Maliko 4

Ɨkɨhwananitso kya ndahambeju

(Mataayo 13:1-9; Luuka 8:4-8)

1Ʉnsɨkɨ ʉgʉnge ʉYɨɨsʉ akatengʉla ikange ʉkʉmanyiisa kʉ lʉkanzimbale kʉ nyanza jya Galilaya. Ɨkɨpʉga ɨkɨvaha kya vaanu kɨkiitsa nʉ kʉlʉndamana ʉpwʉ aale ʉYɨɨsʉ, pwʉ ʉmwene akatoga mu waato nʉ kʉtaama ʉmwa. 2Alɨkʉmanyiisa isiinu syongosu mu sihwananitso. Mu lʉmanyiiso lwa mwene alɨkʉta, 3“Pʉlɨhɨtsi ɨkulongwi ɨjɨ! Ʉndahambeju mpamato akabɨha kwilaha ɨmbeju mu kɨlɨmɨla. 4Wʉ ilaha ɨmbeju, ninie jɨkagwa mu nzɨla, isidege sikiitsa, sikahola, sikamala. 5Ɨmbeju ɨjyɨnge jɨkagwa pa mmanga ʉgwale pakyanya pa lʉnalaawe, ʉmmanga gwale inʼdebe, ɨjyo jɨkamela ngʼaningʼaani. 6Wʉ ɨlitsʉva lɨtogile, ɨmipɨɨni gya mbeju gɨkapya nʉ kwʉma, ʉlwakʉva ɨmilela gya mipɨɨni ɨgyo gyale misupi. 7Ɨjyɨnge jɨkagwa pa mitwinyo. Ɨmitwinyo ɨgyo gɨkahologotetsa ɨmipɨɨni ɨgya mbeju, najyene jɨkalemwa ʉkʉvɨɨka iseke. 8Ɨmbeju ɨjyɨnge jɨkagwa pa mmanga ʉnnonu, jɨkamela nʉ kʉkʉla vʉnonu. Jɨkahʉʉpa siitso, ɨjyɨnge iseke isitsigo sidatu (30), ɨjyɨnge isitsigo ntanato (60), ɨjyɨnge jɨkasikila kʉ ndeevʉlʉ mpamato (100).” 9Pwʉ ʉYɨɨsʉ akavavʉʉla akata, “Ʉvɨ ipʉlɨka, vɨ apʉlɨkage nʉ kʉtsingahɨtsa itso!”

ɄYɨɨsʉ iganula ʉvʉsumbe wa sihwananitso

(Mataayo 13:10-17; Luuka 8:9-10)

10ɄYɨɨsʉ wʉ ɨjyekye, avakongi va mwene kɨtsigo na vavɨlɨ (12) paninie na vakongi avange, vakambʉʉtsa vakata, “Isihwananitso isyo kwʉ kʉta kɨki?” 11Namwene akavavʉʉla akata, “Ʉnyie, ʉNgʉlʉve avapye ʉkʉtsimanya tsilya itsilɨ kʉvʉtiitu itsa Lʉdeeva lwa mwene. Lɨno, valya avalɨ kʉnzi ndikʉvamanyiisa ɨkɨveetsaga kʉ sihwananitso, 12pakʉta tsivombeke ndʉwʉ amamenyu ga Ngʉlʉve giita,

‘Jɨlweli ʉkʉlola vilolaga,

lɨno navakatʉgage.

Ʉkʉpʉlɨka vipʉlɨkaga,

lɨno navakatsimanyage,

vagela vikwandʉka ʉkʉhʉma kʉ mbiivi tsa veene nʉ kʉsyɨkɨliwa.’#Yesaya 6:9-10”

ɄYɨɨsʉ ilʉvʉla ɨkɨhwananitso ɨkya ndahambeju

(Mataayo 13:18-23; Luuka 8:11-15)

