kolinto 2 11
11
poolo ho i'o mesisitoo
1os'o tata'za no temusola uveica a'o, ci'ateeno tamia no mi'o ake'i nongonongo, taa'uzva 'atemu ahtao'te uveica! 2ho la'u ngohia muu micu ac'ʉhʉ no smo'eubut'u, totiski to hamo holasi mi'usni muu. maica mimu mais'a cofkoya ci oko no mamespingi, os'oc'o tovcongneni tomo cihi ci hahocngʉ na muu, 'ai'oeno kilisto. 3os'o ta'sokoeva na 'tohʉngʉmu hoci mi'usnuhe nomo kuzo, ciha na ma'mamhocni ho cofkoya ci himngonghi to kilisto, totiski to 'eva ne moso noa pa'hipepecvazi to moezʉezʉhʉ ci fkoi. 4maica, 'o 'aʉnpʉnpʉ ci cou mo esmi ho psoyaski tomo h'unasi ci iesu, o'ai'o imza anana'va psoyaska ci ic'o, mainci imus'a aac'o uveica; pano h'unasi ci piepiya ho h'unasi ci fukuin, o'amo totiski to imza psoyaska muu, leamuc'o yaeza 'aveoveoneni ho tiova!
5os'o taa'uzva mio no'vonʉ na o'a os'o o'te toc'ʉhi tola yainca <afnaso ci sitoo>! 6nenusino o'ala'u matmampohsu, at'inghi yono mau'to'tohʉngʉ o'a mi'o toskucu no mocmo; na eni, os'o yontamo mav'ov'o ci hi'hioa ho epa'teni muu.
7hola'u psoecʉ'ha muu 'e fukuin to hamo, o'a mo'ula ahtu mi'usnu muu ho m'ene no cuma; la'u eaceaca 'e iachi, ko'ko poa ohpepe muu. tees'aeno yainca zou peis'epo'u eni? 8cono ho la'u yonta 'ayumonamu ho yaahioa, pantola aʉt'ʉcʉ a'o ci kiokai; la mais'a mi'o yu'siseiti to mocmo ci kiokai ho yaahioaneni muu. 9ho la'u no'upu muu, 'upena hoci panonte'o 'ucia tititha, o'amo'ula ahtu mi'usnu muu ho m'eya to'usnu. i'o la'u tititha ci acʉcʉhʉ lahec'o acʉha faeni to sinto ne makitong. ne auyusi mosola maica, ho ataveisi teec'o maica. o'ate'o ahta teyaineni no temu cvʉhʉ na a'o! 10te'o smeecʉ'ho mas'osʉ tomo yonta 'tohʉngʉ'u ci so'emio to kilisto ho mainca, i'e os'o afu'a etanveni tena psoengabo ta mia'usnu ta 'akaiya. 11mo mainci maica co e'e'u? os'onana o'te ngohia muu? isi cohivi to hamo, os'o ngohia muu!
12te'o a'cʉ'cʉna 'e os'o hioa maitan'e, akoeva no o'tena i'vaha poa etano 'ola mainca zou <sitoo> ci cou, la ma'unano mo acʉhʉ totiski ta lamza hioa 'o ihe hioa. 13'emo maica ci cou o'as'a a'ʉmtʉ sitoo; la moezʉezʉhʉ 'o lahe peipeis'ausna, memamais'a sitoo to kilisto. 14a'ʉmtʉsi o'ate nama yamceni. ac'ʉhʉ to satan la maezo tmaangeai ho mais'a tiskova ci tensi! 15ko'koeno, hoci tmaangeai na soskuskunu to satan ho mais'a soskuskunu no moulʉlʉ, yaeza o'ate nama yamceni eni. ina tahe atotavei 'ate ahtuo'te totiski ta peipeis'ausnahe.
