Matta 5
5
Shogar ɓu̱ Yesu mbu̱ Dleng
1Nu̱ Yesu naki nduki wa taba khang, tu̱ dla varan nu̱ ɗyin dlengang tu̱ kha varan gha. Tu̱ nu̱ mburi nda kwang dlan she nda. 2Tu̱ yang nggaasi shogar ye wora.
Barkeku
(Luk 6:20-23)
3Tu̱ ku̱s zu̱ran za,
“Barkya ve nduki
nu̱ zu̱nki katar ɓaanda mbu̱ jiimba,
ku̱me kwaaɗar ɓu̱ Magham
ɗya ɓaanda.
4Barkya ve nduki nu̱ke a mbu̱
su̱bu̱rti memu̱na,
ku̱me ka ɓa du̱ng memu̱na wora.
5Barkya ve nu̱ katar ɗyin ku,
ku̱me wor ka ɓa gwaki ɗye mbu̱ ge larji
nu̱ ɗyin mban ku.
6Barkya ve nduki nu̱ke a meeri
ndu̱ khuzhumndi shir ɗyi nu̱ke
Magham a shimndan,
ku̱me mbu̱ wor ka ɓa zhi.
7Barkya ve nu̱ tu̱kti zhiyaye ku,
ku̱me ka ɓa tu̱k zhiyaye ɓaanda tu̱k.
8Barkya ve nduki
nu̱ke memu̱na wor shakhshakh,
ku̱me wor ka ɓa naki Magham.
9Barkya ve nu̱ somtarku,
ku̱me ka qa wor qusonggi ɓu̱ Magham.
10Barkya ve nduki nu̱ke a za bonye
ku̱me tlu̱nar jeembi ɓaanda,
ku̱me kwaaɗar ɓu̱ Magham
ɗya ɓaanda.
11“Barkya ve nu, sarchi nu̱ nduki pu̱zki nu, tu̱ vu̱r bonye ye nu tu̱ kota aa nyi pooni ɗyi malkandi nu̱ ɗyine nu ku̱me nga. 12Shi ma kashari tu̱ memu̱na nu shi ɓong maɗyi, ku̱me ɗye ɓi ɓaanu khang viɗi, aa annabiku na ɓa ki gume nu wa za bonyeku ba wanang.
Shogar ɗyine Dleeru ndu̱ Yarang
(Mar 9:50; Luk 14:34-35)
13“Tun ke dleeri ɓu̱ larji. Yang mbu̱ dleeru wa mbu̱t mu̱ndi ɓaran, nduk ka gaɓ ndu̱ mu̱ndi ɓaranang kikimndana? Boota si tu̱k ɓa, buka ku̱ wos gha tu̱ nduki khatl nu̱ mbu̱ saari wora.
14“Tun ke yarang ɓu̱ larji, ghai nu̱ke a ɗyin ɗawar nu̱ka shi tuka ɓa. 15Nduk nu̱ka sa ɓai ye pitila tu̱ kurpan gha ndu̱ du̱ɓa ɓa, nduk ka du̱ng nda nu̱ ɗyine ɗye du̱ngndan ma ku̱ vu̱r yarang ɓaran ye nduki nu̱ mbu̱ raftang kap. 16Wanang tu̱k, bu ku̱ kha nu ndu̱ yarang gume nduki, ku̱me mbu̱ wa na ɗye shir mbarkandi nu̱ke tun a shiran, ka gor dlu̱m Zhinonu nu̱ke a mbu̱ viɗi.
