Mataayo 5
5
Imanyiiso tsa Yɨɨsʉ kʉ kɨdugala
Avaanu avagatalʉsu
(Luuka 6:20-23)
1Wʉ ʉYɨɨsʉ alɨweene ɨlipʉga ɨlyo ɨlya vaanu, akatoga navo kʉ kɨdugala, akataama. Wʉ ataamile, avakongi va mwene vakiitsa kʉ mwene, 2ʉYɨɨsʉ akatengʉla ʉkʉvamanyiisa akata,
3“Vagatalʉsu ʉwʉ vɨmanyile ʉkʉta vagatsu mu numbula,#5:3 Vagatsu mu numbula kwʉ kʉta avaanu ʉwʉ valʉmanyile ʉkʉta vikʉndonda ʉNgʉlʉve mu wʉʉmi wa veene.
manya ʉLʉdeeva lwa Kʉkyanya lwa veene.
4Vagatalʉsu ʉwʉ valɨ nʉ lʉsʉsʉvalo,
manya ʉNgʉlʉve alavatseesa.
5Vagatalʉsu ʉwʉ vadeke,
manya ʉNgʉlʉve alavapa ɨkɨlʉnga kyoni.
6Vagatalʉsu ʉwʉ valɨ nɨ nzala nɨ kyʉmɨlwa kya kʉvomba itsa vʉgolosu,#5:6 Valɨ nɨ nzala nɨ kyʉmɨlwa kwʉ kʉta ʉkʉnnogwa ʉNgʉlʉve kʉ maka gooni, kʉ numbula jyoni na kʉ lʉhala lwoni ʉkʉlʉtɨɨlɨla isiinu syoni.
manya ʉNgʉlʉve alaviigusa.
7Vagatalʉsu ʉwʉ vikʉvakolela ɨkɨsa avange,
manya ʉNgʉlʉve alavakolela ɨkɨsa naveene.
8Vagatalʉsu ʉwʉ valɨ nɨ numbula mbalasu,#5:8 Numbula mbalasu Ava vaanu avanʼganile lweli ʉNgʉlʉve. Mu wʉʉmi wa veene vilonda viitse viingile mu Lʉdeeva lwa Ngʉlʉve. Kwʉ kʉta navitʉngʉtsiima nʉ vʉnogwe ʉvʉviivi wa mmana pange ʉkʉva nɨ mingʉlʉve ɨgɨnge.
manya valambona ʉNgʉlʉve.
9Vagatalʉsu ʉwʉ visajania avaanu,
manya ʉNgʉlʉve alavavɨɨka vave vaana va mwene.
10Vagatalʉsu ʉwʉ vikʉvɨlwa kʉ nongwa jya kʉvomba itsa vʉgolosu,
manya ʉLʉdeeva lwa Kʉkyanya lwa veene.
11“Mulɨ vagatalʉsu ʉnyie ɨngave avaanu vikʉvadʉka, vikʉvapelela ʉvʉkʉvɨlwa nʉ kʉvanwangʼila ʉvʉviivi ʉvʉlɨ pongosu kʉ nongwa jyane. 12Hekelagi nʉ kʉhovoka, manya ʉNgʉlʉve avavɨɨkye ʉlʉhombo ʉlʉlʉti kʉkyanya, ʉlwakʉva vʉle vʉle wʉ vaavavombye avanyamalago ʉwʉ vaalongwe pavʉlongolo paanyie.
Ʉmwinyo nʉ lʉmuli
(Maliko 9:50; Luuka 14:34-35)
13“Ʉnyie mulɨ mwinyo gwa kɨlʉnga. Lɨno gʉngave gʉnangiike, ndeeti, kʉlɨ kɨɨnu ɨkiweesa ʉkʉkilivula ikange ʉlʉnogo lwa gwene? Apo jisiita ʉkʉva nʉ lʉnogo ikange. Ʉmwinyo ʉgwa gwiva gwa kʉtaagwa kʉnzi, gʉkadwagwe na vaanu.
14“Ʉnyie mulɨ lʉmuli lwa kɨlʉnga. Ʉvʉtsenge ʉvʉtsengilwe pakyanya pa kɨdugala, navuweesa ʉkʉsihama. 15Ikange, avaanu navipamba ɨnyaale nʉ kʉgubikila nɨ kɨtʉndʉ, apeene vikʉjɨvɨɨka pakyanya pa kɨdʉlɨkɨlo kya nyaale pakʉta ɨvamulikilage avaanu vooni ʉwʉ valɨ mu nyumba. 16Vʉvʉle vʉle nalʉ lʉmuli lwinyo lʉnogye lumulikage kʉ vaanu pakʉta vave vikʉtsivona imbombo tsiinyo inonu, vanʼginiage ʉDadajiinyo ʉvɨ alɨ kʉkyanya.
