I^saa^yaa 11
11
Jetc^si Nyei Zeiv-Fun
1Jetc^si nyei gorn oix cuotv diuh cunx,
ninh nyei nzungh oix cuotv nquaav nquaah yaac ziangh biouv.#Laauc Yaangh 5:5; 22:16
2 Ziouv nyei Singx Lingh oix yiem ninh,
Singx Lingh bun ninh maaih cong-mengh caux wuonh zaang,
Singx Lingh bun ninh haih caangh laangh yaac maaih domh qaqv,
Singx Lingh bun ninh haih mengh baeqc yaac bun ninh taaih Ziouv.
3Ninh zungv oix buangv hnyouv taaih Ziouv.
Ninh maiv zeiz ziux ganh nyei m'zing buatc nyei siemv,
yaac maiv zeiz ziux ninh nyei m'normh haiz nyei dunx sic.
4Ninh oix longc horpc nyei jauv siemv mienh jomc mienh,
yaac baengh fim nyei dunx yiem lungh ndiev
zuqc zatv njiec nyei mienh.
Ninh oix njiec lingc dingc lungh ndiev mienh nyei zuiz,#11:4 Faan zaqc Hipv^lu waac gorngv “Ninh oix longc yiem ninh nyei nzuih nyei biaav mborqv lungh ndiev.”
yaac daix orqv mienh.#11:4 Faan zaqc Hipv^lu waac gorngv “longc ninh nyei nzuih meix nyei qiex daix orqv mienh”.#2 Te^saa^lo^ni^gaa 2:8
5Ninh oix longc baengh fim nyei jauv dorngx houx-hlaang,
yaac longc ziepc zuoqv nyei jauv zoux la'sin sai jienv.#E^fe^so 6:14
6Hieh juv ziouc caux ba'gi yungh dorn yiem,
nda'maauh mbeux yaac caux yungh dorn bueix,
ngongh dorn caux sienh lunx juangc yiem juangc nyanc,#11:6 Fai “ngongh dorn, sienh lunx caux junc nyei ngongh dorn juangc nyanc”.
fu'jueiv-faix yaac oix dorh ninh mbuo.#I^saa^yaa 65:25
7Ngongh nyeiz zungv caux jiepv juangc nyanc,
ninh mbuo nyei dorn juangc bueix,
sienh yaac oix nyanc mbiauh nqaauv hnangv ngongh nor.
8Corc hopv nyorx nyei gu'nguaaz oix yiem naang-jieqv nyei kuotv-ndaangc nyienx,
guangc nyorx nyei gu'nguaaz oix lom bieqc naang-doqc nyei kuotv.
9Da'faanh yiem yie nyei cing-nzengc mbong nyei dorngx,
naaiv deix ga'naaiv maiv hoic, maiv zoux mietc.
Weic zuqc hiuv Ziouv nyei mienh buangv nzengc lungh ndiev,
hnangv wuom buangv koiv nor.#Haa^mbaa^gukc 2:14
Zuqc Guaatv Mingh Nyei Mienh Duqv Nzuonx
10Taux wuov hnoi, maaih dauh Jetc^si nyei Zeiv-Fun#11:10 Faan zaqc gorngv Jetc^si nyei Nzungh. oix liepc jiez zoux maanc fingx nyei jangx-hoc, maanc guoqv mienh ziouc daaih lorz ninh. Ninh hitv nyei dorngx maaih njang-laangc haic.#Lomaa 15:12
11Taux wuov hnoi, Ziouv oix sung da'nyeic nzunc buoz weic siou ninh zengc njiec nyei baeqc fingx, se yiem Atc^si^lie, I^yipv, Batc^lotv,#11:11 Se I^yipv Deic-Bung nyei wuov jiex wuonc. E^ti^ o^bie,#11:11 Se Kutv. Elaam, Mbaa^mbi^lon,#11:11 Se Sinaa. Haamatv caux koiv-nzou nyei mienh.
12Ninh oix liepc jiez domh geh#11:12 Fai jangx-hoc. bun maanc guoqv mienh,
aengx dorh I^saa^laa^en zuqc guaatv mingh nyei mienh daaih zunv.
Ninh oix yiem ndau-beih nyei biei bung lungh gorn,
bun zuqc yiem nzaanx nyei Yu^ndaa Mienh gapv zunv.
13E^faa^im mueic jieqv nyei sic ziouc jiex mi'aqv,
hoic Yu^ndaa nyei mienh yaac zuqc pai guangc.
E^faa^im ziouc maiv mueic jieqv Yu^ndaa,
Yu^ndaa yaac maiv hoic E^faa^im aqv.
14Ninh mbuo oix njiec mingh mborqv#11:14 Faan zaqc gorngv “tiux njiec ninh mbuo nyei mba'dauh”. yiem fai bung nyei Fi^li^saa^die Mienh.
Ninh mbuo lomh nzoih mingh luv yiem dong bung nyei mienh.
Ninh mbuo oix mingh caangv E^ndom caux Mo^apc.
Ammon Mienh yaac zuqc yiem ninh mbuo nyei buoz-ndiev.
15 Ziouv yaac oix bun
I^yipv nyei koiv-congx nqaai.
Ninh oix huangx buoz bun nziaaux-jorm buonc jiex
Yu^fe^ditc Ndaaih gu'nguaaic.
Ndaaih ziouc bun nqoi benx siec diuh ndoqv,
bun mienh haih jiex mingh, zaux yaac maiv ndorn.#Laauc Yaangh 16:12
16Maaih diuh domh jauv bun ninh nyei baeqc fingx
zengc njiec nyei mienh yiem Atc^si^lie nzuonx,
hnangv zinh ndaangc I^saa^laa^en Mienh
yiem I^yipv Deic-Bung nzuonx nyei jauv nor.
Currently Selected:
I^saa^yaa 11: IuMiNR
Highlight
Share
Copy
Want to have your highlights saved across all your devices? Sign up or sign in
ฉบับอักษรโรมันใหม่ © Thailand Bible Society, 2007.
