Luuka 7

ɄYɨɨsʉ ikʉmponia ʉmbombi va mbaha va vasikali

(Mataayo 8:5-13)

1ɄYɨɨsʉ wʉ amalile ʉkʉvamanyiisa avaanu, akalʉta kʉ vʉtsenge wa kʉ Kapelenaumu. 2Kʉ vʉtsenge vʉlya, aalekwo ʉmbaha va vasikali va Kɨlooma. Ʉmbaha ʉjwa aale nʉ mbanda ʉvɨ aanʼganile siitso. Lɨno ʉmbanda ʉlya aale ntamu siitso, gʉkava gupʉʉga. 3Ʉmbaha ʉjwa akapʉlɨka ikulongwi tsa Yɨɨsʉ, akavasuungʼa vaninie mu vanzagɨla va Vayahudi ʉkʉta, valʉte vakanʼdoove ʉYɨɨsʉ, iitse amponie ʉmbanda va mwene. 4Avanzagɨla va Vayahudi valya wʉ vasiike kwa Yɨɨsʉ, vakansiima siitso vakata, “Ʉmuunu ʉjʉ anogye ʉmbombele ɨlyʉ ikʉkʉdoova, 5pakʉva akɨganile ɨkɨvʉmbʉkʉ kiitu. Ikange ʉjʉ, vɨ mwene ʉvatʉtsengye ɨlisinagogi liitu.”

6Pwʉ ʉYɨɨsʉ akahega na vanzagɨla va Vayahudi valya ʉkʉbɨha kʉ nyumba jya mbaha ʉlya. Wʉ vahegelye pa nyumba jɨlya, ʉmbaha ʉlya akavasuungʼa avamanyaani va mwene valʉte kwa Yɨɨsʉ vakambʉʉle vate, “Gwe Ntwa! Ʉne nandɨnogiili ʉkʉta ʉve wiingile mu nyumba jyane. 7Ɨkɨ kyʉ kɨɨnu ndɨkaweene ndɨleke ʉne ʉkwitsa kukwagana nʉʉve. Lɨno ndikʉkʉdoova, ʉtsove ɨlimenyu lyene, ʉmbanda vango, jiipona, 8manya najyʉne ndipʉlɨka ʉlʉlagɨlo lwa vavaha vango, ikange najyʉne ndɨlɨ na vasikali avipʉlɨka ʉlʉlagɨlo lwane. Ndɨngambʉʉle mpamato ndɨte, ‘Lʉtaga,’ ilʉta. Ʉjyʉnge ndɨngate, ‘Itsaga,’ ikwitsa. Najyʉ mbanda vango ndɨngambʉʉle ndɨte, ‘Vomba ndee,’ ivomba.” 9ɄYɨɨsʉ wʉ apʉliike amamenyu ago, akadega siitso. Pwʉ akakɨgalamukila ɨkɨpʉga kya vaanu ɨkyʉ kyankongaga, akata, “Ndikʉvavʉʉla ʉkʉta, namu mu Vaisilahɨli vooni, nandɨmbweni ʉmuunu ʉnya lwɨdɨko lʉvaha ndʉʉlʉ!” 10Avaanu ʉwʉ vaasuungʼilwe, wʉ vakiliwiike kʉ nyumba jya mbaha ʉlya, vakavona ʉmbanda aponile.

ɄYɨɨsʉ itsʉʉsa ʉmwana va nʼdala ʉnswɨle

11Ʉnsɨkɨ ʉnʼdebe ʉgwakongile, ʉYɨɨsʉ na vakongi va mwene, paninie nɨ kɨpʉga ɨkɨvaha kya vaanu vakalʉta kʉ vʉtsenge wa kʉ Naini. 12Wʉ alɨ pawiipi nʉ ndyango gwa vʉtsenge vʉlya, akaaganila na vaanu vihʉma mu vʉtsenge, vapɨmbile ʉnsimba gwa mwana ʉnʼdɨɨmi, mu lijeneza. Ʉmwana ʉjwa, aale lʉdɨɨga kwa vanyina ʉvɨ aale inswɨle. Avaanu vongosu ʉkʉhʉma mu vʉtsenge vʉlya vaale paninie nʉ nʼdala ʉlya.

