kovb zob 15

kovb zob Zauj myenb koj yem ye-lu-saa-lem Kxi wig

1maaib teij myenb yem yu-Dia scvq mivb Tauj an-Ti-okg zivb Faauj syenj ye-su Eei kxb yrud. ninb Bua kxvq, “sij kxvq meib Bua maiq ei Jyenq mo-se Eei leid Jiaj kaatq Eei leid nx, meib Bua maiq haib tu'q Fruj.” #le-wi 12:3 2pau-lo Zauj Baa-naa-Batg Zauj ninb Bua Fiag Qa'q Rcvb vcvg lwrnj leid. Jiub paav zyrug tivg Paaiq pau-lo Zauj Baa-naa-Batg Zauj teij kxb yrud mivb ye-lu-saa-lem zivb lxd kovb zob Zauj myenb koj Bua Zaavb laavb naaiq teij sig.

3Jiub paav zyrug fuvj ninb Bua Zwrtq Jauq mivb. ninb Bua Jiaj fi-ni-sia Zauj saa-maa-lia scvq, Tauj haaij kxvq Buaj myenb Janj Navq haiq nx kxiq Hruq syenj ye-su. zwavj kxb yrud haid naaiq teij fyenj ninb Bua za'kevb a'Neiq haig. 4mivb Tauj ye-lu-saa-lem zivb uaq zang, Jiub paav myenb, kovb zob Bua, Zauj myenb koj Bua a'Neiq zipq. pau-lo Zauj Baa-naa-Batg yaag kxvq Revg Tinb huvb Navq haiq nx lovg ninb Bua zruj ninb Eei kov. 5mq paag maaib teij faa-li-sij uaq Jauq syenj ye-su Eei myenb sruq Jiad taaib kxvq, “Dovg haaij xij zu'g heug Janj Jiaj kaatq Eei leid yaag hatg ninb Bua ei Revg mo-se Eei leib latg.”

6kovb zob Zauj myenb koj yetg zuvq kapq zunq Zaavb laavb naaiq teij sig. 7ninb Bua lwrnj leid laub Eei, pi-te zyrug sruq Jiad taaib kxvq, “kxb yrud aa'b! meib Bua hiuq tu'q zinb Daavg Tinb huvb yem meib Bua ka'Euad kinq yia Zwrtq mivb zunb Kuq fyenj pun Janj mwavj yaag syenj. #kovb zob 10:1-43 8Tinb huvb hiuq tu'q maang myenb Eei Hruq yaag pun Ziv ninb a'Neiq Janj, weig zu'g ninb Zeij sivj livb pun ninb Bua Navq Zeij pun Bua nx. #kovb zob 2:4; 10:44 9yiu-Tai myenb fai Janj Tinb huvb maiq funj kanb Euvg. weig ninb Bua syenj, Tinb huvb Raauj ninb Bua Eei Hruq Zivb Revg. 10uaq Euvg, meib Bua weig haiq tiug xij seij Tinb huvb? xij zx'q Niaq Eei ka'naaiq pun naaiq teij saib kxj Eiaj, tovb Bua kanb Zauj Bua Eei ovb Taaij zuvq Eiaj maiq tovd Eei ka'naaiq. 11maiq zeid Navq naaig lx'g. Bua syenj Bua tu'q Fruj se weig zyruq ye-su Eei en Navq ninb Bua nx.”

12zwavj myenb sekg sekq Eei mwavj Baa-naa-Batg Zauj pau-lo kxvq Tinb huvb lovg ninb Bua yem Janj ka'Euad zruj Eei Javb hog Zauj Bua'g hxvb Eei sig. 13kxvq setq, yaa-kxpg cvj kxvq, “kxb yrud aag, mwavj yia kxvq og. 14si-mon Zo'q ho'g kxvq liud Tinb huvb lxd Janj taaub Rung, kinq Zwrtq teij taaib zruj ninb Eei myenb. 15naaiq za'kevb txij zu'g trug waag myenb Eei waag Navq fiaq Jyenq kxvq nx,

16‘Ga'haaq yia xij Rwrnj taaib,

xij lyepg Jiad Daa-witq Eei pyaub Baav,

cvj lovg lob pyauq Eei ka'naaiq kanb syavb Zeij Jiad. #15:16 eij leid se peiq Daa-witq Eei trub zov. #aa-motq 9:11-12

17Navq naaig se weig pun Eiag Eei myenb xij taaib lxd zyruq,

tovb yia heug taaib zruj yia Eei myenb uaq teij maang fivj Janj.

18lob Nxi pun myenb hiuq tu'q naaiq teij sig xij Zwrtq taaib

uaq taub zyruq kxvq naaiq teij waag.’+”

19yaa-kxpg cvj kxvq, “ziuj yia mavg, Bua maiq hxpg zu'g zruj haiq Euvg pun Win taaib lxd Tinb huvb uaq teij Janj haid a'g haig. 20mq paag Bua xij zu'g fiaq fyenj Buaj ninb Bua keg, maiq tuvq Eang ziag Jiaj miub favj zyrug maaib wij Eei ka'naaiq, #Zwrtq i-yipq 34:15-17 maiq tuvq zruj maiq lwrnj hxvg Eei sig, #le-wi 18:6-23 maiq tuvq Eang nc'g Jaav taig Eei scvb Kuq xq, yaag maiq tuvq Eang Ryaamq. #le-wi 17:10-14 21weig zu'g lob Nxi Tauj ib zang yem nxmb nxm zivb maaib myenb zunb mo-se Eei leid. nxmb nxm tivb kov Nxi maaib myenb yem wig txvb to'g ninb Eei leib latg sru.”