na ohsi elʉa to poolo ci 'atutumzo
16te'o i'vaha yainca: 'upena na siya. o'ante hu'u'usna no mi'o nongonongo. hocimu hu'u'usna no nongonongo a'o, ci 'atemueno yainca mo nongonongo, te'o ko'ko meelʉ ake'i etano. 17i'e os'o e'e maitan'e o'a atuhcusi ta te'o e'e; ho mi'o maica ci hia etano moc'o mais'a meefʉc'ʉ ci nongonongo. 18homoeno botngonʉ ci cou 'omo titho tamo tma'usnu ta hpʉhpʉngʉ ci hi'hioa ho etano, ci'ate'oeno maezo ake'i etano. 19mimu acʉhʉ na'no mau'to'tohʉngʉ, ho kaebeni uveica 'e nongonongo! 20'upena na siya hoci skuzkuzoi muu, epuka na muu, akuzkuzoa muu, hupotfʉnga muu, hocieno t'oplikvi muu, lamu acʉha peelʉi uveica. 21poa epa'hikokoe'i a'o, 'emo maica ci hi'hioa, a'ʉmtʉ uk'a ci 'ʉteʉmza ho hioa.
at'inghi, hoci panonte smeecʉ'ho yono cuma ho e'ʉ'ʉteʉ etano, poa matnʉskʉ a'o no o'amo nama boemi no fnguu ci e'e, 'uate'o maezo yaa totiski ci 'ʉteʉ. 22zou couhevulu na hin'i? 'aeno maezo a'o. zou cou'isolaelu hin'i? 'aeno maezo a'o. zou mʉntʉ'ca to 'avulahamu hin'i? 'aeno maezo a'o. 23zou soskuskunu to kilisto na hin'i? ake'i efnaso, te h'unano zou a'o! 'o la'u hioa la h'unano ngoseo, h'unano man'i 'o hia'u noekotu, h'unasa 'aoka noa ti'usna, man'i ci hia yonto sokoeva 'e nsou. 24ohela i'eoemoha ti'usna to couyutaya, maito esvʉta aacnia emtueha usio; 25ohe i'toteuha yomza to evi ho etokʉa to coulooma, i'nʉska noa tokʉi to fatu to cou, i'toteuhu nia'te kuzo to etʉpʉ, moso i'nʉskʉ cono hie peisfeifei'i to chumu. 26hola covnʉ, mo'ula esmi to sokoeva to fozu ci chumu, sokoeva to yaksai, sokoeva to couyutaya ho itola i'mi to couyafana, panto maezo sokoeva to mahohosa. sokoeva to maepuepuhu, sokoeva to etʉpʉ, ho i'o sokoeva to ihe hioa to menanat'ohaesa. 27lea'u maezo yaa ngoseo ho 'atutumzeni to la'u hioa, siho cono feʉngna o'te oengʉtʉ, buveici to sieo ho mecu, aviovio no 'oanʉ. uk'a yoni mtoevi, o'te mako tomʉtʉ 'o la paceofa. 28o'a anouc'o eni, lea'un'a ma'tipvongʉ ta la hi'hioa ta makikiokai, mais'a cvʉhʉ ho huhucmasi meotpʉtʉ ta feango'u. 29siya nala yoz'u, te'o o'te yoz'u? siya nala smopcuku ho peiskuisi, te'o o'te ta'tipvonga?
30hoci'u 'ahʉyʉ mici etano, nte'o 'uciahe etanveni 'ola epopayo ta yoz'u'u ci hi'hioa. 31i'o amohamo to nooe'oca iesu zou i'o te 'auesiesia tohmomongʉneni; isi cohivi o'a la'u meknuyu. 32ne mo'u yone tamasuko, moso smuhnu to kengsacu to sootoku 'o honte 'alita ho nomʉti 'o maphiphingi to hosa, tehe tʉtpʉta a'o. 33at'inghi panto mo boemi to meoino skayʉ ho i'mi to pethʉ'ta to hosa ho pehtupeoha a'o, poa momeesih'i to emucusi.
Currently Selected:
kolinto 2 11: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
