Mak 5

Yesu Hamaringia Lipu Tela Xaunga Wa Mana

(Matyu 8:28-34; Luk 8:26-39)

1Dila dikisi lang gamolingania disok mana Gerasadi titidinga. 2Yesu ri xai wagania ma, baing lipu tela xaunga#5:2 Grik xuana—aningoningo sigixinga teguam. Maxixinga 8 xauna. wa mana sok gobagobia ma sok mana Yesu. 3Lipua ba numanoa wa guhia gobagobia, ne lipu tela haringinganoa sanga mana goxigoxi te. Waxu haringina xauna, sanga mana te. 4Namua na bunging xumana digoxi king rimandi, ne rambaxuti waxu haringindi mana rimandi saing taha saha waxu haringindi mana kindi. Lipu tela haringinganoa sanga mana bili te. 5Yambong xaidap longgalo, haxa mauli gobagobia xaung xaxagandi, xaba mauli saing taxitaxina mana siangdi.

6Bagu Yesu wa hasoyauyu, baing luki ma gung king tuxundi maxania. 7Wagi sabanga ba, “Yesu, Urana Etuam Sibuna Garanoa, bagula uraxata manga? Ngaxusungaung haringina Urana maxania ba usina salaga nangau tai.” 8Wagi sabanga bila ba namua na muga Yesu harua ba, “Ung xaunga, usok sangua lipua li!”

9Baing Yesu xusunga ba, “Ung yama ga tela?”

Haxuya ba, “Yagua Buranga,#5:9 Mana Grik xuana, haxuya ba, “Litsan.” Litsan bila lipu haungingamdi titingadinga bila 6,000. namua na am xumana.” 10Baing xusunga xusunga Yesu haringina ba labu sinadi mala sangua titia bau tai.

11Ne buxu nangnang bakbak sabanga tela disoya mua xaxagang rubinia ba. 12Xaungadi duxusunga Yesu haringina ba, “Usoxiam maluxuʼm buxudi, unaiam bu am galuxu manadi.” 13Baing naidi. Baing xaungadi disok sangua, saing diluxu mana buxudi. Saking buxu nangnang bakbakka ba diluki haringing sibuna mari long diania maluxu lang gamolingania saing dingara. Buxudi bila 2,000.

14Lipu buxu wasanganamdi diluki mala saing dibaxanga na lipuadi duwa long sabangadi xaung kaxukandi. Baing lipudi disok mala bu dibagu baraxinta sok ba. 15Bungina dima rangua Yesu, dibagu lipua menau xaunga xumang sibuna duwa mana ba. Dibagu rung mua, sau imangdi xaung hatuminganoa maring dup, baing dimaxuwa. 16Lipuadi menau dibagu ba, dinaxuya na lipu teladi mana baraxinta sok mana lipua menau xaunga duwa mana ba, xaung baraxinta sok mana buxudi xauna. 17Baing ina naga, dungguti duxusunga Yesu haringina ba sauya titidinga.

18Yesu bo ba haing xai wagania, baing lipua menau xaungadi duwa mana ba xusunga Yesu haringina ba ila rangua. 19Ne Yesu nai mana te, ne harua na ba, “Ula yabamia rangua bakbagimdi. Ubaladi ba Toxoratamona libu baru maung xaung usingaung baru.” 20Baing lipua ila saing ungguti baxanga na long longgalo duwa maluxu Dekapolis#5:20 Dekapolis namuxina ba long 10. ba Yesu libu baru mana. Baing lipu longgalo dihixi mana.

Yairus Nanuhanginoa Xaung Hainga Ring Yesu Imanginoa

(Matyu 9:18-26; Luk 8:41-56)

21Kimuya Yesu haing wagia, saing kisi muli mala lang gamolingang rubing hataina. Kisi mala baing buranga sabanga dima digugunia ma taxiya, lang rubinia. 22Baing Yudadi sabungading numang yanamiding tela ma, yanoa Yairus. Bagu Yesu saing gung king tuxundi Yesu kinia, 23saing xusunga haringina ba, “Nanuhangigua haxek sibuna ba mati. Laku, uma uta rimamdi mana, baing bagula sok xai muli saing wa.” 24Baing ina naga, Yesu tang dila.

Buranga sabanga disu mana saing dibura mana. 25Haing tela siba ri mua mana niani 12 wa la ba. 26Haingga ba ila rangua lipu baxiam xumana, ne xap salak xumana maluxu mana haulingadingdi saing siangindi disup. Ditubatuba sus. Sok xai monga te, businganoa sok sabanga. 27Haingga ba lungu Yesu naxuyanganoa, binabu hakhaxasilia mana lipudi masok Yesu ubunia saing ring imanginoa, 28namua na hatum ba, “Nabu ngaring imanginoa ing ganina, bagula ngasok xai muli.” 29Baing hata sibuna li sipka ri mua ba moti saing xunumia sanggania businganoa sup.

30Baing Yesu xunumia sap maluxuʼm ing sibuna bila haringingua yunga. Xugia mala rangua lipudi saing xusunga ba, “Gaxarea ring imangigua?”

31Baing lipuxindi dinaxu mana daharua na ba, “Ai, ubagu lipudi dibura buk maung, ne baruta uxusunga ba, ‘Gaxarea ring nga?’ ”

32Ne Yesu bagu mauli, sai mana gaxarea libu bila ba. 33Saking haingga ba, ina xabiau baraxinta sok mana ba, binabu maxuwa saing lulu ma gung king tuxundi kinia. Baing baxanga maxung sibuna. 34Baing ina naga, Yesu bala ba, “Nanuhangigua, hatumingam haringina hamaringiaung. Ula xaung gamogamu xai, salaga sup ba.”

35Harua mua ne lipu teladi disok, dima mana Yairus numanoa, Yudadi sabungading numang yanamidingga ba. Daharua ba, “Nanuhangima mati ba. Heku usina makasangua na Lipu Tubatubaingama.”

36Ne Yesu hatumia haruangadinga te, bala Yudadi sabungading numang yanamidinga ba, “Umaxuwau tai. Uhatum haringina manga ing ganina.”

37Bili lipudi ba dimau tai. Ne nai mana Pita, Yems kixinginoa Yon tung disu mana. 38Bungina disok yanama numania, Yesu bagu buranga dibibi sabanga, lipudi dahatangitangi saing daxaba haringina. 39Luxu saing harua nadi ba, “Abibi sabanga saing ahatangitangi baru? Haing nanunoa mati te, kinuʼm tabu ing ganina.”#5:39 Yesu xabia haingga ba mati ba, ne mana Yesu haringinganoa, matia bila kinunga. 40Ne dimasisia.

Yesu sukadi masok laing sup, baing xap haing nanunoa baungtibundi xaung lipuxing tuwa dinaxu mana duwa rangua, saing diluxu mana longga haing nanunoa wa ba. 41Yesu tuxu rimanoa saing harua na ba, “Talita kum!” (namuxinoa bing “Haing nanuna, ngabalaung ba umesa!”). 42Baing hata sibuna li mesa saing haxa mauli (nianindi 12). Dibagu saing dihixi mana. 43Baing bilidi ba dibaxanga na lipu telau tai. Baing baladi ba dulia haing nanuna ba anginga teladi bu xang.

Currently Selected:

Mak 5: met

Highlight

Copy