sitoo 6

pitu cila to'usnu

1ta hiesi ne mio, 'o hia botngonʉ to sinto mo huhucmasi apuhngu; i'ola buangilisia ci couyutaya ho i'ola buahevulu ci couyutaya mo yupa eehcʉvho. 'ola buangilisia ci couyutaya mo eubut'u to sitoo ho yainca homo aangae tola tititha ta huhucmasi lahe peaezoni 'o micu tuvcongʉ ci maamespingihe. 2i'mi tan'e, ihe eteuyuna tomo maskʉ ueso ci sitoo 'o acʉcʉhʉ ci tesi, mi'usni ho yainca: <hoci poa teongasneni a'mi na hi'hioa no psoyaski to e'e to hamo ho peisbabobonʉ, o'ate emzo hoci maica. 3ko'koeno, maananghia ta 'ayumona to nooe'oca, te i'mi ta taicomu ho epei note pitu ci mo yaa ʉmnʉ ci ongko, nongcʉngci to seilei, a'vinano moutʉs'ʉ ci cou, poa hioaneni 'e mo maica ci hi'hioa. 4inacu a'mi, temza peismamhocni ta 'inoli ho psoyaski ci hi'hioa.>

5i'o 'tohʉngʉhe ta sitoo. mo acʉhʉ tohmʉskʉ 'e botngonʉ. ihecu toehunga poe'oha 'o sutepana; 'e sutepana mo yaa mahtʉicʉ ci singkoo, isi nongcʉngci no seilei ci cou; ihe i'vaha epeiya 'o fuili, polokolo, nikano, timong, pamina, ho i'o moso la i'upu to yutayakio ci cou'antia ci nikola. 6ihe toehunga poa yac'ʉ to tuhcu to sitoo. ataveisi no 'inoli 'o sitoo. ihecu hoe'oci.

7'o e'e to hamo mo a'cʉ'cʉnʉ psoecocoyʉ; 'omo yone 'elusalemu ci tesi mo na'no asuhcu botngonʉ. 'enepio ci saisi mo maezo tiou ta singkoo tan'e.

tʉtpʉta 'o sutepana

8'o sutepana isi nongcʉngci no mengumi ho tonʉ to hamo, yonta mo botngonʉ ho hioa 'omo meoino taunona'vʉ ci hi'hioa ho po'e. 9at'inghi panto mo yu'hango ci cou; 'emo maica ci cou mo tma'usnu to kaitoo tola yainca <couziu> pai'upi 'o mo i'mi ne kulinai ho 'alisanta ci couyutaya. mo toehungu 'o mo i'mi ne cilicia ho i'mi ne 'azia ci couyutaya. ho yupa eehcʉvho 'o sutepana. 10isi fii no moutʉs'ʉ to seilei 'o sutepana, ko'ko o'a ihe peelʉi etpʉti 'o e'esi. 11ihecu phini 'omo piyo ci cou ho poa ehpʉngneni 'o sutepana ho yainca: <imza talʉi na taini mita mo'engho to mo ekuzkuzo to moose ho boevovoyo to hamo ci e'e!> 12ihe yomza tamo maica ci ti'a'ausna ho poot'ova 'o botngonʉ ho i'o coolo, lema'cohio seiso. ihe i'ima 'o sutepana, tʉtpʉtʉ ho hafa uhto ngikai. 13i'o ohe phini cimo meknuyu ci cou. mo yuyafo ho yainca: <'e cou eni lata asngʉcʉ mo'engho tomo yutasufku ta seitento ho ito hoolicu to moose. 14imza talʉi ita yainca tesi eon'ozi to nazalo iesu 'e seiten, te aezuha 'o ohsila poa ticngihneni a'to to moose ci afu'u h'oceoceonato!> 15i'omo afu'u yusuhngu to ngikai ci cou mo acʉhʉ teochʉmʉ to sutepana, aiti 'o mi'ausnasi mo mais'a mi'ausna no tensi.

Currently Selected:

sitoo 6: bsnfe

Highlight

Copy