sitoo 7

esngʉsngʉcʉ 'o sutepana

1isi tuocosi to taisaisi 'o sutepana: <mio a'ʉmtʉ yaa maica ci hi'hioa?>

2yut'inga to sutepana: <acʉcʉhʉ 'e mamameoi ho maanat'ohaesa, temun'a talʉi! 'o nia maameoito ci 'avulahamu ho moson'a yonto misopotamiya, ho o'amocu moso noezuhu ne halan, isi aopa'ta to psoevohngʉ ci hamo, 3mi'usni ho yainca: <<teko mongoi ta 'oyonasu ho ito 'oahngʉsu, uhto te'o eʉsvʉta suu ho usa ci hpʉhpʉngʉ.>> 4micu mongoi to hpʉhpʉngʉ to coukalotei 'o 'avulahamu, hocu yone halan. ne mohcu mcoi 'o nia amosi, ohsicu poa noezuhu ta ceoa tan'e to hamo, 'aeno 'e imu yoni ci ceoa maitan'e. 5ho mio uk'a mocu ci ohsi faeni to 'avulahamu to hamo ci ezoyʉ, ac'ʉhʉ no uk'a maka peelʉi yo'eac'i; at'inghi ohsi teomneni to hamo ho faeni 'e ceoa eni, tehe teyai ezoezoyʉ to 'avulahamu ho ito mʉntʉ'casi, e'vono uk'a mocu ci nia okohe ho mio. 6ohsi mi'usni to hamo ho yainca: <<na tako mʉntʉ'ca tena nouchichipi to h'unano hpʉhpʉngʉ. yonto ic'o ho tolei, tose'sʉpta noa tikuzkuzoa. 7at'inghi, ta'u patvovei 'o moso poa tolei ci hpʉhpʉngʉ. ataveisi tena mongoi to ic'o, yontan'e ho m'ohkuyu a'o.>> 8mohcu yupa esvʉtʉ 'o hamo ho i'o 'avulahamu, ieni no s'e'honga ho teyai huomza. ko'koeno, miveohi no ataveisi no yayo 'o 'isaku isicu hioa to 'avulahamu na s'e'honga; maicac'o. i'o 'isaku isi yaica ho s'e'honga 'o yakovu, 'o yakovu isi s'e'honga 'o masoso'ehti to maskʉ ueso ci suezopʉ.

9<'o masoso'ehti ihe so'eubut'ua 'o yosefu, phieni ne 'ezivuto. at'inghi isi no'upi to hamo, 10to'usni ho poa momengvo'ʉ no afu'u 'atutumzo. ne ohe poa yac'ʉ to tuhcu to faalau ci honte to 'ezivuto. isi fii no moutʉs'ʉ ho mengumi to hamo. isi p'eyac'a to faalau ho poa tocngihi ta hpʉhpʉngʉ ho leaʉt'ʉcʉ ta emoosi. 11o'a mo noana'o, i'e 'ezivuto ho i'o ne kanan moso yupteilʉ to meoino seova, a'ʉmtʉ meoino 'atutumzo; moso ovzovzo no 'oanʉ na nia maameoito. 12ohsi tac'ʉhi to yakovu ho mon'a yaa 'oanʉ 'o ne 'ezivuto, isicu skuna 'o 'o'okosi, 'aeno na nia maameoito, poa uhne'e; na eni moson'a mohnʉskʉ. 13ne mohcu opsohʉ uhne'e, 'o yosefu ho i'o nanat'ot'ohaesasi micu yupa bobohngʉ; i'mi tan'e hocu honga to faalau 'o cono emoo to yosefu. 14moso smuhnu to cou 'o yosefu ho baito to amosi ci yakovu, eho'a 'o amosi ho conosi emoo ho uhne 'ezivuto; i'omoso uso ci 'oahngʉsi moso mpʉtvʉhʉ uemo. 15moso toyovcu ho uhne 'ezivuto 'o yakovu; 'o yakovu ho i'o mocmo ci nia maameoisi moso mcoi ne'e. 16i'o nia feangohe ohe hafa uhne si'ken, efo'a to ohsila phini to mʉntʉ'ca to haamo to 'avulahamu ci heuf'a.

17<ne tec'u mon'i esmi 'o ohsi la mi'usneni to 'avulahamu to hamo ho esvʉta ci hie, 'o moso yone 'ezivuto ci suezopʉ to 'isolaelu mohcu na'no asuhcu botngonʉ. 18ataveisi moso cihi ci o'amo ake'i bohngʉ to yosefu ci mo faeva ci honte ohsicu tiuska aʉt'ʉca 'o 'ezivuto. 19'e honte eni mohcu boemi no moezʉezʉhʉ ho pa'maesih'a 'o nia 'oahngʉto, tikuzkuzoa na nia maameoito, 'ahʉya poa cihneni na foinanahe, poa o'te meelʉ yaansoua. 20aʉlʉ tuhcusi ho mio. mohcu yayo 'o moose; mo na'no yuyoyonghu ci oko, moson'a tuyu no feohʉ ho ohen'a aʉt'ʉca to emoo. 21ac'ʉhʉ ne tehecu ciha. ohsi aʉt'ʉca to oko no mamespingi to faalau. iachia ta'okoa ho e'mameozi. 22moso tiou no motposʉ to 'ezivuto, na'no meemealʉ aomotʉ'ʉ ho totontone homo yaahioa.