13ɄYɨɨsʉ wʉ ambwene ʉnswɨle ʉlya, akankolela ɨkɨsa. Akambʉʉla akata, “Wɨlekelwe ʉkʉlɨla.” 14Pwʉ akahegelela pa lijeneza, akaliibata, avaanu ʉwʉ vaapɨmbile, vakɨɨma. ɄYɨɨsʉ akatsova akata, “Gwe nʼdɨɨmi ʉve! Ndikʉkʉvʉʉla, sisimuka!” 15Akasɨkɨ kaako ʉvaasue ʉlya akasisimuka, akataama, akatengʉla ʉkʉtsova. Pwʉ ʉYɨɨsʉ akampa ʉvanyina, ʉmwana ʉjwa. 16Avaanu vooni vakadwada vakatengʉla ʉkʉnʼginia ʉNgʉlʉve valɨkʉta, “Ʉnyamalago ʉmbaha, itsile kwawe! ɄNgʉlʉve itsile kukʉvatanga avaanu va mwene!” 17Ɨkulongwi jya kɨdego ɨkɨ ɨkyʉ aavombile ʉYɨɨsʉ, jɨkavaala imbasu tsyoni itsa kɨlʉnga kya Yuuda na mu silʉnga isya pawiipi.

ɄYohana ʉMwotsi isuungʼa ɨkulongwi kwa Yɨɨsʉ

(Mataayo 11:2-19)

18Avakongi va Yohana vakampangɨla ʉYohana gooni ʉgwʉ aavombaga ʉYɨɨsʉ. Pwʉ ʉYohana akavɨɨlanga vavɨlɨ mu vakongi va mwene, 19akavasuungʼa kʉ Ntwa ʉYɨɨsʉ vakambʉʉtse vate, “Ʉve nda veeve Kɨlɨsiti ʉvɨ avanyamalago vaatsovile ʉkʉta aliitsa evo tʉmpʉlɨkɨlage ʉjyʉnge?” 20Avakongi valya wʉ vasiike kwa Yɨɨsʉ vakata, “ɄYohana ʉMwotsi atʉsuungʼile kwave tʉkʉvʉʉtse ʉkʉta, ‘Ʉve nda veeve Kɨlɨsiti ʉvɨ avanyamalago vaatsovile ʉkʉta aliitsa, evo tʉmpʉlɨkɨlage ʉjyʉnge?’ ” 21Ʉnsɨkɨ gʉʉgwa ʉgwa, ʉYɨɨsʉ akaponia avatamu vongosu isitamu sya veene. Akaponia nʉ wʉ vaale ni mepo imbiivi. Ikange avabosu vongosu akavapa amaka ga kʉlola. 22Pwʉ akavaanda avakongi va Yohana valya akata, “Bɨhagi mukambʉʉle ʉYohana gooni ʉgwʉ mugaweene nʉ kʉpʉlɨka, manya avabosu vilola, avalema vigenda, avanya bʉʉba vivalatsiwa, avatsivatsi vipʉlɨka, avaswe vitsʉʉka. Ikange, avagatsu vilʉmbɨlɨlwa ɨLivangɨli.#7:22 Imbombo itsʉ ʉYɨɨsʉ itsova mu lʉkɨndɨ ʉlʉ, tsʉ tsyatsovilwe nʉ nyamalago ʉYesaya ʉkʉta alavomba ʉKɨlɨsiti (Mesiya), alaava ikwitsa (Yesaya 26:19; 29:18-19; 35:5-6; 61:1). 23Inʼgatalʉsu ʉmuunu ʉvaveetsaga ʉvɨ nikɨpɨnza nʉʉne!”

24Avakongi va Yohana wʉ vahegile, ʉYɨɨsʉ akatengʉla ʉkʉkɨvʉʉla ɨkɨpʉga kya vaanu ikulongwi tsa Yohana ʉMwotsi akata, “Ʉpwʉ mukalʉtiige kʉ lʉkɨnga, mukahʉʉvɨliige ʉkʉtsikʉmbona ʉmuunu ʉvɨ alɨ ndeeti? Mukahʉʉvɨliige ʉkʉmbona ʉmuunu ʉvɨ avyʉta ligʉgʉ ɨlyʉ lidepanika wʉ lipuulwa nɨ mepo? Ndawʉ jɨlɨwo! 25Lɨno mukalʉtiige kwilola ʉmuunu ʉvɨ alɨ ndeeti? Ʉmuunu ʉvɨ aswalile ɨmisabwa gya lʉtogo? Baako, avaanu aviswala ɨmisabwa gya lʉtogo, ikange valɨ ni siinu syoni isinonu, vitaama mu nyumba imbaha itsa kɨkʉlʉdeeva, navitaama kʉ lʉkɨnga! Ndawʉ jɨlɨwo? 26Lɨno, pwʉ mukalʉtiige kwilola ʉmuunu ʉvɨ alɨ ndeeti? Mukahʉʉvɨliige ʉkʉmbona ʉnyamalago? Mukagolwise! Ndikʉvavʉʉla ʉkʉta ʉYohana nanyamalago vʉvʉle, apeene ʉjwa vɨ mbaha ʉkʉlʉtɨɨlɨla pa nyamalago. 27Ʉjwa vɨ mwene ʉvɨ ʉVʉvɨge ʉVʉvalatse waavɨgilwe ndee ʉkʉkongana nʉ mwene,

