sitoo 8

1'o hi'hioa ho isi opcoza 'o sutepana, isi ʉm'ʉmnʉa to saulo.

akuzkuzo to kiokai 'o saulo

ahoi to hiesi ne mio, 'o kiokai ne 'elusalemu mo elʉ to atva'esi meoino akuzkuzoa. tapeoha 'o sitoo, acʉcʉhʉ 'o sinto mo apeaski ho p'usnu to mia'usnu ne yutaya ho ine samalia. 2panto piyo cimo na'no yaa singkoo ci sinto ihe efo'a 'o sutepana, a'vinano tmunoi mongsi ho tngisi.

3ne mio, 'o saulo isi hioa 'o akuzkuzo to kiokai; ohcacnia 'o macocono emoo ho tʉtpʉta 'o sinto, poekotva to poo'usna.

psoecʉ'ha ne samalia 'o fukuin

4i'o moso apeaski ci sinto moso nongongabo ta hpʉhpʉngʉ ho psoyaska 'o fukuin. 5mo uhne samalia 'o fuili, mi'usnu to cou ne'e ho psoyaska 'o hi'hioa to kilisto. 6mo acʉhʉ tmaayaezoyʉ 'omo botngonʉ ho talʉi 'o e'e to fuili. mo tmalʉ ho aiti 'o isi hioa ci po'e. 7mo moozoyʉ 'o h'aokuv'o ho i'mi to ihe cʉnghi ci cou ho yuyafo, botngonʉ cimo meaupsu'hu, pi'o ci cou mo acʉhʉ noa aotothoma. 8isi nongcʉngci to kokaekaebʉ 'e hosa ta samalia.

9panto mo cihi ci cou, zou saimong 'o ongkosi, 'o nia hiasi meoino yoifo ohela i'nanʉska toehunga taunona'vʉ ta yata samalia. lasi yaeza iachia itanveni; 10i'omo mav'ov'o ci cou ta hosa lahe ʉm'ʉmnʉa talʉi. toehunga yaica: <'e cou eni mo yaa tonʉ to hamo, zou <<sotonʉa>>.> 11maica ho isi noana'va boemi to yoifo ho paspepecvazi 'e botngonʉ ci cou, ko'ko lahe eno talʉi. 12at'inghi, ne ohecu taa'uzva 'o isi psoyaska to fuili ci tonʉ to hamo ho i'o ongko to iesu kilisto, 'o haahocngʉ ho maamespingi cu acʉhʉ tiou to toonono. 13'o saimong mo maezocu iachi tmaa'uzo; ataveisi ne mohcu toonono 'o saimong la asngʉcʉ no'upu to fuili. lasi aiti 'o isi hioa to fuili ci h'unasi ci tonʉ ho po'e, na'na huaeca taunona'vʉ.

14i'o mo yone 'elusalemu ci sitoo ihe tac'ʉhi ho mo tiou to e'e to hamo 'o cousamalia, cu popeoskuna 'o petelo ho i'o yohane ho uhto ihe yoni. 15ne micu sʉc'ʉhʉ 'o mo yoso, cu 'inolineni 'o sinto, tehe poa tiou no seilei. 16maica ne mio o'amocu mo cmʉ'ho to 'ayumonahe na seilei; mosoc'on'a boemi to ongko to nooe'oca iesu ho tiou to toonono. 17cu hoe'oci to petelo ho yohane 'o fnguuhe, micu tiou to seilei.

18isi aiti to saimong 'o ihe hoe'oci to emucu to sitoo ci cou mo acʉhʉ mayo to seilei, micu tuyafo to peisu ho faeni to sitoo. 19yainca: <teko'so yaeza fii tamo maica ci tonʉ a'o, te'o hoe'oci na siya, tec'u maezo tiou no seilei na siya.>

20at'inghi isi mi'usni to petelo ho yainca: <teko fiho ta peisusu ho meaapayo'ʉ! ikon'asiso ta'unano te peelʉi yomza no peisu ho phini na mengumi to hamo! 21uk'a ci teko tanua ta imza hioa; maica ho miko yonto tuhcu to hamo, mo o'te mituhcu si 'tohʉngʉsu. 22ko'koeno, teko ma'vovei, mongoi no kokuzo, m'eya peteongasa to nooe'oca 'emo maica ci hiasu ma'to'tohʉngʉ. 23os'o honga ho isin'a ta'poe'i no 'atutumzo no smo'eubut'u, ho holeo no kuisi.>

