E^saa^laa 4
4
Win-Wangv Dangv Jienv Maiv Bun Ceix Zaangc Tin-Hungh Nyei Biauv
1Yu^ndaa Mienh caux Mben^yaa^min Mienh nyei win-wangv haiz gorngv, zuqc guaatv mingh aengx duqv nzuonx daaih nyei mienh,#4:1 Naaiv deix zuqc guaatv mingh nyei mienh nzuonx nyei ziangh hoc se Yesu maiv gaengh cuotv seix zinh ndaangc 538 hnyangx. weic Ziouv, I^saa^laa^en Mienh nyei Tin-Hungh, ceix zaangc Tin-Hungh nyei biauv. 2Wuov deix win-wangv ziouc mingh lorz Se^lupv^mbaa^mben caux I^saa^laa^en nyei bungh buonc bieiv zeiv. Ninh mbuo gorngv, “Bun yie mbuo tengx jienv meih mbuo ceix oc, weic zuqc yie mbuo zaangc meih mbuo nyei Tin-Hungh hnangv meih mbuo nor. Yiem Atc^si^lie nyei hungh, E^saanx^hatv^ndon, dorh yie mbuo daaih yiem naaiv wuov zanc yie mbuo zanc-zanc fongc horc ziec bun Tin-Hungh.”#2 Hungh Douh 17:24-41
3Mv baac Se^lupv^mbaa^mben, Ye^su^aa, caux yiem I^saa^laa^en zengc njiec nyei bungh buonc bieiv zeiv gorngv mbuox daaih lorz ninh mbuo wuov deix mienh, “Meih mbuo maiv maaih buonc caux yie mbuo ceix zaangc Tin-Hungh nyei biauv. Kungx yie mbuo ganh hnangv oix ceix daaih weic Ziouv, I^saa^laa^en Mienh nyei Tin-Hungh, ziux Besie Guoqv nyei hungh, Sailatv, paaiv yie mbuo zoux.”
4Yiem wuov deix ndau nyei mienh ziouc zoux bun Yu^ndaa Mienh tuix bouc, gamh nziex maiv ceix wuov norm biauv. 5Wuov deix mienh yaac beic ndiev nzuiz nyaanh bun jien-fouv#4:5 Fai “cingv caangh laangh nyei mienh”. dangv jienv Yu^ndaa Mienh, maiv bun ninh mbuo zoux. Da'faanh Sailatv zoux hungh nyei lungh ndiev, zungv mingh taux Besie nyei hungh, Ndaa^li^atc, gunv nyei ziangh hoc, ninh mbuo yaac fih hnangv nyei nyauv jienv Yu^ndaa Mienh nyei gong.#4:5 E^saa^laa 4:5 gorngv nyei jauv-louc yiem 4:24 wuov yiemc borqv jienv gorngv mingh. 4:6-23 cuotv daaih nyei jauv-louc se jiex liuz wuov deix ziangh hoc aav lamh duqv yietc baeqv hnyangx.
Win-Wangv Dangv Jienv Maiv Bun Ceix Ye^lu^saa^lem Zingh
6Yiem Aa^haa^su^e^latv Hungh#4:6 Hipv^lu waac gorngv Aa^haa^su^e^latv. Ziux Besie Guoqv nyei waac maaih deix heuc Sesitv. jiez gorn gunv wuov zanc, wuov deix win-wangv aengx lorz jauv gox Yu^ndaa caux Ye^lu^saa^lem nyei mienh.#E^se^te 1:1
7Yiem Besie Guoqv nyei hungh, Aan^taa^se^sitv, zoux hungh nyei lungh ndiev, Mbitc^laam, Mitv^le^ndaatc, Taa^mbe^en caux ninh mbuo wuov guanh mienh, fiev zeiv sou bun Aan^taa^se^sitv Hungh. Wuov zeiv sou longc Aalam nzaangc yaac benx Aalam waac.#4:7 Fai “fiev benx Aalam waac yaac maaih mienh faan”.
8Le^hum saengv-ziouv caux Simsai sou-biuv, fiev sou bun Aan^taa^se^sitv Hungh weic gox Ye^lu^saa^lem Zingh nyei mienh hnangv naaiv.#4:8 Yiem E^saa^laa 4:8 taux 6:18, naaiv zeiv sou maiv zeiz longc Hipv^lu waac. Se longc Besie Guoqv nyei buonv-guoqv waac, benx Aalam waac.
9Saengv-ziouv, Le^hum, caux Simsai sou-biuv, aengx caux jienv ninh mbuo nyei guanh, se siemv zuiz nyei jien, caux zoux jien nyei mienh, caux Mbaa^mbi^lon Guoqv nyei baeqc fingx, caux Elekv Mienh, caux Elaam baeqc fingx wuov deix Susaax Mienh, 10caux ziex norm guoqv nyei mienh, dongh zoux hlo nyei domh jien, Otc^napv^baa,#4:10 Aalam waac gorngv Otc^napv^baa. Maaih deix sou gorngv Atc^su^mban^i^baan. zunc mingh yiem Saa^maa^lie Zingh caux wuov ngaanc ziqc Yu^fe^ditc Ndaaih, mba'hnoi ndortv maengx norm-norm dorngx, fiev naaiv zeiv sou.