23<ne mohcu tomsʉptʉha 'o moose, mohcu ma'koyu no 'ucia co'cohivi na a'a'ausna to 'oahngʉsi ci 'isolaelu. 24moso i'nʉskʉ, isi aiti 'o cihi ci 'oahngʉsi ihe pohcingha to cou'ezivuto, usa ho auskeni, opcoza 'o cou'ezivuto. 25isi ta'unano tehe cohivi ta 'oahngʉsi ho tesi titha to hamo 'e iachisi ho to'usni 'o 'oahngʉsi, at'inghi ma'i ihe cohivi. 26micu hucma, isi aiti 'omo yoso ci cou'isolaelu mo yupa muutu, isi 'ucia poa eususeomʉ, cu yainca: <<zou nana'o'oahnga muu, mainci yupa akuzkuzo?>> 27i'omo pohcinghi to 'oahngʉ isi pose'va 'o moose, yainca: <<siya namo esvʉtʉ suu ho temia so'ehti, mais'a hookang ho cumasa a'mi? 28teko yaeza opcoza a'o, mais'a to osko opcoza ne hucma ci cou'ezivuto?>> 29ne isi talʉi to moose 'e e'e eni cu pkaako ho mongoi ta 'ezivuto, uhne miiten ho nouchichipi. ne moso yone'e, isi peyafa 'omo yoso ci 'o'okosi.

30<moso i'vaho tomsʉptʉha, yonto maepuepuhu to cum'usi ne hcuyusiinai, panto cihi ci tensi mo i'mi tomo yaa puzu ci cʉcʉmʉ ho aopa'to to moose. 31ne isi aiti to moose 'e a'a'ausna eni mo kuici yamci, emosuhcu ho 'ucia husansana. ne mio, isi talʉi 'o fihngau to nooe'oca isi yainca: 32<<zou hamo to maameoisu a'o, 'aeno hamo to 'avulahamu, 'isaku, ho yakovu.>> mo smoyo ho smoecucunu 'o moose, o'aisi seecʉ'ha teochʉmi. 33isi ivaha mi'usni to nooe'oca 'o moose ho yainca: <<yunga si sapieisu! maica 'e osko yac'i zou cofkoya ci ceoa. 34i'e ihe elʉa ci 'atutumio to 'o'oko'u ne 'ezivuto os'ocu acʉha husansana; os'o yaeza talʉi 'o teoecengihe, te'o ohpueho ho to'usni. teko uhtan'e! te'o popeoskuna suu ho uhne 'ezivuto.>>

35<i'e moose eni 'aeno 'o ihe hopsʉpseni to 'isolaelu ho yainca <<siya namo esvʉtʉ suu ho temia papoevʉ mais'a hookang ho cumasa a'mi>> ci cou ic'o. ieni to mo aopa'to to cʉcʉmʉ ci tensi, isi popeoskuna to hamo ho poa so'ehti ho leto'usnu. 36isi eahafa 'o yatatiskova ho e'eafi ne 'ezivuto, yone 'ezivuto, yone fʉhngoya etʉpʉ, to tomsʉptʉha ta maepuepuhu, mo man'i 'o ihe hioa ci po'e ho taunona'vʉ ci hi'hioa. 37'ai'eeno moose eni 'omo eʉsvʉtʉ ta cou'isolaelu ho yainca: <<te i'mi ta 'oahngʉmu 'o hamo ho poecʉ'o note cihi ci eyongensa, aʉlʉ mais'a ho isi poecʉ'va a'o#<poecʉ'o note cihi ci eyongensa, aʉlʉ mais'a ho isi poecʉ'va a'o> hocieno yainca <poecʉ'o note mais'a a'o ci eyongensa>..>> 38mo yonto maepuepuhu ho no'upu to 'isolaelu; mo no'upu to maameoito ho ito mo mi'usnu ho aomotʉ'ʉ to hcuyusiinai ci tensi; mo tiou to no'auesiesi ci e'e to hamo, isi psoecingha a'to 'e e'e eni.

