SAN MARCOS 13
13
Jesús apxeyenma yakwayam kóltegkesek tegma appagkanamap
(Mt 24.1-2; Lc 21.5-6)
1Xama axta aptepa Jesús kañe' tegma appagkanamap, aptahak axta apcháneya xama apkeltámeséyak se'e:
—¡Sẽlxekmóso, elano hana elwányam meteymog, apkeltásek nahan tegma!
2Aptahak axta apchátegmowágko Jesús se'e:
—Kélwet'ak kéxegke xa tegma apkelyawe nak, megkathánekxék sat mók meteymog xa tegma nak, apyókxoho sat kólmasésók.
Magkenatcheso yakwánxa katnehek néxa ekhem
(Mt 24.3-28; Lc 21.7-24; 17.22-24)
3Apkelmeyákxeyk axta egkexe Olivos natámen xa, payhawók axta apyetnamakxa tegma appagkanamap ma'a. Aphakmek axta Jesús ma'a néten egkexe nak. Keñe axta apkelmaxneyeyncha'a Pedro, Santiago, Juan, tén Andrés aptahakxa axta apxakko' Jesús, 4apkeltamhok axta ey'asagkohok ekhem yakwánxa katnehek xa, apkeltamhok axta anhan ey'asagkohok yakwánxa katnehek aksok magkenatcheso agweta' peya enxoho katnehek xa.
5Aptahak axta apchátegmowágko Jesús se'e: “Kólawho sat, nágkólho aksa kólyexanchesha. 6Hakte elwak sat énxet apxámokma sexneyásamákpoho ko'o. Sat etnehek apkelpeywa s'e: ‘Ko'o Mesías’, apxámok sat nahan etnehek énxet apkelyexancháseykha.
7“Kélleg'ak sat agkok kéxegke amya'a ektepa kempakhakma s'e, tén han ma'a mók apkelókxa nak, nágkólé' aksa. Cháxa yakwánxa nak katnehek xa, háwe eyke yakwánxa makham katnehek néxa ekhem ma'a. 8Hakte elnapakpok sat énxet xama yókxexma, yenmexek sat ma'a apheykha nak mók apkelókxa. Kampakhaxchek sat nahan mók apkelókxa; katyapok sat nahan ekyawheykha xóp ekyókxoho yókxexma, katyapok sat nahan meyk segakhe. Wánxa agkok, cháxa eyesextexa sekxo' kéllegeykegkoho ekmáske xa.
9“Kólleyxmakha kéxegke; hakte kólmések sat kéxegke m'a kelwese'e nak, kóltekyawha sat nahan kañe' apchakneykekxexa nak énxet'ák judíos; kólnaklók sat nahan kéxegke aphágkaxa m'a kelwese'e nak, tén han ma'a kelwese'e apkelwányam nak, ko'o eñamakxa; keñe sat kólewának kólxének kéxegke amya'a segwagkasamo teyp nápakta'awo' xa énxet'ák nak. 10Ekyókxoho yókxexma sat kóltennaha xa amya'a segwagkasamo nak teyp amonye ektemegwánxa néxa ekhem. 11Nágkatneykha aksa kélwáxok ma'a yakwánxa enxoho kóltehek kélpeywa, cham'a kélnaklawa enxoho aphágkaxa kelwese'e. Kólteme sat kélpeywa m'a apmésakxa enxoho Dios yakwayam kóltehek kélpeywa, cham'a ektaha sat kéxegke xa. Háwe sat kéxegke kélagko' ekteyapma kélpeywa. Espíritu Santo sat eyke epakmétek.#Mt 10.17-20; Lc 12.11-12. 12Yának sat etekyók apkelyáxeg énxet, keñe sat apyepmeyk yának etekyók ma'a apketchek; keñe sat kélketchek etnekxak apkelenmexma m'a apyepmeyk, ennápekxak sat nahan. 13Apyókxoho énxet sat etaknók kéxegke ko'o eñamakxa; wánxa agkok, ewagkasakpok sat eyke teyp ma'a énxet apkelenxáneykmoho nak apyennaktésamo apteme mey'áseyam ekweykmoho néxa ekhem.#Mt 10.22.
14“Kélwet'ak sat agkok kéxegke aksok ekmaso agko',#Dn 9.27; 11.31; 12.11. ekyetnakmo m'a megkóltémókxa nak keytnók —kéxegke ektahakxa enxoho kélyetseté s'e, kólya'asagkoho ektémakxa—, keñe kéxegke kélheykha nak Judea, kólmohok kólenyahagkok ma'a néten xóp elekháhéyak elyawe nak; 15keñe m'a énxet apheykha nak néten apxanák, nágkólántep aksa yakwayam kóllekwakxak aksok kélagkok; 16keñe m'a énxet'ák apkeltamheykha nak yókxexma, tásek melmeyekxak apxanák yakwayam elwakxak apkelnakta.#Lc 17.31. 17¡Ayósekak sat kelán'ák lós'awók ma'a ekhem sat, tén han ma'a kelán'ák keyetsék étchek nak! 18Kólmaxna kéxegke Dios yakwayam megkatnehek ma'a apkepsamágexal'a, 19hakte katyapok sat nenlegeykegkoho m'a ekhem sat, megkatnama axta m'a sekxo' apkeláneya axta Dios keso náxop,#Dn 12.1; Ap 7.14. megkatnekxók sat nahan cha'a. 20Apwenakteyásók agkok Dios xa ekhem nak, méko kawagkasaxchek teyp; apyakwátesawók axta eyke Dios yakwánxa katnehek eñama apkelásekhayo m'a ektaha nak énxet'ák apagkok, ektaha axta anhan apkelyéseykha.