11(Naaiv se ninh mbuo juix mingh nyei sou.)
Fungx taux Aan^taa^se^sitv Hungh Diex,
Meih nyei bou, se yiem mba'hnoi ndortv maengx wuov bung Yu^fe^ditc Ndaaih nyei zuangx mienh, jangx taux meih.
12Hungh diex horpc zuqc hiuv duqv, yiem meih wuov daaih yiem yie mbuo naaiv nyei Yiutai Mienh mingh taux Ye^lu^saa^lem Zingh, aengx ceix wuov norm orqv haic, aah loc faanv lunc nyei zingh. Ninh mbuo ceix zingh laatc aav lamh ziangx yaac zorc zingh nyei gorn-ndoqv.
13Hungh diex horpc zuqc hiuv duqv, se gorngv naaiv norm zingh duqv ceix ziangx, zingh laatc yaac zorc ziangx nor, ninh mbuo zungv maiv fungx korx-zinh caux nzou-zinh mingh bun meih aqv. Hnangv naaic, hungh diex nyei zinh nyaanh ziouc zoqc njiec. 14Yie mbuo yietc zungv yiem meih nyei buoz-ndiev nyei mienh, maiv oix buatc hungh diex nyei mengh dauh ndortv cingx fungx naaiv deix waac mingh mbuox hungh diex. 15Tov paaiv mienh zaah mangc hungh diex nyei ong-taaix nyei daan. Yiem daan ziouc duqv buatc wuov norm zingh nyei mienh zanc-zanc faanv lunc, hoic doic-doic hungh caux norm-norm saengv nyei saengv-ziouv. Yiem loz-hnoi daaih taux ih zanc naaiv norm zingh nyei mienh hnyouv ngaengc, cuoqv sic. Weic naaiv, naaiv norm zingh cingx zuqc baaic waaic. 16Yie mbuo oix hungh diex hiuv duqv, se gorngv naaiv norm zingh ceix ziangx, zingh laatc yaac zorc ziangx nor, yiem Yu^fe^ditc Ndaaih mba'hnoi ndortv maengx nyei deic-bung, hungh diex maiv duqv gunv aqv.
Aan^taa^se^sitv Hungh Wuih Nyei Sou
17Hungh diex wuih sou hnangv naaiv nor gorngv.
Fungx bun Le^hum saengv-ziouv caux Simsai sou-biuv, aengx caux ninh mbuo nyei guanh, dongh yiem Saa^maa^lie caux Yu^fe^ditc Ndaaih mba'hnoi ndortv maengx ziex norm dorngx nyei mienh.
Tov bun meih mbuo baengh orn nyei yiem oc.
18Meih mbuo juix daaih bun yie wuov zeiv sou maaih mienh doqc aengx faan daaih bun yie muangx liuz aqv. 19Yie hatc mienh zaah mangc, ziouc buatc naaiv norm zingh nyei mienh yiem loz-hnoi m'daaih maaih caux hungh diex doix-dekc, yaac maaih ngaengc jienv faanv lunc nyei sic. 20Zinh ndaangc maaih hatc maaz nyei hungh gunv Ye^lu^saa^lem Zingh caux Yu^fe^ditc Ndaaih mba'hnoi ndortv maengx nyei yietc zungv deic-bung. Yiem wuov deix deic-bung nyei mienh yaac oix zuqc cuotv nzou-zinh caux korx-zinh bun wuov deix hungh diex. 21Hnangv naaic, meih mbuo oix zuqc hatc ninh mbuo dingh, maiv dungx ceix wuov norm zingh aqv. Zuov taux yie nqoi nzuih. 22Meih mbuo oix zuqc maiv dungx ngaih jienv liuc leiz naaiv deix sic weic maiv hoic hungh diex zuqc kuei.
23Le^hum saengv-ziouv caux Simsai sou-biuv, caux ninh mbuo nyei guanh yietv haiz doqc liuz Aan^taa^se^sitv Hungh nyei sou, ninh mbuo gaanv jienv mingh Ye^lu^saa^lem lorz Yiutai Mienh, ziouc longc hatc maaz, longc qaqv zoux bun Yiutai Mienh dingh gong.
24Yiem Ye^lu^saa^lem Zingh ceix zaangc Tin-Hungh nyei biauv nyei gong ziouc dingh taux Besie Guoqv nyei hungh, Ndaa^li^atc, gunv guoqv da'nyeic hnyangx.#Hakv^gai 1:1; Se^kaa^li^yaa 1:1
Currently Selected:
E^saa^laa 4: IuMiNR
Highlight
Share
Copy
Want to have your highlights saved across all your devices? Sign up or sign in
ฉบับอักษรโรมันใหม่ © Thailand Bible Society, 2007.
