Markus 4
4
Labar ɓu̱ nu̱ Kaɓti
(Mat 13:1-9; Luk 8:4-8)
1Fu̱ɗar ngguri, Yesu wa nggaasi shogar me ɗyim chitndi nu̱ Galili. Tu̱ tabar nduki khang maɗyi a ɓa she nda. Ku̱me nang tu̱ vi nu̱ mbu̱ du̱mbu̱l tu̱ kha gha, tu̱ tabar ndukikwang ching nu̱ me ɗyimang ve me gu̱mndang. 2Tu̱ shoga ɗyiku khang ye wor ndu̱ ku̱rti ɓalar a zu̱ran ye wor a za, 3“Gwa ma dlu̱mndonu ya. Nu̱ ghuti nggur a nje nu̱ ɗu̱ki maa kaɓti. 4A mbu̱ wos ye poonang, tu̱ ɓeena pooni kwang ku̱ɗba nu̱ yiti njiva, tu̱ ɗyikhtiku nu̱ viɗi a ɓa tu̱ ɗu̱m ye poonang ɓara. 5Tu̱ ɓeeni ye poonang ku̱ɗba nu̱ ɗyin tandal nu̱ke ghai nje ye maaran maɗyi ɓa, fan ndu̱ fan tu̱ ɗa ɓana ku̱me ghayang khang ɓa. 6Yang nu̱ fu̱ɗar shiki gu̱rgu̱r, tu̱ su ɓara tu̱ ghwari ku̱me dlu̱dlarsi ve wor maɗyi ɓa. 7Tu̱ ɓeenan tu̱k ku̱dban ɓere njekhtiku, tu̱ njekhtikwang gor tu̱ nggu̱tl boote damang gwaari nu̱ke nu̱ ɗu̱ma nja woi ɓa. 8Tu̱ yang ɓeenan ku̱dban ɗyin ghai mbarkandi tu̱ gori tu̱ vi ɗyin rututundi tu̱ nja woi nggu̱shakhɗu̱m ɓeenan ɗyin kunung ɗyin kunung, ndu̱ ɗyin njong ɗyin njong, ndu̱ won won mbu̱ yen.”
9Tu̱ Yesu ze wor za, “Nu̱ dlu̱mndi tu̱kti maa ku̱ tu̱kki.”
Zu̱r mbu̱ Labar ɓu̱ nu̱ Kaɓtang
(Mat 13:10-17; Luk 8:9-10)
10Sarchi nu̱ke Yesu ndu̱ nu̱ mburi nda ku ndu̱ pudeku gwaanggu̱m rap ndang gwaki vaanda me ɗyin wora, tu̱ Zham nda ku za ku̱ zu̱ mbu̱ ku̱rti ɓalarang ye wora. 11Tu̱ tlogha ye wor za, wa vu̱r zalale zu̱ndi ɗyi nu̱ke a mbu̱ tuka mbe kwaaɗar ɓu̱ Magham ye nu, yang ɓu̱ nduki nu̱ke a dam ka ze wor mbu̱ ku̱rti ɓala. 12Ku̱me,
“Aa wa nggu̱t ku, ɓu̱ na ɓa,
aa wa tu̱k ku, ɓu̱ da mban ɓa.
Ku̱me ku̱ nggoɗku ma gwa
yaapar solar ɓaanda ɓa.”
13Tu̱ ze wor tu̱k za, “Alapa nun da mbu̱ ku̱rti balar nang ɓa? Mbu̱ wanang, tun ka da mbu̱ ɓeeni ku̱rti ɓalarku kikimnda? 14Nu̱ kaɓtang a kaɓkya ɓalar ɓu̱ Magham, 15ye pooni nu̱ ku̱ɗbaki nu̱ ɗyin njiva a khar wa ndukiku nu̱ tu̱kki ɓalar ɓu̱ Magham, yang ba nu̱ tu̱kki ku, tu̱ Sheɗan a ɓa tu̱ da ɓalarang ɓar mbu̱ memu̱na wora. 16Yang tu̱k, ye pooni nu̱ ku̱ɗbaki nu̱ ɗyin tandalang a khar wa ndukiku nu̱ tu̱kki ɓalarang yang ba nu̱ tu̱kki ku tu̱ dlu̱ ndu̱ kashari. 17Yang ku̱me dlu̱dlarsi ve wor ɓa, nu̱ shoɓ ku ɓa ku̱me sarchi nu̱ bonye a ɓa ki ku̱me ɓalar nang, tu̱ gaɓ vaanda nu̱ gana ku fan ndu̱ fan. 18Ye pooni nu̱ ku̱ɗbaki nu̱ ɓere njekhtang a khar wa ndukiku nu̱ tu̱kki ɓalarang. 19Tu̱ damtar mbu̱ Larji ndu̱ shimndi gu̱na kom ndu̱ melakh ɗyiku zum zum ta ɓa tu̱ nggu̱tl ɓalarang ndu̱ gwaari nu̱ke nu̱ shi boota ɓa. 20Yang ye pooni nu̱ ku̱ɗbaki nu̱ ɗyin ghai mbarkandang a khar wa ndukiku nu̱ ka tu̱kki ɓalar ɓu̱ Magham tu̱ dlu̱ ku, tu̱ shi boote ku si. Tu̱ nja woi ɗyin kunung ɗyin kunung, ndu̱ ɗyin njong ɗyin njong kom ndu̱ won won.”