Shogar ɗyine nyedli ɓu̱ Woparkwang
17“Taman nu za nga ɓakya ma nggu̱tl wopar ɓu̱ Musa ndu̱ bu̱larku ɓu̱ annabikwang nu̱gha ɓa. Na nga ɓa ma pasha wor nu̱gha ɓa, nga ɓakya ma nyel wora. 18Zhire nga zu̱ran ye nu, me ku̱ maa viɗi ndu̱ ma vu̱ghai sagha, aa tun mbillokh aa dobti tun koɗom mbu̱ bu̱lar woparang ɓu̱ sagha ɓa, kope wa nyel kap. 19Ku̱me nang kap njif nu̱ke nu̱ khutlo da chele woparku na ɓa, aa me koɗomme ni, tu̱ yang shoga ye nduki ku̱ shi wa nyin shikyang, ka qa nda njif nu̱ dukki katar mbu̱ kwaaɗar viɗi. Yang aaki khutloki, tu̱ yang shoga ye nduki, ka qa nda nduk gori mbu̱ kwaaɗar ɓu̱ Magham. 20Jiwa nga zu̱ran ye nu, mbu̱ nun duk Maalu̱mku ndu̱ Pariseku ndu̱ jeembu ɓa shwat tun ɓu̱ vi nu̱ mbu̱ kwaaɗar ɓu̱ Magham ɓa.
Shogar ɗyine Shokhna
(Luk 12:57-59)
21“Tun wa tu̱k wa ze zhikanerem za, ‘Shi na tlaghar mu̱ɗ ɓa, kap njif nu̱ tlaghaki mu̱dlen ka kuma nda.’ 22Yang nga zu̱ran ye nu, aaki shiki shokhnar nu̱ mu̱dlen ka kuma nda. Njif nu̱ qaki mu̱dlen nduk ‘Bamndi,’ ka ɗu̱ ndu̱ chin gume kumari, njif nu̱ qaki mu̱dlen za ‘Nggu̱bu̱ng’ shipakya giɗim ɓai.
23“Ku̱me nang mbu̱ ta ma shi vu̱rti gume du̱ku̱l sadkyang to yang kor nu̱ ɗyine mu̱dlo a shokhnar ndu̱ to, 24to du̱ng vu̱rti ɓaarang gha gume du̱ku̱lang dong. To ɗu̱ to ɗa tlaɗ ndu̱ mu̱dlwang dong, kom to ɗa ɓa to shi vu̱rti ɓaarang.
25“Mbu̱ nduk wa da zhaano ɓaaro, to shi wakho tun tlaɗ ndu̱ chin yiti njivi fan nu̱ vi nun gume kumari. Mbu̱ wanang ɓa ka vu̱rtor nu̱ mbu̱ khar nu̱ kumari, nu̱ kumarang yang ka sa nu̱ mbu̱ khar nu̱ gu̱ndi mbu̱ var ku tu̱ khiiror gha zhaaru̱m. 26Zhire nga zu̱ran yoro ɓu̱ feetor nu̱ dam ɓa kope ta ɓi mu̱zhindi nu̱ke a mburor kap.
Shogar ɗyine Zawa
27“Tun wa tu̱k wa ze wor za, ‘Shi na zawa ɓa.’ 28Yang ngaa zu̱ran ye nu kap njif nu̱ nggu̱tki nusu tu̱ shim shi zawar ndu̱ chin wa woɗa qaandi ndu̱ chin mbu̱ memu̱naran. 29Mbu̱ke yitor nu̱ zu̱ma wa ka sa ma sola to fu̱lokh to mbuk gha. Ka duk ku̱ mbu̱ɗ na me bar da ve man vaaro, ye ku̱ mbuk manva guma da nu̱ mbu̱ giɗim ɓai. 30Yang tu̱k, mbu̱ khaa nu̱ zu̱ma wa ka sa ma sola, ku̱rto nu̱ gha to mbuk gha ka duk ku̱ mbu̱ɗ na me bar da ve man vaaro, ye ku̱ mbuk manva guma da nu̱ ɓu̱ giɗim ɓai.
Shogar ɗyine Nggar Ɓu̱rti
(Mat 19:9; Mar 10:11-12; Luk 16:18)
31“Zhu tang wa ze wor za, kap njif nu̱ke a ma ngga nokhzan gha, ku̱ vu̱r lagarkati nggar ɓu̱rti yenda. 32Yang nga zu̱ran ye nu̱, kap njif nu̱ nggaki nokhzan gha mbu̱ shikya zawa ndu̱ njif nggur ɓa, sakya nda nu̱ mbu̱ njiv nu̱ke ku̱ shi zawa. Yang tu̱k, aaki ɓu̱rki nokhzi nggakandang, a shikya zawa ndu̱ chin.
