Ị́jọ́ Uꞌbéŋá 29
29
1ꞌBá imbe ũkpó uzájó drị̃ la gá tí rĩ la ị̃lị̃kị̃ ụ́ꞌdụ́ ãlu agá,
icó ru drị̃ ingalé ị̃dị́ ku.
2ꞌBá ãlá rĩ drĩ kí adru drị̃lẹ́ ru nĩ, ꞌbá pírí kí uꞌá ãyĩkõ sĩ,
wó drị̃lẹ́ ũnzí rĩ sĩ ꞌbá kí acá ũcõgõ sĩ.
3ꞌBá ũndũwã lẽlépi rá rĩ la átẹ́pị̃ ní ãyĩkõ fẽ rá,
wó ꞌbá uꞌálépi ãwụ́ꞌbá kí abe rĩ la málĩ ĩꞌdidrị̂ kí iza-izã.
4Úpí ị́jọ́ lịlẹ́pi pịrị rĩ la fẽ sụ́rụ́ ĩꞌdidrị̂ la pá tu ũkpó ru,
wó drĩ ru lẽ mịfị́ saŋá sĩ, sụ́rụ́ ĩꞌdidrị̂ la andi rá.
5ꞌBá ĩꞌdi ꞌbã jĩránĩ ịpị́lépi ĩnzõ sĩ rĩ la
ímbá ꞌbe ĩꞌdi ꞌbã vúŋá nî.
6ꞌBá ị́jọ́ ũnzí ngalépi rĩ la gbã ị́jọ́ ũnzĩ ĩꞌdidrị̂ gá nĩ,
wó ꞌbá ị́jọ́ pịrị rĩ ngalépi rĩ la úngó ngo ãzíla ĩꞌdi adru ãyĩkõ sĩ.
7ꞌBá ãlá rĩ kí así ꞌbá lẽmẽrí rĩ kî sĩ rá,
wó ꞌbá ũnzí rĩ vã ꞌbãngá ị́jọ́ ꞌdĩ ku.
8ꞌBá idemará ru rĩ kí táwụ̃nị̃ ꞌa usa ũmbã sĩ,
wó ꞌbá ũndũwã rú ri kí ũmbã ịgbẹ rá.
9ꞌBá ũndũwã rú rĩ drĩ ꞌbá azalépi aza-azâ rĩ tõ dũwánĩ gá,
ꞌbá azalépi aza-azâ rĩ la gụ ĩꞌdi sĩ gụgụ̃ ãzíla ásị́ ị̃gbẹ̃ la adru ꞌdá yụ.
10ꞌBá ꞌbá ụꞌdị́lépi rĩ kí ꞌbá ị́jọ́ pịrị rĩ ngalépi rĩ kí ngụ̃ ũnzí,
wó kí gẹ̃rị̃ ndrụ̃ sĩ lẽjó ꞌbá ị́jọ́ pịrị rĩ ngalépi rĩ kí ꞌdịjó rá.
11ꞌBá azalépi aza-azâ rĩ la ũmbã ĩꞌdidrị̂ iꞌda tọndọlọ,
wó ꞌbá ũndũwá trũ rĩ la ị́jọ́ kî ꞌdụ ásị́ jã sĩ.
12ꞌBá drị̃lẹ́ ru rĩ drĩ ĩnzõ are áyụ,
ꞌbá ĩꞌdidrị́ ãmbogo rú rĩ kí pírí acá ꞌbá ũnzí la kî.
13ꞌBá lẽmẽrí ri kí ꞌbá ĩꞌdi ĩkpãlépi rĩ be ají kí ru ãlu,
Úpí fẽ ĩꞌbaní mịfị́ sĩ ãngũ ndrejó ị̃rị̃trá rá.
14Úpí drĩ ꞌbá lẽmẽrí rĩ kí drị̃ gá ị́jọ́ lị pịrị,
ĩꞌdi ũpĩ na jã ꞌdâ.
15Ídrĩ anzị mídrị̂ kí ị̃ndụ́ co sĩ kí itújó rá, kí adru ũndũwã rú,
wó ngọ́tị́ŋá aꞌbelé ị̃ndụ́ colé ku rĩ la drị̃nzá ají ãndrẽ nî.
16Drị̃lẹ́ ũnzí rĩ kí kãlãfe drĩ tụtụ̃, ị́jọ́ ũnzí la vâ tụtụ̃,
wó ꞌbá ãlá rĩ kí ꞌbá ũnzí rĩ kí ꞌbã aꞌdéŋá ndre cé.
17Ídrĩ ngọ́tị́ŋá mídrị̂ ị̃ndụ́ co ímbátáŋá ru rá, ĩꞌdi míní ásị́ ị̃gbẹ̃ fẽ rá,
ĩꞌdi ãyĩkõ fẽ ími ásị́ ní rá.
18Sụ́rụ́ Ãdróŋá ꞌbã drị̃ celé nĩ ku rĩ la ị́jọ́ kí nga ãzị́táŋá kóru.
Wó ꞌbá ãzị́táŋá Ãdróŋá drị̂ kí tãmbalépi rá rĩ ĩꞌdi drị̃lẹ́ba rú.
19Mí icó ãtíꞌbó imbálé ị́jọ́ jọŋá tị sĩ rĩ sĩ áꞌdụ̂sĩ ku.
Drĩ kí táni ị́jọ́ míní jọlé rĩ vã rá tí wó icó kí ãzị́ la ngalé ku.
20Ásị́ tị̃jó ꞌbá azalépi aza-azâ rĩ drị̃ gá rĩ ĩꞌdi múké ãndânĩ
ndẽ ásị́ tị̃jó ꞌbá ị́jọ́ jọlépi ũrã ꞌa la ku rú rĩ drị̃ gá rĩ rá.
21Ídrĩ ãtíꞌbó mídrị̂ iwí sĩ ãko pírí kí fẽjó ĩꞌdiní vụ̃rụ́-vụ̃rụ́ ru,
ĩꞌdi drụ́zị́ amụ́ ãko mídrị̂ kí palé nĩ.
22ꞌBá ũmbá rĩ la ãcóŋá ajị́
ãzíla ꞌbá ásị́ ãcí rĩ la ị́jọ́ ũnzí idé wẽwẽ rú.
23Ãfó la ꞌbá ịsị́ vụ̃rụ́,
wó ꞌbá ru irilépi vụ̃rụ́lé rĩ la ãrútáŋá ịsụ́ rá.
24ꞌBá ãko ụ̃gụ́ꞌbá ꞌbã ụ̃gụ̃lé rĩ kí nalépi ĩꞌdi be rĩ ĩꞌdi ĩꞌdi ꞌbã mẹ́rọ́ꞌbá ru cénĩ.
Drĩ táni ũyõ na icó ị́jọ́ pịrị rĩ jọlé ku.
25Ụ̃rị̃ idéjó ꞌbá ꞌbá ru rĩ sĩ rĩ ĩꞌdi ũnzí-ũnzí cécé ímbá áni,
wó ásị́ tị̃jó Úpí drị̃ gá rĩ la ꞌbá tãmba rá.
26ꞌBá ũꞌbí kí lẽ ásị́ ị̃gbẹ̃ úpí drị̂ ịsụ́lé,
wó Úpí la ị́jọ́ pịrị rĩ lị nĩ.
27ꞌBá múké rĩ ngụ̃ kí ꞌbá ũnzí rĩ kí ũnzí
ãzíla ꞌbá ũnzí rĩ ngụ̃ kí ꞌbá múké rĩ kí ũnzí.
Currently Selected:
Ị́jọ́ Uꞌbéŋá 29: lucUG
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