24mo mi'usnu to petelo ho yohane 'o saimong ho yainca: <temun'a mi'usnu to nooe'oca ho 'inolineni a'o, poa o'te esmi ta feango'u 'e imu engha ci hi'hioa.>

25'o petelo ho yohane mo yonto ic'o ho 'akasi, epeaski to e'e to nooe'oca. ataveisi micu yuovei ne 'elusalemu. to ceonʉ no smaivovei, mo neisu to mayoyou ne samalia ho psoyaski to fukuin.

fuili ho i'o taicini to 'isopia

26panto cihi ci tensi to nooe'oca isi eʉsvʉti 'o fuili: <teko yʉc'ʉ ho emo'usnu ne oi'ana, sʉc'ʉhʉ to ceonʉ cimo i'mi ne 'elusalemu ho emo'usnu ne ciasa.> ('e ceonʉ eni ohcula noana'va seoovei#<'e ceonʉ eni ohcula noana'va seoovei> hocieno yainca <'e ceonʉ eni mo smaimio to maepuepuhu>..) 27-28micu yʉc'ʉ 'o fuili ho e'ohʉ. ne mo pcaceoni, isi lʉa 'o cihi ci taicini to 'isopia. zou cihi cila suepe ci taicini 'e cou eni. la noskufu to kantaki ci honte no mamespingi ho le'aʉt'ʉcʉ to yupasʉ. moso uhne 'elusalemu ho m'ohkuyu to hamo; ne micu smaivovei, mo smopayo to iachisi kuyai no 'uma ho mo'engho to tposʉ to eyongensa 'izaya. 29isi mi'usni to seilei 'o fuili ho yaica: <teko usa, tocmu'u ta kuyai.> 30mo smo'usnu 'o fuili, talʉi 'o taicini mo seolʉa no mo'engho to tposʉ to 'izaya. cu tuocosi: <'e osko engha, osko ta'hongi?>

31isi yut'inga: <hoci uk'a mo'ma'cohio a'o. te'oeno ahta ta'hongi?> isicu poa smopayo to kuyai 'o fuili. micu suepohʉ 'o taicini. 32i'oisi engha ci seiso isi yainca:

mo mais'a coni cite yaakaka ho chua ci moam'um'u,

mais'a i'ote skoa m'um'ua ci moam'um'u mo yonto emucu tote smohmam'um'u ci cou ho o'amo mako mumunmuni;

totiski o'amo mako mateafo no conci e'e.

33isi uveica na aokoe'i;

uk'a ci mo cihi cinte boemi no ahmʉskʉ ho etoto'usnu,

maezo uk'a ci mo h'unano eʉsvʉtʉ no ceoceona no suezopʉsi,

maica ho isicu emompuesa na nsousi homo yonta hpʉhpʉngʉ.

34isi tuocosi to taicini 'o fuili: <tekon'a po'pa'cohivi a'o, 'e e'e to eyongensa tan'e siya na isi pahtuhci ho engha? mio mas'usnu ta iachi, hocieno o'te mas'usnu no mocmo?>

35micu ya'ei 'o fuili, ehoza ta seiso tan'e, mi'usni ho esansana 'e mo natʉ'ca to fukuin to iesu ci hi'hioa. 36mo sucaefi to conci hpʉhpʉngʉ, panto chumu to aaskiti to ceonʉ, yainca to taicini: <a'e chumu tan'e, o'a teeno ʉmnʉ hoci'ucu yontan'e ho tiou no toonono?>#panto piyo ci tposʉ noana'o isi topuhngi ta 37 secu <isi mi'usni to fuili ho yainca: <<hociko a'ʉmta taa'uzva, 'ateeno tiou no toonono.>> isi yut'inga: <<os'o taa'uzva 'o iesu kilisto zou oko to hamo.>> >

38isicu poa tosvo to taicini 'o kuyai; micu iepoepohʉ 'o fuili ho uhto chumu, isicu toononvi 'o taicini. 39ne mo seolʉa no tmo'poyapo to chumu, isi hafa to piepiya to nooe'oca 'o fuili; o'ana isi ahta huvahi to taicini 'o fuili. mo emo'cʉ'cʉnʉ to ceonʉ, a'sʉftonʉ kokaekaebʉ 'o 'tohʉngʉsi. 40ataveisi panto cou ohe lʉa ne 'asotu 'o fuili; isi saingaboa 'o mia'usnu to ic'o, yonto mayoyou ho epeaska 'o fukuin, ac'ʉhʉ ne mohcu sʉc'ʉhʉ ne kaisalia.

Currently Selected:

sitoo 8: bsnfe

Highlight

Copy