13Pwʉ ʉYɨɨsʉ akavavʉʉtsa akata, “Mungave mulemilwe ʉkʉkɨmanya ɨkɨhwananitso ɨkɨ, jʉmukʉsimanya ndeeti isihwananitso isinge syoni? 14Lola, ʉmuunu ʉvɨ ivyala, vɨ ʉlya ʉmuunu ʉvɨ ilʉmbɨlɨla ɨlimenyu lya Lʉdeeva lwa Ngʉlʉve. 15Avaanu avange viiva ndi mbeju itsigue mu nzɨla. Wʉ vapʉliike ɨlimenyu ɨlyo, ikwitsa ʉSetano ngʼaningʼaani, ikʉlɨhetsa mu numbula tsa veene. 16Avaanu avange vahwaniine ni mbeju itsivyalilwe pa lʉnalaawe. Wʉ vikʉlɨpʉlɨka ɨlimenyu ɨlyo, ʉnsɨkɨ ʉgwa vikʉlyʉpɨlɨla nʉ lʉhekelo. 17Aveene avo vikwibata ɨlimenyu kʉ nsɨkɨ ʉnsupi, vahwaniine nɨ mipɨɨni ɨgɨtsila milela. Wʉ vukwitsa ʉvʉkʉvɨlwa kʉ nongwa jya limenyu lya Lʉdeeva lwa Ngʉlʉve, pwʉ vitengejʉka. 18Avaanu avange viiva ndi mbeju itsigue mu mitwinyo. Nʉpwʉ vangave vʉpɨlye ɨlimenyu, 19imbombo tsa kɨlʉnga ɨkɨ, ʉvʉsyovi wa kyʉma nʉ vʉnogwe wa siinu isilɨ pongosu sivɨɨka ɨlimenyu lɨleke ʉkʉhʉʉpa iseke. 20Avaanu avange vahwaniine ni mbeju itsivyalilwe pa mmanga ʉnnonu. Avo wʉ vaanu avipʉlɨhɨtsa ɨlimenyu, vikʉlyʉpɨlɨla vʉnonu nʉ kʉhʉʉpa siitso, ʉjyʉnge iseke isitsigo sidatu (30), ʉjyʉnge isitsigo ntanato (60), ʉjyʉnge tsisikila kʉ ndeevʉlʉ mpamato (100).”

Ɨkɨhwananitso kya nyaale ɨnya lʉmuli

(Luuka 8:16-18)

21ɄYɨɨsʉ akatsova ikange nʉ lʉlʉndamano lwa vaanu, akata, “Mwivona ndeeti, ɨnyaale ɨjiviika jɨngiitse nda jigubikilwa nɨ kɨtʉndʉ, pange jivɨɨkwa mwisungu? Ndeeti, najivɨɨkwa pakyanya pa kɨdʉlɨkɨlo kya nyaale? 22Ɨkɨɨnu ɨkɨveetsaga ɨkɨsihamiike lɨno kɨlaava pavʉvalasu, nakyene ɨkɨlɨ kʉvʉtiitu kɨlaava pavʉvalasu. 23Ʉmuunu ʉvɨ ipʉlɨka, vɨ apʉlɨkage nʉ kʉtsingahɨtsa itso!” 24Ikange akavavʉʉla akata, “Ɨkɨgelelo ɨkyʉ mukʉvagelela avange, kɨɨkyo kyʉ ʉNgʉlʉve alavagelela najyʉnyie, nʉ kʉvoongeletsa siitso, 25manya ʉvɨ itsingahɨtsa imanyiiso tsyango, jiikwongeletsiwa ʉvʉmanyi. Namwene ʉvɨ nitsingahɨtsa, navʉvʉmanyi ʉvʉdebe ʉwʉ alɨ nawo, naweene ʉwa alapokwa.”

Ɨkɨhwananitso kya mbeju ɨjimela

26ɄYɨɨsʉ akoongeletsa ʉkʉtsova akata, “ɄLʉdeeva lwa Ngʉlʉve lʉlɨ ndɨ kɨhwananitso ɨkɨ: Ɨkɨgono kɨpamato, ʉmuunu aavyalile ɨmbeju mu kɨlɨmɨla. 27Ʉmuunu ʉjwa alɨkʉgona pakɨlo nʉ kʉhega pamuunyi, najyene ɨmbeju jɨkamela nʉ kʉkʉla kɨtsila ʉmwene kʉlʉmanya ʉmwʉ tsivombekye. 28Ʉmmanga gʉgwene gukʉjɨpelela ɨmbeju ʉkʉmela nʉ kʉhola iseke. Pa kʉtala jivɨɨka amaani amadeke, pwʉ jikwitsa jivɨɨka isootso, kʉ vʉmalɨlo jivɨɨka ɨngano mu nʼgati mu lʉsootso. 29Ɨngano jɨngasike, ʉmuunu ʉjwa pwitoola ʉmmaage nʉ kʉbɨha kwibena, pakʉva ʉnsɨkɨ gwa kʉbena gʉsiike.”