‘Lola, ndikʉnsuungʼa ʉmbombi vango alongole paave,

ʉjwa vɨ mwene inotsaaga ɨnzɨla jyave.’#Malaki 3:1”

28ɄYɨɨsʉ akatsova ikange akata, “Ndikʉvavʉʉla ʉkʉta, kʉ vaanu vooni, nakʉli ʉvɨ ʉmwene imbaha ʉkʉlʉtɨɨlɨla kwa Yohana ʉMwotsi. Napeene ʉmuunu ʉvibedwa, mu Lʉdeeva lwa Ngʉlʉve, vɨ mbaha ʉkʉlʉtɨɨlɨla kwa Yohana.” 29(Pwʉ avaanu vooni paninie na vasangʉtsi va songo, ʉwʉ vaapʉliike amamenyu ga Yɨɨsʉ ʉkʉkongana nʉ Yohana, vakɨɨdɨka ʉkʉta imbombo tsa Ngʉlʉve ngolosu, manya avaanu avo wʉ vootsiiwe nʉ Yohana. 30Napeene, aVafalisayo na vamanyisi va ndagɨlo, navootsiwe nʉ Yohana ʉlwakʉva vaabeelile ʉgwʉ ʉNgʉlʉve aanogilwe kʉ veene.)

31ɄYɨɨsʉ akatsova ikange akata, “Ndɨvahwananie nɨ kɨki avaanu va kɨvʉmbʉkʉ ɨkɨ? Vihwanana nɨ kɨki? 32Vahwaniine na vaana ʉwʉ vikina pa kɨvanza, pwʉ vikʉvavʉʉla avajyavo viita,

‘Lola, twavatovye isiwɨɨwɨ sya lʉhekelo,

namwaneme!

Twavɨmbye ʉlwɨmbo lwa lʉsʉsʉvalo,

pange mulɨle!’

33“Ewo wʉ mulɨwo najyʉnyie! ɄYohana ʉMwotsi ʉpwʉ iitsile, naalitsage ɨmikate pange kʉnywa ɨdivai,#7:33 Naalitsage ɨmikate pange kʉnywa ɨdivai Ʉkʉtsova ewo kwʉ kʉta ʉYohana naalitsage ɨkyakʉlya ɨkyʉ avaanu vooni vaalitsaga isigono syoni. Ʉmwene ʉnsɨkɨ mwongosu ɨɨdɨndaga ʉkʉlya. Alɨkʉvomba ewo ndʉwʉ avanyamalago avange ava katale vaavombaga kʉ nongwa jya mbombo jya Ngʉlʉve. mukata, ‘Alɨ nɨ mepo ɨmbiivi.’ 34Napeene, ʉne ndɨ Mwana va Muunu nditsile, ndiilya nʉ kʉnywa ndʉwʉ vivomba avange, mwita, ‘Lola! Ʉjʉ nya mwojo ikange nʼgaatsi! Ikange immanyaani va vasangʉtsi va songo, na vatulanongwa!’ 35Ʉweene ʉvʉmanyi vuvoneka mu mbombo tsa vaanu va mwene.”

ɄYɨɨsʉ ikʉnsyɨkɨla ʉntulanongwa

36Ɨkɨgono kɨpamato ʉFalisayo ʉvɨ aatambʉlwagwa Simoni, aamwɨlangile ʉYɨɨsʉ ʉkʉta abɨhe kwilya kʉ mwene. Pwʉ ʉYɨɨsʉ akalʉta kʉ nyumba jya Falisayo ʉjwa, akataama pakʉta alye ɨkyakʉlya. 37Mu vʉtsenge vʉlya, aalemwo ʉnʼdala mpamato, ʉvɨ aamanyikiike ʉkʉta ntulanongwa. Ʉnʼdala ʉjwa, wʉ apʉliike ʉkʉta ʉYɨɨsʉ alɨ pa kʉlya mu nyumba jya Falisayo, akalʉta nɨ kɨtsupa kya mafuta ga kwɨbaka amanonu aga ndalama nyongosu. Ɨkɨtsupa ʉmwʉ gaale amafuta ago kyanotsiiwe ʉkʉhʉma ɨliganga lya alabasita.#7:37 Ɨliganga lya alabasita Ɨlɨ lyale liganga livalasu ɨlya kɨgelelo kya pakyanya kya ndalama. Amaganga ago gaahʉmaga kʉ kɨlʉnga kya Misili. 38Wʉ asiike, akɨɨma kʉnsana gwa Yɨɨsʉ, pawiipi ni silʉnde sya mwene. Akatengʉla ʉkʉlɨla, nʉ lwihotsi lwa mwene lʉkava ludonyolela mu silʉnde sya Yɨɨsʉ. Pwʉ alɨkʉpulusa isilʉnde sya Yɨɨsʉ ni nzwɨlɨ tsa mwene, kʉnʉ itsiba isilʉnde nʉ kʉbaka amafuta.