21“Temék agkok amya'a kéláneyáxko kéxegke s'e: ‘Kóllano keso Mesías se'e’, esenhan katnehek amya'a s'e: ‘Kóllano, cháxa apha xa’, nágkóleyxho aksa. 22Hakte elwak sat énxet'ák apkeltemesásamap nak Mesías, tén han ma'a Dios appeywa apkellegaso apkelmopwána amya'a nak; elának sat nahan aksok magkenatcheso agko' nak agweta', tén han ma'a sempelakkaso nak agweta', yakwayam enxoho elyexanchesha énxet'ák, kawomhok sat nahan apkelyexancháseykha m'a ektaha nak Dios apkelyéseykha, apkepwagkexa enxoho. 23¡Kólawho kéxegke xa! Ekpenchásók seltennasa kéxegke seyésa xa, amonye ekteme.
Ektaha nak Apketche énxet apkexyeyam
(Mt 24.29-35,42,44; Lc 21.25-36)
24“Yeyk'ak sat agkok xa ekhem nenlegeykegkoho nak, kapeysemekxak sat ekhem,#Is 13.10; Jl 2.10,31; 3.15; Ap 6.12. kamaskok sat nahan apkelsasáxma m'a pelten,#Is 13.10; Ez 32.7; Jl 2.10; 3.15. 25epallenták sat yaw'a apkeleñama néten,#Is 34.14; Ap 6.13. kalyawheykha sat ekyókxoho aksok eleñama nak néten.#Jl 2.10. 26Keñe sat kólwetak ektaha nak Apketche énxet éxyok neyseksa yaphopé#Dn 7.13; Ap 1.7. yetlo ekyawe apmopwána tén han apcheymákpoho. 27Eláphaksek sat apkelásenneykha yakwayam yánchásekxak ma'a ektaha nak apkelyéseykha apkeleñama ekyókxoho yókxexma: nexcheyha, nepyeyam, ekteyapmakxa ekhem, tén han ektaxnegwánxa ekhem, epayhekxak sat ekyókxoho yókxexma.
28“Kólya'asagkoho kéxegke ektémakxa nak senxekmóso yámet ekwesey nak higo: keltásek agkok naw'ék aktegák yámet ekwesey nak higo, keñe katyapok áwa', keñe kólya'asagkohok kéxegke eyágketwokmo m'a ekméxanmakxal'a. 29Ekhawo nahan ektémakxa kélwet'a sat kéxegke ektaha xa, kólya'ásegwomho sat eyágketwokmo apweyktamxa m'a aptaha nak Apketche énxet. 30Katnehek sat xa amonye apkeletsapma énxet'ák apheyncha'a nak se'e kaxwo' nak. Nakso' xa sektahakxa nak seláneya kéxegke. 31Kamaskok sat néten, kamaskok sat nahan keso náxop, wánxa agkok, megkamassegwomek eyke ko'o sekpeywa.
32“Méko ekya'ásegkoho ekwánxa ekhem tén han ekwánxa hora, melya'ásegkok nahan ma'a Dios apkelásenneykha apheykencha'a nak néten, mey'ásegkok nahan ma'a Dios Apketche. Wánxa apya'ásegkoho m'a Apyap.#Mt 24.36.
33“Kólleyxmakha, nágkólnakténho aksa, hakte megkólya'ásegkok kéxegke yakwánxa katnehek xa. 34Máxa énxet keto' apmaheykegkaxa mók apkelókxa xa, apkeltémo axta etakmelchesesek apxagkok ma'a apkeláneykha. Mók aptamheykha axta apmeyásak pók, apkeltamhok axta anhan eleyxmakha m'a ektaha axta aptakmelcheso átog.#Lc 12.36-38. 35Nágkólnakténho aksa kéxegke, hakte megkólya'ásegkok ekwánxa ekhem ewatak ma'a ektaha nak apagkok xa tegma nak, taxnakmoho katnehek ewata', axta'a éseksok esenhan, esenhan ma'a ekpáwá enxoho tat'a, axto'o esenhan; 36katlakkasek katnehek ewata', keñe eteyágwatak kélnaktenakxa kéxegke. 37Cháxa sektahakxa nak seláneya kéxegke, ektemék nahan seláneya apyókxoho énxet: ¡Nágkólnakténho aksa!”
Currently Selected:
SAN MARCOS 13: LEGN
Highlight
Share
Copy

Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.