I^saa^yaa 26
26
Tin-Hungh Bun Ninh Nyei Baeqc Fingx Hingh Jiex
1Dongh wuov hnoi yiem Yu^ndaa Deic ninh mbuo oix baaux naaiv diuh nzung.
Yie mbuo maaih norm wuonv nyei zingh,
Tin-Hungh nyei njoux en zoux zingh laatc weih jienv.
2Koi nqoi zingh gaengh bun wuov norm guoqv nyei kuv mienh,
se gan longx Tin-Hungh nyei mienh bieqc daaih.
3Liepc dingc hnyouv nyei mienh meih bun maaih baengh orn dunh yunh nyei,
weic zuqc ninh kaux meih.
4Oix zuqc yietc liuz kaux Ziouv,
weic zuqc Ziouv Tin-Hungh se yietc liuz yiem nyei La'bieiv.
5Ninh bun yiem hlang nyei dorngx wuov deix
caux yiem hlang nyei zingh
njiec nzengc, mbaang njiec taux ndau.
Zungv mbaang njiec taux nie-mbung.
6Zaux ziouc caaiv jienv,
se mienh jomc mienh nyei zaux,
caux dangx-donx mienh nyei zaux-caaiv.
7Kuv mienh yangh nyei jauv se baengh nyei.
Zingx nyei Ziouv aac,
meih bun kuv mienh nyei jauv yuonh.
8O Ziouv aac, yie mbuo gan meih siemv nyei jauv,#26:8 Fai meih nyei leiz-latc. yaac zuov jienv meih.
Yie mbuo nyei hnyouv gauh oix jiex nyei
se meih nyei mengh caux horpc zuqc jangx nyei mbuox.
9Lungh muonz zanc yie nyei hnyouv jangx haic meih,
yie nyei hnyouv qaqv lorz meih.
Weic zuqc meih yiem lungh ndiev siemv nyei ziangh hoc,
lungh ndiev mienh ziouc hiuv duqv zoux horpc nyei jauv.
10Se gorngv ceix en bun orqv mienh,
ninh maiv hoqc hiuv zoux horpc nyei jauv.
Ninh yiem hnyouv zingx nyei mienh nyei deic-bung zoux orqv sic,#26:10 Fai maiv baengh fim.
yaac zieqv maiv duqv Ziouv nyei haangh daauh.
11O Ziouv aac, meih nyei buoz sung hlang,
ninh mbuo yaac maiv buatc.
Tov bun ninh mbuo buatc meih weic meih nyei baeqc fingx jorm hnyouv,
ninh mbuo ziouc zuqc nyaiv.
Tov bun meih nyei win-wangv
zuqc douz buov qui.#Hipv^lu 10:27
12O Ziouv aac, meih oix liepc baengh orn bun yie mbuo.
Yie mbuo zoux ziangx nyei yietc zungv se meih weic yie mbuo zoux.
13O Ziouv, yie mbuo nyei Tin-Hungh aac,
cuotv liuz meih, maaih nyiec nyei ziouv gunv yie mbuo,
mv baac yie mbuo kungx nyiemc meih nyei mbuox hnangv.
14Ninh mbuo daic mingh, maiv haih aengx duqv maengc ziangh,
ninh mbuo yiem yiemh gen, maiv haih nangh.
Meih dingc ninh mbuo nyei zuiz yaac mietc ninh mbuo,
meih sortv guangc ninh mbuo nyei mengh hoc,
maiv maaih haaix dauh jangx duqv ninh mbuo.
15O Ziouv aac, meih tipv yie mbuo nyei guoqv nyei baeqc fingx,
meih tipv yie mbuo nyei guoqv nyei baeqc fingx, meih ziouc duqv mienh taaih.
Meih capv guoqv nyei bung-bung gapv-jaaix jangv cuotv.
16 Ziouv aac, ninh mbuo zuqc kouv nyei ziangh hoc ninh mbuo daaih lorz meih.
Meih mborqv njaaux ninh mbuo wuov zanc,
ninh mbuo qaqv gorngv cuotv daux gaux nyei waac.#26:16 Naaiv douc Hipv^lu waac se maiv nangc mengh.
17Hnangv m'sieqv aav lamh ndutv sin nyei ziangh hoc,
mun duqv kouv haic, qaqv heuc.
O Ziouv aac, yie mbuo yiem meih nyei nza'hmien hnangv wuov nor.
18Yie mbuo yaac maaih jienv sin, mun duqv kouv,
mv baac kungx yungz cuotv nyei se hnangv nziaaux.
Yie mbuo maiv haih zoux haaix nyungc weic njoux lungh ndiev,
yaac maiv maaih mienh cuotv seix yiem baamh gen.#26:18 Naaiv deix i liouz Hipv^lu waac se maiv nangc mengh.
19Mv baac meih nyei mienh,#26:19 Hipv^lu waac gorngv daic mingh nyei mienh. daic mingh aengx oix ziangh jienv,
ninh mbuo nyei sei aengx oix nangh daaih.
Bueix jienv nie-mbung nyei mienh aah!
Nyie daaih njien-youh nyei baaux nzung.
Meih tengx ndau nyiemz hnangv lungh ndorm nyei mbiungc-suiv,
meih yaac oix bun daic mingh lauh nyei mienh aengx nangh daaih.
20Yie nyei baeqc fingx aah! Oix zuqc bieqc meih mbuo nyei gen, guon jienv gaengh,
oix zuqc bingx jienv longc diqv dien ziangh hoc
zuov taux ninh qiex jiez nyei ziangh hoc jiex.
21Mangc maah! Ziouv oix yiem ninh ganh yiem nyei dorngx cuotv daaih
dingc lungh ndiev mienh zoux dorngc nyei zuiz.
Ndau oix hinc cuotv zuqc daix daic nyei mienh nyei nziaamv,
maiv aengx biopv zuqc daix daic nyei mienh.
Currently Selected:
I^saa^yaa 26: IuMiNR
Highlight
Share
Copy
Want to have your highlights saved across all your devices? Sign up or sign in
ฉบับอักษรโรมันใหม่ © Thailand Bible Society, 2007.