Imanyiiso tsa Yɨɨsʉ ʉkʉkongana ni ndagɨlo tsa Moose
17“Muleke ʉkʉsaaga ʉkʉta nditsile kwita ndɨhetse indagɨlo tsa Moose, evo ʉgwʉ gatsowaagwa na vanyamalago. Baako, nanditsili kwita ndɨhetse, apeene kuvɨɨka tsivombeke itso tsyoni itsitsovilwe. 18Tsa jɨlweli, ndikʉvavʉʉla ʉkʉta ʉkʉsikila ʉnsɨkɨ ʉpwʉ ʉvʉtandaatse nɨ kɨlʉnga silahega, navʉkʉli ʉvʉvɨge nʉvʉpamato ʉvʉdebe ʉwa ndagɨlo pange ɨsopelo ɨndebe mamato ɨjɨlahega ʉkʉsika ʉpwʉ tsyoni tsilavombeka. 19Ʉmuunu ʉvaveetsaga ʉvɨ ibeda ʉlʉlagɨlo lʉpamato mu ndagɨlo itso ndalʉve lʉdebe, iita ʉkʉvamanyiisa avange ʉkʉta naveene vatsibede, ʉjwa vɨ mwene alatsowa ʉkʉta vɨ nʼdebe mu Lʉdeeva lwa Kʉkyanya. Apeene ʉmuunu ʉvaveetsaga ʉvɨ ikʉtsikonga nʉ kʉvamanyiisa avange ʉkʉta naveene vavombage ewo, ʉjwa vɨ mwene alatsowa ʉkʉta vɨ mbaha mu Lʉdeeva lwa Kʉkyanya. 20Ndikʉvavʉʉla ʉkʉta ɨngave ʉvʉgolosu wiinyo navulʉtɨɨlɨla ʉvʉgolosu wa Vafalisayo nʉ wa vamanyisi va ndagɨlo, namuliingile lʉsiku mu Lʉdeeva lwa Kʉkyanya.
Imanyiiso tsa kulongwi tsa lʉviipo
(Luuka 12:57-59)
21“Mupʉliike ʉkʉta avaanu va katale vaavʉʉlilwe ʉkʉta, ‘Ʉlabudaga,’#Kʉhʉma 20:13 nʉ kʉta ‘ʉmuunu ʉvaveetsaga ʉvɨ ibuda, anogye ahɨgwe.’ 22Lɨno ʉne ndikʉvavʉʉla ʉkʉta ʉmuunu ʉvaveetsaga ʉvɨ ikʉmbiipila ʉlʉkololwe, anogye ʉkʉhɨgwa. Ikange, ʉmuunu ʉvaveetsaga ʉvɨ ikʉnʼdʉka ʉlʉkololwe iita intsimu, anogye ahɨgwe pa lʉlʉndamano. Ikange, ʉmuunu ʉvaveetsaga ʉvɨ ikʉnʼdʉka ʉlʉkololwe iita mpelwa, anogye ʉkʉtaagwa mu mwoto gwa sikutsooni!#5:22 Mwoto gwa sikutsooni kwʉ kʉta apoonu pa vʉpala wa sikutsooni, apakʉtaagwa avaanu ʉwʉ vikʉmʼbeela ʉYɨɨsʉ ni manyiiso tsa mwene.
23“Lola, ʉngave ʉlɨ pa kʉhʉmya isyavʉpe pa kɨteekelelo, lɨno vukʉmbʉhɨtsa ʉkʉta ʉlʉkololwo alɨ nʉ lʉviipo nʉʉve, 24sileke taasi isyavʉpe isyo pa kɨteekelelo, bɨha ʉkasajane taasi nʉ lʉkololwo ʉlya. Pwʉ wiitse kuhʉmya isyavʉpe syako isyo.
25“Ikange, angave ʉndʉgʉ vaako ibɨha kukʉkʉhɨlɨka kʉ mmɨgi, ngʼaningʼaani ʉnʼdoove pakʉta musajane wʉ mulɨ mu nzɨla. Ʉngaleke ʉkʉvomba ewo, ʉmuunu ʉjwa ikʉkʉvɨɨka mu sivoko sya mmɨgi. Pwʉ ʉmwene ikʉkʉtaaga mu kɨkʉngwa. 26Tsa jɨlweli, ndikʉkʉvʉʉla ʉkʉta nʉkahʉme mu nʼgati ʉmwa ʉkʉsikila ʉpwʉ wimala ʉkʉhomba ʉntsigilo gwoni!
