Markus 6

Nduki Nazaret wa Zhang Yesu

(Mat 13:53-58; Luk 4:16-30)

1Tu̱ Yesu njig ghayang tu̱ ɗu̱ mbu̱ ghai ɓaran Nazaret, yang nu̱ mburi nda kwa wa mbu̱ gaanje nda. 2Nu̱ Fu̱ɗar Su̱bji a ɓaki tu̱ nggaasi shogar mbu̱ kib tabar ɓu̱ Yakhudekwang, tu̱ nduki nu̱ tu̱kki nda kap shi lazham a zu̱ran ku za,

“Woɗye khuskinang gwa ɗyiku nang fu̱na? Nang gwakya nyi pooni kaɗarya? Ɗu̱ma shir ɗye lazhamku nang kikimnda na?”

3Nang ke ba kafinte nang de, woi ɓu̱ Maryam khachin Yaqub ndu̱ Yusufu ndu̱ Yakhuda ndu̱ Siman, wonji khachinkirku ɓaran nusukandiku su̱yen ndu̱ chin de? Tu̱ kha ma ɗye shokhna ye wora.

4Tu̱ yang Yesu ze wor za, “Ai Annabi nu̱ka mbu̱ɗ zhaaji ɓa kope mbu̱ ghai ɓaran ndu̱ ndukiku kaa ɓaran.”

5Yang nu̱ ɗu̱ma shi tlu̱nar ɗye lazham khang far ɓa, kope nu̱ khaatiku koɗomma nu̱ su̱ɓa ki wor ndu̱ kharan tu̱ shaana wora. 6Tu̱ Yesu shi lazham song maito ɓaanda. Tu̱ baara mbu̱ gureku a shogar ye wora.

Yesu wa Ru̱k Pudeku Gwanggu̱m Rap ndang

(Mat 10:5-15; Luk 9:1-6)

7Nu̱ Yesu qaki wor gwanggu̱m rap ndang, tu̱ ru̱k wor rap rap, tu̱ vu̱r zalale ye wor ɗyine khu̱kheetiku malkandi.

8Tu̱ ze wor za, ku̱ da aa nu̱m ma yir nang ɓa, aa nu̱ke ka da saaɓir nu̱ me khar wora yang ku̱ da kulup ku ɓa, ku̱ da ɗye zu̱mndi ku ɓa yang ku̱ da mu̱zhin zum ɓa. 9Yang tu̱k za ku̱ sa paghamndiku, tu̱ ɗu̱ ndu̱ lukti nu̱ke a ve wor ɗyenda. 10Tu̱ gaɓ tu̱ ze wor za, “Rafti nun zhurki nu̱ nje kap, kha ma gha ba nje kope sarchi nun njigki ghayang. 11Kap ye maa nu̱ zhangki dlu̱ronu tu̱ zhang tu̱k ɓalar ɓaanu gha, sarchi nu̱ke tun a ma viri ɓar mbu̱ ghayang, tun mba kalau mbu̱ saaronu nu̱ gha ma ku kha ma saidu ɗyine wora. Zhire ngaa zu̱ran ye nu, fu̱ɗar wuri, Sodom ndu̱ Gomora kaa duk ndu̱ gwa longguma ye ghai nang.”

12Tu̱ ji tu̱ ɗu̱ ku a waazu ye ndukiku za ku̱ nggoɗ ku tu̱ njig solar ɓaanda. 13Tu̱ fet khu̱kheetiku malkandi ɓar khang, kom ndu̱ sar mor ye nu̱ khaatiku khang tu̱ shaana wora.

Mu̱ti ɓu̱ Yokhana nu̱ Baptisme

(Mat 14:1-12; Luk 9:7-9)

14Tu̱ kuji Khiridus tu̱k labar ɓu̱ Yesu ku̱me labar ɓaran wa ɗu̱ aa fu̱n, yang ɓeeni ndukyang a zu̱ran za ɗya Yokhana nu̱ baptisma jiiki mbe mu̱ti, nang ke ɗyi nu̱ saki tu̱ ɗu̱ma shi ɗye lazham khangndi nang.

