Cong-Mengh Waac 29
29
1Haaix dauh zanc-zanc zuqc gorngv-hemx corc hnyouv ngaengc,
wuov dauh ziouc liemh zeih zuqc mietc,
maiv maaih za'eix goiv duqv nzuonx.
2Kuv mienh maaih hatc maaz camv jienv faaux, baeqc fingx njien-youh,
mv baac orqv mienh zoux hlo gunv mienh, baeqc fingx njunh jienv yiem.
3Haaix dauh hnamv cong-mengh, wuov dauh bun ninh nyei die a'hneiv,
mv baac haaix dauh caux maaic sin nyei m'sieqv dorn jiu tong,
wuov dauh zaaux nzengc ninh maaih nyei yietc zungv ga'naaiv.
4Hungh diex longc baengh fim nyei jauv,
guoqv ziouc liepc duqv wuonv,
mv baac hungh diex aapv baeqc fingx cuotv nyaanh hmuangx
ziouc bun guoqv zuqc baaic.
5Mienh la'guaih ceng ninh nyei juangc laangz mienh
se hnangv zaeng mungz nzenc ninh ganh nyei zaux.
6Orqv mienh baamz zuiz se hnangv zuqc ganh nyei zuiz zoux koux hlopv jienv,
mv baac kuv mienh njien-youh, baaux nzung.#29:6 Hipv^lu waac gorngv “njien-youh nyei heuc mbui”.
7Kuv mienh hiuv duqv mienh jomc mienh horpc zuqc duqv nyei leiz,
mv baac orqv mienh maiv bieqc hnyouv naaiv nyungc jauv.
8Zoux huotv mienh nyei mienh coqv bun zingh nyei mienh lunc nzengc,#29:8 Naaiv liouz Hipv^lu waac beiv taux biomv douz njopc hiaangx.
mv baac cong-mengh mienh haih donv duqv qiex jiez nyei jauv.
9Se gorngv cong-mengh mienh caux mienh hngongx mienh nzaeng,
mienh hngongx mienh youc qiex jiez youc jatv, zungv maiv haih sekv.
10Oix daix mienh nyei mienh hanc haic maiv maaih dorngx nqemh nyei mienh.
Orqv mienh lorz hnyouv zingx nyei mienh nyei maengc.#29:10 Naaiv yiemc sou maaih ziex nyungc za'eix faan. Orqv mienh Hipv^lu waac gorngv kuv mienh. Maaih deix sou faan daaih gorngv “Kuv mienh oix beu ninh nyei maengc”.
11Mienh hngongx mienh bun ninh nyei ga'qiex baetv cuotv nzengc,
mv baac cong-mengh mienh longc noic nyienz jienv.
12Se gorngv zoux hlo nyei mienh muangx gorngv-baeqc nyei waac,
ninh nyei yietc zungv jien ziouc waaic nzengc.
13Mienh jomc mienh caux zeix mienh nyei mienh maaih yietc diuc fih hnangv,
se Ziouv bun ninh mbuo i dauh nyei m'zing njang.
14Se gorngv hungh diex baengh fim nyei siemv mienh jomc mienh,
ninh nyei hungh weic yietc liuz liepc wuonv.
15Longc biaav mborqv njaaux yaac gorngv-njaaux, fu'jueiv ziouc jaa cong-mengh,
mv baac se gorngv sueih fu'jueiv ei ganh nyei hnyouv zoux, ziouc bun maa zuqc nyaiv.
16Orqv mienh duqv lingc gunv, zuiz nyei jauv jaa camv,
mv baac kuv mienh duqv buatc ninh mbuo zuqc baaic waaic nzengc.
17Oix zuqc mborqv njaaux meih nyei dorn,
ninh ziouc bun meih duqv hitv kuonx,
ninh yaac oix bun meih nyei hnyouv a'hneiv.
18Haaix norm dorngx maiv maaih laauc yaangh nyei jauv,#29:18 Maaih deix sou faan daaih gorngv maiv maaih lingc gunv. Maaih deix gorngv “maiv maaih Tin-Hungh dorh”.
baeqc fingx ziouc maiv muangx leiz gunv,
mv baac gan longx leiz-latc nyei mienh duqv orn-lorqc.
19Kungx longc waac gorngv-njaaux bou hnangv se maiv gaux.
Maiv gunv ninh mengh baeqc ninh maiv ei jienv zoux.
20Meih buatc nzuih siepv nyei mienh fai?
Mienh hngongx mienh zungv maaih lamh hnamv gauh camv ninh.
21Bou faix nyei ziangh hoc meih ei ninh nyei hnyouv bun ga'naaiv ninh,
setv mueiz ninh zorqv#29:21 Naaiv joux waac maaih deix sou faan daaih gorngv nzipc. Hipv^lu waac se maiv nangc mengh. nzengc meih maaih nyei yietc zungv ga'naaiv.
22Ga'qiex beqv nyei mienh coqv cuotv nzaeng jaax nyei sic.
Hungh hec qiex jiez nyei mienh baamz zuiz camv.
23Mienh zoux maux ninh ziouc ndortv njiec aiv,
mv baac mienh nyiemc ganh zoux faix ziouc duqv mienh taaih.
24Haaix dauh caux janx-zaqc maaih buonc ziouc hanc ganh nyei maengc.
Ninh haiz mienh houv nyei waac yaac maiv gorngv haaix nyungc.#29:24 Beiv mangc Lewi 5:1-6.
25Mienh gamh nziex mienh se benx koux hlopv,
mv baac haaix dauh kaux Ziouv duqv yiem longx.
26Mienh camv nyei lorz zoux hlo nyei mienh korv-lienh,
mv baac se Ziouv bun mienh duqv baengh fim.
27Hnyouv maiv zingx nyei mienh zuqc kuv mienh youx,
hnyouv zingx nyei mienh zuqc orqv mienh youx.
Currently Selected:
Cong-Mengh Waac 29: IuMiNR
Highlight
Share
Copy
Want to have your highlights saved across all your devices? Sign up or sign in
ฉบับอักษรโรมันใหม่ © Thailand Bible Society, 2007.