Ɨkɨhwananitso kya mbeju ɨjya libɨkɨ ndɨ lilongoti

(Mataayo 13:31-32, 34; Luuka 13:18-19)

30Kange ʉYɨɨsʉ akatsova akata, “Tʉhwananie nɨ kɨki ʉLʉdeeva lwa Ngʉlʉve? Tʉlʉtsove kʉ kɨhwananitso kɨki? 31Lʉhwaniine ndɨ mbeju ɨjya libɨkɨ ɨlilongoti,#4:31 Mbeju ɨjya libɨkɨ ɨlilongoti Mu Kɨyunaani lɨvɨgilwe mbeju jya haladali. Ɨmbeju ɨjɨ jyʉ jyamanyikiike na Vayahudi ʉkʉta jyʉ mbeju ɨndebe siitso kʉ mbeju tsyoni. Kwawe ɨmbeju ɨjɨ jɨhwaniine nɨ mbeju jya lilongoti. ɨmbeju ɨndebe kʉ mbeju tsyoni. 32Wʉ jɨvyalilwe, jimela nʉ kʉkʉla nʉ kʉva libɨkɨ livaha ʉkʉlʉtɨɨlɨla gooni mu kɨlɨmɨla. Isamba tsa lyene tsiiva mbaha nasyene isidege sitsenga ʉwaaswa mu ntsitsimila gwa libɨkɨ ɨlyo.”

33ɄYɨɨsʉ alɨkʉvamanyiisa ɨlimenyu lya Lʉdeeva lwa Ngʉlʉve kʉ nzɨla jya sihwananitso syongosu ndiisi. Alɨkʉvamanyiisa ʉkʉkongana nɨ kɨgelelo kya veene kya kʉtsimanya itsʉ aamanyiisaaga. 34Aatsovaga navo tsyoni kʉ nzɨla jya sihwananitso. Kʉmbele, wʉ ɨjyekye na vakongi va mwene, alɨkʉganula ʉvʉsumbe wa sihwananitso isyo.

ɄYɨɨsʉ ikʉgʉvʉʉla ʉmbelo gʉlitame

(Mataayo 8:23-27; Luuka 8:22-25)

35Ɨkɨgono kɨɨkyo kʉmihe, ʉYɨɨsʉ akavavʉʉla avakongi va mwene akata, “Tʉlovokele ɨmwambo ɨjyɨnge ɨjya nyanza.” 36Vakalʉleka ʉlʉlʉndamano lwa vaanu nʉ kwingila mu waato vʉʉvʉlya ʉmwʉ aale ʉYɨɨsʉ, vakahega. Ʉwaato ʉvʉnge vʉninie ʉwaalepwo vʉkavakonga. 37Wʉ valɨ pagati pa nyanza, gʉkahʉmɨla ʉnkuluguuto ʉmbaha. Ʉmbelo gʉkatengʉla ʉkwɨtovetsa mu waato na magasi gakatengʉla ʉkʉdɨga mu waato ʉwa. 38ɄYɨɨsʉ aale kʉnsana mu waato, aagoneelye kʉnʉ ɨhagwe ʉntwe gwa mwene pa kyegamilo. Avakongi va mwene vakansisimula vakata, “Gwe Mmanyisi, navukʉtʉkolela ɨkɨsa ʉkʉta tʉlɨ pa kʉswa?” 39Lola, akasisimuka, akagʉtanila ʉnkuluguuto nʉ mbelo, akata, “Litama! Nuunala!” Ʉnkuluguuto nʉ mbelo sikɨɨma, ɨnyanza jɨkalitama, kʉkava mye! 40Pwʉ ʉYɨɨsʉ akatsova na vakongi va mwene akata, “Kɨki mulɨ vadwatsi? Mupitsiige mutsila lwɨdɨko!” 41Baaho ʉlʉtende lʉkaviibata siitso, vakatengʉla ʉkʉvʉʉtsania vakata, “Ʉjʉ vɨ veeni? Nagwene ʉnkuluguuto nʉ mbelo sikʉmpʉlɨka!”

Currently Selected:

Maliko 4: zga

Highlight

Copy