39ɄFalisayo ʉlya, wʉ alɨweene ɨlyo, akasaaga mu numbula jya mwene akata, “Ʉmuunu ʉjʉ akaale ave nyamalago lweli, ndalɨno alʉmanyile ʉkʉta, ʉnʼdala ʉvɨ ikʉmwabaasa muunu ʉvalɨ ndeeti. Akaale ikʉlʉmanya ʉkʉta muunu ntulanongwa.” 40Pwʉ ʉYɨɨsʉ akatsova akata, “Simoni, ndɨlɨ nɨ limenyu, ndinogwa ndɨkʉvʉʉle.” Namwene akata, “Ndipʉlɨhɨtsa iMmanyisi, imbʉʉle.”

Pwʉ ʉYɨɨsʉ akata, 41“Vaalekwo avaanu vavɨlɨ, ʉwʉ vaatsigilwagwa indalama nʉ muunu mpamato. Ʉjyʉnge aakopile idinali#7:41 Idinali Ʉvʉganulu wa limenyu dinali lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ɨmileevʉlʉ gɨhaano (500), ʉjyʉnge aakopile idinali isitsigo sihaano (50). 42Avaanu ava wʉ valemilwe ʉkʉhomba, ʉvɨ aavakopye akavasyɨkɨla. Lɨno! Mwavo ʉwʉ vaatsigilwagwa, vɨ alɨku jiikʉnʼgana siitso ʉmuunu ʉlya?” 43ɄSimoni akamwanda akata, “Ʉne ndisaaga ʉvɨ aansyɨkye nyongosu.” ɄYɨɨsʉ akata, “Ʉlamwe vʉnonu.”

44Baaho, ʉYɨɨsʉ akandola ʉnʼdala ʉlya, akambʉʉla ʉSimoni akata, “Ʉmbwene ʉnʼdala ʉjʉ? Ʉnsɨkɨ wʉ ndikwingila mwave ʉmʉ, nʉmiili amagasi ga kʉpugusa isilʉnde syane.#7:44 Amagasi ga kʉpugusa isilʉnde syane Kʉ Vayahudi, lwale lwiho ʉkʉvapa avahenza amagasi, wʉ navingiili mu nyumba, pakʉta vahetse ʉlʉsumbe evo ʉlʉdaba ʉlwaveetsaga mu silʉnde sya veene. Vaavombaga ndavʉle ʉlwakʉva ʉmwʉ vaagendaga mwaveetsaga nʉ lʉsumbe ʉnsɨkɨ gwa kɨtsʉva evo ʉlʉdaba ʉnsɨkɨ gwa kɨsuku. Lɨno, ʉjʉ ammugwise isilʉnde nʉ lwihotsi lwa mwene, nʉ kʉpulusa ni nzwɨlɨ tsa mwene. 45Ʉnsɨkɨ wʉ vukʉnsaamusa, nʉkansaamuse pa kɨpambaga. Lɨno ʉjʉ, ʉkʉhʉma ndikwingila ʉmʉ, nagatiili ʉkʉtsiba isilʉnde syango. 46Ikange, nʉkambake kʉ ntwe amafuta ga kwɨbaka,#7:46 Nʉkambake kʉ ntwe amafuta ga kwɨbaka Ʉkʉmʼbaka kʉ ntwe ʉmmenza amafuta ga kwɨbaka, lwale lwiho ʉlwavoniaga ʉlʉgano lwa kʉmwʉpɨlɨla ʉmmenza. ʉmwene ʉjʉ asibakile isilʉnde syango amafuta ga kwɨbaka amanonu ga ndalama nyongosu. 47Lɨno ndikʉkʉvʉʉla, ʉlʉgano lwa nʼdala ʉjʉ lʉvaha, ʉlwakʉva asyɨkɨliiwe imbiivi tsa mwene nyongosu. Ʉmuunu ʉvɨ asyɨkɨliiwe ʉvʉtulanongwa vʉdebe, ʉjwa iganaga padebe.” 48Pwʉ ʉYɨɨsʉ akambʉʉla ʉnʼdala ʉlya akata, “Ʉsyɨkɨliiwe ʉvʉtulanongwa waako.”

49Pwʉ avaanu avaalitsaga nʉ Yɨɨsʉ, vakatengʉla ʉkʉvʉʉtsania vakata, “Ʉjʉ vɨ veeni ʉkʉsyɨkɨla ʉvʉtulanongwa?” 50Baaho, ʉYɨɨsʉ akambʉʉla ikange ʉnʼdala ʉlya akata, “ɄNgʉlʉve akʉponiitse kʉ nzɨla jya lwɨdɨko lwako. Bɨhaga nʉ lʉnotsehetso!”

Currently Selected:

Luuka 7: zga

Highlight

Copy