1 Saa^mu^en 8

I^saa^laa^en Mienh Tov Liepc Dauh Hungh

1Saa^mu^en hnyangx-jeiv gox nyei ziangh hoc, ninh liepc ninh nyei dorn zoux I^saa^laa^en Mienh nyei domh jien. 2Ninh nyei dorn-hlo heuc Yo^en, dorn-faix heuc Aa^mbi^yaa. Ninh mbuo i dauh yiem Mbe^e^qe^mbaa zoux domh jien. 3Mv baac Saa^mu^en nyei dorn maiv zuotc ninh mbuo nyei die nyei nyungc zeiv zoux. Ninh mbuo kungx douh ganh duqv nyaanh hnangv, nyanc nyaanh hmuangx yaac mbienv baengh fim nyei leiz.

4I^saa^laa^en Mienh nyei zuangx mienh gox ziouc gapv zunv daaih taux Laamaa Zingh lorz Saa^mu^en. 5Ninh mbuo gorngv, “Meih nyei hnyangx-jeiv gox aqv. Meih nyei dorn yaac maiv zuotc meih nyei nyungc zeiv zoux. Ih zanc tov meih liepc dauh hungh gunv yie mbuo hnangv norm-norm guoqv maaih nor.”#Nzamc Leiz-Latc 17:14-15

6Mv baac ninh mbuo gorngv, “Tov bun dauh hungh gunv yie mbuo,” wuov deix waac, Saa^mu^en haiz maiv horpc hnyouv. Ninh ziouc daux gaux mbuox Ziouv. 7Ziouv dau Saa^mu^en, “Oix zuqc muangx baeqc fingx caux meih gorngv nyei yietc zungv waac, weic zuqc ninh mbuo maiv zeiz nqemh meih. Ninh mbuo nqemh yie, maiv longc yie zoux ninh mbuo nyei hungh. 8Yiem yie dorh ninh mbuo cuotv I^yipv Deic-Bung taux ih zanc ninh mbuo zanc-zanc guangc yie, fu-sux nyiec nyei zienh. Ninh mbuo yaac fih hnangv nyei zoux bun meih. 9Wuov nyungc, meih gunv ei ninh mbuo nyei waac. Mv baac oix zuqc longx-longx nyei kuinx ninh mbuo, gorngv mengh bun ninh mbuo hiuv duqv oix gunv ninh mbuo wuov dauh hungh diex nyei za'eix oix hnangv haaix nor.”

10Saa^mu^en zorqv Ziouv gorngv nyei yietc zungv waac zunh mbuox dongh tov ninh tengx liepc hungh diex nyei baeqc fingx muangx. 11Saa^mu^en gorngv, “Gunv meih mbuo wuov dauh hungh diex nyei za'eix oix hnangv naaiv. Ninh oix zorqv meih nyei dorn zoux baeng. Maaih deix ninh oix paaiv zaangv ninh nyei mborqv jaax nyei maaz-cie, maaih deix paaiv zoux geh maaz baeng, maaih deix paaiv tiux mingh ndaangc mborqv jaax nyei maaz-cie. 12Maaih deix ninh oix paaiv zoux yietc cin dauh baeng nyei bieiv, maaih deix zoux hmz ziepc dauh nyei bieiv. Maaih deix oix zuqc tengx ninh laih ndau, maaih deix tengx ninh siou gaeng-zuangx, maaih deix tengx ninh daav mborqv jaax nyei wuoqc ginc, maaih deix zoux maaz-cie nyei jaa-sic. 13Ninh oix zorqv meih mbuo nyei sieqv tengx ninh zoux youh ndaang, zouv lai-hnaangx, zoux njuov. 14Ninh oix zorqv meih mbuo gauh longx jiex nyei lingh deic caux a'ngunc huingx caux ga'lanv huingx jiu bun ninh nyei jien. 15Ninh oix zorqv meih mbuo nyei mbiauh caux a'ngunc biouv ziepc gouv nyei yietc gouv bun ninh nyei jien caux bou. 16Ninh oix zorqv meih mbuo nyei m'jangc bou m'sieqv bou caux gauh longx jiex nyei mienh lunx mienh#8:16 Hipv^lu waac gorngv mienh lunx mienh. Gikc waac gorngv ngongh. caux lorh tengx ninh zoux gong. 17Ninh oix zorqv meih mbuo nyei ba'gi yungh caux yungh guanh ziepc gouv nyei yietc gouv. Meih mbuo yaac zuqc zoux ninh nyei nouh. 18Taux wuov hnoi meih mbuo oix laaix meih mbuo ganh ginv daaih nyei hungh diex zuqc kouv, heuc jienv tov Ziouv, mv baac wuov hnoi ninh maiv dau meih mbuo.”

19Mv baac baeqc fingx maiv kangv muangx Saa^mu^en gorngv nyei waac. Ninh mbuo ngaengc jienv gorngv, “Maiv zeiz! Yie mbuo ndongc haaix zungv oix longc dauh hungh gunv yie mbuo, 20weic bun yie mbuo hnangv norm-norm guoqv nyei mienh maaih hungh diex gunv, yaac dorh yie mbuo cuotv mingh mborqv jaax.”

21Saa^mu^en haiz baeqc fingx gorngv nyei yietc zungv waac ninh ziouc dorh naaiv deix waac mingh mbuox Ziouv. 22Ziouv gorngv mbuox Saa^mu^en, “Gunv muangx ninh mbuo aengx liepc dauh hungh diex bun ninh mbuo.”

Saa^mu^en ziouc mbuox I^saa^laa^en nyei zuangx mienh, “Gorqv-mienh gunv nzuonx gorqv-mienh nyei buonv-mungv aqv.”

Currently Selected:

1 Saa^mu^en 8: IuMiNR

Highlight

Copy