39<at'inghi, o'aohe talʉi no nia maameoito, o'aihe h'unano cumasa, mo kaebʉhe hoci yuovei ne 'ezivuto. 40ihe mi'usni 'o 'along ho yainca: <<tekon'a teyaineni no uacoua a'mi, te ko'ko yonta tuhcumia ho eahafo. o'aimza cohivi mionana yupteilʉ no cuma 'o moso e'eafo a'mi ne 'ezivuto ci moose.>> 41mohcueno mooyai to conci isi ua oko no 'uachumu, mi'usni ho sʉ'tʉ, nomio to ihe iachia teyai to emucuhe ci macucuma ho meesi ho 'aveoveoyʉ. 42at'inghi, mo miei'cu 'o hamo o'aisi mi'mi'usni, poa maino 'tohʉngʉhe ho m'ohkuyu ta macocongeoha ta pepe, aʉlʉ mais'a 'o isi engha to tposʉ to eyongensa:

yatatiskova ta 'isolaelu, tamo tomsʉptʉha ta maepuepuhu,

ma'i pano ohmula ahta sʉ'teni a'o ci yuansou!

43imu ngoevi 'o tvopeisia to hicu ci molo,

yaeza ngoevi 'o ua congeoha to hicu liivan,

'ai'o imueno teyai ho p'ohkui ci uacoua.

i'mi tan'e, te'o poa noezuhu ta yafana ta papilong na muu.

44<i'o nia maameoito. ne moson'a yonto maepuepuhu. pantola sii to isi huomza no no'upi to hamo ci socofkoya toomʉta, isi skuna to hamo 'o moose ho maino 'tohʉngʉsi ci mi'ausnasi ho teyai. 45ataveisi ohela yu'ticngiha no nia maameoito 'e toomʉta eni; hola papoevʉ 'o hamo ho peobanga 'o couyafana, skoh'ienga 'o ceoa to ic'o, 'o yosiya ho i'o nia maameoito ohecu e'eivhi 'o toomʉta ho hafa uhto ic'o, ac'ʉhʉ to tavite. 46ohsila ʉm'ʉmnʉa to hamo 'o tavite, moso noa teomneni to hamo - 'ai'oeno hamo to yakovu - mooyai no seiten#<teomneni to hamo - 'ai'oeno hamo to yakovu - mooyai no seiten> panto h'unasi ci tposʉ noana'o isi yainca <teyaineni seiten 'o 'isolaelu>.; 47at'inghi, 'o mohcu a'ʉmtʉ m'eac'ʉ to seiten mai'o solomong.

48<a'ʉmtʉsi, 'o sopepea ci hamo o'amo yono isi p'eyac'a ta cou ci seiten, aʉlʉ mais'a 'o e'e to eyongensa:

49yainca to nooe'oca: zou suoca'ha'u 'e engʉca;

la'u psaspoi 'e ceoa.

temu teyaineni no mo mainenu ci seiten a'o?

mo yonenu na te'o yoni amiocni?

50'e acʉcʉhʉ eni o'ao'us'aeno acʉha iachia teyai?

51<'e lamu yameomʉ ci cou, mo tmʉmʉtʉ na 'tohʉngʉmu, meoo'te talʉi na e'e to hamo! mimu aʉlʉ totiski to nia maameoimu, conino yutasufku to seilei! 52eyongensa nenu na o'a moso noa pohcingha no nia maameoimu? ohela epeaska to eyongensa te cmʉ'ho 'o moulʉlʉ ci soskuskunu, at'inghi ohe opcoza to nia maameoimu; maitan'e imuc'o i'vaha phieni 'o soskuskunu ic'o, ho opcoza. 53mimu tiou to hoolicu to hamo ci cou; 'e hoolicu eni ohsi ieni to tensi ho psoecingha. at'inghi o'amimu mee'ofeihni ta hoolicu!>

opcoza 'o sutepana

54ne ihecu talʉi to ngi'in ta ngikai 'o e'e to sutepana, aʉlʉ sihsikiki to hiahe kuici ma'sʉsʉ'no. 55isi nongcʉngcʉ no seilei 'o sutepana, mʉengʉcʉ ta pepe, teolʉi 'o psoevohngʉ to hamo, yaeza aiti 'o iesu mo yac'ʉ to vhona to hamo, 56cu yainca: <os'o teolʉi mo maavo 'o phingi ta pepe, mo yac'ʉ ta vhona ta hamo si okocou!>

57mo moozoyʉ 'omo botngonʉ ho tomʉti 'o koyuhe, a'vinano yunsohʉ ho tʉtpʉta 'o sutepana, 58ihe po'usna to yafana to hosa, yomza to fatu ho tokʉi. i'o yʉsʉ tomo ehpʉngʉ ci cou. ihe faeni to isi yainca saulo 'o ongkosi ci foinana ho poa aʉt'ʉcneni. 59ne ihe toehunga tokʉi to fatu 'o sutepana, mo mi'usnu to nooe'oca ho eyoho'ʉ: <nooe'oca iesu, teko'so tiova 'e piepiya'u!> 60mo i'vaho pop'up'ungu, tmunoi moozoyʉ: <nooe'oca, 'e kuisi eni teav'a ta'una hin'i!> pateʉpnga 'e e'e eni micu mcoi.

Currently Selected:

sitoo 7: bsnfe

Highlight

Copy