Shogar ɗyine dar alqawar
33“Wanang tu̱k tun wa tu̱k wa ze nduki nu̱ zhu za, ‘Zhang na shi ɗyi no daki alqawar ɓa, yang to nyel alqawar no daki ye Magham.’ 34Yang nga zu̱ran ye nu, shi nu ku̱mnda shwat ɓa. Aa ndu̱ maa viɗi, ku̱me nang ke zhakhɗye ɓu̱ Magham. 35Aa ndu̱ maa vu̱ghai ku̱me nang ke ɗye du̱ngndi saaran, yang ku̱mnda nu ndu̱ Urshalima ɓa ku̱me nang ke ghai ɓu̱ Kuji Gwaanjang. 36Yang ku̱mndana nu̱ ɗyinor zum ɓa ku̱me tom ɓu̱ ɗu̱ma gaɓ ndu̱ aa ghosi yen da ku̱ kha ma ɓong ɓa yang chit ɓa. 37Buu ku̱ ‘I’ ɓaanu kha ma ‘I’ ndu̱ ‘O, O’ kha ma ‘O, O’ Kap ɗyi nu̱ peetaki nang a vi she Nu̱ mu̱narang.
Shogar ɗyine Dli gaɗa
(Luk 6:29-30)
38“Tun wa tu̱k ɗyi nu̱ zu̱ki za, ‘Yiti me ɓu̱ yiti, dlin me ɓu̱ dlin.’ 39Yang nga zu̱ran ye nu, nggu̱tl nu ku̱ nduk mu̱na nu ɓa, mbu̱ nduk wa ɓu̱tlor ve shalnggor nu̱ zu̱ma to dambu̱r shalnggor da nda yenda. 40Mbu̱ nduk wa da zhaano ɓa ma lawa ye lukti nu̱ mbu ɓar khaaro, to vu̱r yenda kap ndu̱ lukti gwaanjang. 41Mbu̱ nduk wa ranna ro za shi na yir kilomite da ndu̱ chin, to shi aa kilomite rap ndu̱ chini. 42Mbu̱ nduk wa khuɗ ɗyi nggur khaaro to vu̱r yenda. Njif nu̱ ɗa ɓa ki ma dlu̱ zomchi, nggu̱tl na nda si ɓa.
Ndolo nu̱ Zhangndi ɓaaro
(Luk 6:27-28, 32-36)
43“Tun wa tu̱k wa zu̱ za, ‘Ndolo nu̱ bing ɓaaro, to zhang nu̱ zhangndi ɓaaro.’ 44Yang nga zu̱ran ye nu, ndolama nu̱ zhangndi ɓaanu, tun shi barar ye nduki nu̱ke a vu̱r bonye ye nu. 45Mbu̱ tun wa shi wanang tun ka kha ma qusonggi ɓu̱ Zhinonu nu̱ke a mbu̱ viɗi, ku̱me wa ka sa fu̱ɗar tu̱ shi yarang ɗyine nduki mbarkandi ndu̱ nduki malkandi, tu̱ vu̱r romndi ye nu̱ jeembu ndu̱ nu̱ mu̱narku. 46Mbu̱ tun a ndola kya nu̱ ndolar nu ɗyenda, tun ka gwa ɗye ɓiira fu̱na? Aa nu̱ dlu̱r zhaanggalku wa ka shi ba wa nun ka shikyang. 47Mbu̱ tun ka shi kya qaandi ye nyeezonu ɗyenda tun duk ɓeena ndukyang ve nu̱ma? Aa nduki nu̱ke ɗya Yakhude ku ɓa wa ka shi wanang. 48Ku̱me wanang, tun kha nyeedlan wa nu̱ke Zhinonu nu̱ke a mbu̱ viɗi nyeedlan.
Currently Selected:
Matta 5: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