Imanyiiso tsa kulongwi tsa vʉligu
27“Mupʉliike ʉlʉlagɨlo ʉlwita, ‘Ʉlaligupaga.’#Kʉhʉma 20:14 28Lɨno ʉne ndikʉvavʉʉla ndiita ʉmuunu ʉvaveetsaga ʉvɨ ikʉndola ʉnʼdala kʉ vʉpʉmu wa vʉligu, iveetsaga amalile ʉkʉligupa nave mu numbula jya mwene. 29Lɨno ɨngave ɨliiho lyako lya kʉndyo likʉkʉpelela ʉvombe imbiivi, lyomokole nʉ kʉlɨtaaga, manya lʉnonu ʉkʉjatsa kɨpamato mu sipagɨka sya mmana gwako, ʉkʉlʉtɨɨlɨla nʉ kʉtsitaagwa kʉ mwoto gwa sikutsooni ʉmmana gwako gwoni. 30Ikange, ɨngave ɨkɨvoko kyako kya kʉndyo#5:30 Ʉkʉkongana ni nyiiho tsa Vayahudi, ɨliiho nɨ kɨvoko kya kʉndyo syʉ syene silɨ nyango ʉkʉtula imbiivi nʉ kʉlɨlongotsa ɨliiho nɨ kɨvoko kya kʉngʼɨgɨ. Ʉvʉganulu ʉvʉnge kwʉ kʉta kʉ Vayahudi, ɨkɨɨnu ɨkɨveetsaga ɨkyʉ kɨlɨ kʉ lʉvasu lwa kʉndyo, kikwɨmɨkiwa siitso ʉkʉlʉtɨɨlɨla ɨkyʉ kɨlɨ kʉ lʉvasu lwa kʉngʼɨgɨ. kikʉkʉpelela ʉvombe imbiivi, dumula nʉ kʉtaaga, manya lʉnonu ʉkʉjatsa kɨpamato mu sipagɨka sya mmana gwako, ʉkʉlʉtɨɨlɨla nʉ kʉtsitaagwa kʉ mwoto gwa sikutsooni ʉmmana gwako gwoni.
Imanyiiso tsa kulongwi tsa kʉndeka ʉnʼdala
(Mataayo 19:9; Maliko 10:11-12; Luuka 16:18)
31“Ikange, mupʉliike ʉlʉlagɨlo ʉlwita, ‘Ʉmuunu ʉvaveetsaga ʉvɨ ikʉndeka ʉnʼdala, ampeetsage ɨkalata ɨjya kʉndeka.’#Simiilitso tsa Ndagɨlo 24:1 32Lɨno ʉne ndikʉvavʉʉla ʉkʉta ʉmuunu ʉvaveetsaga ʉvɨ ikʉndeka ʉnʼdala, ʉvɨ navombili ʉvʉligu, ikʉmpela ʉnʼdala va mwene ave ndigu. Ikange, najyʉ muunu ʉvaveetsaga ʉvɨ itegʉla ʉnʼdala ʉvɨ alekilwe nʉ nʼgoosi, pwʉ namwene iligupa.
Imanyiiso tsa kulongwi tsa kwɨjyɨga
33“Mupʉliike ʉkʉta avaanu va katale vaavʉʉlilwe ʉkʉta, ‘Mungave mukɨjyɨga pamiiho ga Ntwa ʉNgʉlʉve, mulagelaga ʉkʉnanga ikange. Apeene muvombage ndʉwʉ mukɨjyɨgile.’ 34Lɨno ʉne ndikʉvavʉʉla ndiita mulɨjyɨgaga lʉsiku, pange kwɨjyɨgɨla kʉkyanya, manya ɨkyo kyʉ kɨtaamilo kya Ngʉlʉve,#5:34 Pange kwɨjyɨgɨla kʉkyanya, manya ɨkyo kyʉ kɨtaamilo kya Ngʉlʉve kwʉ kʉta ʉNgʉlʉve vɨ mwene Nkʉlʉdeeva nakʉ kʉkyanya. 35evo mulɨjyɨgɨlaga kʉ kɨlʉnga, manya pwʉ peene ʉNgʉlʉve ivɨɨka isilʉnde sya mwene.#5:35 Mulɨjyɨgɨlaga kʉ kɨlʉnga, manya pwʉ peene ʉNgʉlʉve ivɨɨka isilʉnde sya mwene kwʉ kʉta ʉNgʉlʉve vɨ mwene ʉvilongotsa ɨkɨlʉnga. Pwʉ ʉkwɨjyɨgɨla kʉ kʉkyanya evo kʉ kɨlʉnga kwʉ kʉta vukɨjyɨga kwa Ngʉlʉve. Pange mulɨjyɨgɨlaga kʉ vʉtsenge ʉwa Yelusalemu, manya wʉ vʉtsenge wa Nkʉlʉdeeva ʉNdʉti. 36Ikange, mulɨjyɨgɨlaga kʉ mitwe giinyo, manya namuweesa ʉkʉhambʉla nalʉ lʉjwɨlɨ lʉpamato lwa nzwɨlɨ tsiinyo lʉve lʉvalasu evo lʉtiitu. 37Mungave mukwɨdɨka ɨkɨɨnu muteetsage eena, evo mungave mubeela ɨkɨɨnu muteetsage baako, manya gooni ʉgwʉ gilʉtɨɨlɨla paago, gihʉma kʉ ntavangwa ʉlya.