15Yang ɓeeni ndukyang za, “Ɗya annabi Iliya.”

Tu̱ ɓeenan tu̱k zu̱ za, “Ɗya da chele annabiku nu̱ zhu.”

16Nu̱ kuji Khiridus tu̱kki ɗyi kunang, tu̱ zu̱ za, “Ɗya Yokhana nang ɗakhki ɗyinan nu̱gha jiiki mbe mu̱ti!”

17Ku̱me Khiridus nu̱ ɗyinan mbu̱r fara ru̱kki ta ku̱s Yokhana tu̱ khi nda gha zhaaru̱m. Yang Khiridus shi wanang ku̱me nokhzan Khirudiya nu̱ke ɗya nokhzi khachin dlu̱man za Filibus tu̱ yang ɓu̱ri, 18yang Yokhana wa ze Khiridus za nu̱ shipa ku̱ ɓu̱r nokhzi khachin ɓa. 19Yang memu̱na Khirudiya wa su̱bu̱r ndu̱ Yokhana nu̱ke a shim tlagha nda nu̱ gha yang nu̱ gwa maaran ɓa. 20Ku̱me Khiridus a sawa Yokhana nu̱ke wa zu̱n za Yokhana ɗya nu̱ jeembu, khar viti ɓaran Shakhshakh, nang ke ɗyi nu̱ saki tu̱ Khiridus khuɓ Yokhana mbari. Wa ka damta maɗyi maɗyi mbu̱ Yokhana ɓalar yenda, yang wa ka tu̱k mu̱ndi ɓalar ɓaran tu̱k ba.

21Yang zalale nggur wa ɗatli sarchi nu̱ Khiridus tabaki kujiku ɓaran ndu̱ gorkir sojeku ɓaran ndu̱ dlegumeku nu̱ Galili ma tabar kashar fu̱ɗar nu̱ khaki nda. 22Ye sarchi nang, tu̱ woi ɓu̱ Khirudiya nusukandi shi sapar nu̱ Khiridus ndu̱ nduki ɓaran tu̱kki mu̱ndan, tu̱ yang kuji Khiridus ze wonkharang za “Khuɗ ɗyi nu̱ke ta shimndan kap ngga vu̱r yoro.”

23Tu̱ Khiridus ku̱mnda za chin ka vu̱r kap ɗyi nu̱ wonkhar nang khuɗki aa ɗyen wa khu̱l bindi kwaaɗar ɓaran.

24Tu̱ wonkharang vi nu̱ dam tu̱ ɗa zham man za, “Yang khuɗ nga kya nu̱ma?”

Tu̱ Khirudiya zu̱ za, “ku̱ khuɗ za ku̱ vu̱r ɗyin Yokhana nu̱ baptisma yenda.”

25Tu̱ wonkharang ɗan gume kuji Khiridus ndu̱ waakho za, “Ngaa shim vu̱r na ɗyin Yokhana nu̱ baptismyang ya mbu̱ kotumndi ba leendang.”

26Tu̱ kuji damta maɗyi, yang ku̱me ku̱mndar nu̱ shiki kom ndu̱ nduki nu̱ke a ye maaranang wa gang nu̱ khanda nu̱ ɗu̱ma zhangndan gha ɓa. 27Fan ndu̱ fan tu̱ kuji ze nu̱ ɗakhti ɗyin ndukiku za ku̱ ɗu̱ ta ɗakh ɗyin Yokhana yenda, tu̱ nu̱ ɗakhti ɗyinang ɗu̱ mbu̱ zhaaru̱mang ta ɗakh ɗyin Yokhana ta ɓasi yenda. 28Tu̱ sa ɗyin Yokhana mbu̱ kotumndi tu̱ vu̱r ye wonkharang tu̱ ɗu̱ si ye man. 29Ni nu̱ mbu Yokhana kwang tu̱kki labaran ta ɓa ku tu̱ da man varanang ta san mbu̱ ku̱jipi.

