Luk 17

Kubolu Diana, Hatuminga Haringina, Kubolu Oxatam

1Yesu harua na lipuxindi dinaxu mana ba, “Axadi daxai lipudi daxanga diania bagula dima, ne usinga sibuna mana lipua libudi disok rimania. 2Nabu digoxi siang sabanga lipua na bila ba waxungtuania, saing diting mari tegia namua na libu dingia tela mana nanunadi li xung mari, bing salaga xap bagula kaxukana mana salaga xap yu Urana rimania. 3Binabu amaxania mang.

“Nabu riama libu kubolu diana, uhanaunau. Nabu xugia hatuminganoa, bing uyunga kubolunoa. 4Nabu libu kubolu diana maung bunging 7 mana xaidap tela, saing bunging 7 goxoya ma saing harua ba, ‘Ngaxugia hatumingagua,’ bing uyunga kubolunoa.”

5Aposeldi daharua na Toxoratamona ba, “Uhauli hatumingamam haringindi ba ditubu!”

6Haxuya ba, “Nabu hatumingam haringina kaxukana bila mastat xuyana, bing bila li: Ung sanga ba ubala xaiya li ba, ‘Uxupkung sangua titia li, saing ula uranggung tegia,’ saing bagula su mana haruangama.

7“Gaxarea angia tela ina lipuxing oxatam, waxata umangia kimbo wasa mana sipsipdi, ne bungina goxoya ma numia harua na ba, ‘Uma, urung oxong to’? Uharua bila ba? 8Tegu. Harua bila li: ‘Usugu, utau angiagua, saing oxop ma sanga ba ngaxang nganung to. Baing kimuya sanga ba oxong unung.’ 9Bagula harua xai sibuna na lipuxing oxatama namua na libu oxatanoa? Tegu. 10Bila balau, bungina asahi oxataimdi Urana sinadi nang ba, xai nabu aharua ba, ‘Heku Urana harua xai nam. Am lipu oxata olanggamdi. Am galibu oxatua sina nam ing ganina.’ ”

Yesu Hamaringia Lipu 10 Businga Saksaxama Xapdi

11Yesu haing mala long sabangga Yerusalemguyu, baing naxu mana titiadi Samaria Galili ragudinga. 12Bungina luxu mana long tela, baing lipu 10, businga saksaxama xapdi, disok mana. Dili hasoya monga 13saing duwagi haringina ba, “Yesu, Lipu Sabanga, usingam!”

14Bungina bagudi, harua ba, “Ala, ahatangang na lipu hananiangamdi.” Dahaxa mala, baing ina naga, disok xai dup, disigixinga.

15Dingia tela, bungina bagu sok xai dup, goxoya ma, wagi haringina saing iti Urana yanoa. 16Gung king tuxundi Yesu kinia, saing harua xai sibuna. Ne lipua ba Samaria tela, Yuda tela te.

17Yesu xusunga ba, “10 disok xai dup. Ne ngabagu taininau ing ganina! 18Baruta teladi digoxoya ma diti Urana yanoa te? Lipu titi telamga li ing ganina ma iti Urana yanoa.” 19Baing harua na ba, “Umesa ulauba. Hatumingam haringina hamaringiaung.”

Urana Yonggaxina Malinganoa

(Matyu 24:37-39)

20Bunging tela Parisidi duxusunga Yesu ba bungintabi Urana Yonggaxinoa bagula ma, baing haxuya ba, “Bungina Urana Yonggaxinoa ma, sanga ba axamandi disok bila hatangangua lipudi dibagu maxadingia te. 21Ne lipu tela te sanga ba harua ba, ‘Wa la li,’ kimbo ‘Wa la ba,’ namua na Urana Yonggaxinoa wa liwe mang.”

22Baing harua na lipuxindi dinaxu mana ba, “Xaidapdi dima yu bungina abo sibuna ba abagu Lipua Ma Rangua Urana xaidabing tela, ne sanga ba abagu te. 23Lipudi bagula dibalang ba, ‘Wa la ba!’ kimbo ‘Wa la li!’ Aluki asu manadiu tai. 24Ahatumia. Bungina abagu bilikbiliga, ralanoa su sabalung subingang longgalo. Bila balau, mana Lipua Ma Rangua Urana xaidabinoa, bagula lipu longgalo dibagu daxabia. 25Ne muga bagula xap salak xumana saing lipu hatatamdi bagula dihitixiya.

26“Lipua Ma Rangua Urana xaidabinoa bagula wa bila Noa xaidabinoa. 27Lipudi daxang, dinung, diyau ding laing xaidapka Noa luxu wagia ba. Baing langa si sabanga saing ung ding longgalo mati.

28“Bila balau mana Lot xaidabinoa. Lipudi daxang xaung dinung. Digim xaung disina. Duxuma xaung ditongtongia. 29Ne bungina Lot yunga long sabangga Sodam, yap xaung siang yapkamdi diri sabalunia ma saing ung ding longgalo mati.

30“Bagula wa bila ba mana xaidaba Lipua Ma Rangua Urana sok sabasabia. 31Mana xaidapka baguba lipu gaxarea duwa numa ubunia, ne xalingidingdi duwa maluxu, labu diluxu bu daxapdiu tai. Bila balau, lipu gaxarea duwa umangia, labu digoxoya mala numiau tai. 32Ahatumia Lot haininoa naxuyanganoa!#17:32 Urana xugia Lot haininoa mala sok bila mosak bungina xugia bagu ubunia mana long sabangga Sodam Urana tau yabia. Ubagu Unggutinga (Stat) 19. 33Lipu gaxarea dituba ba dituxu haringina walingadinga, bing bagula dahanggalang. Ne lipu gaxarea diyunga walingadinga bu dinaxu manga, bing bagula daxap walinga sibuna. 34Ngabalang ba, mana bungina baguba, lipu luwa bagula tang dikinu mana uxainga taininau yambong. Tela bagula daxap, ne tela bagula diyunga. 35-36Haing luwa bagula tang dahamunanggia wit marandi. Tela bagula daxap, ne tela bagula diyunga.”#17:35 Buninga teladi daharua ba …yunga. 36 Lipu luwa bagula duwa umangia. Tela bagula daxap, ne tela bagula diyunga.

37Duxusunga ba, “Toxoratamona, bagula axadi li disok bi?”

Haxuya ba, “Nabu matia tela wa mana long tela, bagula matikomkomdi digugunia la ba.”

Currently Selected:

Luk 17: met

Highlight

Copy