Imanyiiso tsa kulongwi tsa kʉlʉmbɨla
(Luuka 6:29-30)
38“Mupʉliike ʉlʉlagɨlo ʉlwita, ‘Ɨliiho kʉ liiho nɨ liino kʉ liino.’#Kʉhʉma 21:24; Valawi 24:20; Simiilitso tsa Ndagɨlo 19:21 39Lɨno ʉne ndikʉvavʉʉla ʉkʉta mulekage ʉkwɨmɨlanila na vaanu avikʉvavombela imbiivi. Apeene ɨngave ʉmuunu akʉtovile ʉlʉtseetse lwa kʉndyo, inʼgalamulile nʉ lwa kʉngʼɨgɨ. 40Ikange, ɨngave ʉmuunu akʉhɨliike pa vʉhɨgi kʉ vʉsumbe wa kʉpoka ɨkanzo jyako, indeke atoole nalɨ likoti.#Kʉhʉma 22:26-27; Simiilitso tsa Ndagɨlo 24:12-13 41Ikange, ɨngave ʉmuunu akwʉmɨɨliitse ʉkʉpɨmba ʉntsigo gwa mwene ʉvʉtale wa kilomita mamato,#5:41 Ʉkʉpɨmba ʉntsigo gwa mwene ʉvʉtale wa kilomita mamato kwʉ kʉta kʉ nsɨkɨ gʉlya, avasikali va kɨlʉnga kya Looma vaale na maka siitso ga kʉmwʉmɨɨlɨtsa ʉmuunu avagegele ɨmitsigo gya veene. ʉve pɨmba ʉntsigo ʉgwa ʉvʉtale wa kilomita ivɨlɨ. 42Ikange, ɨngave ʉmuunu ikʉkʉdoova ɨkɨɨnu, impe. Ikange, ɨngave ʉmuunu inogwa ʉkʉkopa, ʉleke ʉkʉmʼbeelela.
Imanyiiso tsa kulongwi tsa kʉvagana avalʉgʉ
(Luuka 6:27-28, 32-36)
43“Mupʉliike ikange ʉlʉlagɨlo ʉlwita, ‘Ʉnʼganage ʉnnino,#Valawi 19:18 nʉ kʉnsʉʉla ʉndʉgʉ vaako.’ 44Lɨno ʉne ndikʉvavʉʉla ʉkʉta muvaganage avalʉgʉ viinyo. Ikange, muvadoovelage kwa Ngʉlʉve vooni ʉwʉ vikʉvapelela ʉvʉkʉvɨlwa. 45Apo mwiva vaana va Dadajiinyo ʉvɨ alɨ kʉkyanya, manya ʉmwene ivɨɨka ʉlʉtsʉva lʉvalage kʉ vaanu aviipa na vavejangi. Ikange, ivɨɨka ɨsula jɨtimage kʉ vagolosu nakʉ kʉ vatulanongwa. 46Mungave mukʉvagana valya veene ʉwʉ vikʉvagana ʉnyie, pwʉ veeni avasaane ʉnyie? Ndeeti, avasangʉtsi va songo naveene navikʉvagana valya veene ʉwʉ vikʉvagana aveene? 47Ikange, mungave mukʉvasaamusa avalʉkololwinyo veene mwiva muvomba kɨki ɨkya kʉlʉtɨɨlɨla? Lola, nʉ wʉ navikʉmwɨdɨka ʉNgʉlʉve naveene vivomba vʉvʉle vʉle! 48Pwʉ muveetsage vagolosu ndʉwʉ ʉDadajiinyo ʉvɨ alɨ kʉkyanya inʼgolosu.
Currently Selected:
Mataayo 5: zga
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.