Yesu wa Zum ndu̱ Nduki Du̱pu Qurmun

(Mat 14:13-21; Luk 9:10-17; Ykh 6:1-14)

30Tu̱ pudeku gwaanggu̱m rapndang nu̱ Yesu ru̱kkyang a gaɓ ku tu̱ taba nu̱ she Yesu tu̱ zu̱ ɗyiku nu̱ wora shiki kom ndu̱ ɗyi nu̱ wora shogaki bar ye nduki kap. 31Yang ku̱me ndukikwang nje nu̱ke a yir a gaɓti ye maaranang nu̱ke pudekwang nu̱ gwa tu̱ zu̱m ɗye zu̱m ku ɓa, tu̱ Yesu ze wor za, “Ɗyem mbu̱ gaarang fara ye maa nu̱ke nduk nje ɓa ku̱me gwanu tun mas koɗom.”

32Tu̱ yang vi nu̱ mbu̱ du̱mbu̱l ɗyim tu̱ ɗu̱ ku ye maa nu̱ke aaki nje ɓa kope wor ɗyenda. 33Yang kap ndu̱ nang ɓeena nduki khang wa na wora sarchi nu̱ke a yir kwang, yang ku̱me wa saida wor ku. Tu̱ nduki na viki mbu̱ ghaikwang a ɗa ndu̱ saari wora tu̱ dlu̱ gume ye wor kaabu ku̱ khu̱l ku ye maa yirkwang. 34Nu̱ Yesu zhurki mbu̱ du̱mbu̱lang tu̱ na nduki khang, tu̱ yang tu̱k zhiyaye ɓaanda ku̱me wa kha wa ndu̱ɓangku nu̱ke nu̱ khutlo kha wor ɓa, tu̱ nggaasi shoga ɗyiku khang ye wora.

35Nu̱ fu̱ɗar shiki bing maa nggu̱di, tu̱ nu̱ mburi nda kwa a ɓa she nda. Tu̱ ze nda ku za, “Maa nang ɗya mbu̱ gaari nduk su̱ ɓa, wonji fu̱ɗar wa shi bing ma nggu̱di. 36Yang ze nduki nang ku̱ ɗu̱ ku mbu̱ ghaiku ndu̱ gureku nu̱ke a bing. Ku̱ ɗa masa ɗye zu̱mndi ye vaanda ku̱me ɗye zu̱m kha wor ɓa.”

37Tu̱ Yesu ze wor za, “Vu̱r ma ɗye zu̱mndi ye wor ku̱ zu̱m ku.”

Tu̱ tlogha ku za, “Chem ka ɗu̱ma masa ɗye zu̱mndi nu̱ mu̱zhindan khu̱lki ɓi nu̱ tlu̱nar me piti won rap mu?” 38Tu̱ zham wor za, “Ɓurti tolir kim kya, kha nwa? Ɗu̱ ma tun a nggu̱ɗi.”

Nu̱ nggu̱tki ku tu̱ zu̱ za, “Ɓurti tolir qurmun ndu̱ yurvi rap.”

39Kom tu̱ Yesu ze wor ku̱ shakh ɗyin wor nu̱gha tu̱ kha gha ku koɗom koɗom ɗyin wuzu̱ndi mu̱ɗyekandang. 40Tu̱ kha gha ku koɗom koɗom ɓeenan won won ɓeenan ɗyin qurmun ɗyin qurmun. 41Nu̱ daki ɓurti tolir qurmun ndu̱ yurvi rapndang, tu̱ nggu̱t maa viɗi, tu̱ sa barke nu̱ si, kom tu̱ ɓakhla nu̱ gha tu̱ vu̱r ye nu̱ mburi nda kwa maa ku̱ vu̱r ye ndukyang, tu̱ shakh yurvyang tu̱k ye wora. 42Kap tu̱ zu̱m ku tu̱ mbu̱ wor zhi. 43Tu̱ taba ɓeeni nggusurnggusur ɓurti tolir ndu̱ yurvi nu̱ kha kyang tu̱ gwa kang gwaanggu̱m rap nyeedlan. 44Yang khuzuku du̱pu qurmun wa zu̱m ɗye zu̱mndi nang.

