcʉvho to couyutaya. ihe yainca: <te mainenu hoci peelʉi poa aneni a'to si feango taini?>

53isi mi'usni to iesu ho yainca: <te'o bumemeala eʉsvʉta muu, hocimu o'te bonʉ ta feango ta okocou, mimo ta hmuyusi, o'atemu yaa a'ʉmtʉ nsou. 54nate bonʉ ta feango'u, mimo ta hmuyu'u, tec'u yaa 'auesiesi nsou; no puesona ta hie te'o poa smoevoveia. 55'e feango'u te a'ʉmta peelʉi ana, 'e hmuyu'u te a'ʉmta peelʉi ima. 56ina la bonʉ ta feango'u, ho mimo ta hmuyu'u, te asngʉcʉ no'ayumonʉ ta nsou'u, na a'o te maezo asngʉcʉ no'ayumonʉ ta nsousi. 57'o 'auesiesi yaa nsou ci amo isi popeoskuna a'o, mi'o maezo nomio to amo ho yaansoua. totiski. namo bonʉ ta feango'u te maezo nomio a'o ho yaansoua. 58'aeno eni 'emo i'mi ne pepe ho ohpueho ci 'oanʉ; inate bonʉ ta 'oanʉ tan'e, te 'auesiesi yaansoua, 'e 'oanʉ eni o'amo mas'a na ohela ana no nia maameoimu, moso bonʉ. mosoc'o mcoi.>

59i'e e'e eni ohsi engha to iesu ne moso yonto kaitoo ne kapenong ho mo'ma'cohio to cou.

e'e no 'auesiesi nsou

60talʉi to piyo ci tesi 'e e'e eni, cu yainca: <mo angu ngoveo 'e mo'ma'cohio eni, ma siya nate tma'hongʉ?>

61isi cohivi to iesu 'o tesi ho ihe auc'oc'ova yue'engha eni, isicu mi'usni ho yainca: <isin'asi eot'ovi ta e'e tan'e na singkoomu? 62honcimu aiti 'o okocou hoci ohpepe ho yuovei to ohsi anana'va yoni, teeno mainenu? 63inamo mofi no nsou ta cou zou seilei, uk'a ci a'a'ausna ta fou ta feango; 'e os'o eʉsvʉta muu ci e'e 'ai'omoeno mofi to nsou ci piepiya. 64at'inghi, ta taicomu panto o'amo tmaa'uzo.> (isicu noana'va cohivi to iesu zou masisia na o'amo tmaa'uzo, siya nate himhohioa ho phieni 'e feangosi.) 65isi ivaha yainca: <ko'koeno, o'ucula mi'usni muu ho yainca, hoci o'amo i'mi no mengumi to amo'u, uk'acite meelʉ uso a'o.>

66ahoi ne mio, to 'ayumona to mosola to'ofeihni ci cou mo 'enepio 'omo mongoi, 'anamo i'vaho to'ofeihni. 67isicu tuocosi to iesu 'omo maskʉ ueso ci tesi: <inacu muu? temu maezo mongoi?>

68mo yut'ingi 'o saimong petelo: <nooe'oca miko yaa mofi no 'auesiesi nsou ci e'e, ma ntemzan'a fiho no siya? 69imza taa'uzva, a'vinano cohivi miko i'mi to hamo ho cmʉ'ho ci socofkoya.>

70yainca to iesu: <o'amos'aeno maskʉueso ci cou 'o os'o epeiya? at'inghi ta taicomu mo cihi 'o 'akuma!> 71'e e'e to iesu isi pas'usna to coukaleo ci oko to saimong ci yuta. 'o yuta zou cihi tamo maskʉueso ci tesi, 'ai'o mosoeno atavei himhohioa ho phieni 'o iesu ci cou.

Currently Selected:

yohane 6: bsnfe

Highlight

Copy