kovb zob Zauj myenb koj fiaq fyenj pun syenj ye-su Eei Janj

22uaq zang kovb zob Zauj myenb koj Zauj zwavj Jiub paav myenb Zaavb laavb hxpg kinq teij myenb Paaiq kan pau-lo Zauj Baa-naa-Batg mivb an-Ti-okg zivb. ninb Bua kinq Eei myenb maaib laanb heug yu-Daatg, cvj maaib nxm Buaj heug Baa-sapq-Baatg. maaib laanb heug si-laa. naaiq teij i laanb yem kxb yrud Bu'Dovj zruj pyeiq zeiq Eei myenb. 23kovb zob Zauj myenb koj zyrug fiaq fyenj pun ninb Bua txb Jyenq mivb. fyenj kxvq,

“Zyen xij Eei yem an-Ti-okg zivb, si-lia teig Zauj si-li-sia scvq kanb fivj Eei zwavj kxb yrud aag,

yia Bua kovb zob Zauj myenb koj, meib Bua Eei kxb yrud, fiaq fyenj pun meib Bua.

yia Bua Javj Tauj meib Bua.

24yia Bua haid myenb kxvq maaib teij yem yia Bua naaiq Eei myenb mivb meib Bua naaig zunb tod Zo'q meib Bua Eei Hruq lung Revg. mq paag maiq zeid yia Bua Paaiq ninb Bua mivb og. 25yia Bua zyrug tovb Hruq kinq teij myenb taaib Paaiq ninb Bua mivb meib Bua naaig Zauj Jyenq yia Bua Namq Eei txig, Baa-naa-Batg Zauj pau-lo. 26naaiq teij i laanb weig zyruq ye-su ki-tug Eei Buaj maiq funj mcvg Eei zruj. 27Navq naaig, yia Bua Paaiq yu-Daatg Zauj si-laa mivb Zauj meib Bua txij Myen kxvq mevb naaiq zeiq fyenj Eei sig. 28sivj livb Zauj yia Bua fib Navq Eei maiq xij Tipq haiq Euvg Jaa pun meib Bua Niaq, Zwrtq liud ib zang fiaq Jyenq naaiq teij Navq. 29meib Bua xij zu'g keg maiq tuvq Eang ziag Jiaj miub favj Eei ka'naaiq. maiq tuvq Eang Ryaamq, maiq tuvq Eang nc'g Jaav taig Eei scvb Kuq xq, yaag maiq tuvq zruj maiq lwrnj hxvg Eei sig. sij kxvq meib Bua keg Jyenq naaiq pua'q ka'naaiq zyrug lovj a'q.

pcvb xn Eei yem og.”

30syenj ye-su Eei kxb yrud zyrug fuvj naaiq teij myenb Zwrtq Jauq mivb an-Ti-okg zivb. Tauj uaq ninb Bua heug Jiub paav myenb kapq zunq zyrug zx'q uaq zeiq fyenj pun ninb Bua. 31to'g txv naaiq zeiq fyenj, haid fyenj xn ninb Bua Eei Hruq, taub taub zyrug a'Neiq haig a'q. 32yu-Daatg Zauj si-laa zruj trug waag myenb yaag kxvq Zamq Eei Kwinj kxb yrud Bua, xn ninb Bua Eei Hruq, Tevj ninb Bua kaub syenj tu'q henq. 33yem yetg Zaamj uaq, kxb yrud Bua zyrug fuvj ninb Bua pcvb xn Eei Zwrtq Jauq Rwrnj Tauj Paaiq ninb Bua taaib uaq teij. #15:33 maaib teij lob Nxi sru maiq maaib 15:34 uaq yemg. 34mq paag si-laa tivg Hruq yem uaq. 35pau-lo Zauj Baa-naa-Batg Zxg yem an-Ti-okg zivb. ninb Bua Zauj myenb Zamq Eei Faauj yaag zunb zyruq Eei tod.

pau-lo Zauj Baa-naa-Batg pun Gxi Jauq

36Ga'haaq Zamb Nxi teij Eei, pau-lo kxvq Buaj Baa-naa-Batg, “Bua xij zu'g Rwrnj mivb mavg kaaj, tovb Bua mivb zunb Jiaj zyruq Eei tod Eei nxmb nxm muvq uaq teij kxb yrud Navq haiq nx x'g?” 37Baa-naa-Batg yaag xij txb yo-han maa-Ko Zauj Jyenq mivb. 38mq paag pau-lo haid maiq hxpg zu'g txb, weig zu'g zinb Daavg uaq Rung, Tauj pam-fi-lia, yo-han maa-Ko kwavg ninb Bua, maiq Zauj ninb Bua zruj kov. #kovb zob 13:13 39ninb Bua i taub fiub Zovj liud, zyrug pun Gxi txig mig a'q. Baa-naa-Batg txb Jyenq maa-Ko pia'g Ravq mivb sai-patg Kxib Rru. 40mq paag pau-lo kinq si-laa Zauj ninb mivb. syenj ye-su Eei zwavj myenb zyrug zx'q ninb Bua i laanb fuvj pun zyruq ei ninb Eei en kruj. 41Zwrtq Jauq mivb, ninb Jiaj si-lia Zauj si-li-sia scvq Tevj zwavj Jiub paav kaub syenj tu'q wrnq.

Currently Selected:

kovb zob 15: IuMiNOR

Highlight

Copy