Yesu wa Shi Yir ɗyine Ɗyimi

(Mat 14:22-33; Ykh 6:16-21)

45Fan ndu̱ fan tu̱ Yesu ze nu̱ mburi nda kwa za ku̱ vi nu̱ mbu̱ du̱mbu̱l ɗyim tu̱ peeta ku maa yir Besaida kaabu shi nji khar mu̱ndi ye tabar ndukyang. 46Nu̱ shiki khar mu̱ndi ye ndukyang tu̱ dlan ɗyin dleng maa barari.

47Nu̱ mugdi shiki, du̱mbu̱l ɗyimang a tala mbu̱ ɗyim chitndang, yang chin ɗyenda kya ɗyin ɗawarang. 48Nu̱ naki a gwa damtar chi du̱mbu̱lang ku ku̱me khu̱kheetang tu̱pa wora, yang ɗya chele virkiri wa vi kunung, tu̱ Yesu ɗu̱ she wora a yir ɗyine ɗyimang, tu̱ shi wa chin a ma peeta wora. 49Nu̱ naki nda a yir ɗyin ɗyimang, tu̱ taman ku za ɗya zombu̱ra, tu̱ shi zhaano ku. 50Ku̱me wa na nda ku kap ɓaanda, tu̱ ku̱zha ku.

Tu̱ shi ɓalar ye wor fan ndu̱ fan za, “Damta nu ɓa ɗya nga, tu̱k nu sawa ɓa.”

51Kom tu̱ vi nu̱ mbu̱ du̱mbu̱lang su̱yen ndu̱ wora, tu̱ khu̱kheetang ching gha. Tu̱ shi lazham ku maɗyi wa nu̱m gom. 52Yang nu̱ da mbu̱ ɗyi nu̱ke a mbu̱ zu̱mndi nu̱ nduki du̱pu qurmun nu̱ shikya ɓa ku̱me kaaku̱ɗakh memu̱nar ɓaanda.

Yesu wa Shaana Khaati mbu̱ Ghai Genisarat

(Mat 14:34-36)

53Nu̱ Yesu ndu̱ nu̱ mburi nda kwa dlaki ɗyim chitndang nu̱ dam tu̱ zhur ku̱n mbu̱ ghai Janisarat tu̱ gu̱n du̱mbu̱lang nu̱ me ɗyim chitndang. 54Viri ɓaanda nu̱ dam mbu̱ du̱mbu̱lang ke shar tu̱ nduki zu̱n nu̱ ɗyine ɗya Yesu, 55tu̱ ndukiku nggur ɗa, tu̱ ɗu̱ ku aa fu̱n mbu̱ dlar ghayang. Ta ɓa ndu̱ nu̱ khaatiku qaandan ɗyin ɗye qaandi ɓaanda ma yir ye maa nu̱ tu̱kki za Yesu wa ɗu̱ nje. 56Yang ye maa nu̱ ɗu̱ki si kap aa mbu̱ ghai gwaanji ndu̱ gureku ndu̱ mbu̱ maa ku zum zum, wa ka qan nu̱ khaati ku gha mbu̱ gomarku tu̱ khuɗ nda ku za ku̱ njig nu̱ khaati kwang ku̱ su̱ɓa lukti ɓaran. Yang aakochi mbu̱ nu̱ khaatikwang wa su̱ɓa luktang tu̱ ka gwa shaanar ku.

Currently Selected:

Markus 6: ttrNT

Highlight

Copy