Ɓalar ɗyine Pitile
(Luk 8:16-18)
21Tu̱ Yesu zu̱m guma ndu̱ ɓalarang ye wor a za, “Woɗye tun wa ka kurpa pitila nu̱ gha ndu̱ du̱ɓa mu? Yang ɗa, tun wa ka sa pitile nu̱ su̱ gaanggir mu? Nga za tun ka du̱ng nda nu̱ ɗyine ɗye du̱ngndan ɓa goma? 22Ai tun a nje tukaran nu̱ke ɓu̱ vi si ye dalang ɓa, kap ɗyi nu̱ke tukaran leendang ka ɓa ɗal dam. 23Yang nu̱ dlu̱mndi tu̱kti maa ku̱ tu̱ki.”
24Tu̱ ze wor tu̱k za, “Gwa ma dlu̱mndonu ye ɗyi nu̱ke tun a tu̱ktan. Du̱ɓ zhiiri no zhiki si, ka gaɓ tu̱ shaata yor nu̱ ɗyinan tu̱k. 25Kap njif nu̱ke tun kha nda, ka shaata yenda nu̱ si, yang njif nu̱ke tun kha nda ɓa, aa ɗyi koɗommandi nu̱ke a kha nda ka dlu̱ ɓara.”
Ku̱rti Ɓalar ɗyine ye Pooni nu̱ Ɓanaki
26Tu̱ Yesu zu̱ tu̱k za, “Wonji ɗyi nu̱ kwaaɗar ɓu̱ Magham shipaki. Wa shipa khuski nggur nu̱ woski pooni nu̱ mbu̱ dam ɓaran, 27qan tu̱ ji, tu̱ ye pooni ɓana tu̱ gori, yang khuskyang nu̱ zu̱n shi kikimndi ɓa. 28Maa vu̱ghai wa ka vu̱r boote ɓaran, ka nggaasan ve ɓanar dlu̱mndan ndu̱ shir ghofi kom tu̱ vi ɗyin, qu̱rsan tu̱ nja woi ve ɗyinanang. 29Yang mbu̱ bootyang wa zu̱ni, ka sa dlau tu̱ dlan gha ku̱me sarchi ku̱mndi wa shi.”
Ku̱rti Ɓalar ɗyine Pooni Mastad
(Mat 13:31-32, 34; Luk 13:18-19)
30Tu̱ Yesu zu̱ tu̱k za, “Chem ka buu kwaaɗar ɓu̱ Magham ndu̱ nu̱ma? Woɗye chem ka ku̱rti nda ndu̱ nu̱ma? 31Wa shipa ye pooni mastad nu̱ke wa kata aa nyi pon nu̱ nduki ka kaɓki mbu̱ larji nang. 32Yang mbu̱ nduk wa kaɓi wa ka duk aa nyi ye qu̱farku mbu̱ dam gwaari, tu̱ vi me bu̱n rututundi nu̱ke ɗyikhtiku nu̱ viɗi wa ka shi pugdiku nu̱ mban tu̱ za jiimban. 33Ndu̱ pooni ku̱rti ɓalarku na khang tu̱ Yesu zu̱ ɓalar ɓu̱ Magham ye wor mbe njiv nu̱ke ka daki mban ku 34Sar da nu̱ shi ɓalar ye wor waare ku̱rti ɓala ɓa. Yang sarchi nu̱ke a su̱yen ndu̱ nu̱ mburindakwang ɗyenda, wa ka zu̱ aa nu̱m ye wor ye dalangi.”
Yesu wa Wu Khu̱kheeti Roma
(Mat 8:23-27; Luk 8:22-25)
35Ba fu̱ɗaranang me mugdi tu̱ Yesu ze nu̱ mburi nda kwa za, “Dlami ɗyim chitndang ma yir dam fara.”
36Nu̱ njigki tabar ndukyang, tu̱ da Yesu nu̱ mbu̱ du̱mbu̱lang su̱yen ndu̱ wora, yang ɓeena du̱mbu̱l kwa nje su̱yen ndu̱ wor tu̱k. 37Tu̱ yang khu̱kheeti romndi du̱mbu̱rkandi a gu̱ri, tu̱ ki pu̱sh ɗyimang nu̱ viɗ a ghwaɗ var du̱mbu̱lang tu̱ ɗyimang nyel nu̱ mbu̱ du̱mbu̱lang. 38Yang Yesu a nje mbu̱ du̱mbu̱lang qaandan ku̱n gana a ɗyeniri, wa dla ɗyinan ndu̱ ɗye dlar ɗyini tu̱ nu̱ mburindakwang nakha nda a zu̱ran ku za, “Maalu̱m, no damta nu̱ke chem a ma mu̱ti de?”
39Tu̱ yang Yesu ji tu̱ wu khu̱kheetang, kom tu̱ ze ɗyimang za ku̱ ching gha shir, tu̱ khu̱kheetang ching gha, tu̱ maarang kha yit.
40Tu̱ Yesu ze nu̱ mburindakwang za, “Tun a tu̱kkya sawar nu̱ma? Alapa maito kha nu ɓa goma?”
41Tu̱ tu̱k sawar ku maɗyi, tu̱ yang ki zu̱ran ye yenku za, “Na ɗya nyi pooni nduka, nu̱ke aa khu̱kheeti ndu̱ ɗyim a tu̱k ɓalar ɓara na?”
Currently Selected:
Markus 4: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
